Davidi wɛ-loro
4
Amʋ Tu Wɛ,nmʋ mʋ zɩgɩ amʋ cɩga kam kwaga nɩ.
Cam na tu dɩ pɩɩnɩ amʋ tɩn,
nmʋ joŋi-nɩ n yagɩ
sɩ a lu dɩ wʋnɩ.
Nan ta duri amʋ yibwənə,
sɩ n daarɩ n cəgi
amʋ wɛ-loro kʋm.
2 Nabiinǝ bam, á lagɩ
sɩ á taá kɩ-nɩ cavɩɩra taa
sɩ á vu á maŋɩ yən mʋ?
Á wʋ́ taá soe wo-yɔɔrʋ,
yɩ á kwǝri á sɛ vwan taanɩ
maŋa maama mʋ na?
3 Nan lwarɩ-na nɩ Baŋa-Wɛ kuri cɩga tɔgɩna mʋ
sɩ ba taa yɩ DƖ nyɩm.
Amʋ na yǝni a loori‑DƖ,
DƖ sɛ a taanɩ dɩm mʋ.
4 Nan taá kwarɩ-na fʋʋnɩ
sɩ á yɩra dɩ taa saɩ!
Dɩ kʋntʋ dɩ, yɩ kɩ-na lwarɩm.
Á na yǝni á tigi á sara nɩ yɩ á sin,
sɩ á taá jɩgɩ wʋbʋŋa yantʋ doŋ
á bɩcara wʋnɩ.
5 Tɔgɩ-na cɩga wʋnɩ á kaanɩ
á pa Baŋa-Wɛ,
sɩ á daarɩ á sɛ‑DƖ dɩ wʋ-dɩdʋa.
6 Nɔɔna zanzan yǝni ba bwe ba wɩ:
«Nɔɔnʋ wʋra o na wʋ́ kɩ dɩbam lanyɩranɩ na?»
Amʋ Tu Baŋa-Wɛ, pa n yibiyə jeeri dɩbam seeni
sɩ n lanyɩranɩ dɩm kwǝli dɩbam!
7 Kʋ nan na yɩ amʋ,
nmʋ kɩ ywəəni amʋ bɩcarɩ nɩ
kʋ dwe bantʋ nyɩm dɩm,
dɩ ba na maŋɩ ba jɩgɩ wʋdiiru zanzan dɩ sana tɩn dɩ.
8 Amʋ na yǝni a guni a pəni,
a wʋ́ dɔ mʋ yɩ a bɩcarɩ zuri.
Baŋa-Wɛ, nmʋ yɩranɩ mʋ waɩ
n nii amʋ baŋa nɩ,
sɩ a yɩ na wo-lɔŋɔ.