Wɛ-loro
10
Amʋ Tu Baŋa-Wɛ,bɛɛ mʋ kɩ yɩ n wʋ yigə yigə amʋ tee nɩ?
Bɛŋwaanɩ mʋ cam yi amʋ
yɩ n laan səgi n tɩtɩ?
2 Nɔɔn-balwaarʋ brɩ ba tɩtɩ kamunni
yɩ ba zəli nabwənə sɩ ba ja.
Ba maa tɔgɩ ba wʋbʋŋ-lwaanʋ tɩm baŋa nɩ mʋ
ba jaanɩ-ba.
3 Nɔɔn-balwaarʋ yǝni ba zǝŋi ba tɩtɩ mʋ
dɩ ba fra na zʋ wǝǝnu tɩlʋ tɩn.
Ba maa zuli kampin-nyɩna,
yɩ ba daarɩ ba lwɛ Baŋa-Wɛ.
4 Nɔɔn-balwaarʋ bam yigə tǝrǝ
dɩdaanɩ Wɛ,
ba na jɩgɩ tɩɩra tɩn ŋwaanɩ.
Ba maa bʋŋɩ nɩ: «Wɛ tǝrǝ.»
5 Dɩ kʋ dɩ, ba wǝǝnu maama
kɩ lanyɩranɩ.
Ba maa warɩ sɩ ba ni
nmʋ zaasɩm dɩm kuri,
yɩ ba jɩgɩ ba dʋna bam
ba goonə.
6 Ba maa bʋŋɩ ba wɩ:
«Dɩ́ bá fɔgɩ dɩ́ gɔ naga.
Dɩ́ bá fɔgɩ dɩ́ zʋ cam wʋnɩ maŋa dɩ maŋa!»
7 Ba yǝni ba sɔɔlɩ lwarɩm yɩranɩ mʋ.
Ba maa fɔ vwan yɩ ba fugi nɔɔna.
Ba tiini ba soe nakɔɔrɩ
dɩ pu-sɩŋa ŋwaŋa mʋ.
8 Ba yǝni ba səgi tɩ-balwa bam nɩ
sɩ ba nuŋi ba zi
balʋ na tɔgɩ-da ba kɛ tɩn.
Ba yiǝ sɩɩnɩ dɩ balʋ na ve yalɩm tɩn,
yɩ ba zaŋɩ ba baŋa nɩ ba gʋ-ba.
9 Ba maa səgi gugwəəru wʋnɩ
nɩ nywəənu mʋ te,
sɩ ba dalɩ ba zi
balʋ na yǝri kʋ ni nɩ tɩn.
Ba tɔgɩ kʋntʋ doŋ
ba jaanɩ nabwənə,
yɩ ba daarɩ ba tuuri-ba ba kɛa,
nɩ ba wʋ cɩgɩrʋ wʋnɩ mʋ te.
10 Ba maa jujugi balʋ ba na jaanɩ tɩn
pa ba bəri,
yɩ ba dam dɩm yɔɔrɩ dɩ wanɩ-ba.
11 Ba maa bʋŋɩ ba wɩ: «Wɛ yigə tǝrǝ!
DƖ kwǝli o yibiyə mʋ yɩ DƖ ba naɩ.»
12 Baŋa-Wɛ, zaŋɩ wɛɛnɩ!
Kwe n jɩŋa n ma n yaarɩ
nɔn-balwaarʋ bam,
sɩ n daarɩ n zǝni nabwənə.
13 Bɛɛ mʋ yɩ nɔn-balwaarʋ soe
sɩ ba taa lwɛ Wɛ kʋntʋ?
Bɛɛ mʋ yɩ ba ta ba tɩtɩ nɩ wɩ:
«Wɛ nan bá bwe amʋ»?
14 Sɩ kʋ na yɩ nmʋ, a Tu Wɛ,
nmʋ yɔɔrɩ n naɩ ba na tʋŋɩ cam
dɩ nakɔɔrɩ kənə yalʋ tɩn.
Nmʋ yǝni n jeeli
ba kǝm-balwaarʋ tɩm,
yɩ n daarɩ n vaŋɩ ba zwa.
Kʋ na yɩ balʋ ba na jɩgɩ ba bɛɛsɩ tɩn,
bantʋ salɩ nmʋ yɩra nɩ,
nmʋ na yɩ wʋlʋ na zǝni bɩtara tɩn ŋwaanɩ.
15 Nan cɔgɩ pusɩŋ-nyɩna
dɩ nɔn-balwaarʋ dam.
Bwe-ba ba kǝm-balwaarʋ tɩm ŋwaanɩ,
sɩ ba tɩtʋŋa maama yagɩ.
16 Baŋa-Wɛ mʋ di paarɩ
sɩ kʋ taa ve maŋa kalʋ na ba ti tɩn!
Dwi-gɛ tiinə bam maŋɩ sɩ ba je mʋ
Wɛ tɩtɩ tɩga kam wʋnɩ.
17 Amʋ Tu Baŋa-Wɛ,
nmʋ yǝni n cəgi
nabwənə na loori‑m te tɩn.
Nmʋ kɩ dam n kɩ ba kuri nɩ,
dɩ n na cəgi ba kərə te tɩn.
18 N zɩgɩ bɩtara dɩ balʋ na nɛ bɛɛsɩm tɩn kwaga nɩ,
sɩ nabiinu wʋlʋ maama na wʋ lʋgʋ baŋa nɩ tɩn daa yɩ fugi-ba.