Ba tiŋi Zehu paarɩ dɩm
9
Dɛ dɩdwɩ mʋ Wɛ nijoŋnə Elisa dɛɛn lɩ nɔɔnʋ wʋdoŋ Wɛ nijoŋnə kɔgɔ kʋm wʋnɩ o ta dɩd-o o wɩ: «Fɔgɩ n vɔ n gwaarʋ kiri-kiri n daarɩ n joŋi kasambu kʋntʋ dɩ kʋ wʋ nugə kam n ja n vu Ramɔtɩ-Gileadɩ. 2 Nmʋ na yi da, sɩ n beeri Zehu wʋlʋ na yɩ Zʋzafatɩ bu dɩ Nimisi naa tɩn jǝgǝ. Nmʋ na nɛ‑o, sɩ n lɩ-o o yuudonnə wʋnɩ n ja n zʋ digə wʋnɩ. 3 Laan kwe nugə kam n lo Zehu yuu nɩ n daarɩ ta dɩd-o wɩ: ‹Baŋa-Wɛ na tagɩ kʋlʋ tɩn mʋ tɩntʋ: amʋ laan mʋ tiŋi‑m sɩ n ji Yisɩrayɛlɩ tɩʋ pɛ.›a Nmʋ na kɩ kʋntʋ n ti, sɩ n pʋrɩ digə kam n nuŋi n yagɩ jǝgǝ kam lɩla n viiri.»4 Nɔn-dʋŋʋ kʋm na yɩ Elisa tɩntʋŋnʋ tɩn ma sɩɩnɩ o vu Ramɔtɩ-Gileadɩ. 5 O na yi da tɩn, o ma nii o na jar-kərə yigǝ tiinǝ bam na je daanɩ yɩ ba lara. O ma ta o wɩ: «Amʋ tu, a jɩgɩ kwǝrǝ mʋ sɩ a pa‑m.» Zehu ma bwe o wɩ: «Kwǝrǝ kam yɩ dɩbam maama wʋnɩ wɔɔ tɩtɩ nyɩm mʋ?» O ma ləri o wɩ: «Amʋ tu, kʋ yɩ nmʋ nyɩm mʋ.» 6 Bantʋ bale ma zʋ digə kam wʋnɩ. Nɔn-dʋŋʋ kʋm ma kwe nugə kam o lo Zehu yuu nɩ, yɩ o daarɩ o ta wɩ: «Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: amʋ laan mʋ tiŋi‑m sɩ n ji amʋ nɔɔna Yisɩrayɛlɩ tiinə bam pɛ. 7 Nmʋ nan maŋɩ sɩ n cɔgɩ n tu Akabɩ dwi dɩm mʋ. Amʋ wʋ́ da kʋntʋ baŋa nɩ a waarɩ Zezabɛlɩ dɩ o na gʋ a nijoŋnǝ bam dɩ a tɩntʋŋna bam tɩn.b 8 Akabɩ dwi dɩm maama maŋɩ sɩ ba tɩ mʋ. O dwi dɩm bəkəri sɩm maama wʋ́ saarɩ Yisɩrayɛlɩ tɩʋ nɩ, kʋ na yɩ balʋ ta na wʋ ba ko sɔŋɔ nɩ tɩn, dɩ balʋ na te ba tɩtɩ tɩn dɩ.c 9 Amʋ lagɩ a pa o dwi dɩm yɔɔrɩ dɩ cɔgɩ nɩnɛɛnɩ a na kɩ Nebatɩ bu Zeroboam dwi dɩm, dɩ Ahiya bu Baasa dwi dɩm te tɩn mʋ. 10 Kʋ nan na yɩ Zezabɛlɩ, kakuri mʋ lagɩ sɩ di‑o Zizreyɛlɩ tɩga kam baŋa nɩ, yɩ nɔɔna bá kwe‑o ba kɩ.» Nɔn-dʋŋʋ kʋm na yɔɔrɩ o ta kʋntʋ o ti tɩn, mʋ o pʋrɩ digə kam o duri o viiri.
11 Zehu na nuŋi o joori o donnǝ yigǝ tiinǝ bam te tɩn mʋ ba dɩdʋa bwe‑o o wɩ: «Yazurə mʋ na? Bɛɛ mʋ kɩ yɩ cicoo kʋntʋ ba nmʋ te?» Zehu ma ləri o wɩ: «Kʋ daɩ kʋlʋkʋlʋ. Abam maŋɩ á ye nijoŋnu kantʋ doŋ na yirisi te tɩn.» 12 Ba ma ləri ba wɩ: «N fɔɩ vwan mʋ! Ta n brɩ dɩbam o na taga kʋlʋ tɩn cɩga cɩga.» Zehu ma ta o brɩ-ba nɔn-dʋŋʋ kʋm na tagɩ kʋlʋ dɩ kʋlʋ tɩn yɩ o wɩ: «Baŋa-Wɛ na tagɩ kʋlʋ tɩn mʋ tɩntʋ: Amʋ tiŋi nmʋ mʋ sɩ n ji Yisɩrayɛlɩ tiinə bam pɛ.»
13 Zehu yuudonnə bam maama ma kɩ lɩla ba lɩ ba gwar-dannʋ ba lwarɩ Zehu nɛ sɩm seeni. Ba ma daarɩ ba wu nabwaanʋ yɩ ba tɔɔlɩ wɩ: «Zehu mʋ yɩ pɛ.»
14 Kʋntʋ baŋa nɩ mʋ Zʋzafatɩ bu Zehu dɛɛn kɩ jara dɩ Zʋram. Kantʋ maŋa nɩ Zʋram dɩdaanɩ Yisɩrayɛlɩ tiinə bam maama ya yɩrɩ Ramɔtɩ-Gileadɩ mʋ sɩ ba cɩ Siiri pɛ Azayɛlɩ dɩ o jar-kərə bam. 15 Pɛ Zʋram nan ya joori Zizreyɛlɩ mʋ sɩ o sooni o fufwələ yam Siiri tiinə bam na kɩ o yɩra nɩ tɩn. Zehu ma ta dɩ balʋ na wʋ o tee nɩ tɩn o wɩ: «Abam wʋbʋŋa na sɩɩnɩ ya ja sɩ a ji pɛ, nan yɩ pa-na sɩ nɔɔn-nɔɔnʋ na cwǝŋǝ o nuŋi tɩʋ kʋntʋ nɩ o vu Zizreyɛlɩ o ta kʋlʋ na kɩ tɩn.» 16 Zehu ma jǝni o təriko baŋa nɩ o duri o kɛ Zizreyɛlɩ sɩ o beeri pɛ Zʋram, o na tigi dáanɩ dɩ o fufwələ yam tɩn ŋwaanɩ. Kʋ maa yɩ dáanɩ mʋ Zuda tɩʋ pɛ Ahazɩa ya ve sɩ o war‑o.
17 Zehu dɩ o nɔɔna bam na twɛ Zizreyɛlɩ tɩʋ kʋm tɩn mʋ yɩrɩnʋ wʋdoŋ zɩgɩ tɩʋ kʋm vɔŋɔ yuu nɩ o tʋlɩ o na ba na maa bɩɩnɩ. O ma tɔɔlɩ o ta dɩ Zʋram o wɩ: «Amʋ nɛ nɔɔna mʋ na wurigi sise ba bɩɩnɩ.» Pɛ Zʋram dɩ ma ta o wɩ: «Pa nɔɔnʋ kwe sisǝŋǝ o vu o yi o bwe o nii ba vəŋə kam yɩ yazurə vəŋə mʋ na?»
18 Nɔɔnʋ ma sɩɩnɩ o din sisǝŋǝ baŋa o vu o jeeri Zehu. O ma ta dɩd-o o wɩ: «Pɛ Zʋram bwe sɩ o lwarɩ, á bɩɩnɩ dɩ yazurə mʋ na?» Zehu ma ləri o wɩ: «Kʋ kɔ nan mʋ yɩ nmʋ yigə? Nan pipiri n zʋ a kwaga kɔgɔ kʋm wʋnɩ.» Tɩʋ kʋm yɩrɩnʋ wʋm na tʋlɩ o na tɩn, o ma bəŋi pɛ wʋm o ta dɩd-o wɩ: «Wʋlʋ n na tʋŋɩ tɩn yi da, yɩ o nan ba joorə.»
19 Pɛ Zʋram daa ma tʋŋɩ nɔɔnʋ wʋdoŋ o kɩ bɩle. Wʋntʋ dɩ ma din sisǝŋǝ baŋa o vu o yi Zehu dɩ o nɔɔna bam te. O ma ta dɩ Zehu o wɩ: «Pɛ wʋm bwe sɩ o lwarɩ, á bɩɩnɩ dɩ yazurə mʋ na?» Zehu ma lǝr-o o wɩ: «Kʋ kɔ nan mʋ yɩ nmʋ yigə? Nan pipiri n zʋ a kwaga kɔgɔ kʋm wʋnɩ.» 20 Tɩʋ kʋm yɩrɩnʋ wʋm daa ta ma ta o wɩ: «Nmʋ na tʋŋɩ wʋlʋ tɩn yi da, yɩ o dɩ nan ba joorə. Ba yigə tu wʋm na wurigi te o bɩɩnɩ tɩn nyɩ dɩ Nimisi bu Zehu mʋ. O na duri te tɩn nyɩ dɩ o yirisi mʋ.»
21 Zʋram ma pa ni o wɩ: «Ti-na sisǝŋǝ dɩ a təriko kʋm yigə á pa-nɩ.» Ba na ti tɩn, Yisɩrayɛlɩ tɩʋ pɛ Zʋram, dɩdaanɩ Zuda tɩʋ pɛ Ahazɩa ma din ba tərikooru ba vu ba jeeri Zehu. Ba ma yi‑o tɩga kalʋ dɛɛn na yɩ Zizreyɛlɩ tu Nabɔtɩ nyɩm tɩn jǝgǝ nɩ. 22 Zʋram na jeeri Zehu tɩn, o ma bwe‑o o wɩ: «Yazurə vəŋə mʋ n ve na?» Zehu ma ləri o wɩ: «Yazurə laan wʋ yən mʋ yɩ n nu Zezabɛlɩ yɔɔrɩ o tɔgɩ jwə-yɔɔrʋ dɩ liri mwaanʋ kikiə?»
23 Zʋram na ni kʋntʋ tɩn, o ma pipiri o duri yɩ o kaasɩ baŋa baŋa o bəŋi Ahazɩa o ta o wɩ: «Swan mʋ o kɩa! Pa dɩ́ kɩ lɩla dɩ́ duri dɩ́ lu!» 24 Zehu ma yɔɔrɩ o saŋɩ o taŋa o ta Zʋram. Cɩnɩ dɩm ma zɔ o bakalɩ tɩtarɩ laŋa seeni dɩ vu dɩ mʋʋrɩ o bɩcar-kli wʋnɩ pa o tʋ o təriko kʋm wʋnɩ o tɩ. 25 Zehu ma ta dɩ o tɩntʋŋnʋ Bidikarɩ o wɩ: «Kwe Zʋram yɩra yam n dʋlɩ n yagɩ tɩga kalʋ dɛɛn na yɩ Nabɔtɩ nyɩm tɩn nɩ. Nmʋ wʋ́ guli nɩ: dɩbam bale dɛɛn na wʋ daanɩ dɩ́ tɔgɩ o ko Akabɩ kwaga tɩn mʋ Baŋa-Wɛ maŋɩ DƖ sɔɔlɩ cam DƖ yagɩ Akabɩ yuu nɩ DƖ wɩ: 26 ‹Amʋ diin na nɛ Nabɔtɩ dɩ o biə bam jana bam na taagɩ tɩga kam te tɩn, amʋ ta wʋ́ yɔɔrɩ a pa n joori n ŋwɩ jana bam kʋntʋ jɩnɩ tɩga kam kʋntʋ baŋa nɩ. Amʋ Baŋa-Wɛ na tagɩ te tɩn mʋ kʋntʋ.› Kʋntʋ ŋwaanɩ, n maŋɩ sɩ n kwe‑o n dɩ n yagɩ Nabɔtɩ tɩga kam nɩ, nɩ Baŋa-Wɛ kwǝrǝ kam na brɩ nɩ kʋʋ́ kɩ te tɩn.»d
27 Zuda tɩʋ Pɛ Ahazɩa na nɛ kʋlʋ na jɩgɩ kʋ kɩ tɩn, o ma duri o yɔɔrɩ Bɛt-Agan seeni. Zehu ma pɛ o kwaga o pu yɩ o ta dɩ o nɔɔna bam o wɩ: «Go-na o dɩ.» Ba ma sɩɩnɩ ba ta-o dɩ cɩna cwǝŋǝ kalʋ na diini Guri seeni tɩn yuu nɩ. Je sɩm kʋntʋ bwələ dɩ Ibɩleyam. Ba na tag‑o tɩn, Ahazɩa ma wanɩ o duri o yi Megido. O ma tɩ tɩʋ kʋm wʋnɩ. 28 O tɩntʋŋna bam ma kwe‑o dɩ təriko ba ja ba joori Zeruzalɛm. Ba ma kɩ-o o kwə bam yibeeli nɩ Davidi tɩʋ Zeruzalɛm nɩ.
29 Kʋ dɛɛn ya yɩ Akabɩ bu Zʋram bɩna fugə-dɩdʋa paarɩ dim bɩnɩ dɩm nɩ mʋ Ahazɩa puli sɩ o di Zuda tɩʋ paarɩ.
Zezabɛlɩ tʋʋnɩ
30 Zehu dɛɛn ma zaŋɩ o vu Zizreyɛlɩ. Zezabɛlɩ na ni tɩn, o ma kwe yi-cʋr-poŋo o ma o bə o yi-kunnu baŋa, o daarɩ o fɔgɩ o vɔ o yuuywe sɩm. O laan ma vu o jǝni o digə kam takoro ni nɩ o niə. 31 Zehu na yɔɔrɩ o tɔgɩ manchoŋo kʋm o zʋ tɩn mʋ Zezabɛlɩ bag‑o o wɩ: «Haɩ! Nmʋ brɩ nɩ n vəŋə kam yɩ yazurə vəŋə mʋ na? Nmʋ dɩ yɩ nɔn-gʋrʋ mʋ nɩ Zimri tɛ, n gʋ n yuutu.»e
32 Zehu ma kwǝni o yuu o nii takoro kʋm seeni yɩ o ta dɩ kwǝr-dɩa o wɩ: «Abam wɔɔ mʋ zɩgɩ amʋ kwaga nɩ? Wɔɔ mʋ wʋra?» Pɛ sɔŋɔ kʋm tɩntʋŋna badonnǝ maa tɔgɩ takoro kʋm ba niə ba nii. 33 Zehu ma bagɩ-ba o wɩ: «Yigi-na Zezabɛlɩ á dɩ tɩga nɩ!» Ba ma sɩɩnɩ ba yig-o ba dɩ tɩga nɩ. O na yi tɩga tɩn, mʋ o jana bam taagɩ kəbrə kam ba kɛ ba taagɩ sise sɩm dɩ, dɩ Zehu na pɛ sɩ nɔnɩ o baŋa nɩ sɩ kɛ tɩn.
34 Zehu ma zʋ pɛ sɔŋɔ kʋm wʋ o di wʋdiu. O laan ma ta dɩ nɔɔna badonnǝ o wɩ: «Nii-na ka-wo-kʋrʋ kʋntʋ baŋa nɩ, sɩ á kwe-o á kɩ. Wɛ kampwəl-balwara na maŋɩ ka wʋ o yuu nɩ dɩ, o yɩ pɛ bukɔ mʋ.» 35 Ba na nuŋi sɩ ba kwe o yɩra yam ba kɩ kʋntʋ tɩn, ba wʋ nɛ-ya, kʋ na daɩ o yukol-pʋa, dɩ o nɛ, dɩ o jataala yɩranɩ mʋ ba nɛa. 36 Ba ma vu ba ta ba brɩ Zehu kʋlʋ na kɩ tɩn. O ma ta o wɩ: «Kʋ yɩ Baŋa-Wɛ kwǝrǝ mʋ sɩɩnɩ ka kɩ.f DƖ dɛɛn tɔgɩ Tisibi tu Eli baŋa mʋ DƖ ta DƖ wɩ: ‹Kakuri wʋ́ ja Zezabɛlɩ ya-nwana sɩ di Zizreyɛlɩ tɩga kam baŋa nɩ. 37 O yɩra yam wʋ́ tʋrɩ yɩra yɩra ya taa tigi Zizreyɛlɩ tɩga kam maama baŋa nɩ nɩnɛɛnɩ pʋpɔnɔ mʋ te, pa nɔɔn-nɔɔnʋ bá lwarɩ o na yɩ wʋlʋ tɩn.› »