Zwifǝ tiinə dʋna cɩgɩ Wɛ-digə kam lɔɔm
4
Zuda dwi dɩm dɩdaanɩ Bɛnzamɛn dwi dɩm dʋna dɛɛn ma ni nɩ balʋ na zɩgɩ Babilɔnɩ nɩ ba ba tɩn wʋra ba joori ba lɔ Yisɩrayɛlɩ tiinə Baŋa-Wɛ wʋm digə kam mʋ. 2 Ba na ni tɩn, ba ma vu Zorobabɛlɩ dɩ sam dɩm yigǝ tiinǝ te ba ta ba wɩ: «Dɩbam dɩ zuli á Tu Wɛ nɩnɛɛnɩ abam na kɩ te tɩn mʋ. Kʋ zɩgɩ maŋa kalʋ Asiiri tɩʋ pɛ Esar-Adɔn na jaanɩ dɩbam o ba o yagɩ yo seeni tɩn, dɩ́ yɔɔrɩ dɩ́ kɩ kaanɩm dɩ́ pa‑DƖ mʋ. Dɩ́ nan tu sɩ dɩ́ wǝli abam wʋnɩ mʋ sɩ dɩ́ lɔ Wɛ-digə kam.»a 3 Zorobabɛlɩ, dɩ Zozwe, dɩ Yisɩrayɛlɩ sam yigǝ tiinǝ badonnǝ bam ma lǝri-ba ba wɩ: «Wɛ-digə kam lɔɔm daɩ dɩbam dɩ abam maama tɩtʋŋɩ. Dɩbam yɩranɩ mʋ wʋ́ lɔ digə kam dɩ́ pa Yisɩrayɛlɩ tiinə Baŋa-Wɛ wʋm, nɩnɛɛnɩ pɛ Sirusi na pɛ dɩbam ni sɩ dɩ́ kɩ te tɩn.»b4 Tɩʋ kʋm tiinǝ bam maa pa Zuda nɔɔna bam wʋrʋ cɔgɩ, ba pa ba daa ba jɩgɩ baarɩ sɩ ba lɔ digǝ kam.c 5 Ba ta ma vu ba yʋʋ tɩʋ kʋm dɩdɛɛra sɩ ba cəŋi tɩtʋŋa yam, pa ya daa warɩ ya vu yigə. Ba ma lɛɛrɩ ba kɩ kʋntʋ kʋ zɩgɩ Pɛrsɩ tɩʋ pɛ Sirusi paarɩ dim maŋa nɩ sɩ kʋ yi maŋa kam Dariusi dɩ daa na joŋi Pɛrsɩ paarɩ o di tɩn.d
Ba cɩgɩ Zeruzalɛm tɩʋ kʋm lɔɔm
6 Pɛ Asuerusie dɛɛn na tu o ji Pɛrsɩ pɛ maŋa kalʋ tɩn, mʋ Zuda tiinə dʋna bam pʋpʋnɩ tɔnɔ ba vugimi o wʋbʋŋa Zuda tiinə bam seeni, dɩ Zeruzalɛm tɩʋ kʋm nɔɔna seeni.f
7 Kʋntʋ na kɛ yɩ Atazeregesɩg dɩ daa ji Pɛrsɩ pɛ maŋa kalʋ nɩ tɩn, mʋ Biselam, dɩ Mitredatɩ, dɩ Tabeeli, dɩ ba yuudonnə bam pʋpʋnɩ tɔnɔ ba tʋŋɩ ba pa pɛ wʋm. Ba dɛɛn pʋpʋnɩ tɔnɔ kʋm dɩ Aramɛ tiinə taanɩ mʋ yɩ ba daarɩ ba ləri kʋ taanɩ dɩm ba ga sɩ nɔɔna lwarɩ kʋ kuri.h
8 Kʋ ta na wʋra kʋ wʋra tɩn, Rehumi dɩ Simisayi dɩ dɛɛn ma pʋpʋnɩ tɔnɔ ba pa Pɛ Atazeregesɩ sɩ kʋ vugimi o wʋbʋŋa Zeruzalɛm tɩʋ kʋm nɔɔna seeni. Rehumi dɛɛn mʋ yɩ tɩʋ kʋm yigə tu. Simisayi dɩ maa yɩ dɩdɛɛrʋ wʋlʋ na nii tɩʋ kʋm tɔnɔ pʋpʋnɩm baŋa nɩ tɩn. Ba na pʋpʋnɩ kʋlʋ tɩn mʋ tɩntʋ:
9 «Tɩʋ kʋm yigə tu Rehumi, dɩ tɔnɔ pʋpʋnɩm dɩdɛɛrʋ Simisayi, dɩdaanɩ dɩ́ donnǝ bam maama mʋ pʋpʋnɩ tɔnɔ kʋntʋ. Ba maa yɩ dɩ́ je sɩm yigǝ tiinǝ, dɩ nakwa, dɩ dɩdɛɛra balʋ na yɩ Erɛkɩ tiinə, dɩ Babilɔnɩ tiinə, dɩ Elam tiinə tɩn, 10 kʋ ta wǝli dɩ nɔɔna balʋ maama Pa-farʋ Ɔsnapaarɩ, o yɩrɩ na tiini dɩ zaŋɩ tɩn, dɛɛn na wanɩ o di yɩ o fɩn-ba sɩ ba vu ba jǝni Samari tɩɩnɩ dɩm nɩ, dɩdaanɩ provɛnsɩ dɩlʋ na wʋ Efratɩ bugə kam wa-zʋʋrɩ seeni tɩn.»
11 Tɔnɔ kʋlʋ ba dɛɛn na pʋpʋnɩ ba pa pɛ wʋm tɩn mʋ tɩntʋ:
«Dɩbam balʋ na yɩ Pɛ Atazeregesɩ tɩntʋŋna, yɩ dɩ́ zʋʋrɩ Efratɩ bugə kam wa-zʋʋrɩ je sɩm nɩ tɩn mʋ pʋpʋnɩ tɔnɔ kʋntʋ sɩ dɩ́ pa‑m. 12 Pɛ, dɩ́ lagɩ sɩ n lwarɩ nɩ Zwifǝ tiinə balʋ na nuŋi nmʋ te Babilɔnɩ nɩ ba joori ba ba yo seeni tɩn laan wʋ Zeruzalɛm tɩʋ kʋm wʋnɩ mʋ. Ba nan lagɩ sɩ ba joori ba lɔ tɩʋ kʋm mʋ. Kʋ nan yɩ tɩ-balɔrɔ kʋlʋ nɔɔna na culi dɩ́ tɩʋ kʋm tɩn mʋ. Ba wʋra ba lɔ tɩʋ kʋm kabri sɩm ba tiə mʋ, sɩ ba joori ba kwɛ kʋ kabri-kuri kam. 13 Nan ta n ye nɩ ba na joori ba lɔ ba tɩʋ kʋm ba zɩgɩ, yɩ kʋ kabri sɩm dɩ kwaarɩ daanɩ sɩ ti, Zwifǝ tiinə bam daa bá sɛ sɩ ba taa ŋwɩ lampoo dwi maama. Kʋntʋ na kɩa, sǝbiǝ yalʋ pɛ wʋm na yǝni o joŋi o nɔɔna tee nɩ tɩn wʋ́ muri mʋ. 14 Dɩbam nan na yɩ balʋ n na nii dɩ́ baŋa nɩ tɩn ŋwaanɩ mʋ dɩ́ vaɩ sɩ wo-balwaarʋ tɩntʋ yi‑m. Dɩ́ pʋpʋnɩ tɩntʋ dɩ́ ma koori nmʋ 15 sɩ n pa ba beeri n nabaara cɩbara gulə twaanʋ tɩm wʋnɩ ba nii. Nmʋ wʋ́ na nɩ tɩʋ kʋm kʋntʋ nɔɔna soe jara mʋ. Kʋ zɩgɩ faŋa faŋa tɩn, ba yǝni ba tiini ba daanɩ pwa dɩ dɩdɛɛra balʋ na te-ba tɩn mʋ. Ba na yɩ vɩɩna tɩn ŋwaanɩ mʋ pɛ nɔɔna dɛɛn cɔgɩ ba tɩʋ kʋm. 16 Pɛ, nan lwarɩ nɩ nmʋ na pɛ cwǝŋǝ sɩ ba joori ba lɔ tɩʋ kʋm kʋntʋ, sɩ kʋ kabri sɩm maama zɩgɩ sɩ ti, nmʋ wʋ́ ga tɩga kalʋ maama na wʋ Efratɩ bugə kam wa-zʋʋrɩ seeni provɛnsɩ dɩm nɩ tɩn mʋ.»
17 Pɛ Atazeregesɩ dɩ ma tʋŋɩ kwǝrǝ o lǝri-ba o wɩ:
«Amʋ Pɛ Atazeregesɩ mʋ ləri tɩʋ yigə tu Rehumi, dɩ tɔnɔ pʋpʋnɩm dɩdɛɛrʋ Simisayi, kʋ ta wǝli dɩ ba donnǝ balʋ na zʋʋrɩ Samari nɩ, dɩ je sɩlʋ maama na wʋ Efratɩ bugə kam wa-zʋʋrɩ seeni tɩn. A jɔɔnɩ abam. 18 Ba pipiri tɔnɔ kʋlʋ á na pʋpʋnɩ tɩn ba kɩ dɩbam taanɩ wʋnɩ, yɩ ba ta karɩmɩ-kʋ ba brɩ-nɩ. 19 Amʋ pɛ ni sɩ ba buŋi dɩ́ tɩʋ kʋm cɩbara gulə twaanʋ tɩm wʋnɩ ba nii. A nan sɩɩnɩ a maanɩ nɩ kʋ na nuŋi faŋa tɩn, Zeruzalɛm tɩʋ kʋm su dɩ vɩɩna na soe jara tɩn mʋ. Ba yǝni ba daanɩ pwa mʋ yɩ ba warɩ ba ja. 20 A ta nɛ nɩ pa-fara mʋ di Zeruzalɛm tɩʋ paarɩ, yɩ ba dɛɛn te Efratɩ bugə kam wa-zʋʋrɩ seeni provɛnsɩ dɩm, pa je sɩm kʋntʋ nɔɔna ŋwɩ lampoo dwi maama ba pa-ba. 21 Kʋntʋ ŋwaanɩ nan pa-na-ba ni nɩ ba daa yɩ lɔ tɩʋ kʋm, kʋ na daɔ nɩ amʋ mʋ pɛ-ba cwǝŋǝ sɩ ba lɔ. 22 Nan taá ye-na sɩ á kɩ lɩla á kɩ amʋ ni dɩm kʋntʋ, sɩ daanɩm daa yɩ ba amʋ paarɩ dim baŋa nɩ.»
23 Ba na yɔɔrɩ ba karɩmɩ Pɛ Atazeregesɩ tɔnɔ kʋm ba brɩ Rehumi, dɩ Simisayi, dɩ ba donnǝ bam tɩn, mʋ ba kɩ lɩla ba vu Zeruzalɛm. Ba ma fɩn Zwifǝ tiinə bam dɩ dam pa ba yagɩ tɩʋ kʋm lɔɔm.
24 Kʋntʋ tɩn ba dɛɛn fɩn Zwifǝ tiinə bam mʋ pa ba yagɩ Zeruzalɛm tɩʋ Wɛ-digə kam lɔɔm. Tɩtʋŋa yam daa maa ba ve yigə sɩ kʋ yi maŋa kam Dariusi na joŋi Pɛrsɩ paarɩ o di yɩ kʋ kɩ bɩna yale tɩn.i