Ba pɛ Zwifǝ tiinə cwǝŋǝ sɩ ba jaŋɩ ba joŋi ba ŋwɩa
8
Dɛ dɩm kʋntʋ nɩ mʋ Pɛ Asuerusi kwe Zwifǝ tiinə bam dʋnʋ Haman jɩjɩgɩrʋ maama o pa Ɛsɩtɛɛrɩ. Wʋntʋ dɩ ma ta dɩ pɛ wʋm wɩ Mardose yɩ o cʋrʋ mʋ. Mardose laan ma na cwǝŋǝ sɩ o zʋ pɛ wʋm te. 2 Pɛ wʋm nan ya maŋɩ o lɩ o dam jafʋlɩ dɩm mʋ Haman jɩŋa nɩ. O laan ma kwe-dɩ o kɩ Mardose nʋa nɩ. Kʋ na zɩgɩ dɛ dɩm kʋntʋ nɩ tɩn, Ɛsɩtɛɛrɩ ma pa Mardose lɛɛrɩ o nii kʋlʋ maama Haman ya na jɩgɩ tɩn.3 Ɛsɩtɛɛrɩ daa ta ma zʋ pɛ wʋm te sɩ o loori‑o o dwi tiinə bam ŋwaanɩ. O dɛɛn parɩ o tʋ o nɛ baŋa nɩ mʋ yɩ o keerǝ. O ma loori‑o sɩ o cɩ bʋbʋŋ-balɔrɔ kʋlʋ Agagɩ dwi tu Haman ya na kɩ sɩ o ma o cɔgɩ Zwifǝ tiinə bam tɩn. 4 Pɛ wʋm ma te o səbu-sɩŋa nacəgə kam o jeeri Ɛsɩtɛɛrɩ, yɩ o zaŋɩ wɛɛnɩ o fʋfɔ o yi pɛ wʋm te. 5 Ɛsɩtɛɛrɩ daa maa wɩ: «Pɛ, nmʋ wʋ na dɛa, yɩ kʋ maŋɩ dɩ nmʋ, nmʋ yi maa na sui a kənə yam yɩ n yigə na wʋ amʋ wʋnɩ, sɩ n pa kwǝrǝ kalʋ na wʋ́ cɩ Haman ni dɩm sɩ dɩ daa yɩ tʋŋɩ. Kʋ yɩ ni dɩlʋ Agagɩ dwi tu Hamedeta bu Haman na pɛ o wɩ ba cɔgɩ Zwifǝ tiinə bam nmʋ paarɩ dim laŋa kam je maama nɩ tɩn taanɩ mʋ a tɛa. 6 Amʋ nan bá wanɩ a yagɩ sɩ lɛɛrʋ tɩntʋ ba a dwi tiinə bam baŋa. A bá wanɩ a pɩɩnɩ a tɩtɩ yɩ ba jɩgɩ a tɩtɩ cʋrrʋ ba gʋɩ.»
7 Pɛ Asuerusi ma ta dɩ pa-kana Ɛsɩtɛɛrɩ dɩ Zwifǝ tu Mardose o wɩ: «Nii-na amʋ na kɩ te Zwifǝ tiinə bam ŋwaanɩ. A pɛ ba kuuri Haman mʋ dɩ o na bʋŋɩ lwarɩm sɩ o ti Zwifǝ tiinə bam tɩn, a ta ma kwe o jɩjɩgɩrʋ tɩm a pa Ɛsɩtɛɛrɩ. 8 Amʋ nan wʋ́ pa abam cwǝŋǝ sɩ á kwe amʋ yɩrɩ á pʋpʋnɩ á na lagɩ kʋlʋ maama tɩn á kɩ twannʋ wʋnɩ sɩ kʋ wǝli Zwifǝ tiinə bam ba cam wʋnɩ. Á na pʋpʋnɩ taanɩ dɩm á ti, sɩ á kwe a dam jafʋlɩ dɩm á ma nyɩ twannʋ tɩm baŋa nɩ. Kʋ nan na yɩ ni dɩlʋ ba na kwe pɛ yɩrɩ ba pʋpʋnɩ-dɩ, yɩ ba daarɩ ba ma o jafʋlɩ dɩm ba nyɩ tɔnɔ kʋm tɩn, dɩntʋ bá wanɩ dɩ kwanɩ.»a
9 Ba dɛɛn ma bəŋi pɛ wʋm twan-pʋpʋnna bam sɩ ba ba. Mardose ma ta kʋlʋ ba na wʋ́ pʋpʋnɩ tɩn, sɩ o kwe o ni dɩm o pa Zwifǝ tiinə bam, dɩ pɛ wʋm yigǝ tiinǝ, dɩ dɩdɛɛra, dɩ nakwa balʋ na wʋ tɩɩnɩ bi dɩ fiinle-barpɛ (127) yam maama wʋnɩ tɩn, sɩ kʋ zɩgɩ Ɩndɩ nɩ sɩ kʋ yi Etiyopi. Kʋ maa yɩ canɩ sɩtɔ cana kam da fiinle-yatɔ dɛ nɩ mʋ tɩntʋ maama kɩa. Canɩ kam yɩrɩ mʋ ‹Sivan›. Ba dɛɛn pʋpʋnɩ twannʋ tɩm dɩ tɩʋ maama dwi taanɩ, nɩnɛɛnɩ ba na yǝni ba pʋpʋnɩ-dɩ te tɩn mʋ. Zwifǝ tiinə bam dɩ ma joŋi ba twannʋ dɩ ba tɩtɩ taanɩ, dɩdaanɩ ba pʋpʋnɩm na yɩ te tɩn. 10 Mardose dɛɛn mɛ Pɛ Asuerusi yɩrɩ mʋ o pʋpʋnɩ twannʋ tɩm, yɩ o daarɩ o kwe pɛ dam jafʋlɩ dɩm o nyɩ tɩ baŋa nɩ. O ma daarɩ o kwe-tɩ o pa pɛ tɩntʋŋna balʋ na diini pɛ wʋm tɩtɩ siseŋ-nɔɔna balʋ na waɩ ba duri lɩla tɩn.
11 Twannʋ tɩm dɛɛn brɩ pɛ wʋm ni wɩ Zwifǝ tiinə na zʋʋrɩ tɩʋ kʋlʋ maama wʋnɩ tɩn jɩgɩ cwǝŋǝ sɩ ba la daanɩ sɩ ba jaŋɩ ba joŋi ba tɩtɩ ba yagɩ. Kʋ ta wɩ: jar-kərə na nuŋi dwi dɩlʋ maama wʋnɩ, naa tɩʋ kʋlʋ maama wʋnɩ, yɩ ba zaŋɩ najara dɩ Zwifǝ tiinə bam, bantʋ wʋ́ wanɩ ba cɔgɩ balʋ maama na dʋnɩ-ba tɩn ba ti, kʋ na maŋɩ kʋ yɩ ba kaana dɩ ba biə dɩ. Ba ta wʋ́ wanɩ ba kwe ba dʋna bam jɩjɩgɩrʋ ba taa te. 12 Dɛ dɩm Zwifǝ tiinə bam na jɩgɩ cwǝŋǝ sɩ ba jaŋɩ ba joŋi ba tɩtɩ Pɛ Asuerusi paarɩ dim laŋa kam maama wʋnɩ kʋntʋ tɩn maa yɩ canɩ fugə-sɩle cana kam, ka yɩrɩ na yɩ Adarɩ tɩn, da fugə-yatɔ dɛ dɩm nɩ.b 13 Ba dɛɛn pɛ provɛnsɩ dɩ provɛnsɩ maama taa jɩgɩ dɩ tɔnɔ kʋm, sɩ dwi maama tiinə wanɩ ba lwarɩ ni dɩm jaja. Ba kɩ sɩ dɩ dɛ dɩm na yiǝ, sɩ Zwifǝ tiinə bam ti yigə sɩ ba jaŋɩ dɩ ba dʋna mʋ. 14 Pɛ wʋm ni dɩm ma pa o sise diinə bam duri lɩla ba ja twannʋ tɩm ba vu ba yi je maama. Ba ta ma tɔɔlɩ taanɩ dɩm Suzi dam je sɩm wʋnɩ.
15 Mardose ma nuŋi pɛ sɔŋɔ kʋm nɩ o maa viirǝ, dɩ o zʋ paarɩ gwaarʋ mʋ tɩlʋ nyɩnyʋrʋ na yɩ napwəənu dɩ nazon-pupwiə tɩn. O ta ma daŋɩ gar-fɩfala kalʋ nyɩnyʋgʋ na yɩ nasʋŋ-pupwiə tɩn o kɩ da, yɩ səbu-sɩŋa yu-pugə wʋ o yuu nɩ. Suzi tɩʋ kʋm dam je sɩm laan ma su dɩdaanɩ sɔɔ, nɔɔna bam na jɩgɩ wʋpolo tɩn ŋwaanɩ. 16 Zwifǝ tiinə bam wʋ dɛɛn ma poli dɩ kʋlʋ maama na kɩ tɩn. Nɔɔna maama ma pa-ba zulə je maama nɩ. 17 Ba dɛɛn na tɔɔlɩ pɛ wʋm ni dɩm tɩʋ maama dɩ tɩɩnɩ maama wʋnɩ tɩn, kʋ pɛ Zwifǝ tiinə bam kɩ candiə mʋ ba di wʋdiiru, yɩ ba kwɛɛrɩ, ba na tiini ba jɩgɩ wʋpolo tɩn ŋwaanɩ. Dwi-gɛ tiinə zanzan dɩ brɩ ba pipiri ba ji Zwifǝ tiinə, ba na tu ba kwarɩ fʋʋnɩ dɩ Zwifǝ tiinə bam tɩn ŋwaanɩ.