Ləŋ-ŋwɩ 14

N bá wanɩ n gooni Baŋa-Wɛ

Davidi dɛɛn panɩ ləŋə kantʋ.

Nɔn-jwəəru yǝni ba ta

ba bɩcarɩ nɩ ba wɩ: «Wɛ tǝrǝ.»

Ba maama cɔgɩ mʋ ga fasɩ,

ba tɩtʋŋa dɩ maa tiini ya ba lana.

Nɔɔn-nɔɔnʋ tǝrǝ ba wʋnɩ

kʋ tu na tɔgɩ cwə-laa.

2 Baŋa-Wɛ maa zɩgɩ DƖ wɛyuu

sɔŋɔ kʋm nɩ

DƖ tiiri DƖ nii nabiinǝ,

sɩ DƖ lwarɩ ba wʋlʋ jɩgɩ swan

yɩ o tɔgɩ Wɛ na?

3 Ba maama ywəri Wɛ cwǝŋǝ wʋnɩ,

yɩ ba wʋbʋŋa yɔɔrɩ ya cɔgɩ mʋ

ga fasɩ.

Nɔɔn-nɔɔnʋ nan tǝrǝ ba wʋnɩ

o na tɔgɩ cwə-ŋʋŋa,

dɩ dɩdʋa dɩ.

4 Kəm-balwaarʋ tiinə maama bá sɛ

sɩ ba zaasɩ swan na?

Ba jɩgɩ a nɔɔna bam mʋ ba cɔga,

nɩnɛɛnɩ kʋ yɩ wʋdiu mʋ ba di.

Ba nan ba bəŋi Baŋa-Wɛ yɩrɩ

ba zuli‑DƖ.

5 Nii-ba mʋ! Fʋʋnɩ tiini dɩ jegɩ-ba,

bɛŋwaanɩ Wɛ zǝni balʋ

na zɩgɩ cɩga wʋnɩ tɩn mʋ.

6 Abam kəm-balwaarʋ tiinə bam kwaanɩ

sɩ cavɩɩra mʋ ja yinigə tiinə,

sɩ ba wʋbʋŋa yɩ jǝni.

Baŋa-Wɛ nan mʋ kɩ DƖ woro kʋm

sɩ bantʋ zʋ kʋ wʋnɩ ba səgi da.

7 Amʋ nan wʋ́ loori Wɛ

sɩ DƖ zɩgɩ Siyɔn nɩ

DƖ ba DƖ vrɩ Yisɩrayɛlɩ tiinə bam.

Baŋa-Wɛ na sɩɩnɩ DƖ pa DƖ nɔɔna bam joori ba zɩgɩ dɩ dam,

Yisɩrayɛlɩ dwi dɩm

na yɩ Zakɔbɩ dwi dɩm tɩn

wʋ́ taa caka dɩ wʋpolo!