Davidi wɛ-loro
28
Amʋ Tu Baŋa-Wɛ, amʋ wʋ́ keeri a loori nmʋ mʋ,n na yɩ amʋ dalɩm je tɩn ŋwaanɩ.
Nmʋ nan na maŋɩ da cɩmm,
amʋ dɩ balʋ na tɩga
yɩ ba wʋ tɩga kuri nɩ tɩn
wʋ́ taa yɩ bɩdwɩ mʋ.
2 Amʋ na magɩ a japoori a loori n yigə nɩ tɩn,
nan ləri a kərə kam.
Bɛŋwaanɩ a zǝŋi a jɩa mʋ wɛɛnɩ
a jeeri n digə je-ŋʋŋa jəgə
kalʋ na yɩ lanyɩranɩ fasɩ tɩn.
3 Yɩ pa a tɔgɩ dɩdaanɩ
pusɩŋ-nyɩna bam
dɩ balʋ na tʋŋɩ lwarɩm tɩn a je.
Nɔɔna bam kʋntʋ ŋɔɔnɩ ni-ywəm mʋ dɩ ba donnǝ,
yɩ ba ta yǝni ba bʋŋɩ lwarɩm tɩtʋŋa sɩ ba kɩ ba baŋa nɩ.
4 Nan joori n ŋwɩ ba kǝm-balwaarʋ jɩnɩ dɩm,
pa ba na cam dɩlʋ
na maŋɩ dɩ ba tɩn.
5 Bantʋ yigə tǝrǝ Baŋa-Wɛ na tʋŋɩ kʋlʋ maama tɩn wʋnɩ.
Ba maa vɩn DƖ tɩtʋŋ-ŋʋna yam.
Kʋntʋ ŋwaanɩ, DƖ lagɩ DƖ yigi-ba mʋ
DƖ dɩ tɩga nɩ,
sɩ ba daa yɩ joori ba zaŋɩ wɛɛnɩ.
6 Pa-na dɩ́ te Baŋa-Wɛ,
a na magɩ a japoori a loori DƖ yigə nɩ
yɩ DƖ ləri-nɩ tɩn ŋwaanɩ.
7 Baŋa-Wɛ mʋ yɩ amʋ zənnu.
DƖ ta yǝni DƖ cʋ-nɩ
sɩ cam yɩ yi-nɩ,
nɩ najara cɩ-kwaŋa na kwǝli nɔɔnʋ
najara wʋnɩ te tɩn.
Amʋ yɔɔrɩ a kɩ a wʋ-dɩdʋa dɩ DƖ,
pa a na dam.
A tiini a di ywəəni mʋ
a bɩcarɩ wʋnɩ,
yɩ a ta leeni le a ma kɩ DƖ le.
8 Baŋa-Wɛ mʋ yɩ DƖ nɔɔna bam zənnu.
DƖ maa yɩ dalɩm je
DƖ pa pɛ wʋlʋ DƖ na tiŋi tɩn
sɩ wʋntʋ wanɩ o dʋna bam o di.
9 Baŋa-Wɛ, joŋi n nɔɔna bam n yagɩ!
Kɩ balʋ na yɩ nmʋ nyɩm tɩn yu-yoŋo!
Nii ba baŋa nɩ maŋa maama
nɩ nayɩrʋ na nii o vara baŋa nɩ
yɩ o pəli-ba o jɩn nɩ te tɩn.