Baŋa-Wɛ yɔɔrɩ DƖ kɩ cɩga mʋ
Davidi dɛɛn panɩ ləŋə kantʋ Bɛnzamɛn tu Kusi ŋwaanɩ.
7
Amʋ Tu Baŋa-Wɛ, a kwe a tɩtɩ mʋa səgi nmʋ woro wʋnɩ.
Nan joŋi-nɩ n yagɩ
balʋ na zəli amʋ sɩ ba ja tɩn jɩŋa nɩ.
2 Kʋ na daɩ kʋntʋ, baá yɔɔrɩ
ba ja-nɩ mʋ ba tʋrɩ
nɩnɛɛnɩ nywəənu na kɩ te,
yɩ nɔɔn-nɔɔnʋ tǝrǝ
sɩ kʋ tu joŋi-nɩ o yagɩ.
3 Amʋ Tu Baŋa-Wɛ,
amʋ na cɔgɩ te maama,
yɩ kǝm-balɔrɔ na wʋ a yuu nɩ,
4 naa a na tʋŋɩ a cɔgɩ
a ciloŋ yigə,
naa a zǝni o dʋnʋ wʋlʋ
na daan‑o tɩn,
5 sɩ nmʋ laan pa cwǝŋǝ
sɩ a dʋna bam zəli-nɩ ba ja.
Pa ba nɔnɩ amʋ baŋa nɩ
ba sɩ tɩga nɩ,
sɩ a ŋwɩa laan ti
yɩ a maŋɩ tɩga kam nɩ.
6 Baŋa-Wɛ, zaŋɩ wɛɛnɩ dɩ ban-zɔŋɔ!
Zaŋɩ n cɩ a dʋna bam
dɩ ba ban-lʋm dɩm!
Zaŋɩ ba baŋa nɩ sɩ n pa
n cɩga kam taa zɩga.
7 Nan la lʋgʋ baŋa dwi tiinə bam
sɩ ba gilimi nmʋ yigə nɩ.
Diini baŋa baŋa n ta n te-ba.
8 Baŋa-Wɛ lagɩ DƖ di
dwi tiinə bam maama taanɩ.
Amʋ Tu Baŋa-Wɛ, nan da
amʋ nɔn-ŋʋnnɩ dɩm ŋwaanɩ
n bʋrɩ amʋ bʋra.
Kɩ kʋntʋ Yuutu Baŋa-Wɛ,
amʋ na jɩgɩ cɩga tɩn ŋwaanɩ.
9 Nmʋ yɩ wʋlʋ na yɩ cɩga tu
yɩ n maasɩ nɔɔna bɩcara
dɩ ba wʋbʋŋa n nii tɩn.
Nan cəŋi nɔn-balwaarʋ bam
dɩ ba nakɔɔrɩ kənə yam,
sɩ n daarɩ n pa nɔn-ŋʋna taa zɩga.
10 Yuutu Baŋa-Wɛ yǝni DƖ cʋ-nɩ
nɩ najara cɩ-kwaŋa na kwǝli nɔɔna
najara wʋnɩ te tɩn mʋ.
DƖ maa vrɩ balʋ na yɔɔrɩ cwə-laa wʋnɩ tɩn mʋ DƖ yaga.
11 Wɛ yɩ dɩlʋ na bʋrɩ cɩga bʋra tɩn mʋ.a
Dɛ maama wuu DƖ yǝni DƖ bwɛ
balʋ na tʋŋɩ lwarɩm tɩn.
12 Bantʋ na wʋ ləri ba wʋbʋŋa,
Wɛ wʋ́ dwəri DƖ sʋ-lɔŋɔ ni mʋ,
yɩ DƖ daarɩ DƖ saŋɩ DƖ taŋa kam lanyɩranɩ.
13 DƖ najara zɩla yam maŋɩ ya kwɛ.
DƖ cɩna yam sɩlɩ mʋ dɩ vɩan ya pɔɩ.
14 Nii-na! Nɔɔn-balwaarʋ yǝni ba ja
canɛɛrɩ pugə mʋ.
Ba laan maa vri lwarɩm pugə,
yɩ ba daarɩ ba lʋrɩ vwan yɩranɩ.
15 Bantʋ yǝni ba kʋ gwəənu mʋ,
yɩ ba tɩtɩ laan daarɩ ba tʋ tɩ wʋnɩ.
16 Lwarɩm dɩlʋ ba na tʋŋɩ tɩn
joori dɩ tui ba tɩtɩ yuu nɩ mʋ.
Ba nakɔɔrɩ kənə mʋ joori
ya ni-ba.b
17 Amʋ wʋ́ kɩ Baŋa-Wɛ le,
DƖ na yɔɔrɩ DƖ kɩ cɩga tɩn ŋwaanɩ.
A ta wʋ́ leeni a te DƖ yɩrɩ mʋ,
dɩ DƖ na yɩ Yuutu Baŋa-Wɛ dɩm tɩn.