Esdrasɩ yɩra taanɩ
7
Kʋ na wʋra kʋ wʋra yɩ Atazeregesɩ ji Pɛrsɩ tɩʋ pɛ tɩn, mʋ nɔɔnʋ wʋdoŋ dɛɛn wʋra o yɩrɩ na yɩ Esdrasɩ. Esdrasɩ dɛɛn yɩ Seraya bu mʋ. Seraya maa yɩ Azarɩa bu. Azarɩa maa yɩ Hilkiya bu.a 2 Hilkiya maa yɩ Salum bu. Salum maa yɩ Sadoki bu. Sadoki maa yɩ Asituba bu. 3 Asituba maa yɩ Amari bu. Amari maa yɩ Azarɩa bu. Azarɩa dɩ maa yɩ Merayɔtɩ bu. 4 Merayɔtɩ maa yɩ Zerasia bu. Zerasia maa yɩ Uzi bu. Uzi maa yɩ Buki bu. 5 Buki maa yɩ Abisua bu. Abisua maa yɩ Fineasɩ bu. Fineasɩ maa yɩ Eleyazaarɩ bu, yɩ Eleyazaarɩ yɩ Wɛ kaanɩm yigə tu Arɔn bu.6 Esdrasɩ dɛɛn yɩ tɔnɔ tu mʋ, yɩ o zaasɩ Wɛ niə yam Moyisi na joŋi Yisɩrayɛlɩ tiinə Baŋa-Wɛ dɩm tee nɩ o pa-ba tɩn lanyɩranɩ. O dɩ ma nuŋi Babilɔnɩ nɩ o joori Zeruzalɛm. Pɛ wʋm nan ya pɛ‑o kʋlʋ maama o na lagɩ tɩn mʋ, bɛŋwaanɩ, o Tu Baŋa-Wɛ dɩm yu-yoŋo mʋ wʋ o yuu nɩ. 7 Yisɩrayɛlɩ tiinə badonnǝ, dɩ ba kaanɩm tiinə, dɩ Levi tiinə, dɩ lən-leenə, dɩ Wɛ-digə ni yɩrɩna, dɩ Wɛ-digə kam tɩntʋŋna bam maa tɔgɩ dɩd-o sɩ ba vu Zeruzalɛm. Pɛ Atazeregesɩ paarɩ dim bɩna yarpɛ bɩnɩ dɩm nɩ mʋ ba ve da. 8-9 Kʋ dɛɛn yɩ pulim cana kam pulim dɛ dɩm nɩ mʋ Esdrasɩ nuŋi Babilɔnɩ tɩʋ nɩ sɩ o vu Zeruzalɛm. O ma yi Zeruzalɛm canɩ sɩnu cana kam pulim dɛ dɩm nɩ mʋ, o Tu Wɛ dɩm na tʋ o yigə nɩ tɩn ŋwaanɩ.b 10 Kʋ nan na yɩ te tɩn, Esdrasɩ wʋbʋŋa dɛɛn jaanɩ sɩ o sɩɩnɩ o yiǝ o zaasɩ Baŋa-Wɛ niə yam, sɩ o taa kɩ o tɔgɩ-ya, yɩ o daarɩ o brɩ Yisɩrayɛlɩ tiinə bam ya zaasɩm dɩm dɩ ya cullu tɩm mʋ.c
Pɛ Atazeregesɩ na pɛ Esdrasɩ tɔnɔ kʋlʋ tɩn
11 Pɛ Atazeregesɩ nan ya kwe tɔnɔ mʋ o pa Esdrasɩ. Esdrasɩ dɛɛn yɩ Wɛ niə karanyɩna tu mʋ yɩ o ta yɩ Wɛ kaanɩm tu. O ma zaasɩ Baŋa-Wɛ niə yalʋ dɩ DƖ cullu tɩlʋ DƖ na pɛ Yisɩrayɛlɩ tiinə bam tɩn. Tɔnɔ kʋm wʋ wǝǝnu mʋ tɩntʋ:
12 «Amʋ Pɛ Atazeregesɩ yɩ pwa maama pa-farʋ mʋ.
Amʋ pʋpʋnɩ tɔnɔ kʋntʋ a pa Esdrasɩ na yɩ kaanɩm tu, yɩ o zaasɩ Wɛyuu Tu Wɛ dɩm niə yam tɩn. Yazurə taa wʋ n tee nɩ.
13 Amʋ pɛ ni sɩ a paarɩ dim je sɩm maama wʋnɩ, Yisɩrayɛlɩ tiinə, dɩ ba kaanɩm tiinə, dɩ Levi tiinə balʋ maama na kuri sɩ ba joori Zeruzalɛm, ba jɩgɩ cwǝŋǝ sɩ ba tɔgɩ-m ba viiri.d 14 Amʋ dɩ a nakwa barpɛ bam nan tʋŋɩ-m sɩ n vu n nii kʋ na yɩ te nɔɔna balʋ na zʋʋrɩ Zuda dɩ Zeruzalɛm je sɩm nɩ tɩn yɩra nɩ mʋ. Ve n nii nɔɔna bam kikiə maŋɩ dɩ n Tu Wɛ niə yalʋ DƖ na kɩ n jɩŋa nɩ tɩn naa ya wʋ maŋɩ. 15 Nan ta kwe səbu-poŋo, dɩ səbu-sɩŋa kalʋ amʋ dɩ a nakwa bam na wʋ́ pa‑m tɩn n wǝli da n ja n vu, sɩ n ma-tɩ n kɩ pɛɛrɩ n pa Yisɩrayɛlɩ tiinə Wɛ dɩm na zʋʋrɩ Zeruzalɛm tɩʋ wʋnɩ tɩn. Mʋ dɩ́ wʋbʋŋa na lagɩ sɩ n kɩ te tɩn. 16 Nmʋ na waɩ səbu-poŋo dɩ səbu-sɩŋa kalʋ maama Babilɔnɩ provɛnsɩ nɩ n laɩ, dɩ wʋ-yoŋo pɛɛra yalʋ Yisɩrayɛlɩ tiinə bam, dɩ ba kaanɩm tiinə na wʋ́ pa‑m sɩ ya wǝli Zeruzalɛm Wɛ-digə kam tɩtʋŋa ŋwaanɩ tɩn, sɩ n ja-tɩ n viiri.
17 Nan ta n ye sɩ n kwe səbu kʋm kʋntʋ n yəgi na-balɩ, dɩ pi-balɩ, dɩ pəlbiə, dɩ wʋdiu pɛɛra, dɩ sana pɛɛra. Nmʋ ma n wʋ́ ja-tɩ n vu abam Wɛ dɩm digə kam Zeruzalɛm nɩ, n kɩ kaanɩm DƖ bimbim dɩm baŋa nɩ n pa‑o. 18 Səbu-poŋo dɩ səbu-sɩŋa kalʋ na daarɩ, sɩ nmʋ dɩ n donnǝ bam kwe-tɩ á kɩ á na lagɩ te tɩn sɩ kʋ maŋɩ dɩ á Tu Wɛ wʋbʋŋa yam. 19 Kʋ nan na yɩ zɩla yalʋ amʋ na kwe a kɩ n jɩŋa nɩ sɩ ya wǝli Wɛ-digə kam tɩtʋŋa tɩn, sɩ n ja-ya n joori Zeruzalɛm n pa abam Wɛ dɩm. 20 Abam nan na gɛ woŋo sɩ á ma á tʋŋɩ Wɛ-digə kam tɩtʋŋɩ dɩlʋ maama, n jɩgɩ cwǝŋǝ sɩ n joŋi səbu dɩ́ tɩʋ paarɩ dim sǝbiǝ yam wʋnɩ.
21 Amʋ, Pɛ Atazeregesɩ nan ta pɛ ni dɩntʋ mʋ a sǝbu-tiŋnǝ balʋ maama na nii Efratɩ bugə kam wa-zʋʋrɩ seeni provɛnsɩ dɩm tɩn: Kɩ-na kʋlʋ maama Wɛ kaanɩm tu Esdrasɩ na lagɩ tɩn á pa‑o lɩla. Wʋntʋ nan ta yɩ Wɛyuu Tu Wɛ dɩm niə yam karanyɩna tu mʋ. 22 Á wʋ́ pa‑o o na wʋ́ bwe kʋlʋ á tee nɩ sɩ kʋ yi səbu-poŋo kilo mʋrrʋ tɩtɔ dɩ biə-yana (3,400), dɩ mɩnae ywəllu biə-yatɔ (300), dɩ sana kʋrɩwaa biə bi (100), dɩ nugə kʋrɩwaa biə bi (100). Kʋ nan na yɩ yɛ, sɩ á yɩ jeeli dɩ ni. 23 Taá ye-na sɩ á kwe kʋlʋ maama Wɛyuu Tu Wɛ dɩm na laga DƖ digə kam tɩtʋŋa ŋwaanɩ tɩn á pa Esdrasɩ. Bɛŋwaanɩ, kʋ daɩ sɩ DƖ banɩ zaŋɩ dɩ amʋ naa balʋ na saŋɩ amʋ kwaga ba di paarɩ tɩn. 24 Amʋ nan ta pɛ ni nɩ: kʋ na yɩ Wɛ kaanɩm tiinə, dɩ Levi tiinə, dɩ lən-leenə, dɩ Wɛ-di-kamunu ni-yɩrɩna, dɩ ka tɩntʋŋna, dɩ balʋ na tʋŋɩ tɩtʋŋa yadonnə Wɛ-digə kam ŋwaanɩ tɩn, kʋ daɩ sɩ á joŋi lampoo bantʋ tee nɩ.
25 Kʋ nan na yɩ nmʋ Esdrasɩ, kwe swan yalʋ n Tu Wɛ dɩm na pɛ‑m tɩn, sɩ n kuri nɔɔna badonnǝ sɩ ba taa nii balʋ maama na zʋʋrɩ Efratɩ bugə kam wa-zʋʋrɩ seeni yɩ ba tɔgɩ nmʋ Tu Wɛ dɩm niə yam tɩn. Dɩdɛɛra bam kʋntʋ wʋ́ tɔgɩ cɩga ba di nɔɔna bam taana ba pa-ba. Balʋ nan na yǝri Wɛ niə yam tɩn, sɩ n kwe-ya n brɩ-ba.f 26 Wʋlʋ na vɩn nmʋ Wɛ dɩm niə yam, dɩ amʋ paarɩ niə yam, ba maŋɩ sɩ ba yɔɔrɩ ba waarɩ kʋ tu mʋ. Ba na wʋ gʋ-o, sɩ ba magɩ gulu ba zǝl-o o tɩʋ wʋnɩ. Kʋ na daɩ kʋntʋ, sɩ ba vrɩ o jɩjɩgɩrʋ, naa ba vɔ‑o ba pɩ digə nɩ.»
Esdrasɩ kɩ Wɛ le
27 Esdrasɩ ma ta o wɩ: «Baŋa-Wɛ na yɩ dɩ́ nabaara Wɛ tɩn maŋɩ dɩ tiə mʋ! Dɩntʋ mʋ pɛ pɛ wʋm wʋbʋŋa ja sɩ Wɛ-di-kamunu kalʋ na wʋ Zeruzalɛm wʋnɩ tɩn na zulə yantʋ doŋ. 28 Baŋa-Wɛ ta tɔgɩ DƖ sono kʋm baŋa DƖ pa amʋ kikiə su pɛ wʋm yi, yɩ o nakwa dɩ o dɩdɛɛra dɩ nɩgɩ-nɩ. Amʋ Tu Wɛ yu-yoŋo na wʋ amʋ yuu nɩ tɩn ŋwaanɩ mʋ a nɛ baarɩ. Amʋ ma la Yisɩrayɛlɩ yigǝ tiinǝ badonnǝ a kɩ daanɩ, a daarɩ a pa ba tɔgɩ dɩ amʋ ba vu Zeruzalɛm.»