Da-kʋrɩ zɩgɩ Yisɩrayɛlɩ tɩʋ nɩ
8
Elisa dɛɛn ya maŋɩ o ta dɩ kaanɩ wʋlʋ bu o na bi tɩn o wɩ: «Zaŋɩ n viiri, nmʋ dɩ n digə tiinə, sɩ á wanɩ á na jǝgǝ kadoŋ á taá zʋʋrɩ da. Bɛŋwaanɩ, Baŋa-Wɛ wʋbʋŋa jaanɩ sɩ DƖ pa da-kʋrɩ mʋ zɩgɩ tɩga kantʋ baŋa nɩ bɩna yarpɛ.» 2 Kaanɩ wʋm ma sɩɩnɩ o kɩ kʋlʋ maama Wɛ tɩntʋŋnʋ wʋm na taga tɩn. O dɩ o digə tiinə maama ma vu ba zʋʋrɩ Filisi tiinə tɩʋ nɩ bɩna yarpɛ.3 Bɩna yarpɛ yam ni na ti tɩn o ma zɩgɩ Filisi tɩʋ kʋm nɩ o joori o tɩtɩ tɩʋ. O ma vu o loori pɛ wʋm sɩ o joori o joŋi o sɔŋɔ dɩ o tɩga sɩ o taa zʋʋra. 4 O na yi pɛ wʋm te tɩn, dɩ pɛ wʋm ya jɩgɩ lara dɩ Gehazi wʋlʋ na yɩ Elisa tɩntʋŋnʋ tɩn. Pɛ wʋm ma ta dɩ Gehazi o wɩ: «Ta n brɩ-nɩ wo-kɩnkagɩla yalʋ maama Elisa na kɩ tɩn.» 5 Gehazi ma lwǝni Elisa dɛɛn na pɛ bu wʋdoŋ joori o bi te tɩn. O ta na wʋra o ŋɔɔnɩ kʋntʋ tɩn mʋ kaanɩ wʋm tɩtɩ dɩ o bu wʋlʋ Elisa na joori o bi tɩn yiǝ. Kaanɩ wʋm ya tu sɩ o loori pɛ wʋm o sɔŋɔ kʋm dɩ o tɩga kam ŋwaanɩ mʋ. Gehazi ma na yɩ o wɩ: «Amʋ tu, kaanɩ wʋlʋ a na tɛ o taanɩ tɩn mʋ tɩntʋ. Bu wʋm Elisa na pɛ o bi tɩn dɩ tɩtɩ mʋ tɩntʋ o yiǝ.» 6 Pɛ wʋm ma bwe kaanɩ wʋm sɩ o lwarɩ kʋlʋ na kɩ tɩn. Kaanɩ wʋm ma tʋlɩ kʋ na kɩ te maama tɩn o dɩ o jɩa nɩ. Pɛ wʋm na ni kʋ maama tɩn, o ma bəŋi o dɩdɛɛrʋ sɩ o nii kaanɩ wʋm taanɩ dɩm baŋa nɩ. O ma ta dɩd-o o wɩ: «Kʋlʋ maama ya na yɩ kaanɩ wʋm nyɩm tɩn sɩ n kwe n joori n pa‑o, kʋ ta wǝli dɩ o na gɛ nyɔɔrɩ dɩlʋ o tɩga kam ŋwaanɩ, kʋ zɩgɩ maŋa kalʋ o na viiri tɩn sɩ kʋ ba kʋ yi zɩm tɩn dɩ maama.»
Azayɛlɩ gʋ Bɛn-Hadadɩ
7 Wɛ tɩntʋŋnʋ Elisa dɛɛn ma vu Damasɩ. Siiri tiinə pɛ Bɛn-Hadadɩ maa ba jɩgɩ yazurə. Pɛ wʋm na maanɩ nɩ Elisa tu tɩn, 8 o ma ta dɩ Azayɛlɩ o wɩ: «Ja pɛɛra n vu n warɩ Wɛ tɩntʋŋnʋ wʋm sɩ n daarɩ n pa o bwe Baŋa-Wɛ o nii, amʋ wʋ́ wəri na?» 9 Azayɛlɩ ma la zɩla yalʋ na wʋ Damasɩ nɩ yɩ tɩ lana tɩn zanzan o daŋɩ yogondə fiinna baŋa nɩ o ja o vu sɩ o pa Elisa. O ma zʋ o zɩgɩ Elisa yigə nɩ yɩ o wɩ: «Nmʋ bu Bɛn-Hadadɩ na yɩ Siiri tɩʋ pɛ tɩn mʋ tʋŋɩ-nɩ sɩ a bwe a nii, oó wəri na?» 10 Elisa ma lǝr-o o wɩ: «Ve n ta dɩd-o nɩ: ‹Ɛɛn, o wʋ́ wəri.› Niyɩranɩ nan za tɩn, Baŋa-Wɛ nan pɛ amʋ na nɩ, o sɩɩnɩ o lagɩ o tɩ mʋ.» 11 Elisa ma yɔɔrɩ o nii Azayɛlɩ yibiyə nɩ zii pa cavɩɩra ja-o. Elisa laan ma tʋ kərə nɩ. 12 Azayɛlɩ ma bwe‑o o wɩ: «Amʋ tu, bɛŋwaanɩ mʋ nmʋ keerǝ?» Elisa ma ləri o wɩ: «Amʋ ye lɛɛrʋ tɩlʋ na wʋ́ yi Yisɩrayɛlɩ tiinə bam nmʋ ŋwaanɩ tɩn.a Nmʋ wʋ́ pa mim di ba dam je sɩm, n daarɩ n gʋ ba nɔn-dʋnnʋ najara wʋnɩ. Nmʋ ta wʋ́ yigi ba bu-sɩsɩn n dɩ tɩga nɩ n gʋ, yɩ n daarɩ n lɔ ba kapwi sɩm ba pwi seeni n gʋ. Kʋntʋ ŋwaanɩ mʋ a keerǝ.» 13 Azayɛlɩ ma ləri o wɩ: «A yɩ nabwəm mʋ. Amʋ nyɩɩnɩ dɩntʋ wʋ́ kɩ tɛ mʋ a tʋŋɩ tɩtʋŋ-kamunnu tɩntʋ doŋ?» Elisa ma ləri o wɩ: «Baŋa-Wɛ nan vɩɩrɩ DƖ brɩ-nɩ nɩ: n lagɩ n di Siiri tɩʋ paarɩ mʋ.»b
14 Azayɛlɩ ma zɩgɩ Elisa tee nɩ o joori o vu pɛ wʋm te. Bɛn-Hadadɩ ma bwe‑o o wɩ: «Elisa tagɩ bɛɛ mʋ dɩ nmʋ?» Azayɛlɩ ma ləri o wɩ: «O tagɩ dɩ amʋ o wɩ: Ɛɛn, n lagɩ n wəri mʋ.» 15 Tɩga na yɔɔrɩ ka pʋʋrɩ tɩn mʋ Azayɛlɩ kwe gar-jalɩ o dɩ na wʋnɩ o ma o pɩɩnɩ pɛ Bɛn-Hadadɩ mʋmwɛ o gʋ. O na kɩ kʋntʋ tɩn, o ma lɛɛrɩ o ji pɛ.
Zuda tɩʋ pɛ Yoram taanɩ
16 Yisɩrayɛlɩ tɩʋ pɛ Akabɩ bu Zʋram bɩna yanu paarɩ dim bɩnɩ dɩm wʋnɩ yɩ Zʋzafatɩ ta yɩ Zuda tɩʋ pɛ tɩn mʋ Zʋzafatɩ bu Yoram sɩŋɩ sɩ o di paarɩ Zuda nɩ. 17 O dɛɛn jɩgɩ bɩna fiintɔ-yale mʋ yɩ o laan ji pɛ. O ma jǝni Zeruzalɛm nɩ o di paarɩ dɩm o kɩ bɩna nana. 18 Yoram dɛɛn kwe Yisɩrayɛlɩ pwa bam tɩtʋŋ-naga mʋ, nɩnɛɛnɩ pɛ Akabɩ dɩ o dwi dɩm na kɩ te tɩn, bɛŋwaanɩ o di Akabɩ bukɔ mʋ. Kʋntʋ tɩn, o dɛɛn tʋŋɩ lwarɩm o cɔgɩ Baŋa-Wɛ yigə. 19 Baŋa-Wɛ nan wʋ sɛ sɩ o cɔgɩ Zuda dwi dɩm, bɛŋwaanɩ DƖ maŋɩ DƖ goni ni dɩ DƖ tɩntʋŋnʋ Davidi nɩ: o digə kam wʋ́ taa te paarɩ dɩm taan wuu.
20 Yoram paarɩ dim maŋa nɩ mʋ Edɔm dwi dɩm vɩn sɩ ba taa wʋ Zuda pɛ wʋm dam kuri nɩ. Ba ma lɛɛrɩ ba tiŋi ba tɩtɩ pɛ. 21 Yoram ma ja o jar-kərə dɩ ba tərikooru tɩm maama o vu sɩ o li Zayiri tɩʋ. Edɔm tiinə bam ma ba ba gilimi o dɩ o nɔɔna bam ba kɩ tɩtarɩ nɩ. Tɩtɩɩ nɩ mʋ Yoram dɩ o dɩdɛɛra bam wanɩ ba lu ba jɩŋa nɩ. O jar-kərə bam dɩ ma pipiri ba duri ba joori sɔŋɔ. 22 Dɩ zɩm maama Edɔm tiinə ta vɩn mʋ sɩ ba taa wʋ Zuda tiinə dam kuri nɩ. Libina tɩʋ tiinə dɩ dɛɛn kɩ kʋntʋ doŋ mʋ.
23 Yoram dɛɛn na di paarɩ yɩ o kɩ wǝǝnu tɩlʋ maama tɩn, dɩ o tɩtʋŋa yam maama, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ. 24 O ma tɩ yɩ o vu o kwə te. Ba ma kwe‑o ba kɩ o kwə bam yibeeli nɩ Davidi tɩʋ Zeruzalɛm nɩ. O tʋʋnɩ dɩm kwaga nɩ o bu Ahazɩa ma ləri o yuu nɩ o ji pɛ.
Zuda tɩʋ pɛ Ahazɩa taanɩ
25 Yisɩrayɛlɩ tɩʋ pɛ Akabɩ bu Zʋram bɩna fugə-yale paarɩ dim bɩnɩ dɩm nɩ mʋ Yoram bu Ahazɩa puli sɩ o di Zuda tɩʋ paarɩ. 26 O dɛɛn jɩgɩ bɩna fiinle-yale mʋ yɩ o laan ji pɛ. O ma jǝni Zeruzalɛm nɩ o di paarɩ dɩm o kɩ bɩnɩ dɩdwɩ. O nu dɛɛn mʋ yɩ Atalia wʋlʋ na yɩ Yisɩrayɛlɩ tɩʋ pɛ Omiri naa tɩn.c 27 Ahazɩa dɛɛn kwe pɛ Akabɩ dɩ o dwi dɩm tɩtʋŋ-naga kam mʋ. O tiini o tʋŋɩ lwarɩm mʋ o ma o cɔgɩ Baŋa-Wɛ yigə, nɩnɛɛnɩ Akabɩ dɩ o dwi dɩm na kɩ te tɩn, Akabɩ na yɩ o tɩmbaarʋ tɩn ŋwaanɩ.
28 Ahazɩa dɛɛn dɛ dɩ pɛ Akabɩ bu Zʋram mʋ pa ba vu Ramɔtɩ-Gileadɩ ba zaŋɩ najara dɩ Siiri tɩʋ pɛ Azayɛlɩ. Siiri tiinə bam ma kɩ Zʋram zʋnnɩ najara yam wʋnɩ. 29 Kʋntʋ ŋwaanɩ o joori o vu Zizreyɛlɩ tɩʋ sɩ o sooni o fufwələ yam. O na wʋ Zizreyɛlɩ nɩ tɩn, Zuda tɩʋ pɛ Ahazɩa ma vu o te sɩ o war‑o dɩ o zʋnnɩ dɩm.