Haman bʋŋɩ sɩ o ti Zwifǝ tiinə bam
3
Kʋ na kɩ fɩɩn tɩn, mʋ Pɛ Asuerusi zǝŋi Haman sɩ o ji wʋlʋ na saŋɩ pɛ kwaga o taa nii tɩʋ kʋm tɩn. Haman nan yɩ Amedata bu mʋ, yɩ o nuŋi Agagɩ dwi dɩm wʋnɩ.a 2 Pɛ wʋm ma pa o dɩdɛɛra balʋ na tʋŋɩ o sɔŋɔ kʋm nɩ tɩn maama ni sɩ ba tiiri tɩga nɩ ba ma zuli Haman. Ba maama ma sɛ ba kɩ kʋntʋ, yɩ Mardose yɩranɩ vɩn sɩ o tiiri o zul‑o. 3 Pɛ dɩdɛɛra badonnǝ bam maa yǝni ba bwe‑o ba wɩ: «Bɛŋwaanɩ mʋ n vɩn pɛ wʋm ni dɩm?» 4 Dɛ maama wʋnɩ, ba maa jɩg-o ba daanɩ sɩ o dɩ sɛ o tiiri, yɩ o ba sɛa. O laan ma ta o brɩ-ba o wɩ: o yɩ Zwifǝ tu mʋ, kʋ nan wʋ maŋɩ sɩ o tiiri kʋntʋ doŋ. Ba ma vu ba ta o taanɩ dɩm dɩ Haman, sɩ ba lwarɩ wʋntʋ wʋ́ ja kǝm dɩm tɩta. 5 Haman na lwarɩ nɩ Mardose vɩn sɩ o tiiri o pa‑o tɩn, mʋ o banɩ zaŋɩ. 6 O ta na lwarɩ nɩ Mardose yɩ Zwifǝ tu tɩn, o ma jeeli nɩ o na gʋ Mardose yɩranɩ, kʋ bá zuri o banɩ. O ma kɩ o wʋbʋŋa nɩ sɩ o cɔgɩ Zwifǝ tiinə balʋ maama na zʋʋrɩ Pɛ Asuerusi paarɩ dim laŋa kam nɩ tɩn.7 Pɛ Asuerusi paarɩ dim bɩna fugə-yale bɩnɩ dɩm wʋnɩ, dɩ pulim cana kam, ka yɩrɩ na yɩ Nisan tɩn wʋnɩ mʋ Haman pɛ ba ta jɔrɔ sɩ o lwarɩ cana kalʋ dɩ dɛ dɩlʋ cɩga cɩga o na wʋ́ wanɩ o kɩ o wʋbʋŋa yam tɩn. Jɔrɔ kʋm yɩrɩ mʋ ‹Purim›. Kʋ ma lɩ canɩ fugə-sɩle cana kam ka yɩrɩ na yɩ Adarɩ tɩn mʋ.b 8 Haman na lwarɩ kʋntʋ tɩn, o laan ma yi pɛ wʋm te yɩ o wɩ: «Nɔɔna badonnǝ mʋ jagɩ ba yi nmʋ paarɩ dim laŋa kam ni maama. Ba dwi dɩm zʋʋrɩ provɛnsa maama nɩ mʋ. Ba cullu nan yɩ tɩ yɩra mʋ dɩ nɔɔna maama cullu. Kʋ kwaga nɩ, ba ba tɔgɩ cullu yalʋ dɩbam na pɛ dɩ́ tɩʋ nɔɔna bam sɩ ba taa tɔgɩ tɩn. Kʋntʋ ŋwaanɩ, yɩ sɛ sɩ dɩbam dɩ ba taa zʋʋrɩ daanɩ. 9 Pɛ, nmʋ nan na sɛ a bʋbʋŋɩ dɩm, sɩ n pa ni n wɩ ba maŋɩ sɩ ba tɩ mʋ. Kʋntʋ na kɩa, amʋ wʋ́ kwe səbu duuni na wʋ́ yi kilo mʋrrʋ biə-yatɔ dɩ fiinna (340,000) tɩn a pa balʋ na nii tɩʋ kʋm tɩtʋŋa baŋa nɩ tɩn, sɩ ba tiŋi-tɩ nmʋ paarɩ dɩm ŋwaanɩ.»
10 Pɛ wʋm ma sɛ yɩ o daarɩ o lɩ o jɩŋa jafʋlɩ dɩlʋ na brɩ o dam tɩn, c o pa Haman. Wʋntʋ maa yɩ Agagɩ tu Amedata bu yɩ o culi Zwifǝ tiinə bam. 11 Pɛ wʋm ma ta dɩ Haman o wɩ: «Ta n jɩgɩ n səbu kʋm. Nɔɔna bam dɩ nan wʋ n jɩŋa nɩ, sɩ n kɩ-ba n na lagɩ te tɩn.»
12 Kʋ ma pa Haman bəŋi pɛ wʋm twan-pʋpʋnna, yɩ o pa ba pʋpʋnɩ twannʋ pɛ wʋm yɩrɩ ŋwaanɩ. O ta pɛ ba pʋpʋnɩ o ni dɩm dɩ tɩʋ maama dwi taanɩ, nɩnɛɛnɩ ba na yǝni ba pʋpʋnɩ-dɩ te tɩn. O laan ma kwe Pɛ Asuerusi jafʋlɩ dɩm o nyɩ tɩ baŋa nɩ, yɩ o wɩ ba ja-tɩ ba vu o paarɩ laŋa kam ni maama nɩ ba pa pɛ wʋm yigǝ tiinǝ, dɩ tɩɩnɩ yam dɩdɛɛra, dɩ dwi tiinə maama nakwa. Haman dɛɛn kɩ kʋntʋ pulim cana kam da fugə-yatɔ dɛ dɩm nɩ mʋ. 13 Balʋ na maŋɩ sɩ ba pa taanɩ dɩm jagɩ tɩn ma ja ni dɩm kʋntʋ ba vu Pɛ Asuerusi paarɩ dim laŋa tɩɩnɩ yam maama nɩ. Ni dɩm brɩ nɩ cwǝŋǝ tigə sɩ canɩ fugə sɩle cana kam, ka yɩrɩ na yɩ Adarɩ tɩn, da fugə-yatɔ dɛ nɩ, sɩ ba cɔgɩ Zwifǝ tiinə maama ba ti dɛ dɩdwɩ wʋnɩ. Kʋ na yɩ ba nɔɔn-dʋnnʋ, naa nankwɩn: naa kaana, naa bu-balwa dɩ, sɩ ba gʋ ba maama, yɩ ba daarɩ ba vrɩ ba jɩjɩgɩrʋ ba ja ba viiri. 14 Ba dɛɛn ma pa provɛnsɩ dɩ provɛnsɩ maama taa jɩgɩ dɩ tɔnɔ, sɩ nɔɔna maama wanɩ ba lwarɩ ni dɩm jaja, yɩ ba daarɩ ba ti yigə sɩ dɛ dɩm laan yi.
15 Pɛ wʋm ni dɩm ma pa balʋ na paɩ taanɩ dɩm jagɩ tɩn duri lɩla ba vu ba yi je maama. Ba ta ma tɔɔlɩ taanɩ dɩm Suzi dam je sɩm wʋnɩ. Pɛ wʋm dɩdaanɩ Haman maa je ba jɩgɩ sana ba nyɔa. Suzi tɩʋ kʋm nɔɔna maama wʋbʋŋa nan vugimi.