Baŋa-Wɛ yɩrɩ jɩgɩ zulə
Davidi dɛɛn panɩ ləŋə kantʋ.
8
Baŋa-Wɛ, nmʋ yɩ dɩbam Yuutu.Nmʋ yɩrɩ dɩm jɩgɩ zulə zanzan
lʋgʋ baŋa je maama wʋnɩ.
Nmʋ pɛ n nɩnwaŋa taa naɩ jaja mʋ
wɛyuu jǝgǝ maama nɩ.
2 Nmʋ pɛ biə tɩtɩ dɩ bu-sɩsɩn mʋ taa te nmʋ yɩrɩ.a
Nmʋ jɩgɩ dam sɩ n cəŋi
n dʋna maama
pa ba zɩgɩ da cɩmm.
Balʋ maama na lɔgɩ nmʋ kwaga nɩ tɩn mʋ jaanɩ ba niə.
3 Amʋ yǝni a nii wɛyuu kʋm,
dɩ kʋ na yɩ kʋlʋ
nmʋ tɩtɩ jɩa na naanɩ tɩn,
yɩ a daarɩ a nii cana kam
dɩ calɩcwɩ sɩm,
nmʋ na kwe-sɩ n zɩgɩ sɩ je nɩ tɩn.
Amʋ na nɛ tɩn, a bʋŋɩ a wɩ:
4 «Kʋ na yɩ nabiinǝ,
bɛɛ mʋ yɩ n jɩgɩ ba wʋbʋŋa?
Bɛɛ mʋ kɩ yɩ n yigə wʋ
nabiin-biə wʋnɩ kʋntʋ?»b
5 Nmʋ nan pɛ nabiinǝ
tiini ba jɩgɩ paarɩ,
yɩ n ta pa-ba zulə,
pa ba dam muri
nmʋc nyɩm dɩm fɩnfɩɩn mʋ.
6 N ma n daarɩ n pa ba te
wǝǝnu tɩlʋ maama n jɩa na kɩ tɩn,
sɩ wǝǝnu maama taa wʋ
ba dam kuri nɩ.d
7 Kʋ na yɩ peeni, dɩ bʋnɩ, dɩ naanɩ,
dɩ ga-vara bam maama dɩ,
8 kʋ wǝli dɩ zunə, dɩ kale,
dɩdaanɩ wǝǝnu tɩlʋ maama
na wʋ nanɩɩrʋ wʋnɩ tɩn,
tɩ maama wʋ nabiinǝ
dam kuri nɩ mʋ.
9 Baŋa-Wɛ, nmʋ yɩ dɩbam Yuutu.
Nmʋ yɩrɩ dɩm jɩgɩ zulə zanzan
lʋgʋ baŋa maama wʋnɩ.