Le kǝm ləŋə
Davidi dɛɛn panɩ ləŋə kantʋ.
9
Baŋa-Wɛ, amʋ wʋ́ tee nmʋdɩ a wʋ maama.
A ta wʋ́ ŋɔɔnɩ
nmʋ wo-kɩnkagɩla yam taanɩ
a brɩ nɔɔna.
2 Yuutu Baŋa-Wɛ,
amʋ wʋ́ pa a wʋ poli,
yɩ a daarɩ a di ywəəni nmʋ ŋwaanɩ.
A ta wʋ́ leeni mʋ
a zǝŋi n yɩrɩ wɛɛnɩ.
3 Nmʋ na zaŋɩ a dʋna baŋa nɩ,
baá pipiri mʋ ba duri ba kɛ.
Ba ma tri ba tʋ tɩga nɩ,
yɩ ba daarɩ ba je.
4 Bɛŋwaanɩ, nmʋ na di nɔɔna taanɩ,
n yɔɔrɩ n paɩ cɩga bʋra mʋ.
Nmʋ sɩɩnɩ n bʋrɩ amʋ bʋra
n pa a jɩgɩ a cɩga.
5 Nmʋ yɔɔrɩ n fugi dwi-gɛ tiinə bam,
yɩ n daarɩ n cɔgɩ
nɔn-balwaarʋ bam.
N yagɩ ba yɩrɩ mʋ
sɩ nɔɔna daa yɩ guli ba gulə
maŋa maama.
6 Cɔgɩm mʋ tu dɩ́ dʋna baŋa nɩ,
Ba tɩɩnɩ dɩm ma ji di-dwəənu
sɩ kʋ taa ve maŋa kalʋ na ba ti tɩn,
pa nɔɔna yɔɔrɩ ba swe dɩ ni nɩ.
7 Baŋa-Wɛ nan jɩgɩ DƖ paarɩ mʋ
sɩ kʋ taa ve maŋa kalʋ na ba ti tɩn.
DƖ maa je sɩ DƖ di nɔɔna taanɩ.
8 Wɛ wʋ́ tɔgɩ DƖ cɩga kam baŋa nɩ
DƖ di nabiinǝ maama taanɩ.
DƖ wʋ́ taa te lʋgʋ baŋa dwi tiinə
kʋ cwǝŋǝ nɩ mʋ.
9 Kʋ na yɩ balʋ na nɛ bɛɛsɩm tɩn,
Baŋa-Wɛ yɩ dalɩm je mʋ DƖ pa-ba.
Cam na yi-ba, DƖ maa yɩ ba dam je,
sɩ ba səgi DƖ woro kʋm wʋnɩ.a
10 Balʋ na kwarɩ nmʋ yɩrɩ tɩn wʋ́ kɩ
ba wʋ-dɩdʋa dɩdaanɩ nmʋ.
Bɛŋwaanɩ, kʋ na yɩ balʋ na kwaanɩ
sɩ ba fʋfɔ ba twɛ nmʋ tɩn,
nmʋ Baŋa-Wɛ ta wʋ fɔgɩ n nuŋi
ba kwaga nɩ n daarɩ-ba.
11 Leeni-na á tee Baŋa-Wɛ,
sɩ DƖ di paarɩ mʋ Siyɔn nɩ!
Taá taɩ o na kɩ te maama tɩn
á brɩ lʋgʋ baŋa dwi tiinə bam.
12 Wɛ yɩ dɩlʋ na joori DƖ ŋwɩ
nɔn-gʋra jɩnɩ tɩn mʋ.
Kʋ na yɩ balʋ na wʋ cam wʋnɩ tɩn,
DƖ bá fɔgɩ DƖ vɩn ba kərə
kalʋ na loori-DƖ tɩn.
13 Amʋ Tu Baŋa-Wɛ,
nan duri amʋ ŋwaŋa!
Nii amʋ dʋna bam na daanɩ-nɩ
pa a yaarɩ te!
Nmʋ yɩ wʋlʋ na wʋ́ wanɩ n cɩ tʋʋnɩ sɩ dɩ yɩ ja-nɩ tɩn mʋ.
14 Kʋntʋ tɩn, amʋ wʋ́ zɩgɩ
Siyɔn tɩʋ pooni nɩ
a zuli nmʋ yɩrɩ jaja.
Amʋ wʋ́ taa caka mʋ dɩ wʋpolo,
dɩ nmʋ na joŋi-nɩ n yagɩ tɩn ŋwaanɩ.
15 Dwi-gɛ tiinə bam ve ba tʋ goŋo kʋlʋ ba na kʋgɩ tɩn wʋnɩ.
Cɩkʋ kʋlʋ ba na tiŋi tɩn mʋ joori kʋ ja-ba.
16 Baŋa-Wɛ vɩɩrɩ DƖ tɩtɩ
sɩ kʋ tɔgɩ dɩ DƖ cɩga sarɩya yam mʋ.
Nɔɔn-balwaarʋ bam nan na tʋŋɩ lwarɩm dɩlʋ tɩn
joori dɩ jaanɩ-ba nɩ cɩkʋ tɩn.
17 Nɔɔn-balwaarʋ tɩm wʋ́ vu
ba zʋ curu nɩ,
dɩdaanɩ dwi tiinə balʋ maama
na vɩn Wɛ tɩn.
18 Kʋ nan na yɩ nabwənə,
nɔɔna daa bá swe ba ni nɩ taa.
Balʋ dɩ na wʋ cam wʋnɩ tɩn
tɩɩna bá fɔgɩ ya ti.
19 Amʋ Tu Baŋa-Wɛ, zaŋɩ wɛɛnɩ!
Yɩ pa nabiinǝ cwǝŋǝ sɩ ba vɩn nmʋ.
Ja lʋgʋ baŋa dwi tiinə bam
n zɩgɩ n yigə nɩ
sɩ n laan di ba taanɩ.
20 Baŋa-Wɛ, pa fʋʋnɩ yɔɔrɩ dɩ zʋ-ba,
sɩ ba lwarɩ nɩ ba yɩ nabiinǝ mʋ
yɩ ba dam wʋ yi nmʋ dam dɩm.