7
Elisa ma ləri o wɩ: «Nan cəgi Baŋa-Wɛ kwǝrǝ. Baŋa-Wɛ na tagɩ kʋlʋ tɩn mʋ tɩntʋ: Jwa kantʋ maŋa nɩ baá taa jɩgɩ mun-bwe bwaŋa ba yəgi mwalɩ mwalɩ səbu-dalɩ dɩdʋa mʋ Samari yaga nɩ. Caaraa bwɛn sɩle dɩ wʋ́ yəgi səbu-dalɩ dɩdʋa.»2 Dɩdɛɛrʋ wʋlʋ na tiini o bwələ dɩ pɛ wʋm tɩn ma ta dɩ Wɛ tɩntʋŋnʋ Elisa o wɩ: «Baŋa-Wɛ tɩtɩ na maŋɩ DƖ pʋrɩ wɛyuu kʋm sɩ dʋa tiini ka nɩ mʋ dɩ, kʋntʋ bá wanɩ kʋ kɩ.» Elisa ma lǝr-o o wɩ: «Nmʋ tɩtɩ yi wʋ́ na kʋ na wʋ́ sɩɩnɩ kʋ kɩ te tɩn. Nmʋ nan bá da n laŋɩ wʋdiu kʋm.»
Siiri jar-kərə bam na viiri yɩ Kʋ daarɩ kʋ kɩ te tɩn
3 Baara bana dɛɛn mʋ je Samari tɩʋ manchoŋo kʋm ni nɩ ba na yɩ nanywaanʋ. Ba ma ta ba brɩ daanɩ ba wɩ: «Bɛŋwaanɩ mʋ, dɩbam wʋ́ maŋɩ jəgə kantʋ nɩ dɩ́ ta jei, sɩ kʋ vu kʋ yi dɩ́ tʋʋnɩ tɩm? 4 Dɩ́ na wɩ: ‹Pa-na sɩ dɩ́ zʋ tɩʋ kʋm wʋʋ,› kana wʋ́ gʋ dɩbam dáanɩ. Dɩ́ nan na maŋɩ yo, dɩ ta wʋ́ tɩ mʋ. Nan pa-na sɩ dɩ́ zaŋɩ dɩ́ vu Siiri tiinə jar-kərə bam te dɩ́ sɛ dɩ́ pa-ba. Ba waɩ ba yagɩ dɩbam sɩ dɩ́ taa ŋwɩ. Kʋ nan na daɩ kʋntʋ, baá gʋ dɩbam yɩ kʋ ti.»
5 Tɩga dɛɛn na lagɩ ka yi tɩn, ba ma zaŋɩ ba vu Siiri tiinə bam ya na kikili daanɩ mɛ tɩn. Ba na ve ba yi jǝgǝ kam tɩn, ba ma nii ba na nɩ nɔɔn-nɔɔnʋ tǝrǝ. 6 Bɛŋwaanɩ Baŋa-Wɛ ya pɛ Siiri tiinə bam ni sɔɔ nɩnɛɛnɩ tərikooru dɩ sise na wuurǝ yɩ jar-kərə kɔgɔ kɔgɔ nuŋi te tɩn mʋ. Ba ma ta ba brɩ daanɩ ba wɩ: «Kʋʋ́ taa yɩ Yisɩrayɛlɩ tɩʋ pɛ mʋ warɩ Hɛtɩ tiinə dɩ Ezipi tiinə pwa sɩ ba ba ba kɩ jara dɩ dɩbam.» 7 Kʋ dɛɛn ma pa fʋʋnɩ zʋ-ba pa ba duri tɩtɩɩ dɩm kʋntʋ nɩ ba jagɩ dayigǝ nɩ ba yagɩ ba vwə, dɩ ba sise, kʋ wǝli dɩ ba bɩnɛ, dɩ ba wǝǝnu maama. Ba dɛɛn yagɩ tɩ maama punə mʋ sɩ ba wanɩ ba duri ba lu yɩ ba ta ŋwɩ.
8 Nanywaanʋ tɩna tɩm na fʋfɔ ba yi je sɩm tɩn, ba ma zʋ vwə yam dɩdʋa wʋnɩ ba na wʋdiu ba di ba daarɩ ba nyɔ na. Ba dɛɛn ta kwe Siiri tiinə bam səbu-poŋo, dɩ ba səbu-sɩŋa, kʋ wǝli dɩ ba gwaarʋ ba ja ba vu ba səgi. Ba ta ma joori ba zʋ vwe dɩdoŋ ba kwe wǝǝnu tɩdonnǝ ba ja ba vu ba səgi. 9 Ba ma ta ba brɩ daanɩ ba wɩ: «Kʋlʋ dɩ́ na jɩgɩ dɩ́ kɩ tɩn ba lana. Zɩm dɛ dɩm mʋ dɩ́ jɩgɩ kwər-ywəŋə sɩ dɩ́ tɔɔlɩ dɩ́ pa nɔɔna maama, yɩ dɩ́ jɩgɩ dɩ́ je kafɛ yɩranɩ. Dɩ́ nan na cɩm sɩ tɩga pʋʋrɩ, dɩ wʋ́ na waarɩm kʋ ŋwaanɩ. Pa-na sɩ dɩ́ kɩ lɩla dɩ́ vu pɛ sɔŋɔ dɩ́ ta kʋlʋ na kɩ tɩn.»
10 Ba ma joori ba vu ba yi tɩʋ kʋm manchoŋo ni. Ba ma tɔɔlɩ ba brɩ tɩʋ kʋm ni-yɩrɩna bam ba wɩ: «Dɩbam ve Siiri jar-kərə bam je sɩm dɩ́ nii, yɩ nɔɔn-nɔɔnʋ tǝrǝ. Kʋlʋkʋlʋ sɔɔ dɩ nan ba dwana. Bɩnɛ dɩ sise yɩra nɩ mʋ ləgi sɩ zɩgɩ da, kʋ daarɩ yɩ ba vwə yam dɩ zɩgɩ da kʋntʋ nɔɔn-nɔɔnʋ təri ya wʋnɩ.» 11 Tɩʋ kʋm ni-yɩrɩna bam ma ja kwǝrǝ kam ba vu ba ta ba brɩ pɛ sɔŋɔ nɩ. 12 Pɛ wʋm ma zaŋɩ tɩtɩɩ dɩm kʋntʋ o ta dɩ o tɩntʋŋna bam o wɩ: «Amʋ wʋ́ ta a brɩ abam Siiri tiinə bam na bʋŋɩ sɩ ba kɩ kʋlʋ tɩn. Ba na ye nɩ kana lagɩ ka gʋ dɩbam tɩn mʋ ba yagɩ ba vwə yam ba daarɩ ba vu ba səgi gaa wʋnɩ. Ba maa bʋŋɩ ba nɩ: dɩbam wʋ́ nuŋi dɩ́ beeri wʋdiu dɩ́ di. Dɩbam maa na kɩ kʋntʋ, ba laan wʋ́ na cwǝŋǝ ba ja dɩbam ŋʋnnɩ ba daarɩ ba taa te dɩ́ tɩʋ kʋm.» 13 O dɩdɛɛra bam dɩdʋa ma ləri o wɩ: «Pa nɔɔna kwe sise sɩm ta na daarɩ tɩn sɩnu ba vu ba nii kǝm dɩntʋ baŋa nɩ. Bantʋ na maŋɩ ba tɩ kʋ ŋwaanɩ, kʋ ta yɩ bɩdwɩ mʋ dɩ balʋ maama na maŋɩ tɩʋ kʋm wʋnɩ yɩ ba lagɩ ba tɩ tɩn.»
14 Ba ma lɩ nɔɔna dɩ tərikooru tɩle dɩ tɩ sise. Pɛ wʋm ma tʋŋɩ-ba sɩ ba vu ba nii kʋlʋ na kɩ Siiri tiinə jar-kərə bam tɩn. 15 Nɔɔna bam ma tɔgɩ Siiri tiinə bam nɛ taa ba vu ba yi Zʋrdɛn bugə kam. Ba ma na Siiri tiinə bam na duri sɩ ba lu yɩ ba kwe ba gwaarʋ dɩ ba zɩla zanzan ba dɩ ba yagɩ cwǝŋǝ kam yuu nɩ te tɩn. Ba laan ma joori ba vu pɛ wʋm te ba ta ba brɩ-o kʋ na kɩ te tɩn.
16 Tɩʋ kʋm nɔɔna bam ma kɩ lɩla ba nuŋi ba vu Siiri tiinə vwə yam je ba pɛ ba zɩla dɩ ba wʋdiiru maama. Ba dɛɛn ma sɩɩnɩ ba jɩgɩ mun-bwe bwaŋa ba yəgi səbu-dalɩ dɩdʋa dɩdʋa. Caara bwɛn sɩle dɩ yəgi səbu-dalɩ dɩdʋa mʋ. Kʋ dɛɛn yɔɔrɩ kʋ kɩ nɩ Baŋa-Wɛ na maŋɩ DƖ ta te tɩn mʋ.
17 Kʋ nan na yɩ dɩdɛɛrʋ wʋlʋ na tiini o bwələ dɩ pɛ wʋm tɩn, pɛ wʋm ya tiŋ‑o sɩ o taa nii tɩʋ kʋm ni-yɩrɩna bam baŋa nɩ mʋ. Tɩʋ kʋm nɔɔna bam na duri ba maa nuŋǝ tɩn, ba ma nɔnɩ dɩdɛɛrʋ wʋm kʋntʋ pa o tɩ manchoŋo kʋm ni nɩ. Kʋntʋ ma pa Elisa na wuuri o ta kʋlʋ tɩn sɩɩnɩ kʋ kɩ. 18 Bɛŋwaanɩ, Wɛ tɩntʋŋnʋ Elisa ya maŋɩ o ta o brɩ pɛ wʋm o wɩ: «Jwa kantʋ maŋa nɩ baá taa jɩgɩ caara bwɛn sɩle ba yəgi səbu-dalɩ dɩdʋa mʋ Samari yaga nɩ. Mun-bwe bwaŋa dɩ wʋ́ yəgi səbu-dalɩ dɩdʋa.» 19 Pɛ dɩdɛɛrʋ wʋm ya wʋ sɛ yɩ o wɩ: «Baŋa-Wɛ tɩtɩ na maŋɩ DƖ pʋrɩ wɛyuu kʋm sɩ dʋa tiini ka nɩ mʋ dɩ, kʋntʋ bá wanɩ kʋ kɩ.» Elisa dɩ ya kaan‑o mʋ o wɩ: «Nmʋ tɩtɩ yi wʋ́ na kʋ na wʋ́ sɩɩnɩ kʋ kɩ te tɩn. Nmʋ nan bá da n laŋɩ wʋdiu kʋm.» 20 Kʋntʋ nan mʋ yɔɔrɩ kʋ kɩ-o. Nɔɔna mʋ nɔn‑o manchoŋo kʋm ni nɩ pa o tɩ.