Yisɩrayɛlɩ jar-kərə bam taanɩ
27
Yisɩrayɛlɩ dwi tiinə bam na pɔɔrɩ pɔɔrɩ najara kǝm ŋwaanɩ te tɩn mʋ tɩntʋ. Ba maa yɩ ba sɔ-yuni tɩm nakwa, dɩ balʋ na te jar-kərə mʋrʋ mʋrʋ tɩn, dɩ balʋ na te jar-kərə bi bi tɩn, dɩdaanɩ ba dɩdɛɛra balʋ na tʋŋɩ ba pa pɛ wʋm tɩtʋŋa maama baŋa nɩ tɩn. Bɩnɩ maama wʋnɩ jar-kərə bam pʋpwara dɩdʋa maama tʋŋɩ ba ləri daanɩ mʋ cana dɩ cana wʋnɩ. Ba pʋpwara dɩdʋa ni maa yɩ baara mʋrrʋ fiinle-tɩna (24,000).2 Dayigǝ pʋpwara kalʋ na tʋŋɩ pulim cana kam wʋnɩ tɩn mʋ tɩntʋ:
Zabideli bu Yasobɛmɩ dɛɛn mʋ nii ba baŋa nɩ. Ba maama maa yɩ jar-kərə mʋrrʋ fiinle-tɩna (24,000). 3 Wʋntʋ dɛɛn yɩ Farɛsɩ dwi tu mʋ. O maa nii jar-kərə dɩdɛɛra bam maama baŋa nɩ pulim cana kam nɩ.
4 Pʋpwara bale tu na tʋŋɩ canɩ sɩle cana kam wʋnɩ tɩn mʋ tɩntʋ:
Dodayi na yɩ Awoyi dwi tu tɩn mʋ nii ba baŋa nɩ. Mikilɔtɩ dɛɛn mʋ yɩ yuutu wʋlʋ na saŋɩ o kwaga tɩn. Ba maama maa yɩ jar-kərə mʋrrʋ fiinle-tɩna (24,000).
5 Pʋpwara batɔ tu na tʋŋɩ canɩ sɩtɔ cana kam wʋnɩ tɩn mʋ tɩntʋ:
Benaya na yɩ Wɛ kaanɩm tu Yehoyada bu tɩn mʋ nii ba baŋa nɩ. Ba maama maa yɩ jar-kərə mʋrrʋ fiinle-tɩna (24,000). 6 Benaya dɛɛn tiini o na yɩrɩ ‹Pamaŋ-bɩbɛ fiintɔ kʋm› wʋnɩ mʋ. O maa yɩ ba yuutu. O bu Amizabadɩ dɛɛn mʋ yɩ yuutu wʋlʋ na saŋɩ o kwaga tɩn.
7 Pʋpwara bana tu na tʋŋɩ canɩ sɩna cana kam wʋnɩ tɩn mʋ tɩntʋ:
Zoabɩ nyaanɩ Azayɛlɩ mʋ nii ba baŋa nɩ. O bu Zebadia mʋ ləri o yuu nɩ o ji ba yuutu. Ba maama maa yɩ baara mʋrrʋ fiinle-tɩna (24,000).
8 Pʋpwara banu tu na tʋŋɩ canɩ sɩnu cana kam wʋnɩ tɩn:
Samutɩ na yɩ Yizara dwi tu tɩn mʋ nii ba baŋa nɩ. Ba maama maa yɩ baara mʋrrʋ fiinle-tɩna (24,000).
9 Pʋpwara bɩrdʋ tu na tʋŋɩ canɩ sɩrdʋ cana kam wʋnɩ tɩn mʋ tɩntʋ:
Yirǝ na yɩ Tekoa dwi tu Ikɛsɩ bu tɩn mʋ nii ba baŋa nɩ. Ba maama maa yɩ baara mʋrrʋ fiinle-tɩna (24,000).
10 Pʋpwara bɩrpɛ tu na tʋŋɩ canɩ sɩrpɛ cana kam wʋnɩ tɩn mʋ tɩntʋ:
Peloni tu Helezɩ na nuŋi Efrayim dwi dɩm wʋnɩ tɩn mʋ nii ba baŋa nɩ. Ba maama maa yɩ baara mʋrrʋ fiinle-tɩna (24,000).
11 Pʋpwara nana tu na tʋŋɩ canɩ nana cana kam wʋnɩ tɩn mʋ tɩntʋ:
Usati tu Sibekayi na yɩ Zara dwi tu tɩn mʋ nii ba baŋa nɩ. Ba maama dɛɛn maa yɩ baara mʋrrʋ fiinle-tɩna (24,000).
12 Pʋpwara nʋgʋ tu na tʋŋɩ canɩ nʋgʋ cana kam wʋnɩ tɩn mʋ tɩntʋ:
Anatɔtɩ tu Abizeri na yɩ Bɛnzamɛn dwi tu tɩn mʋ nii ba baŋa nɩ. Ba maama dɛɛn maa yɩ baara mʋrrʋ fiinle-tɩna (24,000).
13 Pʋpwara fugə tu na tʋŋɩ canɩ fugə cana kam wʋnɩ tɩn mʋ tɩntʋ:
Netofa tu Maharayi na yɩ Zara dwi tu tɩn mʋ nii ba baŋa nɩ. Ba maama dɛɛn maa yɩ baara mʋrrʋ fiinle-tɩna (24,000).
14 Pʋpwara fugə-dɩdʋa tu na tʋŋɩ canɩ fugə-dɩdʋa cana kam wʋnɩ tɩn mʋ tɩntʋ:
Piratɔnɩ tu Benaya na yɩ Efrayim dwi tu tɩn mʋ nii ba baŋa nɩ. Ba maama dɛɛn maa yɩ baara mʋrrʋ fiinle-tɩna (24,000).
15 Pʋpwara fugǝ-bale tu na tʋŋɩ canɩ fugə-sɩle cana kam wʋnɩ tɩn mʋ tɩntʋ:
Netofa tu Hɛldayi na nuŋi Ɔtiniyɛlɩ sɔ-yuu kʋm nɩ tɩn mʋ nii ba baŋa nɩ. Ba maama dɛɛn maa yɩ baara mʋrrʋ fiinle-tɩna (24,000).
Yisɩrayɛlɩ dwiə yam yuutiinə bam taanɩ
16 Dɩdɛɛra balʋ dɛɛn na nii Yisɩrayɛlɩ dwiə yam baŋa nɩ tɩn mʋ tɩntʋ:
Ruban dwi dɩm yuutu mʋ yɩ:
Zikiri bu Eliezɛrɩ.
Simeyon dwi dɩm yuutu maa yɩ:
Maaka bu Sefatɩa.
17 Levi dwi dɩm yuutu maa yɩ:
Kemuel bu Hasabia.
Wɛ kaanɩm tu Sadoki maa nii Arɔn dwi dɩm baŋa nɩ.
18 Zuda dwi dɩm yuutu maa yɩ:
Davidi zɩmbaarʋ Elihu.
Yisakaarɩ dwi dɩm yuutu maa yɩ:
Misɛɛlɩ bu Omiri.
19 Zabulɔn dwi dɩm yuutu maa yɩ:
Abdɩasɩ bu Yisamaya.
Nɛfitali dwi dɩm yuutu maa yɩ:
Azireli bu Yerimoti.
20 Efrayim dwi dɩm yuutu maa yɩ:
Azazia bu Oze.
Manasɩ dwi cicoro kʋm yuutu maa yɩ:
Pedaya bu Zowɛlɩ.
21 Manasɩ dwi cicoro kʋlʋ na wʋ Galadɩ laŋa kam nɩ tɩn yuutu maa yɩ:
Zakari bu Yido.
Bɛnzamɛn dwi dɩm yuutu maa yɩ:
Abenɩra bu Yaaseli.
22 Dan dwi dɩm yuutu maa yɩ:
Zeroham bu Azareli.
Dɩdɛɛra balʋ dɛɛn na nii Yisɩrayɛlɩ dwiə yam baŋa nɩ tɩn mʋ kʋntʋ.
23 Davidi dɛɛn na jeeli Yisɩrayɛlɩ dwi tiinə bam ni tɩn, o wʋ pɛ ba ga baara balʋ na ta wʋ yi bɩna fiinle tɩn. Kʋ yɩ Baŋa-Wɛ na maŋɩ DƖ pooli nɩ DƖ lagɩ DƖ pa ba tiini ba puli nɩ calɩcwɩ sɩm na maɩ te tɩn ŋwaanɩ mʋ. 24 Zeruya bu Zoabɩ ma puli sɩ o ga Yisɩrayɛlɩ tiinə bam sɩ o lwarɩ ba ni. O nan wʋ wanɩ o ga-ba o ti, bɛŋwaanɩ Wɛ banɩ zaŋɩ dɩ Yisɩrayɛlɩ tiinə bam ba kǝm dɩm kʋntʋ ŋwaanɩ mʋ. Ba maa wʋ pʋpʋnɩ ba ni na maɩ te tɩn ba kɩ Pɛ Davidi cɩbara gulə twaanʋ tɩm wʋnɩ.a
Pɛ wʋm dɩdɛɛra bam taanɩ
25 Adiyɛlɩ bu Azɩmavɛtɩ dɛɛn mʋ nii pɛ sɔŋɔ kʋm zɩla yalʋ maama na jɩgɩ lʋnnɩ tɩn baŋa nɩ.
Ozɩasɩ bu Zonatan maa nii lʋnnɩ zɩla yalʋ na wʋ gaa wʋnɩ, dɩ tɩɩnɩ dɩm wʋnɩ, dɩ tʋ-balwa bam wʋnɩ, dɩ kabri sɩlʋ na cɩgɩ sɩ kaagɩ wʋnɩ tɩn baŋa nɩ.
26 Kalubi bu Eziri dɛɛn mʋ nii balʋ na varɩ pɛ wʋm karɩ tɩn baŋa nɩ.
27 Rama tu Simeyi dɛɛn mʋ nii vinyə tweeru karɩ sɩm baŋa nɩ.
Sefamɩ tu Zabidi maa nii vinyə tiu biə dɩ ba ŋokɩm baŋa nɩ.
28 Gedɛrɩ tu Baalɩ-Hanan mʋ nii Olivi tweeru dɩ kapʋrrʋ tɩlʋ na wʋ wa-zʋʋrɩ seeni bwəəlu tɩm nɩ tɩn.
Zoasɩ maa nii je sɩlʋ ba na tiŋi Olivi nugə kam da tɩn baŋa nɩ.
29 Sarɔn tu Sitirayi dɛɛn mʋ nii naanɩ dɩlʋ na wʋ Sarɔn pwələ kam nɩ tɩn.
Adali bu Safatɩ dɩ maa nii naanɩ dɩlʋ na wʋ bwəəlu tɩm kurə nɩ tɩn.
30 Ismayɛlɩ dwi tu Obili mʋ nii yogondə yam baŋa nɩ.
Meronɔtɩ tu Yedɩya maa nii bɩnɛ sɩm baŋa nɩ.
31 Hagarɩ dwi tu Yazizi dɛɛn mʋ nii varɩ-balwa bam baŋa nɩ.
Dɩdɛɛra bantʋ maama dɛɛn mʋ nii Pɛ Davidi wǝǝnu baŋa nɩ ba pa‑o.
32 Zonatan na yɩ Pɛ Davidi nabra tɩn dɛɛn jɩgɩ yi-pʋrʋ cɩga cɩga yɩ o ye tɔnɔ pʋpʋnɩm. O maa wǝli Davidi dɩ kwiə.
Hakimoni bu Yehiyɛlɩ mʋ brɩ pɛ wʋm biə bam.
33 Ayitofɛlɩ dɛɛn mʋ wǝli pɛ wʋm dɩ kwiə.
Ariki tu Usayi maa yɩ pɛ wʋm ciloŋ-sono.
34 Benaya bu Yehoyada, kʋ wǝli dɩ Abɩatarɩ maama dɛɛn mʋ ləri Ayitofɛlɩ yuu nɩ.
Zoabɩ dɛɛn maa yɩ pɛ wʋm jar-kərə bam yigə tu.