Ɛsɩtɛɛrɩ 1

Ɛsɩtɛɛrɩ Tɔnɔ

Pa-kana Vasiti gɛ o paarɩ

Wǝǝnu tɩntʋ maama dɛɛn kɩ tɩ maŋɩ dɩ Pɛ Asuerusi na di paarɩ tɩn mʋ. Pɛ wʋm kʋntʋ laŋa kam pɔɔrɩ kuni bi dɩ fiinle-bɩrpɛ (127) mʋ, ka zɩgɩ Ɩndɩ nɩ sɩ ka yi Etiyopi. 2 Ka tʋ-fɔrɔ kʋm maa yɩ Suzi, pɛ wʋm na di o paarɩ dɩm kʋ dam je sɩm nɩ tɩn. 3 O paarɩ dim bɩna yatɔ maŋa nɩ mʋ Asuerusi dɛɛn kɩ candi-fara o pa o nakwa, dɩ o tɩʋ kʋm nadunə maama. O ta ma bəŋi Pɛrsɩ dɩ Mɛdɩ jar-kərə babɛ sɩm, dɩdaanɩ dɩdɛɛra balʋ na nii o laŋa kam pɔɔrɩm sɩm tɩn, sɩ ba maama da ba jeeri candiə kam nɩ. 4 Balʋ o dɛɛn na bəŋi tɩn o kwe canɩ sɩrdʋ mʋ o ma o brɩ o paarɩ dɩm na tiini dɩ jɩgɩ nɩnwaŋa te, dɩ o sɔŋɔ kʋm jɩjɩgɩrʋ na daga te tɩn. 5 Kʋntʋ kwaga nɩ mʋ Pɛ Asuerusi ta kwe da yarpɛ o kɩ candi-fara o pa nɔɔna balʋ maama na zʋʋrɩ Suzi dam je sɩm wʋnɩ tɩn. O ma bəŋi nadunə dɩ nabwənə sɩ ba maama jeeri pɛ sɔŋɔ naboo nɩ, tweeru na wʋra tɩn. 6 Ba maa kwe garyi-pʋpʋrrʋ tɩlʋ na sɔgɩ dɩ gar-ŋʋm-pwe sɩm sɩ na yɩ parɩ parɩ tɩm, dɩ yalʋ na sɔgɩ dɩ lwannʋ gar-ŋʋm ponnu tɩm, dɩ garyiə yalʋ na nyɩ nɩ bʋla tɩn, dɩdaanɩ ŋʋm sɩlʋ ba na gwaanɩ gar-ŋʋm sɩlʋ na lana lanyɩranɩ ba ma ba kalɩ tɩm, dɩ gar-ŋʋm sɩm ba laan kuni kuni səbu-dala nafʋla sɩ niə nɩ, ba lə lə marbrɩ ywə yam ba na cwi tɩm yum nɩ. Ba maa kwe yitunnu tɩlʋ ba na mɛ səbu dɩ səbu-sɩŋa ba ma ba kɩ tɩm, ba tiŋi war-pʋlwarʋ nasʋnnʋ, dɩ naponnu, dɩ pʋpʋrrʋ, dɩ nazonnu baŋa nɩ. 7 Ba dɛɛn jɩgɩ səbu-sɩŋa zwɩ na yɩ yɩra yɩra tɩn mʋ ba nyɔ sana sɩ wʋnɩ. Pɛ wʋm wʋ-yoŋo kʋm ŋwaanɩ o dɛɛn pɛ sana bam daga ba yi nɔɔna bam maama. 8 O ma pa o tɩntʋŋna bam ni sɩ ba taa paɩ sana sɩ kʋ tɔgɩ nɔɔnʋ maama na lagɩ te tɩn.

9 Pɛ Asuerusi na kɩ te dɩ baara bam kʋntʋ tɩn, o kaanɩ Vasiti dɩ ya jɩgɩ candiə mʋ pɛ sɔŋɔ je sɩdonnǝ nɩ o kɩ o paɩ kaana bam. 10 Candiə kam da yarpɛ dim dɛ nɩ, mʋ pɛ wʋm wʋ tiini kʋ poli dɩ sa-nyɔrɩ. O ma bəŋi o dɩdɛɛra barpɛ balʋ na tʋŋɩ ba pa‑o tɩn sɩ ba ba o te. Bantʋ maa yɩ: Mehuman, dɩ Bizeta, dɩ Arbona, dɩ Bigeta, dɩ Abagata, dɩ Zetarɩ, kʋ wǝli dɩ Kakasɩ. 11 O ma pa-ba ni sɩ ba vu ba ta o kaanɩ Vasiti nɩ: o kwe o pa-kana yu-pugə kam o pu, sɩ ba laan ja-o ba ba o te. Vasiti na yɩ ka-laa tɩn ŋwaanɩ, pɛ wʋm ya lagɩ sɩ o nakwa dɩ o nɔɔna bam maama na wɩ o lam tiini dɩ gaalɩ. 12 Pɛ wʋm tɩntʋŋna bam na ve dɩ o ni dɩm tɩn, Vasiti ma vɩn sɩ o vu o te. Pɛ wʋm banɩ ma tiini dɩ zaŋɩ yɩ o warɩ o tɩtɩ sɩ o ja.

13 Kǝm dɩm kʋntʋ doŋ na kɩa, Pɛ wʋm yǝni o bəŋi swan tiinə balʋ na ye cɩga tɩn, sɩ o lwarɩ ba tɩʋ cullu tɩm na brɩ o na wʋ́ kɩ te sɩ lanyɩranɩ taa wʋra tɩn. 14 O dɛɛn ma ja taanɩ dɩm o yi swan tiinə balʋ na tiini ba mɩ dɩd-o tɩn. Karesena mʋ kʋntʋ, dɩ Setarɩ, dɩ Ademata, dɩ Tarsisi, dɩ Meresi, dɩ Masena, dɩdaanɩ Memukan. Nɔɔna barpɛ bam kʋntʋ dɛɛn mʋ yɩ nadunə Pɛrsɩ dɩdaanɩ Mɛdɩ laŋa kam nɩ ba dwe nɔɔna maama.

15 O ma bwe-ba o wɩ: «Amʋ tʋŋɩ a bəŋi pa-kana Vasiti mʋ yɩ o vɩn sɩ o ba. Dɩ́ tɩʋ cullu tɩm nan brɩ sɩ a kɩ-o tɩta mʋ?»

16 Memukan ma ləri Pɛ wʋm o wɩ: «Pa-kana Vasiti na kɩ o cɔgɩ te tɩn, o wʋ kɩ o ma o twɩ Pɛ wʋm yɩranɩ. Kʋ yɩ dɩbam balʋ na yɩ nmʋ nakwa bam tɩn mʋ o gooni, kʋ wǝli dɩ balʋ maama na zʋʋrɩ nmʋ paarɩ je sɩm ni maama nɩ tɩn. 17 O kǝm dɩm na tʋ kaana bam maama zwa nɩ, ba dɩ daa bá taa nɩgɩ ba banna yɩ baá ta dɩ ba ba wɩ: ‹Pɛ Asuerusi tɩtɩ tʋŋɩ o bəŋi o kaanɩ Vasiti mʋ yɩ o vɩn sɩ o vu o te.› 18 Zɩm tɩntʋ, Pɛrsɩ tiinə dɩdaanɩ Mɛdɩ tiinə nakwa bam kaana ni Vasiti kǝm dɩm ŋwa. Ba maa wʋ́ puli sɩ ba taa ləri ba banna yɔɔ yɩranɩ. Banɩgɩrʋ maa na wʋ́ gaalɩ tɩn, ba banna bam banɩ wʋ́ taa zaŋɩ dɩ ba mʋ.

19 Pɛ, nmʋ wʋ na dɛ tɩntʋ, sɩ n pa ni nɩ n daa n ba lagɩ sɩ Vasiti yi n yɩra maŋa dɩ maŋa, sɩ ba daarɩ ba pʋpʋnɩ-dɩ ba tiŋi Pɛrsɩ dɩ Mɛdɩ cullu twannʋ tɩm nɩ, sɩ kʋ yɩ taa yɩ kʋlʋ na wʋ́ ləri maŋa dɩ maŋa tɩn. N ma n ta wʋ́ ta sɩ wʋlʋ na gar-o tɩn ləri wʋntʋ yuu nɩ o ji nmʋ pa-kana. 20 Nmʋ ni dɩntʋ na loori yigə dɩ yi nmʋ paarɩ laŋa kam ni maama, kaanɩ maama laan wʋ́ lwarɩ sɩ o taa nɩgɩ o barʋ, dɩ kʋ tu na yɩ nadum naa nabwəm dɩ.»

21 Pɛ Asuerusi dɩdaanɩ o nakwa bam maama wʋ dɛɛn ma poli dɩdaanɩ Memukan taanɩ dɩm, yɩ o kɩ sɩ kʋ tɔgɩ taanɩ dɩm na brɩ te tɩn. 22 O ma pʋpʋnɩ twannʋ o tʋŋɩ o pa tɩɩnɩ dɩlʋ maama na wʋ wʋntʋ dam kuri nɩ tɩn sɩ tɩ brɩ o ni wɩ: baarʋ maama taa jɩgɩ dam o di o digə tiinə baŋa nɩ. Tɩʋ maama tɔnɔ kʋm pʋpʋnɩ dɩ ba dwi taanɩ, nɩnɛɛnɩ ba na yǝni ba pʋpʋnɩ-dɩ te tɩn.