Dooru na puki na baŋa nɩ te tɩn
6
Dɛ dɩdwɩ mʋ Wɛ nijoŋnə kɔgɔ kʋm taga dɩ Elisa ba wɩ: «Dɩ́ tu, jǝgǝ kalʋ dɩbam na zʋʋrɩ yɩ n nii dɩ́ baŋa nɩ tɩn daa ba daga ka paɩ dɩbam. 2 Kʋntʋ tɩn, pa dɩbam cwǝŋǝ sɩ dɩ́ vu Zʋrdɛn bugə kam ni dɩ́ beeri jǝgǝ kadoŋ sɩ dɩ́ taa zʋʋrɩ da. Dáanɩ dɩbam maama wʋ́ wanɩ dɩ́ goni dɛ dɩ́ ma dɩ́ cɩ je sɩ kʋ taa daga.» Elisa ma lǝri-ba o wɩ: «Ve-na á kɩ kʋntʋ.»3 Nijoŋnǝ bam wʋnɩ dɩdʋa ma ta dɩ Elisa o wɩ: «A loori-m, tɔgɩ dɩ́ kwaga sɩ dɩ́ vu.» Elisa ma ləri o wɩ: «Tɔ. Amʋ wʋ́ tɔgɩ a vu.»
4 Ba ma vu ba yi Zʋrdɛn bugə kam ni, yɩ Elisa dɩ tɔgɩ o wʋra. Ba ma puli sɩ ba goni tweeru tɩm. 5 Ba dɩdʋa na wʋra o goni tiu naga tɩn mʋ o dooru wʋm lɩ o tʋ bugə kam wʋnɩ. O ma kaasɩ dɩ kwǝr-dɩa o wɩ: «Woo! Amʋ tu Elisa, dooru wʋm yɩ a jɩn‑o mʋ.» 6 Wɛ tɩntʋŋnʋ Elisa ma bwe‑o o wɩ: «Kʋ lɩ kʋ tʋ yən mʋ?» O ma brɩ-o kʋ na tʋ mɛ tɩn. Elisa ma goni tiu naga o dɩ bugə kam wʋnɩ. O kǝm dɩm kʋntʋ ma pa dooru wʋm puki na bam baŋa nɩ. 7 Elisa ma ta dɩ nɔɔnʋ wʋm o wɩ: «Laarɩ n kwe-kʋ.» Nɔɔnʋ wʋm ma te o jɩŋa o lɩ-kʋ.
Elisa cɩgɩ Siiri jar-kərə bam
8 Maŋa dɩ maŋa Siiri tɩʋ pɛ dɛɛn yǝni o zaŋɩ najara dɩ Yisɩrayɛlɩ tiinə bam mʋ. O ma yǝni o banɩ dɩ o nakwa yɩ o wɩ: «A laga sɩ dɩ́ jeeri-ba yo naa yo mʋ.»
9 Wɛ tɩntʋŋnʋ Elisa dɩ dɛɛn ma yǝni o tʋŋɩ ni o pa Yisɩrayɛlɩ pɛ wʋm o wɩ: «Yɩ zaŋɩ n twɛ jǝgǝ kam kʋntʋ, sɩ Siiri jar-kərə bam mʋ ve ba gilimi da.» 10 Kʋntʋ baŋa nɩ Yisɩrayɛlɩ tɩʋ pɛ ma yǝni o tʋŋɩ ni mɛ seeni Wɛ tɩntʋŋnʋ wʋm na tagɩ tɩn sɩ kʋ jǝgǝ kam nɔɔna bam taa fɔgɩ ba cʋ ba tɩtɩ. Kʋ dɛɛn kɩ kʋntʋ mʋ kuni zanzan.
11 Siiri tiinə pɛ wʋm wʋbʋŋa dɛɛn vugimi dɩ kǝm dɩm kʋntʋ. O ma bəŋi o dɩdɛɛra bam yɩ o bwe-ba o wɩ: «Abam wʋnɩ wɔɔ tɩtɩ mʋ nuŋi a kwaga nɩ sɩ o wǝli Yisɩrayɛlɩ tiinə pɛ wʋm?» 12 Dɩdɛɛra bam wʋnɩ dɩdʋa ma ləri o wɩ: «Dɩ́ tu, kʋ daɩ dɩbam wʋlʋwʋlʋ mʋ kɩ kʋntʋ. Kʋ yɩ Yisɩrayɛlɩ tu Elisa wʋlʋ na yɩ Wɛ nijoŋnu tɩn mʋ tɛ woŋo maama o brɩ Yisɩrayɛlɩ tiinə pɛ wʋm. O brɩ o ye nmʋ na tɛ kʋlʋ maama n digə nɩ tɩn dɩ.» 13 Pɛ wʋm ma ta o wɩ: «Ve-na á beeri Elisa je sɩ a pa nɔɔna vu ba ja-o.» Ba ma nii ba na‑o yɩ ba daarɩ ba ta dɩ pɛ wʋm nɩ: «Elisa wʋ Dotan nɩ mʋ.» 14 Pɛ wʋm ma tʋŋɩ o jar-kərə zanzan, dɩ ba sise, dɩ ba tərikooru sɩ ba vu jǝgǝ kam kʋntʋ. Tɩtɩɩ nɩ ba ma vu ba yi Dotan, yɩ ba kaagɩ tɩʋ kʋm ba pu.
15 Tɩga na pʋʋrɩ tɩtɩɩtɩ tɩn mʋ Elisa tɩntʋŋnʋ wʋm zaŋɩ o nuŋi pooni o na nɩ jar-kərə, dɩ ba sise, dɩ ba tərikooru mʋ kaagɩ tɩʋ kʋm maama ba pu. O ma vu o ta dɩ Elisa o wɩ: «Woo, amʋ tu, lɛɛrʋ yi dɩbam! Dɩ́ nan wʋ́ kɩ tɛ mʋ?» 16 Elisa ma lǝr-o o wɩ: «Yɩ ta n kwarɩ fʋʋnɩ, sɩ balʋ na wʋ dɩbam tee nɩ tɩn daga ba dwe balʋ na wʋ bantʋ tee nɩ tɩn.»a 17 Elisa ma loori Wɛ o wɩ: «Baŋa-Wɛ, puri a tɩntʋŋnʋ wʋm yiǝ sɩ o wanɩ o na amʋ na tɛ kʋlʋ tɩn.» Baŋa-Wɛ ma sɩɩnɩ DƖ puri nɔn-dʋŋʋ wʋm yiǝ pa o nii o na nɩ: sise kɔgɔ kɔgɔ dɩ tərikooru zanzan na jɩgɩ min-vʋgʋ tɩn mʋ faarɩ piu kʋm maama tɩ gilimi Elisa.
18 Siiri jar-kərə bam ma fʋfɔ ba yi sɩ ba ja Elisa. Elisa ma loori Baŋa-Wɛ o wɩ: «A loori‑m sɩ n pa nɔɔna bantʋ maama yiǝ dwe.» Baŋa-Wɛ ma sɩɩnɩ DƖ pa ba yiǝ dwe, nɩ Elisa na loori‑DƖ te tɩn. 19 Elisa ma vu ba te yɩ o ta dɩ ba o wɩ: «Abam tusi cwǝŋǝ mʋ á ba tɩʋ kʋntʋ wʋnɩ. Tɔgɩ-na amʋ kwaga sɩ a ja abam a vu a brɩ wʋlʋ á na beeri tɩn.» O ma ja-ba o vu Samari.
20 Ba na yɔɔrɩ ba yi Samarib ba zʋ tɩʋ kʋm wʋ tɩn mʋ Elisa loori Wɛ o wɩ: «Baŋa-Wɛ, puri nɔɔna bantʋ yiǝ sɩ ba joori ba taa naɩ.» Baŋa-Wɛ ma sɩɩnɩ DƖ kɩ kʋntʋ pa ba naɩ. Ba ma na nɩ ba tu ba wʋ Samari tɩʋ wʋnɩ mʋ.
21 Yisɩrayɛlɩ tiinə pɛ wʋm na nɛ-ba tɩn, o ma bwe Elisa o wɩ: «Amʋ tu, cwǝŋǝ wʋra sɩ a gʋ-ba na?» 22 Elisa ma ləri o wɩ: «Awo! Yɩ gʋ-ba. Kʋ na maŋɩ kʋ yɩ nɔɔna balʋ nmʋ na wanɩ najara wʋnɩ n ja tɩn, n daɩ sɩ n gʋ-ba. Nan pa-ba wʋdiu sɩ ba di sɩ ba daarɩ ba nyɔ na. Ba na ti, sɩ n pa-ba cwǝŋǝ sɩ ba joori ba tu wʋm te.»c 23 Pɛ wʋm ma kɩ wʋdi-fɔrɔ candiə o pa-ba. Siiri jar-kərə bam na di ba ti tɩn, o ma pa ba viiri. Ba ma joori ba vu ba tɩtɩ pɛ wʋm te. Kǝm dɩm kʋntʋ kwaga nɩ, Siiri tiinə bam daa maa wʋ joori ba zʋ Yisɩrayɛlɩ tiinə laŋa kam sɩ ba vrɩ ba wǝǝnu ba ja ba viiri.
Siiri tiinə zaŋɩ najara dɩ Samari tɩʋ
24 Kʋntʋ kwaga nɩ mʋ Siiri tɩʋ pɛ Bɛn-Hadadɩ kɩ o jar-kərə kɔgɔ kʋm maama o kɩ daanɩ pa ba vu Samari ba zaŋɩ najara dɩ Yisɩrayɛlɩ tiinə bam. 25 Ba ma vu ba kaagɩ Samari tɩʋ kʋm taa ba pu. Kʋ ma pa kana tiini ka zʋ tɩʋ kʋm. Bɩnaga yuu kwǝrǝ dɛɛn yɩ səbu-poŋo səbu-dala funɔnɔ mʋ. Kunkwən-pulə ci-bəənud bwaŋa balaŋa maa yɩ səbu-poŋo səbu-dala yanu.
26 Yisɩrayɛlɩ tiinə pɛ wʋm dɛɛn na tɔgɩ tɩʋ kʋm kəbrə baŋa o maa kɛ tɩn, mʋ kaanɩ wʋdoŋ kaasɩ dɩ kwǝr-dɩa o wɩ: «A loori-m, amʋ tu, zəni-nɩ!» 27 Pɛ wʋm ma lǝr-o o wɩ: «Baŋa-Wɛ na wʋ vrɩ nmʋ DƖ yagɩ, amʋ lagɩ a ma bɛ mʋ a ma a vrɩ-m a yagɩ? Woŋ-woŋo daa wʋ daarɩ. Mɩna tərə, sana dɩ nan tərə. 28 O ta ma bwe kaanɩ wʋm o wɩ: «Bɛɛ mʋ daanɩ‑m?» Kaanɩ wʋm ma ləri o wɩ: «Kaanɩ wʋdoŋ ya mʋ taga dɩ amʋ sɩ a ja a bu a gʋ sɩ dɩ́ maama di, sɩ dɛdoŋ nɩ o dɩ daa ja o bu o gʋ sɩ dɩ́ maama di. 29 A ma sɩɩnɩ a gʋ a bu wʋm a daarɩ a saŋ-o pa dɩ́ maama di. Tɩga na pʋʋrɩ tɩn, a ma ta dɩd-o sɩ o dɩ ja o bu wʋm o gʋ sɩ dɩ́ di. Kaanɩ wʋm ma vɩn yɩ kwe o bu wʋm o səgi.»
30 Pɛ wʋm na ni kaanɩ wʋm taanɩ dɩm tɩn, o ma vaŋɩ o gwaarʋ o kaarɩ wʋ-cɔgɔ ŋwaanɩ. O ta na dɔgɩ kəbrə kam yuu nɩ o ve tɩn, nɔɔna ma kwǝni ba nii ba na o gwaarʋ tɩm na kaarɩ mɛ seeni yɩ o zʋ gwar-zɩnzwara tɩ kuri nɩ tɩn. 31 Pɛ wʋm ma du durə o wɩ: «Amʋ na wʋ goni Safatɩ bu Elisa yuu zɩm dɛ dɩm nɩ, sɩ Wɛ ti a mʋmwɛ.»
32 Elisa dɛɛn maa je o sɔŋɔ nɩ dɩ Yisɩrayɛlɩ tɩʋ nakwa yɩ ba lara. Pɛ wʋm ma tʋŋɩ o tɩntʋŋnʋ sɩ o vu o bǝŋ-o. Tɩntʋŋnʋ wʋm ta na wʋ yi tɩn, Elisa ya maŋɩ o ta dɩ nakwa bam o wɩ: «Á wʋ nɛ na? Nɔn-gʋrʋ wʋntʋ mʋ tʋŋɩ nɔɔnʋ sɩ o ba o goni a yuu. Nii-na, o tɩntʋŋnʋ wʋm na yiǝ, sɩ á ja bwəəru tɩm á pɩ-o á yagɩ pooni yigə nɩ. Kʋ nan bá daanɩ yɩ pɛ wʋm tɩtɩ saŋɩ o kwaga o ba.»
33 Elisa ni wʋ tʋ tɩga nɩ dɩ tɩntʋŋnʋ wʋm na yi o te. Pɛ wʋm dɩ ma yi yɩ o wɩ: «Lɛɛrʋ tɩntʋ maama na tu dɩ baŋa tɩn yɩ Baŋa-Wɛ yigə mʋ. Amʋ nan wʋ́ cəgi tɩntʋ a vu a maŋɩ yən nɩ mʋ sɩ Baŋa-Wɛ laan ba DƖ zǝni dɩbam?»