Davidi wɛ-loro
5
Amʋ Tu Baŋa-Wɛ,cəgi amʋ ni-taanɩ.
Kʋ cɛ a yɩra nɩ yɩ a sisigə!
2 Amʋ Tu Wɛ, nmʋ yɩ amʋ Pɛ,
pa-nɩ cwǝŋǝ sɩ a ba nmʋ yigə nɩ.
A loori zǝnǝ mʋ nmʋ tee nɩ.
Popo, sɩ n sɛ a wɛ-loro kʋm.
3 Baŋa-Wɛ, tɩga na pʋʋrɩ,
nmʋ yǝni n cəgi amʋ ni-taanɩ.
Zɩzɩŋa nɩ amʋ wʋ́ tiŋi a taanɩ dɩm nmʋ yigə nɩ mʋ,
yɩ a laan taa je a cǝgǝ sɩ a nii.a
4 A Tu Wɛ, nmʋ na yɩ te tɩn,
n wʋ ba poli dɩ lwarɩm tɩtʋŋa.
Nɔn-balwaarʋ bá wanɩ ba zʋ nmʋ te.
5 Balʋ na brɩ ba tɩtɩ kamunni tɩn
dɩ bá wanɩ ba zɩgɩ nmʋ yigə nɩ.b
Nmʋ culi balʋ maama
na kɩ lwarɩm tɩn.
6 Kʋ na yɩ vwa-fɔra,
nmʋ wʋ́ cɔgɩ-ba mʋ,
yɩ n vɩn nɔn-gʋra
dɩ gɩngan-nyɩna maama.
7 Kʋ daarɩ kʋ na yɩ amʋ,
nmʋ jɩgɩ amʋ sono cɩga cɩga.
Kʋntʋ ŋwaanɩ, amʋ wʋ́ na cwǝŋǝ
sɩ a zʋ n sɔŋɔ kʋm.
Amʋ wʋ́ kuni doonǝ nmʋ yigə nɩ,
yɩ a zuli nmʋ yɩrɩ
nmʋ tɩtɩ digə kam wʋnɩ.
8 Baŋa-Wɛ, pa a taa tɔgɩ
nmʋ cɩga cwǝŋǝ kam,
amʋ dʋna na daga ba gaalɩ tɩn ŋwaanɩ.
Tiŋi cwǝŋǝ kalʋ na yɔɔrɩ tɩn
a yigə nɩ,
sɩ a yɩ ywəri ka wʋnɩ.
9 Kʋ na yɩ a dʋna bam,
ba niə yam ba nuŋi cɩga maŋa dɩ maŋa.
Ba beeri cɔgɩm yɩranɩ mʋ.
Ba niə maa ŋɔɔrɩ,
nɩ yibeeli na puri tɩn mʋ,
yɩ ba tɔgɩ ni-sʋŋɩ baŋa nɩ
ba ganɩ nɔɔna. c
10 A Tu Wɛ, pa ba tʋ ba bʋra wʋnɩ!
Pa ba tɩtɩ bʋbwɛa yam dɩ ba.
Ba lwarɩm yam na daga tɩn,
zəli-ba n yigə nɩ,
bɛŋwaanɩ ba lɔgɩ nmʋ kwaga nɩ mʋ.
11 Kʋ daarɩ, kʋ na yɩ balʋ maama
na səgi nmʋ woro kʋm wʋnɩ tɩn,
pa ba wʋ poli.
Pa ba taa leeni le dɩ ywəəni
maŋa maama.
Balʋ na soe nmʋ tɩn,
sɩ n ta n cʋ-ba
sɩ ba taa zuli nmʋ yɩrɩ dɩ wʋpolo.
12 Baŋa-Wɛ, nmʋ sɩɩnɩ n kɩ balʋ na zɩgɩ cɩga wʋnɩ tɩn yu-yoŋo.
Kʋ ta wǝli da, nmʋ yǝni n kwe
n lanyɩranɩ dɩm mʋ,
n ma n cʋ-ba sɩ cam yɩ yi-ba,
nɩ najara cɩ-kwaŋa na kwǝli nɔɔnʋ
najara wʋnɩ te tɩn.