Pɛ wʋm pɛ ba zuli Mardose
6
Tɩtɩ dɩm kʋntʋ nɩ, dɔɔm ba tui pɛ wʋm yiǝ nɩ. O ma pa ni sɩ ba ja ba tɩʋ pwa yɩra cɩbarɩ twannʋ tɩm ba na yǝni ba pʋpʋnɩ o paarɩ dim kənə ba tiŋi da tɩn ba ja ba ba ba karɩmɩ sɩ o cəgi. 2 Ba na jɩgɩ tɔnɔ kʋm ba karɩmɩ tɩn, ba ma vu ba yi mɛ kʋ na pʋpʋnɩ wɩ Bigetanɩ dɩ Teresɩ ya bʋŋɩ sɩ ba gʋ pɛ wʋm tɩn baŋa. Bantʋ dɛɛn yɩ pɛ sɔŋɔ dɩdɛɛra balʋ na yɩrɩ o di sɩm tɩn, yɩ Mardose pa pɛ wʋm lwarɩ ba bana yam ni nɩ.a3 Pɛ wʋm ma bwe o tɩntʋŋna bam o wɩ: «Mardose na kɩ kǝm-laa kʋntʋ tɩn, dɩ́ zul‑o tɩta seeni mʋ kʋ ŋwaanɩ?» Ba ma ləri ba wɩ: «Ba wʋ kɩ kʋlʋkʋlʋ ba pa‑o.» 4 Pɛ Asuerusi daa ma bwe-ba o wɩ: «Amʋ nakwa bam wʋnɩ wɔɔ mʋ wʋ yo seeni?»
Kʋ yɔɔrɩ kʋ kɩ kʋ maŋɩ dɩdaanɩ Haman yi pɛ sɔŋɔ manchoŋo kʋm. O dɛɛn ya tu pɛ wʋm te sɩ o loori cwǝŋǝ mʋ sɩ ba kuuri Mardose dɩ ŋʋnɩ sɩlʋ o na lǝgi dɛ sɩm yɩra nɩ tɩn. 5 Pɛ tɩntʋŋna bam ma ləri ba wɩ: «Haman wʋ kʋnkɔlɔ kʋm nɩ, yɩ o beeri cwǝŋǝ sɩ o na‑m.» Pɛ wʋm ma ta o wɩ: «Pa-na cwǝŋǝ sɩ o zʋ amʋ tee nɩ.»
6 Haman na zʋ pɛ wʋm te tɩn, mʋ Asuerusi bwe‑o o wɩ: «Amʋ bʋŋɩ sɩ a kɩ zulə mʋ a pa nɔɔnʋ wʋdoŋ, a yi na su o kənə tɩn ŋwaanɩ. Nmʋ bʋŋɩ ta mʋ sɩ a kɩ a pa kʋntʋ tu?»
Haman ma bʋŋɩ o tɩtɩ nɩ wɩ: «Wɔɔ mʋ pɛ daa wʋ́ taa lagɩ sɩ o kɩ-o zulə kʋ na daɩ amʋ yɩranɩ?» 7 O ma ləri pɛ wʋm o wɩ: «Pɛ. Nmʋ yi na su nɔɔnʋ kənə yɩ n bʋŋɩ sɩ n kɩ-o zulə, 8 sɩ n pa ba kwe n paarɩ gwaarʋ tɩlʋ n tɩtɩ na zʋʋrɩ tɩn, sɩ ba daarɩ ba ja nmʋ paarɩ sisəŋ-nɔɔnʋ wʋm ba ba, yɩ paarɩ yupugə wʋ ka yuu nɩ. 9 Nmʋ laan ma n beeri n nakwa bam dɩdʋa na yɩ nɔn-yuu cɩga cɩga tɩn, sɩ o kwe gwaarʋ tɩm kʋntʋ o zʋ nɔɔnʋ wʋm yɩ o daarɩ o pa wʋlʋ n na lagɩ n kɩ-o zulə tɩn dɔgɩ n sisəŋ-nɔɔnʋ wʋm baŋa nɩ. O maa wʋ́ taa jɩgɩ kʋ tu o kaagɩ tɩʋ kʋm pooni nɩ o tɔɔlɩ o wɩ: ‹Nii-na! Pɛ na bʋŋɩ sɩ o kɩ nɔɔnʋ zulə, oó kɩ tɩntʋ mʋ o pa kʋ tu.› »
10 Pɛ wʋm ma ta Haman o wɩ: «Nmʋ taanɩ dɩm lana. Nan kɩ lɩla n ti a gwaarʋ tɩm yigə dɩdaanɩ a sisəŋ-nɔɔnʋ wʋm yigə, sɩ n tɩtɩ kɩ n na brɩ te maama tɩn sɩ dɩ́ ma dɩ́ zuli Mardose na yɩ Zwifǝ tu yɩ o je pɛ sɔŋɔ manchoŋo ni nɩ tɩn. Yɩ swe sɩ n kɩ kʋlʋ maama n na tagɩ tɩn n pa‑o!»
11 Haman ma vu o joŋi paarɩ nɩnwaŋa gwaarʋ tɩm dɩdaanɩ sisəŋ-nɔɔnʋ wʋm. O ma pa Mardose zʋ gwaarʋ tɩm. Mardose na diini sisǝŋǝ kam baŋa nɩ tɩn, Haman laan maa tɔgɩ o yigə o jɩg-o o beeri o kaagɩ tɩʋ kʋm pooni maama. O na ve tɩn, o maa tɔɔlɩ o wɩ: «Nii-na! Pɛ na bʋŋɩ sɩ o kɩ nɔɔnʋ zulə, oó kɩ tɩntʋ mʋ o pa kʋ tu.»
12 Ba na kaagɩ tɩʋ kʋm ba ti tɩn, Mardose ma joori o vu o wʋ pɛ sɔŋɔ manchoŋo ni nɩ o tʋŋa. Haman ma goori o tri yɩ o kɩ lɩla o joori sɔŋɔ dɩ cavɩɩra. 13 O ma ta o brɩ o kaanɩ Zerɛsɩ dɩ o badonnǝ maama kʋlʋ na yi‑o tɩn. O kaanɩ dɩ o badonnǝ balʋ na jɩgɩ swan tɩn ma ta ba wɩ: «Nmʋ wʋ maanɩ nɩ n puli sɩ n ta n tʋɩ n paɩ Mardose mʋ na? O yɩ Zwifǝ tu mʋ, yɩ n war‑o. O nan wʋ́ dɩ-m tɩga nɩ.»
14 Ba ya daa ta wʋ ba lara yam wʋnɩ mʋ, yɩ pɛ sɔŋɔ dɩdɛɛra bam ba sɩ ba ja Haman ba kɩ lɩla ba vu sɩ o di wʋdi-fɔrɔ kʋlʋ Ɛsɩtɛɛrɩ na kɩ tɩn.