Ruban dwi dɩm
5
Ruban ya mʋ yɩ Yisɩrayɛlɩa bu-kwɩan. O nan gɛ o nakwɩɩnɩ dɩm mʋ, o na pəni dɩ o ko kaanɩ tɩn ŋwaanɩ. O nyaanɩ Zʋzɛfʋ biə bale bam mʋ ləri o yuu nɩ ba di nakwɩɩnɩ dɩm. Kʋntʋ ŋwaanɩ Ruban yɩrɩ wʋ dɛ dɩ zʋ nɩ o yɩ bu-kwɩan kam.b 2 Zuda dɛɛn mʋ sɩɩnɩ o dana o dwe o cʋrrʋ tɩm maama, yɩ o dwi dɩm nɔɔnʋ ba o ji tɩʋ kʋm yuutu.c Dɩ kʋ dɩ, Zʋzɛfʋ dwi dɩm dɛɛn mʋ jɩgɩ nakwɩɩnɩ dɩm.3 Yisɩrayɛlɩ bu-kwɩan Ruban biə mʋ tɩntʋ:
Yenokɩ, dɩ Palu, dɩ Esrɔm, dɩ Karmɩ.
4 Zowɛlɩ dwi dɩm na yɩ te tɩn mʋ tɩntʋ:
Semaya dɩ o bu Gɔgɩ, dɩ wʋntʋ bu Simeyi, 5 dɩ wʋntʋ dɩ bu Mika, dɩ wʋntʋ bu Reaya, dɩ wʋntʋ bu Baalɩ, 6 dɩ wʋntʋ bu Beerǝ. Beerǝ dɛɛn na yɩ Ruban dwi dɩm nakwɩ maŋa kalʋ nɩ tɩn, mʋ Asiiri tɩʋ pɛ Tigila-Pilezarɩ jaan‑o o vu o tɩtɩ tɩʋ.
7 Ruban dwi dɩm sɔ-yuni nakwa yɩra yam na pʋpʋnɩ te cɩbara gulə twaanʋ tɩm wʋnɩ tɩn mʋ tɩntʋ:
Ba yigə tu Yeyiyɛlɩ, dɩ Zakari, 8 dɩ Azaze bu Bela. Azaze dɛɛn yɩ Sema bu mʋ, yɩ Sema dɩ yɩ Zowɛlɩ bu.
Dwi dɩntʋ dɛɛn jǝni laŋa kalʋ na zɩgɩ Aroyɛrɩ nɩ sɩ ka vu ka yi Nebo dɩ Baal-Meyɔn seeni tɩn mʋ. 9 Kʋ na yɩ wa-puli seeni, ba laŋa kam ta kɛ ka yi kagʋa kam ni mʋ, mɛ na wʋ Efratɩ bugə kam bubɛ baŋa seeni tɩn. Ba laŋa kam dɛɛn yalma kʋntʋ doŋ, ba vara bam kɔgɔ na puli zanzan Galadɩ nɩ tɩn ŋwaanɩ.
10 Maŋa kalʋ Sooli na di paarɩ tɩn, mʋ Ruban dwi tiinə dɛɛn kɩ najara dɩ Hagarɩ tiinə bam ba di-ba. Ba laan ma vu ba joŋi Hagarɩ tiinə bam je sɩm maama na wʋ Galadɩ wa-puli seeni tɩn ba te.
Gadɩ dwi dɩm
11 Gadɩ dɩm dɛɛn zʋʋrɩ Basan nɩ mʋ sɩ kʋ vu kʋ yi Salɛka. Je sɩm kʋntʋ bwələ dɩ Ruban dwi tiinə bam na zʋʋrɩ mɛ tɩn. 12 Zowɛlɩ dɛɛn mʋ yɩ ba yigə tu Basan nɩ. Safam maa yɩ bɩle tu. Yanayi dɩ Safatɩ dɩ ma saŋɩ. 13 Ba cʋrrʋ tɩlʋ na daarɩ tɩn dɩ dwiə yam nakwa mʋ tɩntʋ:
Misɛɛlɩ, dɩ Mesulam, dɩ Seba, dɩ Yorayi, dɩ Yakan, dɩ Ziǝ, dɩ Hebɛrɩ. Ba maama yɩ barpɛ mʋ. 14 Bantʋ maama dɛɛn yɩ Abihali dwi mʋ. Abihali dɛɛn yɩ Huri bu mʋ. Huri maa yɩ Yarʋa bu. Yarʋa dɩ maa yɩ Galadɩ bu, yɩ Galadɩ yɩ Misɛɛlɩ bu. Misɛɛlɩ maa yɩ Yesisayi bu. Yesisayi dɛɛn yɩ Yado bu, yɩ Yado yɩ Buzi bu. 15 Abideli bu Ahi dɛɛn mʋ yɩ ba sɔ-yuu kʋm nakwɩ. Abideli dɩ dɛɛn maa yɩ Guni bu.
16 Gadɩ dwi tiinə bam dɛɛn zʋʋrɩ Basan dɩ Galadɩ je sɩm nɩ dɩ sɩ nawuurə yam nɩ mʋ. Ba maa te pwəli sɩlʋ na wʋ Sarɔn nɩ sɩ kʋ vu kʋ yi sɩ sisənə yam maama tɩn.
17 Ba dɛɛn pʋpʋnɩ ba natɔga kam kʋntʋ ba tiŋi maŋa kalʋ Zʋatam na di Zuda tɩʋ paarɩ yɩ Zeroboam dɩ di Yisɩrayɛlɩ tɩʋ paarɩ tɩn mʋ.
18 Ruban dwi dɩm, dɩ Gadɩ dwi dɩm, kʋ wǝli dɩ Manasɩ dwi cicoro kʋm dɛɛn jɩgɩ pamag-bɩbɛ mʋrrʋ fiinna-tɩna dɩ biə-yarpɛ dɩ fusɩrdʋ (44, 760) balʋ na ye najara kǝm tɩn mʋ. Bantʋ waɩ ba maɩ najara cɩ-kwɛn dɩ sʋ-lwaanʋ ba kɩ najara, yɩ ba ye cɩna tam lanyɩranɩ. 19 Ba dɛɛn ma kɩ najara dɩ Hagarɩ tiinə, dɩ Yeturi tiinə, dɩ Nafisi tiinə, kʋ wǝli dɩ Nodabɩ tiinə maama. 20 Wɛ dɛɛn zǝni pamaŋna bam kʋntʋ mʋ pa ba wanɩ Hagarɩ tiinə bam dɩ balʋ na wǝli-ba najara wʋnɩ tɩn ba di, ba na keeri ba loori-DƖ najara yam wʋnɩ tɩn ŋwaanɩ. Wɛ ma sɛ ba wɛ-loro kʋm, ba na kɩ ba wʋ-dɩdʋa dɩ DƖ tɩn ŋwaanɩ. 21 Pamaŋna bam ma vrɩ Hagarɩ tiinə bam vara bam maama ba ja ba viiri. Yogondə mʋrrʋ fiinnu (50,000), dɩ peeni mʋrrʋ biə-yale dɩ fiinnu (250,000), kʋ wǝli dɩ bɩnɛ mʋrrʋ tɩle (2,000) mʋ kʋntʋ. Ba dɛɛn ta ma ja nɔɔna mʋrrʋ bi (100,000) ba wǝli da ba ja ba viiri. 22 Wɛ na wǝli-ba najara yam wʋnɩ tɩn, pamaŋna bam dɛɛn gʋ ba dʋna bam zanzan mʋ. Ba laan maa zʋʋrɩ je sɩm kʋntʋ nɩ mʋ sɩ kʋ yi maŋa kalʋ Asiiri tiinə bam na jaanɩ-ba ba vu ba tɩtɩ tɩʋ tɩn.d
Manasɩ dwi cicoro kʋm
23 Manasɩ dwi cicoro kʋm dɛɛn daga mʋ zanzan. Ba maa zʋʋrɩ je sɩlʋ na zɩgɩ Basan nɩ sɩ kʋ vu kʋ yi Baal-Hɛrɩmɔn, dɩ Seniri, dɩ Hɛrmɔn piu kʋm seeni tɩn.
24 Ba sɔ-yuni tɩm nakwa bam mʋ tɩntʋ:
Efɛrɩ, dɩ Yiseyi, dɩ Eliɛlɩ, dɩ Azireli, dɩ Zeremi, dɩ Hodavia, dɩ Yadeli.
Nakwa bantʋ maama dɛɛn yɩ nɔn-babɛ mʋ najara wʋnɩ yɩ ba tiini ba jɩgɩ yɩrɩ. 25 Ba nan nuŋi ba nabaara Wɛ dɩm kwaga nɩ, yɩ ba daarɩ ba kaanɩ wa-yɔɔrʋ tɩlʋ Kaanan tiinə bam dɛɛn na tɔgɩ tɩn mʋ. Wɛ nan ya cɔgɩ nɔɔna bam kʋntʋ DƖ yagɩ pa DƖ nɔɔna laan joŋi ba tɩga kam mʋ ba te. 26 Kʋntʋ ŋwaanɩ Wɛ ma pa Asiiri tɩʋ pɛ Puuli kɩ jara dɩ ba. Pɛ wʋm kʋntʋ yɩrɩ dɩdoŋ maa yɩ Tigila-Pilezarɩ. O ma wanɩ o di Ruban dwi tiinə bam, dɩ Gadɩ dwi tiinə bam, dɩ Manasɩ dwi cicoro tiinə bam, yɩ o daarɩ o ja-ba o ja viiri. O ma kalɩ-ba o vu Hala, dɩ Haborɩ, dɩ Hara, kʋ wǝli dɩ Gozan bugə kam seeni. Dáanɩ mʋ ba zʋʋra sɩ kʋ ba kʋ yi zɩm maama.