Amʋ tɩɩna wʋ Wɛ tee nɩ
Davidi dɛɛn panɩ ləŋə kantʋ.
27
Baŋa-Wɛ mʋ pa pooni tigi a yigə nɩ sɩ a taa veǝ.DƖ maa yɩ amʋ Vɩrnʋ.
Bɛ nan mʋ wʋ́ pa
sɩ fʋʋnɩ taa jɩgɩ-nɩ?
Baŋa-Wɛ maa jɩgɩ dam
yɩ DƖ cʋ a ŋwɩa kam.
Nɔɔn-nɔɔnʋ bá wanɩ o pa
sɩ a taa kwarɩ fʋʋnɩ.
2 Nɔn-balwaarʋ mʋ na maŋɩ ba ba
sɩ ba ja amʋ,
yɩ a dʋna bam na bʋŋɩ
sɩ ba cɔge-nɩ,
bantʋ wʋ́ seeri mʋ yɩ ba tʋ tɩga nɩ.
3 Amʋ dʋna bam zɩ na yɩ kɔgɔ kɔgɔ,
yɩ ba zaŋɩ sɩ ba zaŋɩ najara
amʋ baŋa nɩ,
amʋ bá taa kwarɩ fʋʋnɩ dɩ ba.
Amʋ ta wʋ́ taa jɩgɩ baarɩ mʋ.
4 Woŋo dɩdʋa mʋ a loori
Baŋa-Wɛ tee nɩ.
A tiini a lagɩ sɩ DƖ kɩ kʋntʋ DƖ pa-nɩ.
Kʋ maa yɩ sɩ DƖ pa-nɩ cwǝŋǝ
sɩ a taa zʋʋrɩ DƖ sɔŋɔ kʋm nɩ
maŋa maama,
sɩ kʋ taa nii a ŋwɩa kam sisəm.
Dáanɩ mʋ amʋ wʋ́ taa nii
a naɩ Baŋa-Wɛ lam dɩm,
yɩ a war‑DƖ DƖ tɩtɩ di-ŋʋŋa kʋm nɩ.
5 Cam na tu amʋ baŋa,
Baŋa-Wɛ wʋ́ taa cʋ-nɩ
DƖ woro kʋm nɩ.
DƖ maa wʋ́ pa a səgi
DƖ sɔŋɔ kʋm nɩ,
yɩ DƖ pa a zɩgɩ dɩ dam
piu baŋa nɩ.
6 Amʋ dʋna bam na gilimi-nɩ,
Wɛ wʋ́ zǝŋi a yuu mʋ
yɩ a di dam ba baŋa nɩ.
Baŋa-Wɛ digə kam nɩ mʋ
amʋ wʋ́ kɩ kaanɩm a pa‑DƖ,
yɩ a ta wʋpolo taanɩ
dɩ kwǝr-dɩa.
A ta wʋ́ leeni mʋ a maa tee‑DƖ.
7 Amʋ Tu Baŋa-Wɛ, a na loori‑m,
popo duri amʋ ŋwaŋa
sɩ n sɛ a wara yam.
8 Amʋ bɩcarɩ ta dɩ brɩ-nɩ
sɩ a ba nmʋ te a warɩ‑m.
Amʋ Tu Baŋa-Wɛ,
amʋ wʋ́ sɩɩnɩ a fʋfɔ a twɛ nmʋ.
9 Kʋntʋ tɩn, yɩ səgi n yibiyə
amʋ tee nɩ.
Amʋ Tu Wɛ,
nmʋ mʋ yɩ amʋ zənnu.
Nan yɩ vɩn n tɩntʋŋnʋ wʋm
n banɩ na zaŋɩ tɩn ŋwaanɩ.
Nmʋ na yɩ amʋ Vɩrnʋ tɩn,
yɩ ma n kwaga n ya amʋ.
10 A ko dɩ a nu na maŋɩ
ba vɩ-nɩ ba yagɩ dɩ,
Baŋa-Wɛ mʋ wʋ́ kɩ-nɩ
DƖ ja-kukoro nɩ.a
11 Amʋ Tu Baŋa-Wɛ,
brɩ-nɩ cwǝŋǝ sɩ a taa tɔga.
Da amʋ yigə sɩ a taa ve
cɩga cwǝŋǝ kam nɩ,
sɩ a dʋna bam yɩ wanɩ amʋ ba ja.
12 Yɩ sɛ sɩ a tʋ a dʋna bam jɩŋa nɩ.
Ba bʋŋɩ sɩ ba fɔ vwan mʋ
ba daŋɩ a yuu nɩ,
yɩ ba kaagɩ ba lagɩ
sɩ ba kɩ-nɩ zʋnnɩ.
13 Dɩ kʋntʋ maama dɩ,
amʋ jɩgɩ cɩga a wɩ:
a ta na ŋwɩ tɩga baŋa nɩ tɩn,
amʋ wʋ́ na Baŋa-Wɛ na lana te tɩn.
14 Pɩɩnɩ n tɩtɩ sɩ n ta n jɩgɩ tɩɩna
dɩ Baŋa-Wɛ!
Ta n cʋ n tɩtɩ dɩ baarɩ!
Ɛɛn, pa n tɩɩna taa wʋ
Baŋa-Wɛ tee nɩ!