Wʋlʋ na jɩgɩ bʋra tɩn wɛ-loro
Davidi dɛɛn panɩ ləŋə kantʋ.
26
Amʋ Tu Baŋa-Wɛ,pa a na a bʋra!
Bɛŋwaanɩ, amʋ yɔɔrɩ a tɔgɩ cwǝŋǝ mʋ a ŋwɩa maama wʋnɩ.
A ta ma kɩ a wʋ-dɩdʋa dɩ nmʋ
yɩ bʋbwɛa tǝrǝ.a
2 Baŋa-Wɛ, makɩ-nɩ n nii,
sɩ n maanɩ a wʋbʋŋa dɩ a bɩcarɩ maama na yɩ te tɩn.
3 Bɛŋwaanɩ, amʋ yǝni a guli
nmʋ na yɔɔrɩ n jɩgɩ a sono
te tɩn gulə.
Amʋ ta tɔgɩ nmʋ na jɩgɩ cɩga
dɩ amʋ te tɩn a ŋwɩa wʋnɩ.
4 A ba mɩ dɩ vwa-fɔra.
A maa ba tɔgɩ
dɩdaanɩ pipiri-nyɩna.
5 A culi balʋ na jeeri daanɩ
sɩ ba tʋŋɩ lwarɩm tɩn,
yɩ a daarɩ a vanɩ pusɩŋ-nyɩna.
6 Baŋa-Wɛ, amʋ sanɩ a jɩa mʋ,
sɩ kʋ brɩ nɩ a jɩgɩ bʋra.
A maa wʋ́ kaagɩ nmʋ kaanɩm bimbim dɩm
n yɩrɩ zulə ŋwaanɩ
7 yɩ a leeni a zuli‑m
a daarɩ a ta nmʋ tɩtʋŋ-kamunə yam taanɩ jaja.
8 Baŋa-Wɛ, amʋ tiini a soe
nmʋ digə kam
mɛ n na zʋʋrɩ tɩn.
Kʋ maa yɩ jǝgǝ kalʋ n paarɩ-zulǝ kʋm na brɩ jaja tɩn.
9 Yɩ pa a tɔgɩ dɩ lwarɩm-kərə
a ga a ŋwɩa.
Ta yɩ pa a ŋwɩa ti,
nɩnɛɛnɩ kʋ na kɩ nɔn-gʋra te tɩn.
10 Bantʋ yɩ kampin-nyɩna mʋ
yɩ ba jɩn sɩm soe pu-sɩŋa kənə.
11 Kʋ nan na yɩ amʋ,
a yɔɔrɩ a tɔgɩ cwǝŋǝ mʋ
a ŋwɩa maama wʋnɩ.
Kʋntʋ tɩn, duri a ŋwaŋa,
sɩ n daarɩ n joŋi-nɩ n yagɩ.
12 Amʋ laan nan zɩgɩ mʋ cɛpɩ,
tɩga kalʋ na maɩ daanɩ tɩn baŋa nɩ.
Baŋa-Wɛ nɔn-kɔgɔ kʋm na jeeri daanɩ,
amʋ wʋ́ tee-DƖ ba tɩtarɩ nɩ.