Yisɩrayɛlɩ tiinə bam tusi kaana dim baŋa nɩ
9
Wǝǝnu tɩm kʋntʋ maama na kɩ tɩ kɛ tɩn, Zwifǝ tiinə yigǝ tiinǝ badaara ma ba ba ta dɩ amʋ ba wɩ: «Yisɩrayɛlɩ tiinə bam, dɩ ba kaanɩm tiinə dɩ Levi tiinə badonnǝ wʋ sɛ sɩ ba pwɛ ba tɩtɩ dɩ dwi-gɛ tiinə balʋ na maŋɩ ba zʋʋrɩ tɩga kam wʋnɩ tɩn. Bantʋ yɔɔrɩ ba kɩ tɩtʋŋ-zɔɔna yalʋ Kaanan tiinə, dɩ Hɛtɩ tiinə, dɩ Perezi tiinə, dɩ Yebusi tiinə, dɩ Amɔn tiinə, dɩ Moabɩ tiinə, dɩ Ezipi tiinə, dɩ Amɔɔrɩ tiinə bam maama na yǝni ba kɩ tɩn doŋ mʋ. 2 Kʋ nan na kɩ te tɩn, Yisɩrayɛlɩ tiinə baara mʋ ve ba kwe tɩɩnɩ dɩm kʋntʋ bukwa sɩ ba taa yɩ ba kaana. Ba ta di tɩɩnɩ dɩm bukwa mʋ ba pa ba biə. Kʋntʋ ma pa dwi dɩlʋ ya na yɩ dɩ yɩra Wɛ ŋwaanɩ tɩn laan digimi ba tɩtɩ dɩ dwiə yalʋ na gilimi-ba tɩn. Kʋ nan yɩ ba dɩdɛɛra bam dɩ ba yigǝ tiinǝ bam mʋ cɔgɩ ba dwǝni.»a3 Ba taanɩ dɩm yɔɔrɩ dɩ cɔgɩ a wʋʋ mʋ pa a ja a gwaarʋ a kaagɩ. A ta ma vaŋɩ a yuuywe, dɩ a twana a vuuri. A ma daarɩ a je tɩga nɩ dɩ wʋ-cɔgɔ.b 4 Balʋ maama na kwarɩ fʋʋnɩ dɩ Yisɩrayɛlɩ tiinə Baŋa-Wɛ niə yam tɩn ma ba, yɩ ba dɩ jǝni amʋ tee nɩ, balʋ na zɩgɩ Babilɔnɩ nɩ ba joori tɩn na kɩ ba cɔgɩ te tɩn ŋwaanɩ. Amʋ maa yɔɔrɩ a je dɩ wʋ-cɔgɔ kʋntʋ taan, sɩ kʋ yi dɩdaan-ni kaanɩm maŋa kam.
5 Dɩdaan-ni kaanɩm maŋa kam na yi tɩn, a ma zɩgɩ a ya na je mɛ dɩ a gwar-kɩkaarʋ tɩm tɩn a zaŋɩ wɛɛnɩ. A laan ma kuni a nadoonə, yɩ a daarɩ a zǝŋi a jɩn sɩm a jeeri a Tu Baŋa-Wɛ dɩm. 6 A ma loori Wɛ yɩ a wɩ:
«Amʋ Tu Wɛ, cavɩɩra tiini ya jɩgɩ-nɩ sɩ a kwǝni a yibiyə a nii nmʋ seeni. Dɩbam lwarɩm dɩm diini vili vili mʋ ya dwǝni dɩ́ yum tɩm na yi mɛ tɩn. Dɩ́ na cɔgɩ te tɩn maŋɩ kʋ din kʋ gaalɩ wɛyuu na wʋ mɛ tɩn mʋ. 7 Sɩ kʋ nuŋi faŋa tɩn, dɩbam dɩdaanɩ dɩ́ nabaara bam yɔɔrɩ dɩ́ kɩ dɩ́ cɔgɩ nmʋ yigə mʋ. Dɩ́ lwarɩm dɩm na wʋ dɩ́ yuu nɩ tɩn ŋwaanɩ nan mʋ pɛ tɩɩnɩ dɩdonnǝ pwa jɩgɩ dam dɩbam, dɩ dɩ́ pwa, dɩdaanɩ dɩ́ kaanɩm tiinə bam baŋa nɩ, pa ba gʋ dɩbam badonnǝ, yɩ ba ja dɩbam badonnǝ dɩ ba vu ba yagɩ ba tɩɩnɩ wʋnɩ. Ba ta vrɩ dɩbam jɩjɩgɩrʋ mʋ, yɩ ba ta kwǝri ba kɩ dɩbam cavɩɩra, nɩnɛɛnɩ kʋ na yɩ te dɩ́ yɩra nɩ zɩm tɩn.c
8 Lele kʋntʋ dɩbam Tu Baŋa-Wɛ nan kɩ yu-yoŋo dɩbam yuu nɩ maŋa kukugə kantʋ wʋnɩ, yɩ DƖ pa dɩ́ kɔgɔ fɩnfɩɩn joori kʋ nuŋi dɩ́ gabɛɛm dɩm wʋnɩ sɩ kʋ bəŋi DƖ yɩrɩ. DƖ ta pɛ dɩ́ na kugu je DƖ tɩtɩ tɩʋ kʋm nɩ, yɩ dɩ́ ŋwɩa joori ka kɩ lam. Dɩ́ laan nɛ siun fɩnfɩɩn dɩ́ gabɛɛm tɩtʋŋa yam baŋa nɩ. 9 Bɛŋwaanɩ, dɩ́ yɩ gambɛ mʋ.d Dɩ́ Tu Wɛ dɩm nan wʋ vɩn dɩbam DƖ yagɩ dɩ́ gabɛɛm dɩm wʋnɩ. DƖ dɛ DƖ sono kʋm baŋa nɩ mʋ, DƖ pa Pɛrsɩ pwa bam kɩ dɩbam lanyɩranɩ. DƖ ma pa dɩbam cwǝŋǝ sɩ dɩ́ taa ŋwɩ yɩ dɩ́ wanɩ dɩ́ joori dɩ́ lɔ dɩ́ Wɛ dɩm digə kam, dɩ́ daarɩ dɩ́ joori dɩ́ kwɛ-ka pa ka zɩgɩ. DƖ ma daarɩ DƖ kwǝli dɩbam Zeruzalɛm tɩʋ kʋm wʋnɩ, dɩ Zuda je sɩm maama nɩ.
10 Dɩbam Tu Wɛ, wǝǝnu tɩntʋ maama na kɩ tɩn, dɩ́ nan daa jɩgɩ bɛɛ mʋ sɩ dɩ́ ta? Dɩbam daa mʋ vɩn nmʋ niə yam, 11 nmʋ na tɔgɩ n nijoŋnǝ bam baŋa n kwe-ya n pa dɩbam tɩn. Nmʋ nijoŋnǝ bam kʋntʋ dɛɛn kaanɩ dɩbam ba wɩ: ‹Nɔɔna balʋ na zʋʋrɩ tɩga kalʋ á na wʋ́ zʋ ka wʋnɩ á joŋi-ka tɩn yɔɔrɩ ba kɩ tɩtʋŋ-zɔɔna mʋ. Tɩga kam ni maama maa su dɩdaanɩ ba wo-yɔɔrʋ kikiə, pa ka maama cɔgɩ. 12 Kʋntʋ ŋwaanɩ, abam yɩ sɛ sɩ á bukwa zʋ ba biə, sɩ á ta yɩ pa á biə dɩ di ba bukwa ba ma ji ba kaana.e Daa á yɩ wǝli-ba maŋa dɩ maŋa, naa á kɩ kʋlʋ na wʋ́ pa-ba yazurə tɩn. Á na pwɛ á tɩtɩ dɩ ba kʋntʋ, á kɔgɔ kʋm wʋ́ kɩ dam, yɩ á di tɩga kam ywəəni. Á ta wʋ́ daarɩ tɩga kam á pa á kwaga kam sɩ ba dɩ taa zʋʋrɩ da maŋa maama.›
13 Tɔ. Dɩ́ Tu Wɛ, dɩ́ nan ye nɩ dɩ́ wo-lwaanʋ tɩm na wʋ dɩ́ yuu nɩ tɩn ŋwaanɩ mʋ dɩ́ nɛ waarɩm dɩntʋ. Dɩ kʋ dɩ, nmʋ na waarɩ dɩbam te tɩn wʋ yi dɩ́ ya na maŋɩ sɩ dɩ́ joŋi-dɩ te tɩn. Bɛŋwaanɩ, nmʋ yagɩ dɩbam badaara mʋ, sɩ dɩ́ kɔgɔ fɩnfɩɩn taa wʋra sɩ kʋ bəŋi nmʋ yɩrɩ. 14 Kʋntʋ tɩn, dɩ́ wʋ́ wanɩ dɩ́ daa vɩn nmʋ niə yam sɩ dɩ́ di nɔn-balwaarʋ bantʋ bukwa na? Dɩ́ na kɩ kʋntʋ, nmʋ banɩ wʋ́ tiini dɩ zaŋɩ dɩ dɩbam mʋ, pa n cɔgɩ dɩbam maama n ti, yɩ dɩ́ wʋlʋwʋlʋ bá daarɩ. 15 Yisɩrayɛlɩ tiinə Baŋa-Wɛ, nmʋ yɩ cɩga tu mʋ. Nmʋ nan pɛ dɩbam lu dɩ́ gabɛɛm dɩm wʋnɩ pa dɩ́ kɔgɔ fɩnfɩɩn zɩm wʋ n yigə nɩ. Dɩ́ lwarɩm dɩm nan wʋ dɩ́ yuu nɩ mʋ, yɩ dɩ́ ba jɩgɩ bʋra nmʋ tee nɩ.»f