Pɛ Dariusi na ləri te tɩn
6
Pɛ Dariusi ma pa ni sɩ nɔɔna vu ba na yǝni ba tiŋi Babilɔnɩ tɩʋ cɩbara gulə twaanʋ tɩm mɛ tɩn ba beeri tɩ wʋnɩ sɩ ba nii. 2 Kʋ dɛɛn nan yɩ Mɛdɩ provɛnsɩ dɩm tʋ-fɔrɔ Ekebatana wʋnɩ mʋ ba nɛ tɔnɔ, yɩ kʋ wʋ taanɩ mʋ tɩntʋ:3 «Pɛ Sirusi paarɩ dim pulim bɩnɩ dɩm wʋnɩ mʋ o pɛ ni na tɔgɩ Zeruzalɛm Wɛ-di-kamunu kʋm seeni tɩn.a O ni dɩm yɩ sɩ ba joori ba lɔ-ka sɩ ka taa yɩ jǝgǝ kalʋ ba na wʋ́ taa kɩ ba kaanɩm da tɩn mʋ. Ba maŋɩ sɩ ba cwi ka kabri-kuri kam, yɩ ba pa digə kam wɛyuu dɩdwarɩm taa yɩ kantɩ fusɩrdʋ (60), sɩ ka yalɩm seeni dɩ taa yɩ kantɩ fusɩrdʋ (60). 4 Ba nan wʋ́ kwe kandwa-zana mʋ sɩ ba na tiŋi-ya yɩ ba lɔ kəbrə kam kuni bɩtɔ, sɩ ba kwe dɛ gɩna dɩdʋa ba lɔ ba daŋɩ da. Ba maŋɩ sɩ ba lɩ səbu dɩ́ tɩʋ paarɩ dim sǝbiǝ wʋnɩ mʋ ba ma ŋwɩ Wɛ-digə kam lɔɔm jɩnɩ dɩm. 5 Kʋ ta wǝli da, səbu-sɩŋa dɩ səbu-poŋo zɩla yalʋ Pɛ Nebukadnɛtsarɩ dɛɛn na lɩ Zeruzalɛm Wɛ-digə kam wʋnɩ o ja o vu o tiŋi Babilɔnɩ nɩ tɩn maŋɩ sɩ ba joori ba ja-tɩ mʋ ba vu ba zɩgɩ tɩ ya na wʋ Wɛ-digə kam je sɩlʋ wʋnɩ tɩn.»
6 Pɛ Dariusi laan ma pa ni o wɩ:
«Tatenayi na yɩ Efratɩ bugə kam wa-zʋʋrɩ seeni provɛnsɩ yigə tu tɩn, dɩ Setar-Bozɩnayi, dɩ á donnǝ yigǝ tiinǝ bam na wʋ Efratɩ bugə kam wa-zʋʋrɩ seeni tɩn, taá ye-na sɩ á yɩ twɛ ba lɔɔm je sɩm! 7 Yɩ daanɩ-na nɔɔna bam na wʋra ba lɔ Wɛ-digə kam tɩn. Yagɩ-na Zwifǝ tiinə yigə tu wʋm dɩ ba nakwa bam sɩ ba joori ba lɔ ba Wɛ-digə kam ka jǝgǝ nɩ.
8 Amʋ nan ta pɛ ni mʋ sɩ abam lwarɩ á na wʋ́ kɩ te á wǝli Zwifǝ tiinə nakwa bam sɩ ba lɔ ba Wɛ-digə kam tɩn. Lampoo kʋlʋ á na laɩ amʋ yɩrɩ ŋwaanɩ Efratɩ bugə kam wa-zʋʋrɩ seeni provɛnsɩ dɩm nɩ tɩn mʋ á wʋ́ lɩ kʋ wʋnɩ á pa-ba sɩ kʋ ma ŋwɩ ba lɔɔm jɩna yam maama, sɩ kʋlʋkʋlʋ yɩ cɩ tɩtʋŋa yam. 9 Dɛ maama wʋnɩ nan ta pa-na kaanɩm tiinə balʋ na wʋ Zeruzalɛm nɩ tɩn ba na lagɩ kʋlʋ maama sɩ ba ma kɩ kaanɩm ba pa Wɛyuu Tu Wɛ dɩm tɩn. Ba na lagɩ na-balɩ, dɩ pi-balɩ, dɩ pəlbiə sɩ ba zwɛ ba ma kɩ kaanɩm, naa ba na lagɩ mɩna, dɩ yɛ, dɩ sana, dɩ nugə, sɩ á yɔɔrɩ á pa-ba. 10 Kɩ-na kʋntʋ maama á pa-ba sɩ ba wanɩ ba kɩ kaanɩm dɩlʋ na wʋ́ poli Wɛyuu Tu Wɛ dɩm wʋʋ tɩn, sɩ ba daarɩ ba loori Wɛ sɩ DƖ pa amʋ dɩ a biə yazurə.
11 Nɔɔnʋ wʋlʋ nan na vɩn amʋ ni dɩm, sɩ baá lɩ o digǝ bǝŋǝ mʋ, ba vɔ-o ka yɩranɩ, ba mag-o ba pa kʋ cɛ o yɩra lanyɩranɩ, ba daarɩ ba kuuri kʋ tu ban bǝŋǝ kam yɩra nɩ, ba laan pa o sɔŋɔ kʋm ji puuri. 12 Wɛ dɩlʋ na kuri Zeruzalɛm tɩʋ kʋm sɩ nɔɔna zuli DƖ yɩrɩ kʋ wʋnɩ tɩn nan wʋ́ pa lɛɛrʋ yi pɛ wʋlʋ, dɩ nabiin-dwi dɩlʋ maama na wʋ́ kwaanɩ sɩ o ləri amʋ ni dɩm tɩn. Lɛɛrʋ ta wʋ́ yi balʋ maama na bʋŋɩ sɩ ba cɔgɩ Wɛ-digə kalʋ na wʋ Zeruzalɛm nɩ tɩn.
Amʋ Dariusi mʋ pɛ ni dɩntʋ. Nɔɔnʋ maama nan maŋɩ sɩ o sɛ-dɩ mʋ lanyɩranɩ.»
Ba kwe Wɛ-digə kam ba pa Baŋa-Wɛ
13 Tatenayi na yɩ Efratɩ bugə kam wa-zʋʋrɩ seeni provɛnsɩ yigə tu tɩn, dɩ Setar-Bozɩnayi, dɩ ba donnǝ yigǝ tiinǝ bam ma yɔɔrɩ ba tɔgɩ pɛ wʋm ni dɩm. 14 Zwifǝ tiinə nakwa bam daa ta ma lɔ Wɛ-digə kam ba vu yigə lanyɩranɩ, yɩ Wɛ nijoŋnə Aze dɩ Ido bu Zakari dɩ maa tɔɔlɩ Wɛ kwǝrǝ ba paɩ-ba baarɩ.b Ba ma sɩɩnɩ ba lɔ-ka ba ti, nɩnɛɛnɩ Yisɩrayɛlɩ tiinə Wɛ dɩm na pɛ-ba ni sɩ ba kɩ te tɩn, yɩ Pɛrsɩ tɩʋ pwa Sirusi, dɩ Dariusi, dɩ Atazeregesɩ dɩ pa-ba ni te tɩn. 15 Kʋ nan yɩ Pɛ Dariusi paarɩ dim bɩna yardʋ bɩnɩ dɩm wʋnɩ, Adarɩ cana kam da yatɔ dɛ nɩ mʋ ba lɔgɩ-ka ba ti.
16 Yisɩrayɛlɩ tiinə bam maama, dɩ ba kaanɩm tiinə, dɩ Levi tiinə, dɩdaanɩ nɔɔna balʋ maama na zɩgɩ Babilɔnɩ nɩ ba joori tɩn laan ma kwe Wɛ-digə kam ba pa Wɛ dɩ wʋpolo.c 17 Ba dɛɛn mɛ na-balɩ bi mʋ, dɩ pi-balɩ biə-yale, dɩ pəlbiə biə-yana ba kɩ kaanɩm ba ma loori Wɛ yu-yoŋo ba pa Wɛ-digə kam. Ba ta kwe bʋ-balɩ fugə-sɩle mʋ ba ma kɩ lwarɩm saarɩm kaanɩm Yisɩrayɛlɩ dwiə fugə-yale yam ŋwaanɩ. 18 Ba ma pɔɔrɩ kaanɩm tiinə bam dɩ Levi tiinə bam kɔgɔ kɔgɔ sɩ kɔgɔ maama taa jɩgɩ kʋ tɩtʋŋa ba tʋŋɩ ba paɩ Wɛ Zeruzalɛm wʋnɩ, nɩnɛɛnɩ kʋ na pʋpʋnɩ Moyisi niə tɔnɔ kʋm nɩ te tɩn.
Ba di Pakɩ candiə kam
19 Balʋ na zɩgɩ Babilɔnɩ nɩ ba joori tɩn dɛɛn ma di Pakɩ candiə kam bɩn-dʋʋrɩ cana kam da fugə-yana dɛ nɩ. 20 Kaanɩm tiinə bam, dɩ Levi tiinə bam maama nan ya kwɛ ba tɩtɩ Wɛ ŋwaanɩ mʋ sɩ ba maŋɩ dɩ cullu tɩm. Levi tiinə bam ma gʋ Pakɩ kaanɩm pəlbiə sɩ ba ma kwɛ nɔɔna balʋ na joori tɩn, dɩ ba donnǝ kaanɩm tiinə bam, dɩ ba tɩtɩ dɩ. 21 Yisɩrayɛlɩ tiinə balʋ maama na nuŋi Babilɔnɩ nɩ ba joori ba ba tɩn ma di Pakɩ candiə kam. Balʋ maama dɩ na pɔɔrɩ ba tɩtɩ dɩ wo-zɔɔna kikiə yalʋ dwi-gɛ tiinə bam na kaagɩ ba kɩ tɩn, yɩ ba laan ba sɩ ba zuli Yisɩrayɛlɩ tiinə Baŋa-Wɛ wʋm tɩn ma tɔgɩ ba di candiə kam. 22 Ba ta ma kwe da yarpɛ ba di Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam dɩ wʋpolo. Baŋa-Wɛ dɛɛn pɛ ba di ywəəni dɩ DƖ na pipiri Asiiri tɩʋ pɛ wʋbʋŋa pa o wǝli-ba sɩ ba wanɩ ba joori ba lɔ Yisɩrayɛlɩ tiinə Wɛ dɩm digə kam ba zɩgɩ te tɩn.