Zuda dwi dɩm nɔɔna badaara
4
Zuda dwi dɩm biə badonnǝ mʋ tɩntʋ:Farɛsɩ, dɩ Esrɔm, dɩ Karmɩ, dɩ Huuri, dɩ Sobalɩ.
2 Sobalɩ bu Reaya dɛɛn lʋgɩ Yahatɩ. Yahatɩ ma lʋ Ahumayi dɩ Lahadɩ. Bantʋ dɛɛn yɩ Zoratɩ sɔ-yuni tɩm nabaara mʋ.
3 Etam biə bam mʋ tɩntʋ:
Zizreyɛlɩ, dɩ Yisama, dɩ Yidibasɩ.
Bantʋ nakɔ yɩrɩ dɛɛn yɩ Hazɩleponi. 4 Penuwɛlɩ dɛɛn ma lʋ Gedora. Etisɛrɩ dɩ dɛɛn ma lʋ Husa. Bantʋ mʋ yɩ Huuri dwi dɩm. Huuri dɛɛn yɩ Efrata bu-kwɩan mʋ yɩ o ta yɩ Betelɩhɛm tiinə bam nabaarʋ.
5 Tekoa ko Asuuri dɛɛn jɩgɩ kaana bale mʋ. Ba yɩra maa yɩ Hela dɩ Naara. 6 Naara ma lʋ bəkəri sɩna o pa‑o. Bantʋ mʋ yɩ Ahuzam, dɩ Hefɛrɩ, dɩ Temeni, dɩ Ahastari. 7 O kaanɩ Hela dɩ ma lʋ Zeretɩ, dɩ Tɩsoharɩ, dɩ Etanan, 8 dɩ Kozɩ. Kozɩ dɛɛn ma lʋ Anubi dɩ Zobeba, yɩ o ta yɩ Harum bu Ahareli sɔ-yuni tɩm nabaarʋ.
9 Nɔɔnʋ wʋdoŋ dɛɛn mʋ wʋra o yɩrɩ na yɩ Yabɛsɩ. Wʋntʋ mʋ jɩgɩ yɩrɩ sɩ kʋ dwǝni o cʋrrʋ tɩm maama. O nu dɛɛn nan ya bəŋi o yɩrɩ wɩ Yabɛsɩ, yɩ o wɩ: «A na lʋg-o tɩn, kʋ tiini kʋ cɛ a yɩra nɩ mʋ.» 10 Yabɛsɩ dɩ dɛɛn ma zaŋɩ o keeri o loori Yisɩrayɛlɩ tiinə Wɛ dɩm o wɩ: «A loori-m! Kɩ amʋ yu-yoŋo, sɩ n pa laŋa kalʋ amʋ na wʋ́ taa te tɩn yalɩ ka gaalɩ. Ta n wʋ a tee nɩ sɩ n zəni-nɩ, sɩ n daarɩ n cɩ sɩ lwarɩm yɩ yi-nɩ sɩ kʋ cɛ a yɩra.» Wɛ ma sɩɩnɩ DƖ kɩ Yabɛsɩ na loori kʋlʋ tɩn DƖ pa‑o.
11 Suwa cʋrʋ Kalubi dɛɛn lʋgɩ Meyiri. Meyiri dɩ ma lʋ Esɩtɔn. 12 Esɩtɔn dɩ dɛɛn ma lʋ Bɛtɩ-Rafa, dɩ Pasɩa, dɩ Teyina wʋlʋ na yɩ Nahasɩ tiinə nabaarʋ tɩn. Reka dwi dɩm mʋ kʋntʋ.
13 Kenazɩ biə bam mʋ tɩntʋ:
Ɔtiniyɛlɩ dɩ Seraya.
Ɔtiniyɛlɩ dɩ biə bam maa yɩ Hatatɩ dɩ Meonotayi. 14 Meonotayi dɛɛn ma lʋ Ofera. Seraya dɩ ma lʋ Zoabɩ, yɩ wʋntʋ dɛɛn mʋ jigi tɩʋ kʋlʋ ba na bǝi nɩ «Gwarʋ jǝgǝ» tɩn ko, kʋ nɔn-biə bam na tiini ba ye gɔgɩrɩm tɩtʋŋa tɩn ŋwaanɩ.
15 Yefune bu Kalɛbɩ biə bam mʋ tɩntʋ:
Yiru, dɩ Ela, dɩ Naam. Ela ma lʋ Kenazɩ.
16 Yehaleli biə bam mʋ tɩntʋ:
Zifi, dɩ Zifa, dɩ Tiriya, dɩ Azarɛlɩ.
17-18 Esdrasɩ biə bam mʋ tɩntʋ:
Yetɛrɩ, dɩ Merɛdɩ, dɩ Efɛrɩ, dɩ Yalon.
Merɛdɩ dɛɛn di Ezipi pa-farʋ bukɔ Bitia mʋ o ma o kɩ o kaanɩ. Ba ma lʋ bɩsankana o yɩrɩ na yɩ Miriyam tɩn, kʋ wǝli dɩ Samayi, dɩ Esɩtemoa ko Yisiba. Merɛdɩ kaanɩ wʋdoŋ wʋm na nuŋi Zude tɩn ma lʋ Gedora ko Zeredi, dɩ Soko ko Hebɛrɩ, kʋ wǝli dɩ Zanoa ko Yekuteli.
19 Odiya kaanɩ na yɩ Naham nakɔ tɩn biə mʋ tɩntʋ:
Keyila ko wʋlʋ na yɩ Garimi tu tɩn, kʋ wǝli dɩ Esɩtemoa wʋlʋ na yɩ Maaka tu tɩn.
20 Simɔn biə mʋ tɩntʋ:
Aminɔnɩ, dɩ Rina, dɩ Ben-Hanan, dɩ Tilon.
Yiseyi dɩ biə bam maa yɩ Zohetɩ dɩ Ben-Zohetɩ.
21 Zuda bu Siloe biə bam mʋ tɩntʋ:
Ɛrɩ wʋlʋ bu na yɩ Lɛka tɩn, dɩ Laada wʋlʋ bu na yɩ Maresa tɩn.
Siloe dɛɛn yɩ sɔ-yuni tɩlʋ na zʋʋrɩ Bɛtɩ-Asebea nɩ yɩ ba sɔ gar-fɩfalɩ tɩn nabaarʋ mʋ. 22 Siloe ma lʋ Yokim, dɩ balʋ na zʋʋrɩ Kozeba nɩ tɩn, kʋ ta wǝli dɩ Zoasɩ, dɩ Sarafɩ. Bantʋ bale dɛɛn mʋ di Moabɩ bukwa yɩ ba daarɩ ba joori ba zʋʋrɩ Lehem nɩ. (Taanɩ dɩntʋ nuŋi faŋa faŋa mʋ.) 23 Bantʋ dɛɛn daa ta yɩ kamɔ-mɔra balʋ na zʋʋrɩ Netayim dɩ Gedɩra nɩ tɩn mʋ. Ba na wʋra tɩn, ba tʋŋɩ ba pa pɛ wʋm mʋ.
Simeyon dwi dɩm
24 Simeyon dwi dɩm mʋ tɩntʋ:
Nemuwɛlɩ, dɩ Yamini, dɩ Yaribi, dɩ Zara, dɩ Sawuli.a 25 Sawuli bu dɛɛn mʋ yɩ Salum. Salum bu maa yɩ Mibsan, yɩ Mibsan bu dɩ yɩ Misma. 26 Misma dɩ dwi dɩm maa yɩ o bu Hamuwɛlɩ, dɩ wʋntʋ bu Zakuri, kʋ wǝli dɩ Zakuri bu Simeyi.
27 Simeyi dɛɛn lʋgɩ bəkəri fugə-sɩrdʋ dɩ bɩsankam sɩrdʋ mʋ. O cʋrrʋ tɩm nan wʋ lʋgɩ biə zanzan. Kʋntʋ ma pa Simeyon dwi dɩm wʋ puli sɩ ba taa maɩ dɩ Zuda dwi dɩm.
28 Simeyon dwi dɩm maa zʋʋrɩ tɩɩnɩ dɩntʋ wʋnɩ:
Bɛɛr-Seba, dɩ Molada, dɩ Hazara-Suwala, 29 dɩ Bila, dɩ Ezem, dɩ Toladɩ, 30 dɩ Betuɛlɩ, dɩ Horama, dɩ Zikalagɩ, 31 dɩ Bɛtɩ-Markabɔtɩ, dɩ Hazara-Susim, dɩ Bɛtɩ-Biri, dɩ Saarayim. Tɩɩnɩ dɩntʋ maama dɛɛn wʋ ba dam kuri nɩ mʋ sɩ kʋ taa nii maŋa kalʋ Davidi laan na tu o di paarɩ tɩn.
32 Ba dɛɛn ta maa zʋʋrɩ tɩ-balwa bantʋ wʋnɩ:
Etam, dɩ Ayin, dɩ Rimɔn, dɩ Tokɛn, dɩ Asan, 33 kʋ ta wǝli dɩ tɩɩnɩ dɩm kʋntʋ nawuurə yam sɩ kʋ kɛ kʋ yi Baalatɩ. Mʋ tɩɩnɩ dɩlʋ ba dɛɛn na zʋʋrɩ dɩ wʋnɩ tɩn. Ba dɛɛn nan pʋpʋnɩ ba nabaara bam natɔga kam ba tiŋi tɔnɔ wʋnɩ mʋ.
34 Ba nakwa bam mʋ tɩntʋ:
Mesobabɩ, dɩ Yamalɛkɩ, dɩ Amasia bu Yosa, 35 dɩ Zowɛlɩ, dɩ Yosibia bu Zehu. Yosibia maa yɩ Seraya bu yɩ o kwǝri o yɩ Aziyɛlɩ naa mʋ. 36 Ba nakwa badonnǝ maa yɩ Eliu-Enayi, dɩ Yakoba, dɩ Yesohaya, dɩ Asaya, dɩ Adiyɛlɩ, dɩ Yesimiyɛlɩ, dɩ Benaya, 37 kʋ ta wǝli dɩ Sifi bu Ziza. Sifi ko yɩ Alon mʋ. Alon ko maa yɩ Yedaya yɩ Yedaya ko yɩ Simiri. Simiri dɩ ko maa yɩ Semaya.
38 Baara bam kʋntʋ maama dɛɛn yɩ Simeyon sɔ-yuni tɩm yigǝ tiinǝ mʋ. Ba dwi dɩm dɛɛn puli lanyɩranɩ. 39 Ba dɛɛn jagɩ mʋ ba vu ba yi Gedora sɩ ba beeri ga-lɛɛrʋ sɩ ba vara taa di. Laŋa kam kʋntʋ dɛɛn bwələ dɩ bolo kʋlʋ na wʋ tɩʋ kʋm wa-puli seeni tɩn mʋ. 40 Ba ma na tɩ-ywəŋə na yalma yɩ ka maŋɩ dɩ vara kɔnɔ tɩn ba jǝni da. Kʋlʋkʋlʋ wʋ yaarɩ-ba je sɩm kʋntʋ nɩ. Samɩ dwi tiinə dɛɛn ya mʋ zʋʋrɩ tɩga kam kʋntʋ baŋa nɩ.
41 Ezekɩasɩ dɛɛn na di Zuda tɩʋ paarɩ tɩn, mʋ yigǝ tiinǝ bam kʋntʋ kɩ jara dɩ Samɩ tiinə bam dɩ Meyunim tiinə balʋ dɩ na zʋʋrɩ da tɩn ba cɔgɩ ba sam maama. Ba ma yɔɔrɩ ba cɔgɩ ba maama pa ba yɩra saarɩ dɩ zɩm maama. Ba ma daarɩ ba joŋi ba tɩga kam ba jɩga, ka na lana dɩ vara kɔnɔ tɩn ŋwaanɩ. 42 Kʋntʋ kwaga nɩ mʋ Simeyon dwi tiinə bam wʋnɩ nɔɔna biə-yanu (500) dɛɛn ve Seyiri pweeru laŋa kam ba kɩ najara dɩ balʋ na zʋʋrɩ da tɩn. Kʋ nan yɩ Yiseyi biə mʋ dɛ ba yigə yɩ ba vu. Pelatɩa, dɩ Neari, dɩ Refaya, dɩ Uziyɛlɩ mʋ kʋntʋ. 43 Ba dɛɛn ma vu ba gʋ Amalɛkɩ dwi tiinə balʋ ya na lugi najara wʋnɩ yɩ ba ta wʋra tɩn. Ba ma joŋi ba tɩga kam yɩ ba zʋʋrɩ da dɩ zɩm maama.