Davidi wɛ-loro
12
Baŋa-Wɛ,zaŋɩ n zǝni dɩbam!
Bɛŋwaanɩ, balʋ na sɛ Wɛ tɩn daa tǝrǝ.
Balʋ na jɩgɩ cɩga dɩ Wɛ tɩn
laan je mʋ nabiinǝ tɩtarɩ nɩ.
2 Nɔɔna maama fɔɩ vwan mʋ
ba cɔgɩ ba donnǝ yigə.
Ba maa jɩgɩ ni-sʋnɩ
ba maɩ ba ganɩ daanɩ.
3 Baŋa-Wɛ, kʋ na yɩ balʋ
na jɩgɩ ni-sʋnɩ tɩn,
sɩ n pu ba niə!
Kʋ ta wǝli dɩ balʋ na brɩ ba tɩtɩ kamunni yɩ ba wɩ:
4 «Dɩbam ni-taanɩ mʋ paɩ
dɩ́ wanɩ nɔɔna maama dɩ́ di.
Dɩ́ wʋ́ taa ŋɔɔnɩ dɩ́ na lagɩ te tɩn mʋ,
yɩ nɔɔn-nɔɔnʋ bá wanɩ dɩbam
o cəŋi.»
5 Baŋa-Wɛ ma ta DƖ wɩ:
«Amʋ laan wʋ́ zaŋɩ wɛɛnɩ
a tʋŋɩ woŋo,
yinigə tiinə na nɛ bɛɛsɩm
yɩ nabwənə suuri cam wʋnɩ tɩn ŋwaanɩ.
Amʋ wʋ́ vrɩ-ba cam wʋnɩ
sɩ ba na siun,
nɩ kʋ na maŋɩ dɩ ba te tɩn.»a
6 Baŋa-Wɛ ni-taanɩ dɩm yɔɔrɩ
dɩ yɩ cɩga mʋ.
Dɩ tiini dɩ lana jasɩ nɩnɛɛnɩ
səbu tɩlʋ na tiini tɩ kwɛ tɩn.
Dɩ nyɩ dɩ ba na kɩ səbu
mim wʋnɩ kuni bɩrpɛ
pa digru daa tǝrǝ tɩn mʋ.
7 Baŋa-Wɛ, nmʋ wʋ́ yɩrɩ nabwənə
sɩ kʋlʋkʋlʋ yɩ yi-ba.
Nmʋ ta wʋ́ ta n cʋ dɩbam maŋa maama
dɩ nɔn-balwaarʋ tɩm kənə.
8 Pusɩŋ-nyɩna bam kaagɩ mʋ
ba brɩ ba tɩtɩ.
Nɔɔna maama maa zuli balʋ na tʋŋɩ lwarɩm nabiinǝ tɩtarɩ nɩ tɩn.