Ba daa lɔgɩ kaanɩm bimbim ba zɩgɩ
3
Kʋ na yi bɩnɩ dɩm canɩ sɩrpɛ cana kam tɩn, dɩdaanɩ Yisɩrayɛlɩ tiinə bam laan zʋʋrɩ ba tɩtɩ tɩɩnɩ wʋnɩ mʋ. Ba maama maa kɩ ni dɩdwɩ ba jeeri Zeruzalɛm wʋnɩ. 2 Yozadaki bu Zozwe na yɩ Wɛ kaanɩm tu tɩn, dɩ o donnǝ kaanɩm tiinə bam, dɩ Salatɩyɛlɩ bu Zorobabɛlɩ dɩ o cʋrrʋ tɩm ma puli sɩ ba lɔ Yisɩrayɛlɩ tiinə Wɛ dɩm kaanɩm bimbim dɩm.a Kʋ nan maŋɩ sɩ ba taa kɩ zwɛɛm kaanɩm mʋ dɩ baŋa nɩ ba pa Wɛ, nɩnɛɛnɩ Wɛ niə tɔnɔ kʋlʋ Moyisi na pʋpʋnɩ na brɩ te tɩn. 3 Fʋʋnɩ maa jɩgɩ-ba dɩ balʋ na zʋʋrɩ je sɩm kʋntʋ nɩ tɩn. Dɩ kʋntʋ dɩ, ba ta cwi kaanɩm bimbim dɩm dɩ dɛɛn na maŋɩ dɩ zɩgɩ mɛ tɩn mʋ. Ba ma yɔɔrɩ ba sɩŋɩ ba kɩ zwɛɛm kaanɩm dɩ baŋa nɩ ba pa Baŋa-Wɛ dɛ maama, tɩtɩɩtɩ dɩ dɩdaan-ni nɩ. 4 Ba ta di Vwə cwiim candiə kam mʋ nɩnɛɛnɩ Moyisi tɔnɔ kʋm na brɩ te tɩn.b Candiə kam da yam maama wʋnɩ, nɔɔna bam maa yǝni ba kɩ zwɛɛm kaanɩm na maŋɩ sɩ dɩ kɩ te dɛ maama tɩn. 5 Ba dɛɛn ta yǝni ba kɩ zwɛɛm kaanɩm dɩlʋ maama na maŋɩ sɩ dɩ kɩ dɛ maama tɩn mʋ, dɩ yalʋ na maŋɩ sɩ ya kɩ can-dʋŋa maŋa nɩ tɩn, kʋ ta wǝli dɩ yalʋ na maŋɩ dɩ candi yadonnə ya maŋa nɩ, nɩnɛɛnɩ Baŋa-Wɛ na pɛ-ba ni te tɩn. Ba ta yǝni ba ja ba wʋ-yoŋo pɛɛra ba ba ba pa Baŋa-Wɛ mʋ. 6 Bɩnɩ dɩm kʋntʋ canɩ sɩrpɛ cana kam pulim dɛ dɩm wʋnɩ mʋ nɔɔna bam dɛɛn puli sɩ ba kɩ zwɛɛm kaanɩm ba pa Baŋa-Wɛ. Ka maŋa nɩ dɩ ba ya ta wʋ puli sɩ ba cwi Wɛ-di-kamunu kʋm kabri-kuri.7 Ba laan ma ŋwɩ lwara dɩ gwarʋ tɩlʋ na tʋŋɩ dɛ tɩtʋŋa tɩn sɩ ba tʋŋɩ ba pa-ba. Ba ta ma kwe wʋdiu, dɩ sana, dɩ nugə ba tʋŋɩ ba pa Tiiri tiinə dɩ Sidɔn tiinə sɩ ba ma yəgi dɛ ba tee nɩ. Bantʋ ma zagɩ Sɛdrɩ tweeru na wʋ Liban pweeru tɩm nɩ tɩn yɩ ba daarɩ ba ja dɛ sɩm ba tɔgɩ Mɛditeranɩa nɩnɩʋ kʋm ba vu ba yi Zope.c Pɛ Sirusi dɛɛn mʋ pɛ cwǝŋǝ sɩ kʋntʋ maama kɩ.
Ba puli Wɛ-di-kamunu kʋm lɔɔm
8 Kʋ yɩ bɩna yale bɩnɩ dɩm wʋnɩ nɔɔna bam na joori ba yi Zeruzalɛm tɩn, mʋ ba puli sɩ ba lɔ Baŋa-Wɛ digə kam. Kʋ maa yɩ bɩnɩ dɩm kʋntʋ canɩ sɩle cana kam nɩ mʋ Salatɩyɛlɩ bu Zorobabɛlɩ, dɩ Yozadaki bu Zozwe, dɩ o donnǝ kaanɩm tiinə bam, dɩdaanɩ Levi dwi tiinə bam, kʋ wǝli dɩ balʋ maama na joori ba ba tɩn cɛ dɩ tɩtʋŋa yam.d Ba dɛɛn ma kwe digə kam lɔɔm tɩtʋŋa maama ba kɩ Levi dwi tiinə balʋ na yi bɩna fiinle ba daŋɩ tɩn jɩŋa nɩ, sɩ ba taa nii ya baŋa nɩ. 9 Levi dwi tiinə balʋ na nii Wɛ-digə kam tɩntʋŋna baŋa nɩ tɩn mʋ tɩntʋ: Zozwe dɩ o biə, dɩ o cʋrrʋ tɩm, kʋ wǝli dɩ Kadimeli dɩ o biə, Enadadɩ dɩ Hodaviae mʋ. Levi tiinə balʋ dɩ na yɩ Enadadɩ dwi nɔɔna tɩn dɩ ma wǝli da.
10 Tɩntʋŋna bam dɛɛn na yɔɔrɩ ba cwi Baŋa-Wɛ digə kabri-kuri kam tɩn, mʋ kaanɩm tiinə bam zʋ ba gwaarʋ yɩ ba daarɩ ba vu ba zɩgɩ ba zɩga je nɩ, sɩ ba wu ba nabwaanʋ tɩm. Levi tiinə balʋ na nuŋi Azafɩ digə kam nɩ tɩn dɩ ma kwe zwɩ ba zɩgɩ da, sɩ ba maama zuli Baŋa-Wɛ nɩnɛɛnɩ Yisɩrayɛlɩ tiinə Pɛ Davidi dɛɛn na brɩ sɩ ba taa kɩ te tɩn.f 11 Ba dɛɛn ma mɔɔnɩ le yɩ ba sɛ-sɩ ba ma zuli Baŋa-Wɛ yɩ ba kɩ-DƖ le. Ba maa tɛ ba wɩ:
«DƖ tiini DƖ lamma!
DƖ sono kʋlʋ DƖ na jɩgɩ
Yisɩrayɛlɩ tiinə ŋwaanɩ tɩn
wʋra mʋ maŋa maama!»g
Nɔɔna bam maama ma tiini ba tee Baŋa-Wɛ dɩ kwǝr-dɩa, ba na bəri Baŋa-Wɛ digə kam kuri tɩn ŋwaanɩ. 12 Kʋntʋ na jɩgɩ kʋ kɩ tɩn, kaanɩm tiinə dɩ Levi tiinə dɩ sam yigǝ tiinǝ balʋ na yɩ nankwɩn tɩn ma guli pulim Wɛ-di-kamunu kʋm dɛɛn na yɩ te tɩn yɩ ba tiini ba kaasɩ dɩ wʋ-cɔgɔ.h Kʋ nan na yɩ balʋ na daarɩ tɩn, ba zanzan kaasɩ dɩ wʋpolo mʋ. 13 Ba maama sɔɔ kʋm ma tiini kʋ di baŋa pa nɔɔna warɩ sɩ ba pɔɔrɩ ywəəni dɩ wʋ-cɔgɔ daanɩ. Sɔɔ kʋm dɛɛn ma ni yigə yigə.