Ɛsɩtɛɛrɩ na ve pɛ wʋm te yɩ o ta kʋlʋ tɩn
5
Ɛsɩtɛɛrɩ ni-vɔrɩ dɩm da yatɔ dɛ dɩm nɩ, mʋ o zʋ o paarɩ gwaarʋ tɩm o laan vu o zʋ pɛ sɔŋɔ kʋnkɔlɔ kʋm nɩ o zɩgɩ da. Je sɩm kʋntʋ jeeri dɩ paarɩ digə kam. Pɛ Asuerusi dɛɛn je o paarɩ yituŋu kʋm baŋa nɩ mʋ o nii digə kam ni dɩm seeni. 2 O ma na nɩ Ɛsɩtɛɛrɩ zɩgɩ kʋnkɔlɔ kʋm nɩ. O wʋ ma poli dɩd-o yɩ o te o səbu-sɩŋa nacəgə kam o jeer-o sɩ o ma zaan‑o. O dɩ ma fʋfɔ o yi o te, yɩ o dwe ka nabili dɩm seeni. 3 Pɛ wʋm ma bwe‑o o wɩ: «Ɛsɩtɛɛrɩ, bɛɛ mʋ daanɩ‑m? Ta n brɩ-nɩ kʋlʋ n na lagɩ tɩn, sɩ kʋ na maŋɩ kʋ yɩ a paarɩ dim laŋa kam cicoro dɩ, amʋ wʋ́ kwe-ka a pa‑m.» 4 Ɛsɩtɛɛrɩ ma lǝr-o o wɩ: «Pɛ, laŋa na daarɩ, sɩ nmʋ dɩdaanɩ Haman ba amʋ te zɩm sɩ dɩ́ di daanɩ. A lagɩ a vu a ti wʋdi-fɔrɔ yigə abam ŋwaanɩ mʋ.»5 Pɛ wʋm ma pa ni sɩ ba kɩ lɩla ba bəŋi Haman sɩ ba vu Ɛsɩtɛɛrɩ te ba di, nɩ o na tagɩ te tɩn. Ba ma sɩɩnɩ ba vu. 6 Ba na di ba ti yɩ ba nyɔ sana tɩn, pɛ wʋm ma bwe Ɛsɩtɛɛrɩ o wɩ: «Ta n brɩ-nɩ n na lagɩ sɩ a kɩ kʋlʋ tɩn, sɩ amʋ wʋ́ kɩ a pa‑m, kʋ na maŋɩ kʋ yɩ a laŋa kam cicoro dɩ.»
7 Ɛsɩtɛɛrɩ ma lǝr-o o wɩ: «Pɛ, amʋ na wʋ́ loori kʋlʋ nmʋ tee nɩ tɩn mʋ tɩntʋ: 8 Nmʋ yi na sui a kənə yam yɩ n wʋ na dɛ sɩ n kɩ kʋlʋ a na lagɩ tɩn, sɩ nmʋ dɩ Haman jwa daa joori yo seeni. Amʋ ta wʋ́ kɩ wʋdi-fɔrɔ sɩ abam ba á di. Kantʋ maŋa nɩ, a laan wʋ́ ta kʋlʋ a na lagɩ tɩn a brɩ-m.»
Haman banɩ zaŋɩ dɩ Mardose
9 Dɛ dɩm kʋntʋ nɩ, Haman na nuŋi pa-kana Ɛsɩtɛɛrɩ te yɩ o maa viiri tɩn, o wʋ yɔɔrɩ kʋ tiini kʋ poli mʋ. Kʋ daarɩ, o na nuŋi pɛ sɔŋɔ manchoŋo kʋm ni nɩ o maa kɛ tɩn, mʋ o nɛ Mardose. Wʋntʋ maa wʋ zaŋɩ wɛɛnɩ, o nan wʋ kwarɩ fʋʋnɩ dɩ Haman. Kʋntʋ ŋwaanɩ Haman banɩ tiini dɩ zaŋɩ o baŋa nɩ. 10 Dɩ kʋ dɩ, o dɛɛn pɩɩnɩ o banɩ mʋ yɩ o viiri. O na yi sɔŋɔ tɩn, o ma bəŋi o badonnǝ sɩ ba ba o sɔŋɔ, yɩ o bəŋi o kaanɩ Zerɛsɩ o wǝli da. 11 O laan ma ŋɔɔnɩ o brɩ o tɩtɩ dɩ o jɩjɩgɩrʋ, dɩ o bu-baara na daga te, dɩ pɛ na zǝŋi wʋntʋ sɩ o saŋɩ o kwaga pa tɩʋ kʋm nakwa dɩ nadunə maama maŋɩ sɩ ba taa kwar-o te tɩn. 12 Haman laan ma ta o wǝli da o wɩ: «Kʋlʋ na tiini kʋ dwe maama tɩn mʋ yɩ pa-kana Ɛsɩtɛɛrɩ na kɩ wʋdi-fɔrɔ sɩ pɛ wʋm ba o di tɩn, amʋ yɩranɩ mʋ o bəŋi sɩ a da a vu. O daa ma ta o wɩ dɩ́ ta joori jwa nɩ sɩ dɩ́ daa di daanɩ. 13 Amʋ nan na nɛ tɩntʋ maama, yɩ a joori a na Zwifǝ tu Mardose na je pɛ sɔŋɔ manchoŋo ni nɩ te tɩn, tɩntʋ maama yɩ kafɛ mʋ.»
14 O kaanɩ Zerɛsɩ dɩ o badonnǝ bam maama maa bwɛ dɩd-o ba wɩ: «Kʋ nan na yɩ kʋntʋ, pa ba cwi dɛ na dwara sɩ yi kantɩa ni maŋɩm kuni fiinnu tɩn. Laan le ŋʋnɩ tɩ yɩra nɩ sɩ jwa tɩtɩɩtɩ, n vu pɛ te n joŋi cwǝŋǝ sɩ n kuuri Mardose tɩ baŋa nɩ n gʋ. Kʋ kwaga nɩ, n laan wʋ́ tɔgɩ dɩ pɛ wʋm n vu n di dɩdaanɩ wʋpolo.»
Haman ma kwe ba bʋbʋŋɩ dɩm o kɩ o yuu nɩ, yɩ o pa ba cwi da-dɩdwaarʋ sɩ ba wanɩ ba kuuri Mardose tɩ baŋa nɩ.