Pɛɛra yalʋ na wǝli Wɛ-digə kam lɔɔm tɩn
29
Pɛ Davidi dɛɛn ma ta dɩ kɔgɔ kʋm maama o wɩ:«Baŋa-Wɛ kuri amʋ bu Solɔmɔn mʋ sɩ o lɔ DƖ digə kam. Solɔmɔn nan yɩ nɔn-dʋŋʋ mʋ yɩ o ta bwǝnǝ. Tɩtʋŋɩ dɩm nan yɩ tɩtʋŋ-kamunu mʋ, bɛŋwaanɩ kʋ daɩ nabiinu digə mʋ o lagɩ o lɔ, sɩ kʋ yɩ Baŋa-Wɛ digə mʋ. 2 Kʋntʋ ŋwaanɩ mʋ amʋ tiini a kwaanɩ a beeri zɩla yalʋ maama na maŋɩ dɩ amʋ Tu Wɛ-digə kam lɔɔm tɩn a kɩ dayigǝ nɩ. Zɩla yantʋ yɩ səbu-sɩŋa, dɩ səbu-poŋo, dɩ canna, dɩ luuru tɩtɩ, dɩ dɛ sɩdonnǝ, kʋ wǝli dɩ Onisi kandwa, dɩ kandwa-ŋʋna dwi dwi sɩ ba taa maɩ ba gɔgɩrɩ wǝǝnu, kʋ wǝli dɩ kandwa yalʋ na jɩgɩ nyʋnyʋrʋ dwi tǝri tǝri tɩn. Amʋ nan tiini a la tɩntʋ maama zanzan mʋ a tiŋi. 3 Kʋntʋ maama kwaga nɩ amʋ jɩgɩ a tɩtɩ səbu-sɩŋa dɩ səbu-poŋo wǝǝnu sɩ a pa ba ma ba lɔ amʋ Tu Wɛ-digə kam, a na saɩ yɩra ka lɔɔm dɩm ŋwaanɩ tɩn. Amʋ tɩtɩ ta na wʋ́ wǝli kʋlʋ da tɩn mʋ tɩntʋ: 4 Səbu-sɩŋa kalʋ na yɩ lanyɩranɩ yɩ ka nuŋi Ofiiri tɩn duuni yɩ kilo mʋrrʋ bi (100,000) mʋ. Səbu-poŋo tɩlʋ ba na wʋ́ ma ba taagɩ kabri sɩm tɩn duuni maa yɩ kilo mʋrrʋ biə-yale dɩ fiinna (240,000). 5 Gwarʋ tɩm ta wʋ́ ma səbu-sɩŋa kam dɩ səbu-poŋo tɩm kʋntʋ ba ma ba gɔgɩrɩ Wɛ-digə kam wǝǝnu dwi dwi. Tɔ. Abam wɔɔ tɩtɩ mʋ wʋ́ sɛ sɩ o dɩ kwe o wǝǝnu o pa Baŋa-Wɛ zɩm dɛ dɩntʋ nɩ?»
6 Davidi na tagɩ kʋntʋ o ti tɩn, sɔ-yuni nakwa bam, dɩ Yisɩrayɛlɩ dwiə yam nakwa bam, dɩ dɩdɛɛra balʋ na te jar-kərə mʋrʋ mʋrʋ tɩn, dɩ balʋ na te jar-kərə bi bi tɩn, kʋ wǝli dɩ dɩdɛɛra balʋ na nii pɛ wʋm tɩtʋŋa baŋa nɩ tɩn maama ma sɛ ba pa pɛɛra dɩ ba wʋʋ maama Wɛ-digə kam lɔɔm ŋwaanɩ. 7 Ba dɛɛn pɛ səbu-sɩŋa duuni na yi kilo mʋrrʋ bi dɩ fusɩrpɛ (170,000) tɩn, dɩ səbu-poŋo duuni na yi kilo mʋrrʋ biə-yatɔ dɩ fiinna (340,000) tɩn, dɩ canna duuni na yi kilo mʋrrʋ biə-yardʋ (600,000) tɩn, dɩ luuru tɩlʋ duuni na yi kilo mʋrʋ kuni mʋrrʋ tɩtɔ dɩ biə-yana (3,400,000) tɩn mʋ. 8 Balʋ maama dɩ dɛɛn na jɩgɩ kandwa-ŋʋna tɩn dɩ ma kwe-ya ba ja ba vu ba tiŋi lʋnnɩ wǝǝnu digə kam wʋnɩ, yɩ Gɛrsɔnɩ tu Yehiyɛlɩ nii tɩ baŋa nɩ. 9 Nɔɔna bam wʋrʋ ma tiini kʋ poli dɩ ba na pɛ wǝǝnu zanzan dɩ ba wʋʋ maama ba ma kɩ pɛɛra ba pa Baŋa-Wɛ tɩn. Ba maama dɩ Pɛ Davidi tɩtɩ maa tiini ba caka.a
Davidi wɛ-loro
10 Davidi ma zɩgɩ kɔgɔ kʋm maama yigə nɩ o zuli Baŋa-Wɛ yɩ o wɩ:
«Pa-na sɩ dɩ́ te Yuutu Baŋa-Wɛ dɩm
dɩbam nabaarʋ Yisɩrayɛlɩ dɩ dɛɛn na zuli tɩn.
Baŋa-Wɛ, nmʋ maŋɩ sɩ n joŋi zulə
sɩ kʋ taa ve maŋa maama.
11 Nmʋ kamunni, dɩ dam,
dɩ kajaanɩ, dɩ paarɩ daga zanzan,
nmʋ na te lʋgʋ baŋa dɩ wɛyuu wǝǝnu maama tɩn ŋwaanɩ.b
12 Jɩjɩgɩrʋ dɩ duuni maama
nuŋi nmʋ tee nɩ mʋ,
nmʋ na di paarɩ nabiinǝ maama baŋa nɩ tɩn ŋwaanɩ.
Nmʋ yǝni n kwe n dam-fɔrɔ mʋ
n pa nɔɔna
pa ba jiri nadunə dɩ nɔn-yɩrrʋ.
13 Dɩbam Tu Wɛ, dɩ́ kɩ nmʋ le,
yɩ dɩ́ daarɩ dɩ́ zuli
n yɩrɩ kamunu kʋm mʋ.
14 Amʋ dɩ a nɔɔna bam nan ya muri sɩ dɩ́ wanɩ dɩ́ pa pɛɛra yantʋ dɩ dɩ́ wʋʋ maama, jɩjɩgɩrʋ maama na nuŋi nmʋ tee nɩ tɩn ŋwaanɩ. Kʋlʋ na yɩ nmʋ nyɩm tɩn mʋ dɩ́ joori dɩ́ kwe dɩ́ pa‑m. 15 Dɩbam yɩ vərə mʋ dɩ́ zʋʋrɩ lʋgʋ kʋntʋ wʋnɩ, nɩ dɩ́ nabaara bam dɩ dɛɛn na yɩ te tɩn. Dɩ́ ba jɩgɩ kugu je lʋgʋ baŋa nɩ. Dɩ́ nan wʋ́ je lɩla nɩnɛɛnɩ luluŋu na da kʋ duri kʋ je te tɩn mʋ.
16 Dɩbam Tu Baŋa-Wɛ, kʋ na yɩ pɛɛra yantʋ maama dɩ́ na jaanɩ dɩ́ ba sɩ dɩ́ ma dɩ́ lɔ digə kalʋ na wʋ́ taa zɩgɩ nmʋ yɩrɩ kamunu kʋm zulə ŋwaanɩ tɩn, ya maama maŋɩ ya yɩ nmʋ nyɩm mʋ. 17 Amʋ Tu Wɛ, a ye nɩ n yǝni n maŋɩ nɔɔnʋ bɩcarɩ mʋ n nii, yɩ n wʋʋ poli dɩ balʋ kikiə na tɔgɩ cɩga tɩn. A kwe wǝǝnu tɩntʋ a pa‑m dɩ a wʋʋ maama, dɩ a wʋbʋŋ-laarʋ mʋ. A ta ma maanɩ nɩ nmʋ nɔɔna balʋ na jeeri yo seeni tɩn dɩ kwe ba wǝǝnu ba kɩ nmʋ jɩŋa nɩ dɩ wʋpolo, dɩ ba cɩga maama. 18 Yuutu Baŋa-Wɛ dɩm na yɩ dɩ́ nabaara Abraham, dɩ Yizakɩ, dɩ Yisɩrayɛlɩ Wɛ tɩn, nan pa n nɔɔna bam taa jɩgɩ sinsigǝ yam kʋntʋ taan, sɩ ba taa jɩgɩ nmʋ cɩga sɩ kʋ taa ve maŋa maama. 19 Ta pa amʋ bu Solɔmɔn yɔɔrɩ o taa tʋŋɩ o tɔgɩ n niə yam, dɩ n cullu tɩm, dɩ n kwiə yam maama. Zən‑o sɩ o sɩɩnɩ o yiǝ o lɔ nmʋ digə kam a na maŋɩ a la ka yɩra zɩla yam a tiŋi sɩ ba ma ba lɔ tɩn.»
20 Davidi laan ma ta dɩ nɔn-kɔgɔ kʋm maama o wɩ: «Tee-na abam Tu Baŋa-Wɛ!» Ba maama ma tee Baŋa-Wɛ dɩm na yɩ ba nabaara Wɛ tɩn. Ba maa tiiri ba vin ba yibiyə tɩga nɩ ba zuli Baŋa-Wɛ, ba daarɩ ba zuli Pɛ Davidi tɩtɩ dɩ.
Solɔmɔn ləri Davidi yuu nɩ o ji pɛ
21 Tɩga na pʋʋrɩ tɩn, Yisɩrayɛlɩ tiinə bam dɛɛn ma gʋ vara zanzan ba ma kɩ zwɛɛm kaanɩm ba pa Baŋa-Wɛ. Ba dɛɛn gʋ na-balɩ mʋrʋ dɩdʋa, dɩ pi-bɛ mʋrʋ dɩdʋa, dɩ pəlbiə mʋrʋ dɩdʋa mʋ. Ba ta ma kɩ wo-nyɔɔrʋ pɛɛra dɩdaanɩ pɛɛra dwi dwi ba wǝli da, Yisɩrayɛlɩ tiinə bam maama ŋwaanɩ. 22 Dɛ dɩm kʋntʋ nɩ nɔɔna bam wʋrʋ dɛɛn poli sɩ kʋ gaalɩ. Ba ma di wʋdi-fɔrɔ candiə Baŋa-Wɛ yigə nɩ. Ba ma joori ba tiŋi Solɔmɔn paarɩ dɩm sɩ kʋ kɩ bɩle tu, sɩ o wanɩ o ləri o ko Davidi yuu nɩ o di paarɩ dɩm. Ba ma kwe Wɛ yu-yoŋo nugə ba lo o yuu nɩ. Ba ta ma lo nugə kam Sadoki yuu nɩ sɩ o ji Wɛ kaanɩm tu. 23 Solɔmɔn ma ləri o ko Davidi yuu nɩ o di paarɩ Baŋa-Wɛ ŋwaanɩ. Wǝǝnu maama dɛɛn ma kɩ lanyɩranɩ tɩ pa Solɔmɔn. Yisɩrayɛlɩ tiinə bam maama maa sɛ o ni. 24 Tɩʋ kʋm dɩdɛɛra bam maama, dɩ nɔn-yɩrrʋ tɩm maama, kʋ wǝli dɩ Davidi biə bam maama dɛɛn ma sɛ Solɔmɔn ni mʋ.
25 Baŋa-Wɛ dɛɛn pɛ Solɔmɔn tiini o na zulə Yisɩrayɛlɩ tiinə bam maama tee nɩ. O ta ma pa o paarɩ dɩm jɩgɩ nɩnwaŋa zanzan sɩ kʋ dwǝni Yisɩrayɛlɩ tɩʋ pwa balʋ na loori wʋntʋ na nɛ nɩnwaŋa kalʋ tɩn.c
Davidi paarɩ dɩm cɩbarɩ
26 Zese bu Davidi dɛɛn mʋ di paarɩ Yisɩrayɛlɩ tɩʋ maama nɩ. 27 O nɛ bɩna fiinna mʋ Yisɩrayɛlɩ tɩʋ paarɩ dɩm baŋa nɩ. Bɩna fiinna yam wʋnɩ o kɩ bɩna yarpɛ mʋ Ebrɔn nɩ, o daarɩ o kɩ bɩna fiintɔ-yatɔ Zeruzalɛm nɩ. 28 Davidi dɛɛn jɩgɩ jɩjɩgɩrʋ zanzan yɩ nɔɔna nɩg-o. O kwɩn o yi o maŋa mʋ yɩ o tɩ. O bu Solɔmɔn ma ləri o yuu nɩ o di paarɩ dɩm.
29 Davidi dɛɛn na di paarɩ yɩ o kɩ wǝǝnu tɩlʋ maama tɩn, kʋ zɩgɩ o paarɩ dɩm pulim nɩ sɩ kʋ yi dɩ na kweeli maŋa kalʋ tɩn, ba pʋpʋnɩ tɩ maama ba tiŋi Wɛ nijoŋnǝ Samowɛlɩ, dɩ Natan, dɩ Gaadɩ yɩra cɩbarɩ twannʋ tɩm wʋnɩ. 30 Ba dɛɛn pʋpʋnɩ kʋ tɔgɩ o dam dɩm dɩ o paarɩ dɩm, dɩ wǝǝnu tɩlʋ na yi o dɩ Yisɩrayɛlɩ tiinə bam tɩn, kʋ wǝli dɩ wǝǝnu tɩlʋ na yi dwi-gɛ tiinə dɩ ba tɩɩnɩ dɩm tɩn mʋ ba tiŋi.