Wɛ-digə kam
28
Pɛ Davidi dɛɛn ma bəŋi Yisɩrayɛlɩ dɩdɛɛra bam maama sɩ ba jeeri Zeruzalɛm nɩ. Bantʋ maa yɩ Yisɩrayɛlɩ dwiə yam nakwa bam, dɩ tɩʋ kʋm dɩdɛɛra balʋ na tʋŋɩ ba pa pɛ wʋm tɩn, dɩ balʋ na te jar-kərə mʋrʋ mʋrʋ tɩn, dɩ balʋ na te jar-kərə bi bi tɩn, dɩ dɩdɛɛra balʋ na nii pɛ wʋm dɩ o biə zɩla yam dɩ ba vara baŋa nɩ tɩn, dɩ pɛ sɔŋɔ kʋm tɩntʋŋna bam, kʋ wǝli dɩ balʋ maama na yɩ nɔn-yɩrrʋ dɩ pamaŋ-bɩbɛ tɩn. 2 Ba na jeeri daanɩ kʋntʋ tɩn, Pɛ Davidi ma zɩgɩ wɛɛnɩ o ta o wɩ:«A ko-biǝ bam, a dɛɛn jaanɩ wʋbʋŋa mʋ sɩ a lɔ digə sɩ ba taa zɩgɩ Baŋa-Wɛ ni-gonim daka kam da, sɩ dɩ́ Tu Wɛ dɩm na jǝgǝ kalʋ DƖ na wʋ́ cwi DƖ nɛ da tɩn. Amʋ dɛɛn nan ya ti woŋo maama yigǝ mʋ ka lɔɔm dɩm ŋwaanɩ. 3 Baŋa-Wɛ nan vɩn mʋ yɩ DƖ wɩ: ‹Nmʋ bá lɔ digə amʋ yɩrɩ zulə ŋwaanɩ, nmʋ na yɩ nɔn-babɩa yɩ n pwəri nɔɔna zanzan jana tɩn ŋwaanɩ.›
4 Kʋ nan yɩ Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ lɩ amʋ a ko sɔŋɔ kʋm maama wʋnɩ sɩ a taa di Yisɩrayɛlɩ tɩʋ paarɩ taan wuu. DƖ dɛɛn kuri Zuda dwi dɩm mʋ sɩ ba di yigə Yisɩrayɛlɩ dwiə yam maama wʋnɩ. DƖ ta ma kuri a ko digə kam Zuda dwi dɩm wʋnɩ, yɩ DƖ daarɩ DƖ zʋ a ko biə bam wʋnɩ DƖ kuri amʋ sɩ a taa yɩ Yisɩrayɛlɩ tɩʋ maama pɛ, DƖ yi na su amʋ kikiə tɩn ŋwaanɩ.a 5 Baŋa-Wɛ ma pa a lʋ bəkəri zanzan. DƖ ma nii ba maama wʋnɩ DƖ kuri Solɔmɔn sɩ o ləri amʋ yuu nɩ o di paarɩ Baŋa-Wɛ tɩtɩ nɔɔna Yisɩrayɛlɩ tiinə baŋa nɩ. 6 Baŋa-Wɛ ma ta dɩ amʋ nɩ: ‹Nmʋ bu Solɔmɔn mʋ yɩ wʋlʋ na wʋ́ lɔ a digə kam dɩ ka kʋnkwallʋ tɩm tɩn. Bɛŋwaanɩ, a kuri wʋntʋ mʋ sɩ o taa yɩ a bu, sɩ amʋ dɩ taa yɩ o ko.b 7 Amʋ wʋ́ pa o paarɩ dɩm fɔgɩ dɩ jǝni lanyɩranɩ taan wuu, nɩ o na yɔɔrɩ o sɛ sɩ o tʋŋɩ o tɔgɩ amʋ niə yam dɩ a kwiə yam, nɩ kʋ zɩm na yɩ te tɩn.›
8 Kʋntʋ ŋwaanɩ, amʋ na zɩgɩ abam Yisɩrayɛlɩ tiinə na yɩ Baŋa-Wɛ kɔgɔ kʋm maama yigə nɩ, yɩ dɩ́ Tu Wɛ dɩm wʋra DƖ maanɩ dɩ́ kənə yam tɩn, amʋ zɩm kaanɩ abam nɩ: abam maŋɩ sɩ á taá tʋŋɩ a tɔgɩ á Tu Baŋa-Wɛ niə yam maama mʋ. Kʋntʋ mʋ wʋ́ pa á wanɩ á joŋi tɩ-ywəŋə kantʋ á taá te, yɩ á daarɩ á kwe-ka á taá paɩ á biə sɩ kʋ taa ve wuu.
9 Kʋ nan na yɩ nmʋ Solɔmɔn na yɩ amʋ bu tɩn, kwaanɩ sɩ n sɛ n pa n ko Wɛ dɩm, sɩ n tan zuli‑DƖ dɩ n bɩcarɩ maama, dɩ n wʋbʋŋa maama. Bɛŋwaanɩ, Baŋa-Wɛ yǝni DƖ buŋi nɔɔna bɩcara wʋnɩ yɩ o lwarɩ ba wʋbʋŋa maama na yɩ te tɩn mʋ. Nmʋ na beeri DƖ je, DƖ wʋ́ pa‑m cwǝŋǝ sɩ n na‑DƖ. Nmʋ nan daa na vanɩ‑DƖ, DƖ dɩ wʋ́ vɩ‑m sɩ kʋ taa ve wuu.c 10 Kʋntʋ nan tɩn, jeeli sɩ n lwarɩ nɩ Baŋa-Wɛ kuri nmʋ mʋ sɩ n lɔ digə kalʋ na wʋ́ taa yɩ DƖ wara-je sɩm tɩn n pa‑DƖ. Kʋntʋ tɩn, kɩ dam n kɩ n tɩtɩ kuri nɩ, sɩ n kwaanɩ n tʋŋɩ.»
11 Davidi na ŋɔɔnɩ kʋntʋ o ti tɩn, o ma kwe twannʋ tɩlʋ na brɩ Wɛ-digə kam zɩga tɩn o pa o bu Solɔmɔn. Tɩ brɩ ba na wʋ́ lɔ-ka te maama tɩn mʋ: ka napɔrɔ kʋm, dɩ ka di-balwa bam, dɩ ka zɩla di sɩm, dɩ ka wɛyuu di sɩm, dɩ ka wʋ di sɩm, kʋ wǝli dɩ lwarɩm saarɩm jǝgǝ kam maama. 12 Davidi dɛɛn ma brɩ-o o wʋbʋŋa na jaanɩ sɩ o lɔ Baŋa-Wɛ digə kam kʋnkwallʋ tɩm te tɩn, dɩ ka pooni yigə di sɩm, dɩ ka lʋnnɩ wǝǝnu tiŋim di sɩm, dɩ di sɩlʋ ba na wʋ́ zɩgɩ Wɛ pɛɛra da tɩn. 13 O ta ma brɩ-o kaanɩm tiinə bam dɩ Levi dwi tiinə bam tɩtʋŋa na maŋɩ sɩ ya pɔɔrɩ te tɩn, dɩdaanɩ ba na wʋ́ taa tʋŋɩ te maama Wɛ-digə kam wʋnɩ tɩn, dɩ zɩla yalʋ ba na wʋ́ taa maɩ ba zuli Baŋa-Wɛ tɩn. 14 O ta ma brɩ Solɔmɔn səbu-sɩŋa duuni, dɩ səbu-poŋo duuni na maŋɩ sɩ tɩ taa maɩ te tɩn sɩ ba ma ba kɩ zwɩ sɩlʋ ba na wʋ́ taa ma-sɩ ba tʋŋɩ tɩtʋŋa dwi dwi Baŋa-Wɛ digə kam wʋnɩ tɩn. 15 O ta brɩ-o səbu-sɩŋa dɩ səbu-poŋo duuni na maŋɩ sɩ tɩ taa maɩ te sɩ ba ma ba kɩ min-zwǝn-zɩgɩrʋ tɩm dɩ min-zwǝǝnu tɩm tɩtɩ, sɩ kʋ tɔgɩ tɩ maama tɩtʋŋɩ na yɩ te tɩn. 16 O ta ma brɩ-o səbu-sɩŋa duuni ba na wʋ́ ma ba kɩ taabʋlʋ kʋlʋ ba na tigisi dɩpwa da Wɛ ŋwaanɩ tɩn, kʋ ta wǝli dɩ səbu-poŋo duuni ba na wʋ́ ma ba kɩ taabʋllʋ tɩdonnǝ tɩn. 17 O ta brɩ-o səbu-sɩŋa duuni na wʋ́ taa maɩ te sɩ o ma o kɩ wǝǝnu tɩlʋ ba na wʋ́ taa ma-tɩ ba zɔ nwana tɩ lɩ tɩn, dɩ zwɩ sɩm, dɩ kambi sɩm maama. O ma daarɩ o brɩ-o səbu-sɩŋa dɩ səbu-poŋo duuni na maŋɩ sɩ tɩ taa maɩ te sɩ ba ma ba kɩ zwɩ sɩdonnǝ tɩn. 18 O ta ma brɩ-o ba na wʋ́ kwe səbu-sɩŋa duuni dɩlʋ tɩn ba ma ba kɩ wǝǝnu tɩlʋ lwǝm na ywǝmmǝ tɩn zwɛɛm bimbim dɩm. O ta ma daarɩ o brɩ-o ba na wʋ́ ma səbu-sɩŋa ba mɔ Serubɛn nyɩnyʋrʋ tɩm dɩ tɩ jǝŋǝ je te tɩn. Tɩntʋ lwarɩ tɩ vwana mʋ tɩ kwǝli Baŋa-Wɛ ni-gonim daka kam.
19 Pɛ Davidi ma ta o wɩ: «Tɩntʋ maama a pʋpʋnɩ a tiŋi tɔnɔ wʋnɩ, nɩ Baŋa-Wɛ tɩtɩ na brɩ-nɩ te maama tɩn. DƖ ma pa a lwarɩ digə kam lɔɔm dɩ ka tɩtʋŋa maama na maŋɩ sɩ ya taa yɩ te tɩn.»
20 Davidi ta ma ta dɩ o bu Solɔmɔn o wɩ: «Yɔɔrɩ n kɩ dam n tɩtɩ kuri nɩ, sɩ n daarɩ n tan jɩgɩ baarɩ yɩ n kwaanɩ n tʋŋɩ. Yɩ tan fʋna, nan yɩ pa n vwana parɩ. Bɛŋwaanɩ, Yuutu Baŋa-Wɛ na ya amʋ Tu Wɛ tɩn wʋ́ taa wʋ n tee nɩ. DƖ wʋ́ yɔɔrɩ DƖ wəli‑m yɩ DƖ bá yagɩ‑m, sɩ n wanɩ n tʋŋɩ Baŋa-Wɛ digə kam lɔɔm tɩtʋŋɩ dɩm maama n ti. 21 Nii mʋ! Wɛ kaanɩm tiinə bam dɩ Levi dwi tiinə bam maŋɩ ba lwarɩ ba na wʋ́ taa tʋŋɩ Wɛ-digə kam tɩtʋŋa dwi dwi te tɩn. Gwarʋ tɩm maama dɩ ye ba tɩtʋŋa lanyɩranɩ, yɩ ba ti ba yigə sɩ ba wəli‑m tɩtʋŋa yam maama wʋnɩ. Dɩdɛɛra bam dɩ nɔɔna bam maama dɩ maa wʋ́ sɛ ni dɩlʋ maama n na wʋ́ pa-ba tɩn.»