Zwifǝ tiinə bam di dam ba dʋna baŋa nɩ
9
Adarɩ cana kam da fugə-yatɔ dɛ dɩm ma sɩɩnɩ dɩ yi. Dɛ dɩm kʋntʋ mʋ pɛ wʋm ni dɩm maŋɩ sɩ dɩ tʋŋɩ. Zwifǝ tiinə dʋna bam dɛɛn ya bʋŋɩ sɩ ba wanɩ-ba mʋ, yɩ bantʋ joori ba wanɩ ba dʋna bam ba di. 2 Pɛ Asuerusi paarɩ dim laŋa kam nɩ Zwifǝ tiinə na zʋʋrɩ mɛ maama tɩn, ba ma la daanɩ sɩ ba jeeri balʋ na bʋŋɩ sɩ ba cɔgɩ-ba tɩn dɩ najara. Nɔɔn-nɔɔnʋ maa warɩ sɩ o dwǝni dɩ ba, dwi maama tiinə na kwarɩ fʋʋnɩ dɩ ba tɩn ŋwaanɩ. 3 Tɩʋ maama nakwa, dɩdaanɩ pɛ wʋm dɩdɛɛra, dɩ o sarɩya-dirə, dɩ o tɩntʋŋna maama dɛɛn tɔgɩ ba wǝli Zwifǝ tiinə bam mʋ, ba na kwarɩ Mardose tɩn ŋwaanɩ. 4 Pɛrsɩ tɩɩnɩ yam maama wʋnɩ nɔɔna laan tu ba maanɩ nɩ Mardose mʋ tiini o jɩgɩ dam pɛ sɔŋɔ nɩ. O dam dɩm dɛɛn kɩ dɩ wǝli da mʋ dɛ maama.5 Dɛ dɩm na yi tɩn, Zwifǝ tiinə bam dɛɛn cɔgɩ ba dʋna bam ba na lagɩ te tɩn. Ba ma kwe sʋ-lwaanʋ ba jeeri balʋ na culi-ba tɩn yɩ ba gʋ-ba. 6 Suzi dam je sɩm wʋnɩ, ba dɛɛn gʋ nɔɔna biə-yanu. 7-10 Ba ma gʋ Amedata bu Haman bu-baara fugə. Wʋntʋ dɛɛn yɩ Zwifǝ tiinə bam dʋnʋ mʋ. O biə bam mʋ tɩntʋ: Pɩsandata, dɩ Dalɩfon, dɩ Asepata, dɩ Porata, dɩ Adalia, dɩ Aridata, dɩ Paramaseta, dɩ Arisayi, dɩ Aridayi, dɩdaanɩ Vayizata. Ba ma gʋ nɔɔna bam kʋntʋ maama, yɩ ba laan wʋ vrɩ ba jɩjɩgɩrʋ.
11 Dɛ dɩm kʋntʋ nɩ ba ma ta ba brɩ pɛ wʋm ba na gʋ nɔɔna balʋ Suzi dam je sɩm nɩ tɩn ni na maɩ te. 12 O dɩ ma guli dɩ pa-kana Ɛsɩtɛɛrɩ o wɩ: «Suzi dam je sɩm yɩranɩ wʋnɩ Zwifǝ tiinə bam gʋ nɔɔna biə-yanu mʋ, yɩ Haman biə fugə kam tɔgɩ ba wʋ twa bam wʋnɩ. Sɩ kʋ na yɩ provɛnsa yadonnə yam wʋnɩ, kʋ laan wʋ́ taa yɩ tɩta mʋ? Nan ta n brɩ-nɩ kʋlʋ nmʋ daa n na lagɩ sɩ a kɩ tɩn, sɩ amʋ wʋ́ kɩ a pa‑m. Nmʋ wʋ́ loori bɛɛ mʋ amʋ tee nɩ?»
13 Ɛsɩtɛɛrɩ ma ləri o wɩ: «Pɛ, kʋ na dɛ dɩ n wʋ, sɩ n jwa daa n pa Zwifǝ tiinə bam cwǝŋǝ sɩ ba kɩ ba na kɩ te zɩm tɩntʋ tɩn doŋ. Ta pa ni sɩ ba kwe Haman biə bam yɩra ba lə da-kwǝli-dɩdwaarʋ tɩm yɩra nɩ.»
14 Pɛ wʋm ma pa ni Suzi tɩʋ wʋnɩ sɩ ba kɩ te pa-kana wʋm na tagɩ tɩn. Ba ma kwe Haman biə bam yɩra yam ba lə dɛ sɩm yɩra nɩ. 15 Adarɩ cana kam da fugə-yana dɛ dɩm nɩ Zwifǝ tiinə balʋ na zʋʋrɩ Suzi wʋnɩ tɩn daa ma kɩ daanɩ ba gʋ nɔɔna biə-yatɔ, yɩ ba ta wʋ vrɩ ba jɩjɩgɩrʋ.
16 Zwifǝ tiinə balʋ na wʋ provɛnsa yayam yam wʋnɩ tɩn dɩ ma kɩ daanɩ sɩ ba jaŋɩ ba joŋi ba tɩtɩ, yɩ ba wanɩ ba dʋna ba di. Ba ma gʋ ba dʋna mʋrrʋ fusɩrpɛ-tenu (75,000). Ba dɩ maa wʋ vrɩ ba dʋna bam jɩjɩgɩrʋ. 17 Kʋ dɛɛn yɩ Adarɩ cana kam da fugə-yatɔ dɛ dɩm nɩ mʋ ba gʋ-ba. Sɩ kʋ na yɩ da fugə-yana dɛ dɩm nɩ, ba sin mʋ dɩ najara. Ba pɛ dɩ ji wʋpolo dɛ mʋ yɩ ba di candiə. 18 Kʋ daarɩ, Zwifǝ tiinə balʋ na zʋʋrɩ Suzi wʋnɩ tɩn, mʋ pɛ cana kam da fugə-yanu dɛ dɩm yɩ wʋpolo dɛ yɩ ba di candiə. Bɛŋwaanɩ, ba mɛ da fugə-yatɔ dɛ dɩm dɩ da fugə-yana dɛ dɩm mʋ ba gʋ ba dʋna yɩ ba laan sin dɩ najara yam. 19 Kʋntʋ ma pa Zwifǝ tiinə balʋ na zʋʋrɩ tɩ-balwa wʋnɩ tɩn kwe Adarɩ cana kam da fugə-yana dɛ dɩm sɩ dɩ ji ba wʋpolo dɛ. Kʋ na yǝni kʋ yi dɛ dɩm kʋntʋ, ba maa yǝni ba kɩ candiə yɩ ba daarɩ ba tʋŋɩ wʋdiiru ba paɩ daanɩ.
Purim candiə kamm dim
20 Mardose dɛɛn pɛ ba pʋpʋnɩ wǝǝnu tɩntʋ maama mʋ ba tiŋi, yɩ o daarɩ o tʋŋɩ twannʋ o pa Zwifǝ tiinə balʋ na zʋʋrɩ Pɛ Asuerusi paarɩ dim laŋa kam je maama nɩ, ba na maŋɩ ba yɩ bwələ bwələ naa yigə yigə dɩ. 21 O ma ta dɩ ba sɩ bɩnɩ maama wʋnɩ, kʋ na yǝni kʋ kaagɩ kʋ yi Adarɩ cana kam da fugə-yana dɛ dɩm dɩ ka da fugə-yanu dɛ dɩm, sɩ ba taa kɩ wʋpolo candiə, 22 kʋ na yɩ da yam kʋntʋ wʋnɩ mʋ Zwifǝ tiinə bam dɛɛn vrɩ ba tɩtɩ ba dʋna jɩŋa nɩ tɩn ŋwaanɩ. Kʋ ta yɩ cana kalʋ wʋnɩ ba wʋ-cɔgɔ dɛɛn na pipiri kʋ ji wʋpolo yɩ ba cam dɩ ji ywəəni tɩn mʋ. Mardose ma brɩ-ba sɩ ba kwe da yam kʋntʋ ba di candiə yɩ ba kwɛɛra, sɩ ba taa kɩ wʋdiiru pɛɛra ba pa daanɩ, yɩ ba ta wǝli yinigə tiinə dɩ pɛɛra. 23 Zwifǝ tiinə bam ma sɛ Mardose ni dɩm yɩ ba pa kǝm dɩm kʋntʋ lɛɛrɩ dɩ ji bɩnɩ maama kənə, nɩ ba na puli sɩ ba kɩ te tɩn.
24 Kʋ na yɩ te tɩn, Agagɩ dwi tu Amedata bu Haman, o ya na yɩ Zwifǝ tiinə maama dʋnʋ tɩn, dɛɛn mʋ bʋŋɩ sɩ o cɔgɩ Zwifǝ tiinə bam o ti. O ma ta jɔrɔ sɩ o lwarɩ dɛ dɩlʋ o na wʋ́ pa ba dwi dɩm yagɩ tɩga baŋa nɩ tɩn. Jɔrɔ kʋm yɩrɩ mʋ ‹Purim›. 25 Ɛsɩtɛɛrɩ ma pa pɛ wʋm lwarɩ Haman wʋbʋŋa yam ni nɩ. Pɛ wʋm na ni tɩn, o ma pʋpʋnɩ o ni o kɩ tɔnɔ wʋnɩ, pa Haman ya na bʋŋɩ sɩ o kɩ Zwifǝ tiinə bam lwarɩm dɩlʋ tɩn pipiri dɩ joori o tɩtɩ yuu nɩ. Pɛ wʋm ta ma pa ba kuuri Haman dɩ o biə dɛ yɩra nɩ.a 26 Haman ya na tagɩ ‹Purim› jɔrɔ kʋm tɩn ŋwaanɩ, ba laan ma lɛɛrɩ ba jɩgɩ candiə kam kʋntʋ da yam ba bǝi nɩ ‹Purim›. Zwifǝ tiinə bam dɛɛn sɛ kʋlʋ Mardose tɔnɔ kʋm na brɩ-ba sɩ ba taa kɩ tɩn sɩ ba taa gulə kʋlʋ maama na yi-ba tɩn. 27 Kʋntʋ ŋwaanɩ ba ma lɛɛrɩ ba sɛ sɩ da yam kʋntʋ yale taa zɩgɩ ya pa-ba, sɩ ba dɩ ba biə, dɩdaanɩ wʋlʋ maama na wʋ́ ba o wǝli ba wʋnɩ tɩn taa di ywəəni. Ba ta ma sɛ sɩ ba tɔgɩ Mardose ni dɩm sɩ ba yɔɔrɩ ba di candiə kam bɩnɩ maama nɩ, nɩnɛɛnɩ kʋ na yǝni kʋ yi ka maŋa kam. 28 Zwifǝ tiinə bam maama maŋɩ sɩ ba jwa jwa taa ye da yale yam kʋntʋ ni nɩ, sɩ ba di Purim candiə kam sɔŋɔ maama nɩ, dɩ tɩʋ dɩ provɛnsɩ maama wʋnɩ, sɩ ba dɩ ba dwi dɩm yɩ swe ya ni nɩ sɩ kʋ taa ve maŋa maama.
29 Pa-kana Ɛsɩtɛɛrɩ na yɩ Abihali bu tɩn ma zɩgɩ Zwifǝ tu Mardose kwaga nɩ, yɩ o daarɩ o pʋpʋnɩ tɔnɔ sɩ kʋ pa ni dɩlʋ Mardose na pʋpʋnɩ Purim candiə kam ŋwaanɩ tɩn taa jɩgɩ kuri. 30 Ba dɛɛn ma pa twannʋ yi Zwifǝ tiinə balʋ maama na zʋʋrɩ Pɛ Asuerusi paarɩ dim laŋa kam provɛnsa bi dɩ fiinle-yarpɛ (127) maama wʋnɩ tɩn. Twannʋ tɩm maa tɛ yazurə dɩ cɩga zɩgɩm taanɩ mʋ. 31 Tɩ ta ma brɩ Zwifǝ tiinə dɩ ba dwi dɩm sɩ ba tiŋi da yam kʋntʋ ba di Purim candiə kam nɩnɛɛnɩ ka maŋa na yǝni ka yi bɩnɩ maama wʋnɩ. Baá taa kɩ nɩnɛɛnɩ Zwifǝ tu Mardose dɩ pa-kana Ɛsɩtɛɛrɩ na pɛ-ba ni sɩ ba kɩ te tɩn, sɩ kʋ tɔgɩ ba na maŋɩ ba kɩ te yɩ ba yǝni ba vɔ ni wʋ-cɔgɔ ŋwaanɩ te tɩn.
32 Ɛsɩtɛɛrɩ ni dɩm kʋntʋ dɛɛn pɛ Purim candiə dim cullu tɩm zɩgɩ. Ba pʋpʋnɩ-dɩ mʋ ba kɩ tɔnɔ wʋnɩ.