Haman na tʋ te tɩn
7
Pɛ Asuerusi dɩ Haman ma vu ba zʋ pa-kana Ɛsɩtɛɛrɩ tee nɩ sɩ ba di daanɩ. 2 Ba na di dɩd-o bɩle tu baŋa nɩ ba ti yɩ ba nyɔ sana tɩn, mʋ pɛ wʋm daa bwe Ɛsɩtɛɛrɩ o wɩ: «Laan ta n brɩ-nɩ n ya na lagɩ sɩ a kɩ kʋlʋ tɩn, sɩ amʋ wʋ́ kɩ a pa‑m, kʋ na maŋɩ kʋ yɩ a paarɩ laŋa kam cicoro dɩ.»3 Ɛsɩtɛɛrɩ ma ləri o wɩ: «Pɛ, a kǝm na sui n yi, yɩ kʋ na poli n wʋ, sɩ n kɩ a na wʋ́ bwe‑m kʋlʋ tɩn n pa-nɩ. Kʋ maŋɩ sɩ n joŋi amʋ ŋwɩa sɩ n daarɩ n yagɩ a dwi tiinə bam maama sɩ ba taa ŋwɩ. 4 Kʋ na yɩ te tɩn, ba maŋɩ ba yəgi amʋ dɩ a dwi tiinə bam mʋ sɩ dɩ́ maama na cɔgɩm dɩ́ ti. Kʋ ya na yɩ ba lagɩ sɩ dɩ́ ji gambɛ mʋ, amʋ yaá taa cɩm mʋ, kʋ na wʋ yi sɩ a daanɩ‑m tɩn ŋwaanɩ. Ba bʋbʋŋɩ dɩm nan maŋɩ sɩ dɩbam dwi dɩm je tɩga baŋa nɩ lɩla!»
5 Pɛ Asuerusi ma bwe pa-kana wʋm o wɩ: «Wɔɔ mʋ bʋŋɩ sɩ o kɩ wo-balɔrɔ kʋm kʋntʋ? O wʋ yən mʋ?» 6 Ɛsɩtɛɛrɩ ma ləri o wɩ: «Dɩbam dʋm wʋm, o na beeri dɩ́ tʋʋnɩ tɩn mʋ yɩ nɔn-balɔrɔ kʋntʋ, Haman.»
Haman ma lɛɛrɩ o je o nii pɛ wʋm dɩ pa-kana wʋm ziin, yɩ fʋʋnɩ tiini dɩ zʋ-o. 7 Pɛ wʋm ma zaŋɩ wɛɛnɩ dɩ banɩ o nuŋi pooni yɩ o yagɩ sana bam nyɔɔm. O ma vu o zɩgɩ pɛ sɔŋɔ naboo nɩ mɛ tweeru na wʋra tɩn. Haman ma maanɩ nɩ pɛ wʋm wʋbʋŋa jaanɩ sɩ o waar‑o o kənə yam ŋwaanɩ. O ma maŋɩ digə kam nɩ sɩ o loori Ɛsɩtɛɛrɩ sɩ o ja pɛ wʋm naga sɩ o yɩ tɩ. 8 O ma yɔɔrɩ o vu o tʋ gadogo kʋlʋ nɩ Ɛsɩtɛɛrɩ na tigi da tɩn sɩ o loori‑o, dɩ pɛ wʋm dɩ zɩgɩ pɛ sɔŋɔ naboo kʋm nɩ o zʋ digə kam. Pɛ wʋm na nɛ kʋntʋ tɩn, mʋ o wɩ: «Nɔɔnʋ wʋntʋ laan bʋŋɩ sɩ o zi pa-kana wʋm mʋ a tɩtɩ sɔŋɔ nɩ na?»
O taanɩ dɩm maŋɩ dɩ wʋ tʋ tɩga nɩ dɩdaanɩ pɛ sɔŋɔ tɩntʋŋna na tu ba kwǝli Haman yibiyə. 9 Pɛ tɩntʋŋna bam dɩdʋa o yɩrɩ na yɩ Arbona tɩn ma ta o wɩ: «Haman maŋɩ o cwi dɛ mʋ o sɔŋɔ nɩ, sɩ na dwara sɩ yi kantɩa ni maŋɩm kuni fiinnu tɩn, yɩ o le ŋʋnɩ sɩ yɩra nɩ sɩ o ma kuuri Mardose o gʋ. Wʋntʋ dɛɛn nan mʋ yɩ wʋlʋ na joŋi nmʋ o yagɩ tɩn.»