Davidi wɛ-loro
Davidi dɛɛn panɩ ləŋə kantʋ maŋa kalʋ o na duri sɩ o lu Absalɔn jɩŋa nɩ tɩn.a
3
Amʋ Tu Baŋa-Wɛ,nii amʋ dʋna na daga te!
Balʋ na zɩgɩ amʋ zɩga tɩn
gaalɩ zanzan!
2 Ba maa ta amʋ taanɩ ba wɩ:
Wɛ daa ba lagɩ DƖ joŋi-nɩ DƖ yagɩ.
3 Baŋa-Wɛ, nmʋ nan cɩgɩ amʋ mʋ
n pu sɩ cam yɩ yi-nɩ,
nɩ najara cɩ-kwaŋa na kwǝli nɔɔnʋ
najara wʋnɩ te tɩn.
Nmʋ yǝni n paɩ a yuu zǝŋi wɛɛnɩ,
yɩ n pa-nɩ zulə zanzan.
4 Amʋ yǝni a loori Baŋa-Wɛ
dɩ kwǝr-dɩa mʋ.
DƖ dɩ maa zɩgɩ piu kʋlʋ DƖ na pɔɔrɩ DƖ pa DƖ tɩtɩ tɩn yuu nɩ,
DƖ ləri amʋ loro.b
5 Amʋ wʋ́ guni mʋ a pəni
a taa dɔa yɔlɔ-lɔ-lɔ,
yɩ a dɔ a zaŋɩ zɩzɩŋa nɩ
dɩ yazurə,
Baŋa-Wɛ na təli-nɩ tɩn ŋwaanɩ.
6 Jar-kərə mʋrrʋ fugə mʋ na jeeri-nɩ,
yɩ ba pɩɩnɩ-nɩ je maama
ba kɩ tɩtarɩ nɩ dɩ,
amʋ ta bá kwarɩ fʋʋnɩ.
7 Amʋ Tu Baŋa-Wɛ, zaŋɩ wɛɛnɩ!
Amʋ Tu Wɛ, joŋi-nɩ n yagɩ!
Nan magɩ a dʋna bam maama niə n cɔgɩ-ba,
sɩ ba daa yɩ taa jɩgɩ dam amʋ baŋa nɩ.
8 Baŋa-Wɛ, nmʋ mʋ vrɩ nɔɔna
n yagɩ ba cam wʋnɩ.
Nan pa n yu-yoŋo taa wʋ
n nɔɔna bam yuu nɩ.