Can-kamunu maŋa wɛ-loro
Davidi dɛɛn panɩ ləŋə kantʋ.
25
Baŋa-Wɛ, nmʋ mʋa kwe a tɩtɩ a pa‑m.
2 Amʋ Tu Wɛ, a kɩ a wʋ-dɩdʋa
dɩdaanɩ nmʋ.
Yɩ pa cavɩɩra di-nɩ.
Nan yɩ sɛ sɩ a dʋna bam
taa jɩgɩ-nɩ ba mwana.
3 Balʋ tɩɩna na daŋɩ
nmʋ baŋa nɩ tɩn maama
bá na ba cavɩɩra.
Balʋ nan na ganɩ ba donnǝ
yɔɔ yɔɔ tɩn
wʋ́ yɔɔrɩ ba di cavɩɩra mʋ.
4 Amʋ Tu Baŋa-Wɛ,
pa a lwarɩ nmʋ cwe sɩm,
sɩ a taa tɔgɩ n zaasɩm yam a ŋwɩa wʋnɩ.
5 Brɩ-nɩ nmʋ cɩga kam,
sɩ a wanɩ a tɔgɩ ka cwe sɩm.
Bɛŋwaanɩ nmʋ mʋ yɩ
amʋ Vɩrnʋ Wɛ dɩm.
Amʋ tɩɩna maa wʋ nmʋ tee nɩ mʋ
dɛ dɩm maama wʋnɩ.
6 Baŋa-Wɛ, yɩ swe n sono kʋm ni nɩ,
dɩ n na tiini n jɩgɩ nɔɔna ŋwaŋa te tɩn.
Nmʋ sono kʋm dɩ n yibwənə
maŋɩ tɩ wʋra sɩ kʋ nuŋi faŋa mʋ.
7 Kʋ na yɩ a na lɔgɩ nmʋ kwaga nɩ
yɩ a kɩ lwarɩm yalʋ
a nɔn-dʋnnɩ maŋa nɩ tɩn,
sɩ n kwe-ya n ma n cɛ-nɩ.
Baŋa-Wɛ, nan tɔgɩ n sono kʋm ŋwaanɩ
n pa n yigə taa wʋ amʋ wʋnɩ,
nmʋ na jɩgɩ lam tɩn ŋwaanɩ.
8 Baŋa-Wɛ lamma mʋ
yɩ DƖ yɔɔrɩ DƖ kɩ cɩga.
Kʋ na yɩ balʋ na cɔgɩ tɩn,
DƖ yǝni DƖ brɩ-ba cwǝŋǝ kalʋ na yɩ cɩga cɩga tɩn.
9 DƖ maa tɔgɩ balʋ na tu ba tɩtɩ tɩn yigə,
sɩ ba taa kɩ kʋlʋ na maŋɩ tɩn mʋ,
yɩ DƖ daarɩ DƖ brɩ-ba DƖ cwǝŋǝ kam.
10 Cwe sɩlʋ maama Baŋa-Wɛ
na tɔgɩ tɩn
yɩ DƖ sono kʋm ŋwaanɩ mʋ.
O maa kɩ o cɩga dɩdaanɩ balʋ
na sɛ ba tɔgɩ ni dɩlʋ
o na goni dɩ ba tɩn.
11 Amʋ Tu Baŋa-Wɛ,
nan da n yɩrɩ dɩm ŋwaanɩ
n kwe a kǝm-balwaarʋ
n yagɩ n ma n cɛ-nɩ,
dɩ tɩ na maŋɩ tɩ daga te maama.a
12 Kʋ na yɩ wʋlʋ maama
na kwarɩ Baŋa-Wɛ tɩn,
Wɛ wʋ́ brɩ kʋ tu sɩ o taa tɔgɩ cwǝŋǝ kalʋ na maŋɩ tɩn mʋ.
13 Wɛ ta wʋ́ pa o di ywəəni
o ŋwɩa wʋnɩ.
O dwi dɩm dɩ wʋ́ joŋi tɩga kam
ba taa te.
14 Baŋa-Wɛ yǝni DƖ lɔ DƖ wʋ
DƖ brɩ balʋ na kwarɩ-DƖ tɩn.
DƖ maa paɩ ba lwarɩ DƖ ni-gonim dɩm na brɩ te maama.
15 Amʋ yǝni a kwǝni a nii
Baŋa-Wɛ seeni mʋ,
sɩ DƖ ba DƖ wǝli-nɩ.
Wʋntʋ yɩranɩ mʋ wʋ́ wanɩ
DƖ lɩ-nɩ a dʋna jɩŋa nɩ,
sɩ a lu ba cɩkʋ kʋm wʋnɩ.
16 Amʋ Tu Baŋa-Wɛ,
pa n yigə taa wʋ amʋ wʋnɩ,
sɩ n daarɩ n duri amʋ ŋwaŋa,
a na yɩ a yɩranɩ yɩ kʋ tiini
kʋ ni-nɩ tɩn ŋwaanɩ.
17 A can-nɛɛrɩ dɩm laan tiini
dɩ zʋ-nɩ.
Popo, joŋi-nɩ n yagɩ
ya maama wʋnɩ.
18 Nan nii amʋ zʋnnɩ dɩm dɩ a can-nɛɛrɩ dɩm na daga te tɩn,
sɩ n laan kwe a lwarɩm yam maama n ma n cɛ-nɩ.
19 Nii amʋ dʋna bam laan
na puli zanzan te tɩn.
Ba maa tiini ba culi-nɩ
dɩdaanɩ pu-sɩŋa.
20 Amʋ nan tu sɩ a dalɩ
nmʋ woro nɩ mʋ.
Ta n cʋ a ŋwɩa sɩ a na vrɩm,
pa a yɩ di a cavɩɩra.
21 A kwe a tɩɩna a daŋɩ nmʋ baŋa nɩ.
Nan ta n yɩrɩ-nɩ,
dɩ a na yɔɔrɩ a tɔgɩ cwǝŋǝ
yɩ a jɩgɩ cɩga te tɩn.
22 Amʋ Tu Wɛ,
joŋi Yisɩrayɛlɩ tiinə bam n yagɩ,
sɩ ba nuŋi ba cam maama wʋnɩ.