Ɛsɩtɛɛrɩ jigi pa-kana
2
Kʋ na wʋra kʋ wʋra tɩn, Pɛ Asuerusi banɩ ma tʋ. O laan ma yɔɔrɩ o bʋŋɩ Vasiti na kɩ te, dɩdaanɩ ni dɩlʋ o na pɛ o wɩ: o daa yɩ taa yɩ pa-kana tɩn. 2 Pɛ wʋm nakwa balʋ na mɩ dɩd-o tɩn ma bwɛ dɩd-o ba wɩ: «Nmʋ na pɛ cwǝŋǝ, dɩ́ wʋ́ pa ba beeri kabonə balʋ na lana yɩ ba yǝri baara tɩn. 3 Kuri dɩdɛɛra n paarɩ dim laŋa kam je maama nɩ, sɩ n pa-ba ni nɩ ba ja kabonə bantʋ ba ba Suzi nɩ yo seeni. Ba maa wʋ́ pa bukwa bam kʋntʋ zʋ pɛ sɔŋɔ di sɩlʋ ba na jɩgɩ pɛ kaana ŋwaanɩ tɩn, sɩ ba maŋɩ da. Nmʋ dɩdɛɛrʋ Egayi wʋlʋ na nii n kaana tɩna wʋ́ taa nii-ba, yɩ o pa ba kwe tralɩ nugə ba kwɛ-ba sɩ ba taa lana. 4 Nmʋ laan ma n wʋ́ nii bukɔ-laarʋ tɩm kʋntʋ wʋnɩ, n lɩ wʋlʋ na tiini o su n yi tɩn sɩ o ji pa-kana o ləri Vasiti yuu nɩ.»Pɛ wʋm na maanɩ nɩ bʋbʋŋɩ dɩm lana tɩn, o ma sɛ-dɩ.
5 Zwifǝ tu dɩdʋa dɩ dɛɛn tɔgɩ o zʋʋrɩ Suzi dam je sɩm nɩ. O yɩrɩ yɩ Mardose mʋ. O maa yɩ Yayiri bu, yɩ o nuŋi Bɛnzamɛn dwi dɩm wʋnɩ. Kisi dɩdaanɩ Simeyi dɩ dɛɛn yɩ o nabaara mʋ. 6 Maŋa kalʋ Babilɔnɩ tɩʋ pɛ Nebukadnɛtsarɩ dɛɛn na di Zuda tɩʋ pɛ Zekonɩa,b yɩ o coori o dɩ o nɔɔna o lɩ Zeruzalɛm nɩ o ja vu o tɩtɩ tɩʋ tɩn, Mardose dɩ dɛɛn tɔgɩ o wʋ ba wʋnɩ mʋ.c 7 O nan ya jɩgɩ o cʋrʋ yɩrɩ na yɩ Ɛsɩtɛɛrɩ. Wʋntʋ Ebru yɩrɩ dɛɛn yɩ Adasa mʋ. O nan ya yɩ bɩsankana kalʋ na lana cɩga cɩga tɩn mʋ, yɩ o yatɩga dɩ lana. Ɛsɩtɛɛrɩ ko dɩ o nu dɛɛn na tɩgɩ tɩn, mʋ Mardose lɛɛrɩ o kwe‑o o ji o tɩtɩ bukɔ, o jɩg-o o kɔna.
8 Pɛ wʋm ni-dʋʋrɩ dɩm ŋwaanɩ, ba dɛɛn ma ja bukwa zanzan ba vu Suzi dam je sɩm, yɩ Ɛsɩtɛɛrɩ dɩ dɛɛn wʋ ba wʋnɩ. Ba dɛɛn kwe o dɩ ba kɩ pɛ sɔŋɔ di sɩlʋ wʋnɩ Egayi na nii ba maama baŋa nɩ tɩn mʋ. 9 Ɛsɩtɛɛrɩ kənə ma su Egayi yi, pa o lagɩ o ni-taanɩ. Egayi ma pa ba taa maɩ nugə ba turi Ɛsɩtɛɛrɩ yɩra, yɩ o daarɩ o pa‑o wʋdi-ŋʋŋʋ sɩ o di. Egayi ta ja‑o o kɩ sɔ-fɔrɔ kʋm mɛ na jɩgɩ zulə cɩga cɩga tɩn nɩ mʋ, yɩ o daarɩ o kuri pɛ sɔŋɔ tɩntʋŋ-kaana barpɛ sɩ ba taa nii o baŋa nɩ.
10 Mardose nan ya maŋɩ o ta dɩ Ɛsɩtɛɛrɩ sɩ o yɩ pa nɔɔn-nɔɔnʋ lwarɩ nɩ o yɩ Zwifǝ tu, naa ba lwarɩ o na nuŋi sɔŋɔ kʋlʋ wʋnɩ tɩn. 11 Dɛ maama wʋnɩ, Mardose dɛɛn yǝni o kaagɩ pɛ kaana di sɩm kʋnkɔlɔ ni nɩ mʋ o kɩkara. O nan kɩ kʋntʋ sɩ o taa ye kʋ na yɩ te Ɛsɩtɛɛrɩ yɩra nɩ tɩn, dɩdaanɩ kʋlʋ na wʋ́ yi‑o tɩn mʋ.
12 Bukwa bam lam kwɛɛm yǝni dɩ kwe bɩnɩ mʋ. Ba maɩ Miiri nugə mʋ ba we ba yɩra yam canɩ sɩrdʋ, sɩ ba daa kwe tralɩ nugə ba turi-ba canɩ sɩrdʋ. Kʋntʋ kwaga nɩ, ba laan wʋ́ ja kabwənə bam mʋ dɩdʋa dɩdʋa ba zʋ Pɛ Asuerusi te. 13 Kabwəm wʋlʋ na maŋɩ sɩ o nuŋi kaana bam di sɩm nɩ o vu pɛ tɩtɩ digə kam, kʋ tu wʋ́ wanɩ o taa zʋʋrɩ gwaarʋ tɩlʋ maama o na lagɩ tɩn. 14 Ba nan maŋɩ sɩ ba ja kabwəm wʋm kʋntʋ ba vu ba zʋ pɛ te mʋ dɩdaan-ni maŋa nɩ. Tɩga maa na pʋʋrɩ, baá ja-o ba daa vu di sɩdonnǝ sɩm mɛ pɛ kaana badonnǝ bam na zʋʋrɩ da tɩn mʋ. Saasegazɩ nan mʋ yɩ dɩdɛɛrʋ wʋlʋ na nii pɛ ka-bi sɩm kʋntʋ tɩn. Pɛ wʋm na wʋ mɛ kabwəm wʋlʋ yɩrɩ o joori o bǝŋ-o, kʋ brɩ nɩ o yi wʋ su kʋ tu. O maa daa bá joori pɛ te.
15 Kʋ ma yi sɩ Abihali bukɔ Ɛsɩtɛɛrɩ dɩ zʋ pɛ wʋm te. Wʋntʋ yɩ Mardose cʋrʋ mʋ, yɩ Mardose ya ja‑o o ji o tɩtɩ bukɔ. Nɔɔna maama maa lagɩ Ɛsɩtɛɛrɩ ni-taanɩ. Ɛsɩtɛɛrɩ na lagɩ o zʋ pɛ wʋm te tɩn, o zʋ gwaarʋ tɩlʋ yɩranɩ pɛ dɩdɛɛrʋ Egayi na brɩ-o sɩ o zʋ tɩn mʋ. O wʋ kwe kʋlʋkʋlʋ o wǝli da. 16 Kʋ yɩ Asuerusi paarɩ dim bɩna yarpɛ bɩnɩ dɩm wʋnɩ canɩ fugə kam nɩ, mʋ ba dɛɛn jaanɩ Ɛsɩtɛɛrɩ ba zʋ pɛ-sɔŋɔ kʋm nɩ sɩ o zʋ Pɛ Asuerusi te. Cana kam kʋntʋ yɩrɩ yɩ ‹Tebeti› cana mʋ. 17 Pɛ wʋm wʋbʋŋa maa tɔgɩ Ɛsɩtɛɛrɩ sɩ kʋ dwǝni kabwənə babam bam dɩ o kaana bam maama. Ɛsɩtɛɛrɩ kǝm dɩ ma su pɛ wʋm yi, yɩ pɛ wʋm kɩ-o yu-yoŋo. O ma kwe pa-kana yu-pugə kam mʋ o pu o yuu nɩ, sɩ o taa yɩ pa-kana o ləri Vasiti yuu nɩ. 18 Kʋ kwaga nɩ mʋ pɛ wʋm dɛ Ɛsɩtɛɛrɩ ŋwaanɩ o kɩ candi-fara. O ma bəŋi o tɩʋ nakwa, dɩ o dɩdɛɛra maama sɩ ba jeeri ba di candiə kam. O ta ma pa ni o wɩ dɩ dɛ dɩm yɩ candiə siun dɛ mʋ, yɩ o daarɩ o kwe pɛɛra na maŋɩ dɩ pɛ tɩn o pa o nɔɔna bam.
Mardose cɩgɩ pɛ wʋm tʋʋnɩ
19 Kabwənə bam daa na jeeri daanɩ tɩn, dɩdaanɩ Mardose yǝni o je pɛ-sɔŋɔ ni nɩ o tʋŋɩ o pa pɛ wʋm mʋ. 20 Kʋ daarɩ, Ɛsɩtɛɛrɩ wʋ pɛ nɔɔn-nɔɔnʋ lwarɩ sɔŋɔ kʋlʋ o na nuŋi tɩn naa ba lwarɩ nɩ o yɩ Zwifǝ tu, nɩ Mardose na maŋɩ o brɩ-o sɩ o səgi o dwi dɩm te tɩn mʋ. O na sɛ o ni dɩm kʋntʋ tɩn tɔgɩ o dɛɛn na maŋɩ o kɩ te yɩ Mardose kɔn‑o tɩn mʋ.
21 Mardose dɛɛn na wʋ pɛ sɔŋɔ kʋm ni nɩ o tʋŋɩ o tɩtʋŋa tɩn, mʋ dɛ dɩdwɩ Bigetanɩ, dɩ Teresɩ bwɛ sɩ ba gʋ pɛ wʋm, ba na dʋn‑o tɩn ŋwaanɩ. Ba maa yɩ pɛ sɔŋɔ dɩdɛɛra balʋ na yɩrɩ o di sɩm tɩn mʋ. 22 Mardose ma ni kʋ ŋwa yɩ o vu o ta dɩ Ɛsɩtɛɛrɩ. Wʋntʋ dɩ ma pa pɛ wʋm lwarɩ Mardose na tagɩ kʋlʋ o brɩ-o tɩn. 23 Ba ma tʋŋɩ nɔɔna sɩ ba yɛ taanɩ dɩm wʋnɩ yɩ ba daarɩ ba maanɩ nɩ kʋ yɩ cɩga mʋ. Ba ma kuuri nɔɔna bale bam kʋntʋ dɩ ŋʋnɩ ba gʋ. Pɛ wʋm ma pa ba pʋpʋnɩ kənə yam kʋntʋ ba tiŋi ba tɩʋ pwa yɩra cɩbarɩ twannʋ tɩm wʋnɩ.