Wɛ-digə kam ni-yɩrɩna bam taanɩ
26
Levi dwi tiinə balʋ dɛɛn na tʋŋɩ Wɛ-digə kam ni-yɩrɩna tɩtʋŋa tɩn na pɔɔrɩ kɔgɔ dɩ kɔgɔ te tɩn mʋ tɩntʋ.Kʋra dwi dɩm wʋnɩ:
Meselemia na yɩ Kʋrɩ bu yɩ o nuŋi Azafɩ dwi dɩm wʋnɩ tɩn.
2 Meselemia bu-baara barpɛ bam na saŋɩ da-kwaga te tɩn mʋ tɩntʋ:
4 Obɛd-Edɔmi bu-baara nana maa yɩ:
O bu-kwɩan Semaya, dɩ Yehozabadɩ, dɩ Yoa, dɩ Sakarɩ, dɩ Netaneli, 5 dɩ Amiyɛlɩ, dɩ Yisakaarɩ, dɩ Puletayi.
Wɛ dɛɛn tiini DƖ kɩ Obɛd-Edɔmi yu-yoŋo lanyɩranɩ mʋ.
6 Obɛd-Edɔmi bu Semaya dɩ dɛɛn jɩgɩ bəkəri na yɩ nɔn-babɛ ba sɔ-yuni tɩm nɩ, nɔɔna na nɩgɩ-ba tɩn ŋwaanɩ. 7 Semaya biə maa yɩ:
Ofini, dɩ Refayɛlɩ, dɩ Obɛdɩ, dɩ Elizabadɩ. O cʋrrʋ tɩm na yɩ Elihu dɩ Semakia tɩn dɩ dɛɛn jɩgɩ yɩrɩ mʋ.
8 Obɛd-Edɔmi biə bam kʋntʋ. Bantʋ dɩ ba biə bam, kʋ wǝli dɩ ba cʋrrʋ tɩm dɛɛn yɩ nɔn-babɛ mʋ lanyɩranɩ. Ba maa dana pa ba waɩ tɩtʋŋɩ dɩm ba tʋŋa. Obɛd-Edɔmi dwi dɩm dɛɛn yɩ baara fusɩrdʋ-bale (62) mʋ.
9 Meselemia biə bam dɩ o cʋrrʋ tɩm wʋnɩ ba dɛɛn kuri baara fugə-nana (18) balʋ na jɩgɩ yɩrɩ tɩn mʋ.
10 Hosa na nuŋi Merari sɔ-yuu kʋm nɩ tɩn biə bam mʋ tɩntʋ:
Ba yigə tu mʋ yɩ Simiri.
O nan maŋɩ o daɩ bu-kwɩan yɩ o ko ta kur‑o sɩ o taa yɩ o biə bam yigə tu. 11 O biə balʋ na saŋɩ tɩn maa yɩ:
Hilkiya, dɩ Tebalia, dɩ Zakari.
Hosa biə bam dɩ o cʋrrʋ tɩm wʋnɩ ba dɛɛn kuri baara fugə-batɔ mʋ.
12 Ba dɛɛn na pɔɔrɩ ni-yɩrɩna bantʋ te tɩn tɔgɩ dɩ ba yigǝ tiinǝ na yɩ balʋ tɩn mʋ. Ba ma pa pʋpwara maama dɩ ka tɩtʋŋa sɩ ka tʋŋɩ Baŋa-Wɛ digə kam wʋnɩ, nɩnɛɛnɩ ba cʋrrʋ dɩ dɛɛn na kɩ te tɩn. 13 Ba dɛɛn tagɩ jɔrɔ mʋ sɩ ba lwarɩ ni dɩ ni dɩlʋ digə maama na wʋ́ taa yɩrɩ tɩn. Ba ya na yɩ nankwɩn naa nɔn-dʋnnʋ dɩ, kʋ yɩ bɩdwɩ mʋ.
14 Jɔrɔ kʋm dɛɛn kuri Selemɩaa mʋ sɩ o taa yɩrɩ ni dɩlʋ na jeeri wa-puli seeni tɩn. Ba ta ma kuri o bu Zakari sɩ o taa yɩrɩ ni dɩlʋ na jeeri jazɩm baŋa seeni tɩn. Zakari dɛɛn nan jɩgɩ swan mʋ lanyɩranɩ. 15 Jɔrɔ kʋm ta ma kuri Obɛd-Edɔmi sɩ o taa yɩrɩ ni dɩlʋ na jeeri jagwiə seeni tɩn. Ba ta ma kuri o biə bam sɩ ba taa yɩrɩ zɩla yam na tigi di sɩlʋ wʋnɩ tɩn. 16 Jɔrɔ kʋm ma kuri Supim dɩ Hosa sɩ ba taa yɩrɩ Wɛ-digə kam ni dɩlʋ na jeeri wa-zʋʋrɩ seeni tɩn, dɩdaanɩ Salekɛtɩ ni dɩm na jeeri jazɩm baŋa seeni cwǝŋǝ kam tɩn.
Ni-yɩrɩnʋ maama dɛɛn saŋɩ o doŋ mʋ o zɩgɩ o tikəri nɩ. 17 Dɛ maama wʋnɩ Levi dwi tiinə bardʋ dɛɛn mʋ yɩrɩ Wɛ-digə kam ni dɩlʋ na jeeri wa-puli seeni tɩn. Ba bana maa yɩrɩ ni dɩlʋ na jeeri jazɩm baŋa seeni tɩn. Ba bana dɩ maa yɩrɩ ni dɩlʋ na jeeri jagwiə seeni tɩn. Ba bale bale ma yɩrɩ zɩla yam na tigi di sɩle sɩm wʋnɩ tɩn. 18 Kʋ ta na yɩ kʋnkɔlɔ kʋlʋ na wʋ Wɛ-digə kam wa-zʋʋrɩ seeni tɩn, nɔɔna bana ma yɩrɩ kʋ ni dɩlʋ na wʋ cwǝŋǝ kam ni nɩ tɩn. Ba bale ma yɩrɩ kʋnkɔlɔ kʋm tɩtɩ.
19 Nɔɔna balʋ na nuŋi Kʋra dɩ Merari sɔ-yuni tɩm nɩ yɩ ba yɩ Wɛ-digə kam ni-yɩrɩna tɩn dɛɛn na pɔɔrɩ kɔgɔ dɩ kɔgɔ te tɩn mʋ kʋntʋ.
Wɛ-digə kam dɩdɛɛra badonnǝ taanɩ
20 Levi dwi tiinə badonnǝ dɛɛn mʋ nii Wɛ-digə kam səbu baŋa nɩ, kʋ wǝli dɩ di sɩlʋ ba na tiŋi ka lʋnnɩ wǝǝnu da tɩn.
21 Gɛrsɔnɩ dwi tiinə balʋ na yɩ Ladanb biə yɩ ba yɩ ba sɔ-yuni tɩm nakwa tɩn dɛɛn yɩ Yehiyɛlɩ, 22 dɩ Yehiyɛlɩ dɩ biə bam mʋ. O biə bam maa yɩ Zetam, dɩ o nyaanɩ Zowɛlɩ. Bantʋ dɛɛn mʋ yɩrɩ Baŋa-Wɛ digə kam səbu na tigi mɛ tɩn.
23 Yɩrɩna badonnǝ dɩ dɛɛn nuŋi Amiram, dɩ Yiseyarɩ, dɩ Ebrɔn, dɩ Uziyɛlɩ dwiə yam wʋnɩ.
24 Moyisi bu Geresom dwi tu Sebuɛlɩ dɛɛn mʋ yɩ dɩdɛɛrʋ wʋlʋ na nii Wɛ-digə kam səbu tiŋim baŋa nɩ tɩn. 25 O cʋrrʋ tɩlʋ na yɩ Eliezɛrɩ biə tɩn maa yɩ:
Rehabia, dɩ Ezayi, dɩ Zʋram, dɩ Zikiri, dɩ Selomiti.
26 Selomiti dɩ o cʋrrʋ tɩm dɛɛn mʋ yɩrɩ zɩla yalʋ maama ba na tiŋi sɩ ba ma ba kɩ pɛɛra ba pa Baŋa-Wɛ tɩn. Balʋ na jaanɩ pɛɛra yam kʋntʋ ba ba tɩn dɛɛn yɩ Pɛ Davidi, dɩ nakwa balʋ na te nɔɔna mʋrʋ mʋrʋ tɩn, dɩ balʋ na te nɔɔna bi bi tɩn, dɩdaanɩ jar-kərə dɩdɛɛra bam. 27 Ba dɛɛn yǝni ba kwe zɩla yalʋ ba na vrɩ ba dʋna bam tee nɩ tɩn yadonnə mʋ ba kɩ Baŋa-Wɛ jɩŋa nɩ, sɩ ba ma ba fɔgɩ ba kwɛ DƖ digə kam. 28 Wɛ nijoŋnu Samowɛlɩ, dɩ Kisi bu Sooli, dɩ Nera bu Abenɩra, dɩ Zeruya bu Zoabɩ dɩ dɛɛn jaanɩ pɛɛra yadonnə ba ba ba kɩ Wɛ jɩŋa nɩ. Selomiti dɩ o cʋrrʋ tɩm mʋ nii tɩ maama baŋa nɩ.
29 Yiseyarɩ sɔ-yuu kʋm wʋnɩ:
Kenanɩa dɩ o biə bam dɛɛn yɩ dɩdɛɛra balʋ na tʋŋɩ Yisɩrayɛlɩ tɩʋ je sɩdonnǝ nɩ tɩn mʋ. Ba tɩtʋŋa maa yɩ sɩ ba taa nii tɩʋ kʋm taana baŋa nɩ.
30 Ebrɔn sɔ-yuu kʋm wʋnɩ:
Hasabia dɩ o cʋrrʋ mʋ ba dɛɛn kuri sɩ ba taa nii Yisɩrayɛlɩ laŋa kalʋ na wʋ Zʋrdɛn bugə kam wa-zʋʋrɩ seeni tɩn. Bantʋ maa yɩ nɔɔna mʋrʋ dɩ biə-yarpɛ (1,700) na jɩgɩ yɩrɩ tɩn. Je sɩm kʋntʋ nɩ mʋ ba dɛɛn nii Wɛ cwǝŋǝ tɩtʋŋa, dɩdaanɩ pɛ wʋm tɩtʋŋa maama baŋa nɩ. 31 Yeria dɛɛn mʋ yɩ Ebrɔn sɔ-yuu kʋm nakwɩ: nɩ kʋ na pʋpʋnɩ te ba dwi dɩm cɩbara gulə twaanʋ tɩm wʋnɩ tɩn. Davidi paarɩ dim bɩna fiinna bɩnɩ dɩm wʋnɩ mʋ ba vɛɛsɩ Ebrɔn dwi dɩm wʋnɩ digə dɩ ka digə ba kuri nɔn-yɩrrʋ ba ja ba nuŋi Galadɩ tɩʋ Yazɛrɩ nɩ. 32 Yeria cʋrrʋ tɩlʋ na yɩ nakwa yɩ ba kwǝri ba yɩ nɔn-yɩrrʋ tɩn dɛɛn yɩ baara mʋrrʋ tɩle dɩ biə-yarpɛ (2,700) mʋ. Pɛ Davidi dɛɛn kuri bantʋ mʋ sɩ ba taa nii Ruban dwi dɩm, dɩ Gadɩ dwi dɩm, kʋ wǝli dɩ Manasɩ dwi cicoro kʋm. Dwiə yam kʋntʋ tee nɩ mʋ ba dɛɛn yǝni ba nii Wɛ cwǝŋǝ tɩtʋŋa, dɩdaanɩ pɛ wʋm tɩtʋŋa maama baŋa nɩ.