Naaman yawɩʋ kʋm na je te tɩn
5
Nɔɔnʋ wʋdoŋ dɛɛn mʋ wʋra, o yɩrɩ mʋ Naaman. O maa yɩ Siiria tiinə pɛ wʋm jar-kərə yigə tu. O yɩ dɩdɛɛrʋ mʋ yɩ o kikiə su pɛ wʋm yi lanyɩranɩ, Baŋa-Wɛ na dɛ o baŋa DƖ wǝli Siiri tiinə pa ba di ba dʋna najara wʋnɩ tɩn ŋwaanɩ. Kʋntʋ tɩn, o yɩ babɩa na ye najara kǝm lanyɩranɩ tɩn mʋ. Dɩ kʋ dɩ, o dɛɛn yɩ nanyɔŋɔ mʋ.2 Siiri tɩʋ kʋm jar-kərə dɛɛn yǝni ba zʋ Yisɩrayɛlɩ laŋa kam ba kɩ najara ba vrɩ wǝǝnu yɩ ba joori sɔŋɔ. Ba dɛɛn ma vu ba ja Yisɩrayɛlɩ tiinə bɩsankana wʋdoŋ. Ba ma ja-o ba vu ba pa Naaman kaanɩ sɩ o taa yɩ o tɩntʋŋ-kana. 3 Dɛ dɩdwɩ: bɩsankana kam ma ta dɩ Naaman kaanɩ o wɩ: «A nu, nmʋ barʋ wʋm ya na waɩ o ve Wɛ nijoŋnu wʋlʋ na zʋʋrɩ Samari nɩ tɩn te, wʋntʋ yaá pa o na yazurə dɩ nanywannʋ yawɩʋ kʋm.» 4 Naaman na ni kʋntʋ tɩn, o ma vu o ta kʋlʋ Yisɩrayɛlɩ tiinə bɩsankana kam na tagɩ tɩn o brɩ o tu wʋm. 5 Siiri tiinə pɛ wʋm ma ləri o wɩ: «Tɔ. Ve sɩ n na nɔɔnʋ wʋm kʋntʋ. Amʋ wʋ́ pʋpʋnɩ tɔnɔ nmʋ ŋwaanɩ sɩ n ja n vu n pa Yisɩrayɛlɩ tɩʋ pɛ wʋm.»
Naaman ma la səbu-poŋo kilo biə-yatɔ dɩ fiinna (340), dɩ səbu-sɩŋa kilo fusɩrpɛ (70), kʋ wǝli dɩ garyiǝ fugə. O laan ma zaŋɩ o ja-tɩ o kɛ. 6 O ma kwe tɔnɔ kʋm o vu o pa Yisɩrayɛlɩ tɩʋ pɛ wʋm. Kʋlʋ na pʋpʋnɩ kʋ wʋnɩ tɩn mʋ tɩntʋ: «Tɔnɔ kʋntʋ yɩ sɩ kʋ brɩ nɩ amʋ mʋ tʋŋɩ a tɩntʋŋnʋ Naaman sɩ o ba nmʋ te, sɩ n yɔɔrɩ o nanywannʋ yawɩʋ kʋm n pa‑o.»
7 Yisɩrayɛlɩ tɩʋ pɛ wʋm na karɩmɩ tɔnɔ kʋm o ti tɩn, mʋ o jaanɩ o gɔrɔ o kaarɩ yɩ o wɩ: «Amʋ yɩ Wɛ mʋ sɩ a wanɩ a pa nɔɔnʋ mʋmwɛ ti, yɩ a daarɩ a pa wʋdoŋ na ŋwɩa na? Bɛɛ mʋ yɩ Siiri tɩʋ pɛ tʋŋɩ nɔɔnʋ wʋntʋ sɩ o ba amʋ te sɩ a soon-o? Nii-na o na beeri woŋo sɩ o da kʋ baŋa o ja najara dɩ amʋ te!»
8 Wɛ tɩntʋŋnʋ Elisa na ni kʋlʋ na kɩ yɩ Yisɩrayɛlɩ tiinə pɛ wʋm kaarɩ o gɔrɔ tɩn, o ma tʋŋɩ ni dɩntʋ o pa‑o yɩ o wɩ: «Bɛɛ mʋ pɛ n ja n gwaarʋ n kaarɩ? Tʋŋɩ nɔɔnʋ wʋm sɩ o ba amʋ te sɩ a pa o lwarɩ nɩ: Wɛ nijoŋnu sɩɩnɩ o wʋ Yisɩrayɛlɩ tɩʋ nɩ.» 9 Naaman laan ma ja o sise sɩm dɩ sɩ tərikooru tɩm o vu o zɩgɩ Elisa digə ni nɩ. 10 Elisa ma tʋŋɩ o tɩntʋŋnʋ sɩ o vu ta dɩ Naaman o wɩ: «Nan ve n swɛ n yɩra kuni bɩrpɛ Zʋrdɛn bugə kam wʋnɩ, sɩ n ya-nwana yam laan wʋ́ kwɛ yɩ n yawɩʋ kʋm je.»
11 Naaman na ni kʋntʋ tɩn, o banɩ ma zaŋɩ zanzan. O ma varɩgɩ yɩ o wɩ: «Nii mʋ! A ya bʋŋɩ nɩ Elisa tɩtɩ mʋ wʋ́ nuŋi o ba o zɩgɩ amʋ yigə nɩ o bəŋi o Tu Baŋa-Wɛ dɩm yɩrɩ, sɩ o daarɩ o yɩgɩsɩ o jɩa a ŋwana yam baŋa nɩ o sooni amʋ. 12 Abana dɩ Parɩparɩ bwi sɩm na wʋ Damasɩ nɩ tɩn ba garɩ Yisɩrayɛlɩ bwi sɩm maama na? A ya waɩ a swɛ a yɩra bwi sɩntʋ wʋnɩ yɩ a ya-nwana kwɛ.» 13 Naaman tɩntʋŋna ma fʋfɔ ba yi o te. Ba dɩdʋa ma ta dɩd-o o wɩ: «A ko, nijoŋu wʋm ya na wɩ n tʋŋɩ tɩtʋŋ-cɛɛrɩ, nmʋ bá kɩ na? O nan na tagɩ kʋlʋ tɩn daɩ mwalɩ kʋ pa‑m na? O wɩ n swɛ n yɩra sɩ ya kwɛ. Kʋ daɩ kʋntʋ mʋ na?» 14 Naaman laan ma sɩɩnɩ o tu o misi o tɩtɩ Zʋrdɛn bugə kam wʋnɩ kuni bɩrpɛ, nɩ Wɛ tɩntʋŋnʋ wʋm na taga te tɩn. O ya-nwana yam ma joori ya kwɛ lanyɩranɩ nɩnɛɛnɩ bəkər-pwələ yɩra na yɩ te tɩn, yɩ o yawɩʋ kʋm je.b
15 Naaman dɩ o nɔɔna bam maama ma joori ba vu Wɛ tɩntʋŋnʋ Elisa te ba zɩgɩ o yigə nɩ. Naaman ma ta dɩ Elisa o wɩ: «Amʋ zɩm laan tu a lwarɩ nɩ Yisɩrayɛlɩ tiinə Wɛ dɩm yɩranɩ mʋ yɩ Wɛ cɩga cɩga lʋgʋ baŋa maama wʋnɩ. A loori-m, amʋ tu! Sɛ sɩ n joŋi a pɛɛra yam.» 16 Elisa ma ləri o wɩ: «Ŋwɩa Tu Baŋa-Wɛ na sɩɩnɩ DƖ wʋra yɩ a tʋŋɩ a pa‑DƖ tɩn, amʋ dugi Dɩntʋ yɩrɩ ŋwaanɩ nɩ: amʋ bá joŋi kʋlʋkʋlʋ nmʋ tee nɩ.» Naaman ta ma loori Elisa o ga sɩ o joŋi pɛɛra yam o tee nɩ. 17 Naaman ma ta o wɩ: «Amʋ tu, nmʋ na tagɩ nɩ n bá sɛ sɩ n joŋi kʋlʋkʋlʋ a jɩŋa nɩ tɩn, nan pa-nɩ cwǝŋǝ sɩ a pɛ tɩɩrʋ yo seeni sɩ tɩ yi bɩna-sise sɩle na wʋ́ wanɩ sɩ zɩŋɩ te tɩn, sɩ a ja a viiri. Bɛŋwaanɩ, kʋ zɩgɩ zɩm sɩ kʋ taa veǝ, amʋ daa bá kɩ kaanɩm naa zwɛɛm pɛɛra a pa Wɛ dɩdoŋ, kʋ na daɩ Baŋa-Wɛ yɩranɩ. 18 Amʋ nan loori Baŋa-Wɛ sɩ DƖ duri a yibwənə kǝm dɩntʋ ŋwaanɩ: amʋ na dɛ dɩ a tu Siiri tɩʋ pɛ a zʋ Rimɔn jwəm digə kam sɩ o zuli-dɩ, yɩ pɛ wʋm na salɩ a yɩra nɩ, yɩ amʋ dɩ da a tiiri tɩga nɩ dɩd-o, sɩ Baŋa-Wɛ yagɩ DƖ cɛ-nɩ.» 19 Elisa ma ləri o wɩ: «Nan ve, sɩ Wɛ wʋ́ pa‑m yazurə.» Naaman ma viiri.
Naaman na ve o yi yigə fɩɩn tɩn, 20 mʋ Elisa tɩntʋŋnʋ Gehazi taga o tɩtɩɩ nɩ o wɩ: «Ta n nii te. Amʋ tu Elisa yagɩ Siiri tu wʋm mʋ sɩ o viiri kʋntʋ mwalɩ mwalɩ, yɩ o wʋ joŋi pɛɛra yam o jɩŋa nɩ dɩ fɩnfɩɩn dɩ. Ŋwɩa Tu Baŋa-Wɛ na sɩɩnɩ DƖ wʋra tɩn, a dugi Dɩntʋ yɩrɩ ŋwaanɩ nɩ amʋ tɩtɩ lagɩ a duri a da o kwaga mʋ, a nan wʋ́ na woŋo a joŋi.» 21 Gehazi ma kɩ lɩla sɩ o vu o yi‑o. Naaman na tʋlɩ o na nɔɔnʋ na duri o bɩɩnɩ o te tɩn, o ma zɩgɩ o təriko kʋm baŋa o faŋɩ o cu tɩga nɩ o vu o jeer-o. O ma bwe‑o o wɩ: «Yazurə mʋ n ve na?» 22 Gehazi ma ləri Naaman o wɩ: «Kʋ daɩ wo-lɔŋɔ. Kʋ yɩ amʋ tu Elisa mʋ tʋŋɩ-nɩ sɩ a ta dɩ nmʋ nɩ: Wɛ nijoŋnə kɔgɔ kʋm nɔn-dʋnnʋ tɩle mʋ zɩgɩ Efrayim pweeru laŋa kam nɩ ba yɔɔrɩ ba yi o sɔŋɔ lele kʋntʋ. O nan lagɩ sɩ n kwe səbu-poŋo kilo fiintɔ (30), kʋ wǝli dɩ garyiǝ bale mʋ n pa-ba.»
23 Naaman ma ləri o wɩ: «Amʋ tee nɩ, a lagɩ a pa‑m səbu-poŋo kilo fusɩrdʋ (60) mʋ.» O ma koori Gehazi pa o joŋi. O ma kwe səbu-poŋo kʋm o kɩ ywəllu tɩle wʋnɩ o vɔ. O ta ma kwe garyiǝ bale bam o wǝli da. O laan ma tʋŋɩ o tɩntʋŋna bale sɩ ba zɩŋɩ zɩla yam ba tɔgɩ Gehazi yigə ba taa veǝ. 24 Ba na yi piu kʋm yuu mɛ seeni Elisa na zʋʋrɩ tɩn, Gehazi ma joŋi zɩla yam ba jɩŋa nɩ o səgi o tɩtɩ digə nɩ, o daarɩ o banɩ Naaman tɩntʋŋna bale bam pa ba joori ba viiri.
25 Gehazi ma zʋ o zɩgɩ Elisa tee nɩ. Elisa ma bwe‑o o wɩ: «Gehazi, nmʋ ya ve yən mʋ?» Gehazi ma ləri o wɩ: «Amʋ tu, a wʋ ve je je.» 26 Elisa ma ta dɩd-o o wɩ: «Nmʋ wʋ lwarɩ nɩ maŋa kalʋ Naaman na zɩgɩ o təriko kʋm baŋa nɩ o cu o jeeri‑m tɩn, amʋ joro ya wʋra mʋ na? Kantʋ daɩ maŋa sɩ n joŋi səbu, dɩ gwaarʋ, dɩ Olivi tweeru karɩ, dɩ vinyə tweeru kadwi, dɩ peeni, dɩ nabɛ, dɩ tɩntʋŋna, dɩ tɩntʋŋ-kaana. 27 Nmʋ nan na kɩ kʋntʋ tɩn, ta n ye nɩ Naaman nanywannʋ yawɩʋ kʋm wʋ́ ba nmʋ tɩtɩ, dɩ n biə, dɩ dwi dɩlʋ na wʋ́ saŋɩ n kwaga tɩn baŋa sɩ kʋ taa ve wuu.» Gehazi na nuŋi pooni yigə tɩn mʋ o jigi nanyɔŋɔ. O yɩra ma pɩɩrɩ ca nɩ lɔŋɔ doŋ tɩn.