Ba daa puli sɩ ba lɔ Wɛ-di-kamunu kʋm
5
Maŋa kam kʋntʋ nɩ, Wɛ nijoŋnə Aze dɩ Ido bu Zakari dɛɛn zaŋɩ ba ŋɔɔnɩ Baŋa-Wɛ kwǝrǝ kam ba brɩ Zwifǝ tiinə balʋ na zʋʋrɩ Zuda provɛnsɩ dɩm nɩ, dɩ Zeruzalɛm tɩʋ kʋm wʋnɩ tɩn. Ba kwe Yisɩrayɛlɩ tiinə Baŋa-Wɛ dɩm yɩrɩ mʋ ba ŋɔɔnɩ dɩ ba, Dɩntʋ na yɩ dɩlʋ na nii-ba tɩn ŋwaanɩ.a 2 Salatɩyɛlɩ bu Zorobabɛlɩ dɩ Yozadaki bu Zozwe na ni ba taanɩ dɩm tɩn, mʋ ba sɩŋɩ sɩ ba joori ba lɔ Zeruzalɛm Wɛ-digə kam. Wɛ nijoŋnǝ bam dɛɛn maa wʋ ba tee nɩ sɩ ba taa wǝli-ba.b3 Tatenayi dɛɛn mʋ yɩ Efratɩ bugə kam wa-zʋʋrɩ seeni provɛnsɩ dɩm yigə tu. O ma tɔgɩ dɩ Setar-Bozɩnayi, dɩ ba donnǝ yigǝ tiinǝ bam o vu Zwifǝ tiinə bam te yɩ o bwe-ba o wɩ: «Wɔɔ mʋ pɛ abam cwǝŋǝ sɩ á joori á lɔ Wɛ-digə kam, sɩ á daarɩ á kwɛ-ka á zɩgɩ?» 4 Ba ta ma ta ba wɩ: «Pʋpʋnɩ-na balʋ na wʋra ba lɔ-ka tɩn yɩra á pa dɩbam sɩ dɩ́ nii.» 5 Pɛrsɩ tɩʋ dɩdɛɛra bam nan wʋ cɩgɩ tɩtʋŋa yam, Baŋa-Wɛ yi na pagɩ Zwifǝ tiinə nakwa bam baŋa nɩ tɩn ŋwaanɩ.c Dɩdɛɛra bam dɛɛn bʋŋɩ sɩ ba pʋpʋnɩ tɔnɔ ba tʋlɩ taanɩ dɩm ba brɩ Pɛ Dariusi mʋ, sɩ o na ləri-kʋ, sɩ ba laan lwarɩ ba na wʋ́ kɩ te tɩn.
6 Tatenayi, dɩ Setar-Bozɩnayi, dɩ ba donnǝ yigǝ tiinǝ bam na wʋ Efratɩ bugə kam wa-zʋʋrɩ seeni tɩn na pʋpʋnɩ tɔnɔ kʋlʋ ba pa Pɛ Dariusi tɩn mʋ tɩntʋ:
7 «Pɛ Dariusi, yazurə taa wʋ n tee nɩ.
8 Dɩ́ lagɩ sɩ n lwarɩ nɩ dɩbam ve Zuda provɛnsɩ dɩm nɩ, yɩ dɩ́ na digə kalʋ ba na wʋra ba lɔ sɩ ba pa Wɛ-kamunu kʋm tɩn. Nɔɔna bam jɩgɩ kandwa-zana mʋ ba ma lɔ-ka, yɩ ba kwe dɛ ba kɩ ka yɩra nɩ. Tɩntʋŋna bam nan zuri yɩra mʋ ba tʋŋa dɩ yi-sɩɩna, yɩ lɔɔm dɩm ve yigə lanyɩranɩ.
9 Dɩ́ ma bwe ba nakwa dɩ́ wɩ: ‹Wɔɔ mʋ pɛ abam cwǝŋǝ sɩ á joori á lɔ Wɛ-digə kam, sɩ á daarɩ á kwɛ-ka á zɩgɩ?› 10 Dɩ́ nan ta bwe sɩ dɩ́ lwarɩ tɩntʋŋna bam yɩra mʋ sɩ dɩ́ pʋpʋnɩ, sɩ n lwarɩ balʋ na wʋ ba tɩtʋŋa yam yigə nɩ tɩn.
11 Ba dɩ ma ləri ba wɩ: ‹Dɩbam yɩ Wɛ dɩlʋ na te wɛyuu dɩ tɩga baŋa tɩn tɩntʋŋna mʋ. Dɩ́ nan wʋra dɩ́ joori dɩ́ lɔ Wɛ-digə kalʋ Yisɩrayɛlɩ pa-kamunu wʋdoŋ dɛɛn na lɔgɩ yɩ o fɔgɩ o kwɛ-ka o zɩgɩ tɩn mʋ. 12 Dɩbam nabaara dɛɛn ya pɛ Wɛyuu Tu Wɛ dɩm banɩ mʋ zaŋɩ dɩ ba. DƖ dɩ ma vɩ-ba DƖ kɩ Babilɔnɩ tɩʋ pɛ Nebukadnɛtsarɩ na yɩ Kalde dwi tu tɩn jɩŋa nɩ pa o ba o cɔgɩ ba Wɛ-digə kam. O dɛɛn ta ma kalɩ-ba o ja o vu o tɩtɩ tɩʋ sɩ ba taa zʋʋrɩ da.d 13 Kʋ nan na yɩ te tɩn, Pɛ Sirusi dɩ dɛɛn daa na joŋi Babilɔnɩ paarɩ o di tɩn, o paarɩ dim pulim bɩnɩ dɩm wʋnɩ mʋ o pɛ ni sɩ Zwifǝ tiinə joori ba lɔ Wɛ-digə kam. 14 Pɛ Sirusi dɛɛn kwe səbu-sɩŋa dɩ səbu-poŋo zɩla yalʋ Pɛ Nebukadnɛtsarɩ ya na lɩ Zeruzalɛm Wɛ-digə kam nɩ o daarɩ o ja-tɩ o vu o zɩgɩ o tɩtɩ jwǝnǝ digə kam nɩ tɩn mʋ o joori o pa dɩbam. O dɛɛn ma kwe-tɩ o kɩ Sesebazarɩ jɩŋa nɩ sɩ o ta nii tɩ baŋa nɩ. Pɛ wʋm ya tiŋi wʋntʋ sɩ o taa yɩ Zuda provɛnsɩ dɩm yigə tu mʋ, 15 yɩ o daarɩ o pa‑o ni sɩ o ja zɩla yam kʋntʋ o joori o vu Zeruzalɛm o tiŋi Wɛ-digə kam nɩ. O ta wʋ́ joori o lɔ Wɛ-digə kam o zɩgɩ ka dɛɛn na maŋɩ ka wʋ je sɩlʋ tɩn nɩ. 16 Sesebazarɩ nan sɩɩnɩ o kɩ kʋntʋ mʋ, pa o puli o cwi Wɛ-digə kam kabri-kuri Zeruzalɛm nɩ. Kʋ na zɩgɩ maŋa kam kʋntʋ nɩ sɩ kʋ yi zɩm tɩn, dɩ́ yɔɔrɩ dɩ́ wʋra dɩ́ lɔ Wɛ-digə kam mʋ. Tɩtʋŋa yam nan ta wʋ ti.›
17 Pɛ, kʋntʋ ŋwaanɩ nan dɩ́ loori‑m mʋ sɩ n pa ba buŋi Babilɔnɩ tɩʋ cɩbara gulə twaanʋ tɩm wʋnɩ, sɩ ba nii Pɛ Sirusi sɩɩnɩ o pa ni nɩ ba joori ba lɔ Zeruzalɛm Wɛ-digə kam naa o wʋ kɩ kʋntʋ. Nmʋ laan na nɛ kʋlʋ na wʋra tɩn, sɩ n brɩ dɩbam n wʋbʋŋa na jaanɩ te tɩn.»