Balʋ na dɛ dɩ Esdrasɩ ba joori Zeruzalɛm tɩn yɩra
8
Pɛ Atazeregesɩ paarɩ dim maŋa nɩ mʋ dɩ́ zɩgɩ Babilɔnɩ tɩʋ nɩ sɩ dɩ́ joori dɩ́ vu Zeruzalɛm. Ba na jeeli sam yigǝ tiinǝ balʋ na tɔgɩ dɩ amʋ ba joori tɩn yɩra mʋ tɩntʋ:2 Geresom mʋ nuŋi Fineasɩ dwi kʋm nɩ.
Daniyɛlɩ ma nuŋi Itamarɩ dwi kʋm nɩ.
3 Sekanɩa bu Atusi ma nuŋi Davidi dwi kʋm nɩ.
Zakari dɩ baara bi dɩ fiinnu (150) badonnǝ ma nuŋi Parʋsɩ dwi kʋm nɩ. Baara bam kʋntʋ nabaara natɔga kam dɛɛn pʋpʋnɩ ka tiŋi tɔnɔ nɩ mʋ.
4 Zerasia bu Eli-Hoyenayi dɩ baara biə-yale (200) badonnǝ ma nuŋi Pahat-Moabɩ dwi kʋm nɩ.
5 Yahazeli bu Sekanɩa dɩ baara biə-yatɔ (300) badonnǝ ma nuŋi Zaatu dwi kʋm nɩ.
6 Zonatan bu Ebɛdɩ dɩ baara fiinnu (50) badonnǝ ma nuŋi Adin dwi kʋm nɩ.
7 Atalia bu Ezayi dɩ baara fusɩrpɛ (70) badonnǝ ma nuŋi Elam dwi kʋm nɩ.
8 Misɛɛlɩ bu Zebadia dɩ baara funɔnɔ (80) badonnǝ ma nuŋi Sefatɩa dwi kʋm nɩ.
9 Yehiyɛlɩ bu Abdɩasɩ dɩ baara biə-yale dɩ fugə-nana (218) badonnǝ ma nuŋi Zoabɩ dwi kʋm nɩ.
10 Yosifia bu Selomiti dɩ baara bi dɩ fusɩrdʋ (160) ma nuŋi Bani dwi kʋm nɩ.
11 Bebayi bu Zakari dɩ baara fiinle-nana (28) badonnǝ ma nuŋi Bebayi dwi kʋm nɩ.
12 Hakatan bu Yohanan dɩ baara bi dɩ fugə (110) badonnǝ ma nuŋi Azagadɩ dwi kʋm nɩ.
13 Elifelɛtɩ, dɩ Yeweli, dɩ Semaya, dɩ baara fusɩrdʋ (60) badonnǝ ma nuŋi Adonikam dwi kʋm nɩ.
14 Yutayi, dɩ Zakuri, dɩ baara fusɩrpɛ (70) badonnǝ ma nuŋi Bigavayi dwi kʋm nɩ.
Esdrasɩ kwe cwǝŋǝ o maa ve Zeruzalɛm
15 Amʋ Esdrasɩ dɛɛn ma ta sɩ dɩ́ kɔgɔ kʋm jeeri bu-tʋla kalʋ na duri kʋ maa ve Ahava seeni tɩn ni nɩ. Dɩ́ ma cwi dɩ́ vwə dɩ́ kɩ da yatɔ daanɩ. Amʋ na nii tɩn, mʋ a maanɩ nɩ Levi tiinə tǝrǝ dɩ́ kɔgɔ kʋm wʋnɩ, sɩ kaanɩm tiinə yɩra mʋ wʋra. 16 A laan ma tʋŋɩ a bəŋi yigǝ tiinǝ bantʋ: Eliezɛrɩ, dɩ Areli, dɩ Semaya, dɩ Elinatan, dɩ Yaribi, dɩ Elinatan, dɩ Natan, dɩ Zakari, dɩ Mesulam. A ta ma tʋŋɩ Yoyaribi, dɩ Elinatan kwaga nɩ, ba na yɩ yi-pʋrɩ-nyɩna tɩn ŋwaanɩ. 17 Amʋ laan ma tʋŋɩ-ba Ido tee nɩ. Wʋntʋ mʋ yɩ Levi tiinə balʋ na zʋʋrɩ Kasifia nɩ tɩn yigə tu. A ma brɩ-ba ba na wʋ́ ta kʋlʋ dɩ Ido dɩ o cʋrrʋ na tʋŋɩ Wɛ-digə kam tɩtʋŋa Kasifia nɩ tɩn. A dɛɛn lagɩ sɩ ba lɩ tɩntʋŋna sɩ ba ba ba taa tʋŋɩ ba pa Wɛ DƖ digə kam nɩ. 18 Dɩ́ Tu Wɛ dɩm nan na tʋ dɩbam yigə tɩn ŋwaanɩ mʋ ba tʋŋɩ Serebia sɩ o ba dɩ́ te. O dɛɛn yɩ Levi dwi tu na nuŋi Masili dwi kʋm nɩ tɩn mʋ. O maa yɩ wʋbʋŋa tu lanyɩranɩ. O biə dɩ o cʋrrʋ fugə-nana ma tɔgɩ dɩd-o ba ba. 19 Ba ta pɛ Hasabia, dɩ Ezayi, dɩ ba cʋrrʋ fiinle mʋ tɔgɩ ba ba dɩ́ tee nɩ. Bantʋ yɩ Merari dwi kʋm tiinə mʋ. 20 Kʋ ta wǝli da, ba pɛ Wɛ-digə kam tɩntʋŋna biə-yale dɩ fiinle (220) mʋ ba dɩ́ te. Pɛ Davidi dɩ o dɩdɛɛra bam dɛɛn mʋ kuri nɔɔna bam kʋntʋ nabaara sɩ ba yǝni ba tʋŋɩ ba wǝli Levi tiinə bam. Ba ma pʋpʋnɩ ba maama yɩra ba tiŋi tɔnɔ nɩ.
Ba na ti ba yigə sɩ ba kɛ te tɩn
21 Dɩ́ dɛɛn na wʋ Ahava bu-tʋla kam ni nɩ kʋntʋ tɩn, a ma pa ni sɩ dɩ́ vɔ ni dɩ́ ma dɩ́ tu dɩ́ tɩtɩ dɩ́ Tu Wɛ yigə nɩ. Dɩ́ ma loori Wɛ sɩ DƖ kwɛ dɩ́ cwǝŋǝ sɩ ka kɩ lam, sɩ DƖ daarɩ DƖ kwǝli dɩbam, dɩ dɩ́ biə, dɩdaanɩ dɩ́ jɩjɩgɩrʋ cwǝŋǝ kam yuu nɩ. 22 Kʋ na yɩ te tɩn, dɩ́ loori yigə dɩ́ ta dɩ pɛ wʋm nɩ: dɩ́ Tu Wɛ dɩm yǝni DƖ tʋ balʋ na zuli‑DƖ tɩn yigə nɩ sɩ cam yɩ yi-ba mʋ. Dɩ́ ta tagɩ nɩ: Wɛ banɩ yǝni dɩ zaŋɩ dɩ balʋ na vanɩ‑DƖ tɩn mʋ. Kʋ laan ma pa cavɩɩra jɩgɩ-nɩ sɩ a loori pɛ wʋm sɩ o pa dɩbam jar-kərə balʋ na dɔgɩ siseŋ-nɔɔna baŋa nɩ tɩn sɩ ba taa yɩrɩ dɩbam cwǝŋǝ kam yuu nɩ, sɩ dɩ́ dʋna yɩ daanɩ dɩbam.a 23 Kʋntʋ ŋwaanɩ dɩ́ ma vɔ ni yɩ dɩ́ ja Wɛ təŋə sɩ DƖ wǝli dɩbam. DƖ ma sɛ dɩ́ wɛ-loro kʋm.b
24 Amʋ ma lɩ nɔɔna fugǝ-bale kaanɩm yigǝ tiinǝ bam wʋnɩ. A ta ma kuri Serebia, dɩ Hasabia, dɩ ba cʋrrʋ fugə badonnǝ a wǝli da. 25 Amʋ laan ma maŋɩ səbu-poŋo tɩm, dɩ səbu-sɩŋa kam, dɩ zɩla yalʋ maama na maŋɩ sɩ ba ma-ya ba tʋŋɩ Wɛ-digə kam tɩtʋŋa tɩn, yɩ a daarɩ a kwe-tɩ a kɩ kaanɩm tiinə bam jɩŋa nɩ. Pɛɛra yam kʋntʋ mʋ pɛ wʋm, dɩ o nakwa bam, dɩ o dɩdɛɛra bam, dɩ Yisɩrayɛlɩ tiinə bam maama pɛa. 26 A na jeeli wǝǝnu tɩlʋ a kɩ ba jɩŋa nɩ tɩn mʋ tɩntʋ:
Səbu-poŋo tɩm duuni yɩ kilo mʋrrʋ fiinle (20,000) mʋ.
Səbu-poŋo zɩla bi (100) duuni yɩ kilo fusɩrpɛ (70).c
Səbu-sɩŋa kam duuni yɩ kilo mʋrrʋ tɩtɔ dɩ biə-yana (3,400) mʋ.
27 Səbu-sɩŋa zwɩ fiinle duuni yɩ kilo nana dɩ cicoro (8.5).
Canna zɩlɩ-laarʋ tɩle, tɩ na jɩgɩ yuu tɩ maŋɩ dɩ səbu-sɩŋa zɩla tɩn.
28 Amʋ ma ta dɩ kaanɩm tiinə bam a wɩ: «Abam pɔɔrɩ mʋ á yɩ á yɩra Baŋa-Wɛ ŋwaanɩ. Zɩla yantʋ dɩ nan pɔɔrɩ mʋ ya yɩ Baŋa-Wɛ nyɩm. Səbu-sɩŋa kam, dɩ səbu-poŋo tɩm maama yɩ nɔɔna bam wʋ-yoŋo pɛɛra mʋ ba na kwe ba pa abam nabaara Baŋa-Wɛ dɩm. 29 Taá nii-na tɩ baŋa nɩ lanyɩranɩ, sɩ á ja-tɩ á yi Zeruzalɛm Wɛ-digə kam wʋnɩ. Á na yi da, sɩ á kwe-tɩ á ja zʋ Wɛ-digə kam wʋnɩ á daarɩ á maŋɩ tɩ ni kaanɩm tiinə di sɩm nɩ. Á laan wʋ́ kwe-tɩ á kɩ Wɛ kaanɩm yigǝ tiinǝ bam, dɩ Levi tiinə, dɩ Yisɩrayɛlɩ sɔ-yuni yigǝ tiinǝ bam jɩŋa nɩ.»d
30 Amʋ na tagɩ kʋntʋ a ti tɩn, kaanɩm tiinə bam dɩ Levi tiinə bam ma sɛ sɩ ba ja səbu-poŋo tɩm, dɩ səbu-sɩŋa kam, dɩ lʋnnɩ zɩla yam kʋntʋ maama ba vu Zeruzalɛm ba tiŋi dɩbam Tu Wɛ-digə kam wʋnɩ.
Ba na zaŋɩ ba joori Zeruzalɛm te tɩn
31 Bɩn-dʋʋrɩ cana kam da fugə-yale dɛ dɩm wʋnɩ mʋ dɩ́ zaŋɩ Ahava bu-tʋla kam je sɩm nɩ sɩ dɩ́ vu Zeruzalɛm. Dɩbam na wʋ cwǝŋǝ yuu nɩ dɩ́ maa ve tɩn mʋ dɩ́ Tu Baŋa-Wɛ dɛɛn wʋ dɩ́ tee nɩ, yɩ DƖ cɩ dɩbam pa dɩ́ dʋna dɩ vɩnvɩrna wʋ daanɩ dɩbam. 32 Dɩ́ ma vu dɩ́ yi Zeruzalɛm, yɩ dɩ́ maŋɩ da dɩ́ sin da yatɔ.e
33 Da yana na kɛ tɩn, mʋ dɩ́ zʋ dɩ́ Tu Wɛ dɩm digə kam. Dɩ́ ma maŋɩ səbu-poŋo tɩm, dɩ səbu-sɩŋa kam, dɩ lʋnnɩ zɩla yam maama, yɩ dɩ́ daarɩ dɩ́ kwe-tɩ dɩ́ kɩ kaanɩm tu Yuri bu Meremɔtɩ jɩŋa nɩ. Fineasɩ bu Eleyazaarɩ dɩ maa wʋ o tee nɩ, kʋ wǝli dɩ Levi tiinə bale: Zozwe bu Yozabadɩ, dɩdaanɩ Enadadɩ bu Noadɩa. 34 Dɩ́ ma maŋɩ kʋlʋ maama dɩ́ na jaanɩ dɩ́ ba tɩn, yɩ dɩ́ jeeli-tɩ tɩ ni nɩ. Maŋa kam kʋntʋ nɩ nɔ́ɔ mʋ ba pʋpʋnɩ tɩ duuni dɩm maama ba tiŋi.
35 Nɔɔna balʋ maama na zɩgɩ Babilɔnɩ nɩ ba joori ba ba tɩn ma kwe vara ba zwɛ ba ma kɩ kaanɩm ba pa Yisɩrayɛlɩ tiinə Wɛ dɩm. Kʋ nan yɩ na-balɩ fugə-sɩle (12) mʋ ba gʋ Yisɩrayɛlɩ tiinə bam maama ŋwaanɩ, dɩ pi-balɩ funʋgʋ-sɩrdʋ (96), dɩ pəlbiə fusɩrpɛ-sɩrpɛ (77). Ba kwe vara bam kʋntʋ maama ba zwɛ ba kɩ kaanɩm ba pa Baŋa-Wɛ. Ba ta ma kwe bʋ-balɩ fugə-sɩle (12) ba kɩ lwarɩm saarɩm kaanɩm. 36 Nɔɔna bam ta ma kwe pɛ wʋm niə yalʋ o na pʋpʋnɩ tɔnɔ kʋm nɩ tɩn ba pa yigǝ tiinǝ dɩ dɩdɛɛra balʋ na nii Efratɩ wa-zʋʋrɩ seeni provɛnsɩ dɩm tɩn. Ba dɩ ma sɛ, yɩ ba wǝli nɔɔna bam dɩ ba Wɛ-digə kam tɩtʋŋa.