Elisa na wǝli kadəm wʋdoŋ te tɩn
4
Kaanɩ wʋdoŋ dɛɛn mʋ wʋra, o na yɩ Wɛ nijoŋnǝ bam dɩdʋa kaanɩ. Dɛ dɩdwɩ o ma zaŋɩ o vu Elisa te o magɩ a japoori a loori o wɩ: «Amʋ tu, a barʋ wʋm tɩga yɩ o ya tɔgɩ nmʋ kwaga. Nmʋ maŋɩ n ye o na yǝni o kwarɩ Baŋa-Wɛ te tɩn. O ya na di jɩnɩ nɔɔnʋ wʋlʋ tee nɩ tɩn nan mʋ tu sɩ o joŋi a bəkəri sɩm sɩle o vu o ma o ji o gambɛ sɩ o ma o yiri jɩnɩ dɩm.» 2 Elisa ma bwe‑o o wɩ: «Woŋo wʋra amʋ na wʋ́ wanɩ a kɩ a wəli‑m na? Nan ta n brɩ-nɩ, bɛɛ mʋ n daarɩ n yagɩ sɔŋɔ nɩ?» Kadəm wʋm ma ləri o wɩ: «Amʋ tu, kʋlʋkʋlʋ tǝrǝ kʋ na daɩ kunkwələ dɩ ka wʋ nugə fɩnfɩɩn yɩranɩ.»3 Elisa ma ta dɩ kadəm wʋm o wɩ: «Tʋlɩ sam dɩlʋ na bwələ dɩ nmʋ tɩn sɩ n jɩnɩ kambi ba tee nɩ. Pa sɩ taa daga zanzan. 4 Kwe kambi sɩlʋ n na nɛ tɩn n zʋ digə n pɩ ka ni, sɩ nmʋ dɩ n biə bale bam taa wʋra. Nmʋ ma n wʋ́ pwəri nugə kam n kɩ kambi sɩm wʋnɩ. Kambiə kalʋ na sua, sɩ n zɩgɩ-ka dáanɩ.»
5 Kadəm wʋm ma joori sɔŋɔ o pɩ o ni digə wʋnɩ, o dɩ o biə bam. Ba maa jaanɩ kambi sɩm ba ve ba pa‑o yɩ o pwəri nugə kam sɩ wʋnɩ. 6 Kambi sɩm maama na su tɩn, o ma ta biə bam sɩ ba ja sɩdonnǝ ba ba ba pa‑o. Ba dɩdʋa ma ləri o wɩ: «Mʋ sɩ maama.» O na tagɩ kʋntʋ tɩn mʋ kunkwələ kam wʋʋ nugə kam ti. 7 Kadəm wʋm ma vu o ta kʋ na kɩ te tɩn o brɩ Wɛ tɩntʋŋnʋ Elisa. Elisa ma ta dɩd-o o wɩ: «Ve n kwe nugə kam n yəgi n ma n ŋwɩ jɩnɩ dɩm. Səbu ta na daarɩ, kʋʋ́ wǝli nmʋ dɩ n biə bam sɩ á na á ni-wʋdiu.»
Sunem tiinə kaanɩ wʋdoŋ taanɩ
8 Dɛ dɩdwɩ mʋ Elisa dɛɛn ve Sunem. Kaanɩ wʋdoŋ maa zʋʋrɩ da yɩ o yɩ nadum. O ma bəŋi Elisa o sɔŋɔ nɩ sɩ o di wʋdiu. Kʋ na zɩgɩ dɛ dɩm kʋntʋ nɩ tɩn, maŋa kalʋ maama Elisa na ve Sunem, o yǝni o di kaanɩ wʋm kʋntʋ sɔŋɔ nɩ mʋ. 9 Kaanɩ wʋm ma ta dɩ o barʋ o wɩ: «Nii mʋ. Amʋ maanɩ nɩ nɔɔnʋ wʋntʋ na yǝni o tui dɩbam te tɩn yɩ Baŋa-Wɛ tɩntʋŋnʋ mʋ cɩga cɩga. 10 Nan pa dɩ́ lɔ di-balaŋa nayuu kʋm nɩ sɩ dɩ́ daarɩ dɩ́ zɩgɩ gadogo, dɩ taabʋlʋ, dɩ yituŋu, dɩ min-zoŋo da. Kʋntʋ wʋ́ wǝli Wɛ tɩntʋŋnʋ wʋm sɩ, o na yǝni o ba, sɩ o na pwəgə je.»
11 Dɛ dɩdwɩ mʋ Elisa joori Sunem. O ma din o zʋ nayuu digə kam sɩ o pəni. 12 O ma ta dɩ o tɩntʋŋnʋ Gehazi o wɩ: «Ve n bəŋi kaanɩ wʋm n pa-nɩ.» Gehazi ma sɩɩnɩ o bəŋi kaanɩ wʋm pa o ba o zɩgɩ Elisa yigə nɩ. 13 Elisa ma ta dɩ Gehazi sɩ o lwǝni o ta kaanɩ wʋm nɩ: «Nii nmʋ na pɛ n yɩra cɛ sɩ n ma n wǝli dɩbam te! Dɩbam nan wʋ́ kɩ bɛɛ mʋ dɩ́ ma dɩ́ zǝni nmʋ? Dɛdoŋ amʋ wʋ́ wanɩ a ta n lanyɩranɩ a brɩ pɛ wʋm naa jar-kərə yigə tu wʋm.» Kaanɩ wʋm ma ləri o wɩ: «Yɩ daanɩ n tɩtɩ, amʋ na zʋʋrɩ dɩ a sɔŋɔ tiinə tɩn, kʋnkʋlʋ wʋ muri amʋ.»
14 Elisa laan ma bwe Gehazi o wɩ: «Bɛ nan mʋ maŋɩ sɩ a kɩ a pa kaanɩ wʋm?» Gehazi ma ləri o wɩ: «Kaanɩ wʋm ta wʋ lʋgɩ bu. O barʋ dɩ ma tiini o kwɩn lanyɩranɩ.»
15 Elisa ma ta dɩ Gehazi o wɩ: «Bəŋi kaanɩ wʋm sɩ o joori o ba.» Kaanɩ wʋm ma ba o zɩgɩ digə kam ni nɩ. 16 Elisa ma ta dɩ kaanɩ wʋm o wɩ: «Bɩnɩ tɩntʋ wɛɛnɩ nmʋ wʋ́ lʋ bəkərə.» Kaanɩ wʋm maa wʋ sɛ yɩ o wɩ: «Amʋ tu, yɩ ganɩ-nɩ, sɩ n yɩ Wɛ tɩntʋŋnʋ mʋ.»
17 Bɩnɩ na joori dɩ yi tɩn, kaanɩ wʋm ma sɩɩnɩ o ja pugə o lʋ bəkərə. Kʋ dɛɛn kɩ nɩ Elisa na wuuri o ta te dɩd-o tɩn mʋ.
18 Bu wʋm na kɩ nɔɔnʋ fɩɩn tɩn mʋ dɛ dɩdwɩ o zaŋɩ o vu o ko te kara nɩ maŋa kalʋ o ko wʋm dɩ tɩntʋŋna badonnǝ na wʋra ba zagɩ mɩna tɩn. 19 Bu wʋm ma da o kaasɩ bɩdwɩ baŋa nɩ dɩ o ko o wɩ: «A yuu wɔɛ yoo! A yuu wɔɛ yoo!» O ko ma ta dɩ o tɩntʋŋnʋ wʋdoŋ o wɩ: «Ja bu wʋm n vu o nu te.» 20 Tɩntʋŋnʋ wʋm ma təli bu wʋm o ja o vu o kɩ o nu wʋm jɩŋa nɩ. Bu wʋm ma maŋɩ o nu nɛ baŋa nɩ o jǝni. Wɩa na yi yuparɩ baŋa maŋa kalʋ tɩn mʋ bu wʋm tɩga. 21 Kaanɩ wʋm ma ja o bu wʋm o din nayuu kʋm o zʋ Elisa digə o tiŋ‑o gadogo kʋm baŋa nɩ. O ma nuŋi o ja digə kam ni o pɩ o yagɩ bu wʋm da. 22 Kaanɩ wʋm ma bəŋi o barʋ o ta dɩd-o o wɩ: «A loori-m, pa n tɩntʋŋna bam dɩdʋa ja bɩnaga o ba, sɩ dɩ́ da daanɩ dɩ́ vu Wɛ tɩntʋŋnʋ wʋm te, sɩ dɩ́ joori lɩla.»
23 O barʋ wʋm ma ta dɩd-o o wɩ: «Bɛɛ mʋ kɩ yɩ n lagɩ sɩ n vu zɩm? Can-dʋŋa ta wʋ nuŋi. Kʋ maa daɩ siun dɛ.» Kaanɩ wʋm ma lǝr-o o wɩ: «Kʋ yɩ yazurə mʋ.» 24 O ma ti bɩnaga kam yigə yɩ o daarɩ o ta dɩ tɩntʋŋnʋ wʋm o wɩ: «Pa dɩ́ kɛ. Tʋ ka yigə nɩ n ta n va-ka. Yɩ zaŋɩ n ta n wɩ n zɩgɩ cwəŋə nɩ, kʋ na daɩ amʋ mʋ ga wɩ n zɩgɩ.» 25 Kaanɩ wʋm ma vu o yi Karmɛlɩ piu kʋm mɛ Wɛ tɩntʋŋnʋ Elisa na wʋra tɩn. Elisa ma tʋlɩ o na‑o yigə yigə yɩ o ta dɩ o tɩntʋŋnʋ Gehazi o wɩ: «Nii Sunem tiinə kaanɩ wʋm na maa bɩɩnɩ. 26 Kɩ lɩla n duri n jeer-o n bwe‑o n nii, yazurə mʋ o ve na? Bwe‑o n nii o barʋ dɩ o bu yazurə na yɩ te tɩn.» Kaanɩ wʋm ma ləri Gehazi o wɩ: kʋ yɩ yazurə mʋ.
27 Kaanɩ wʋm na yi Elisa te Karmɛlɩ piu kʋm yuu nɩ tɩn mʋ o tʋ o yigə nɩ o ja o naga. Gehazi ma fʋfɔ o yi sɩ o vaŋ-o o yagɩ dáanɩ. Elisa ma ta o wɩ: «Yagɩ o yɩra! O wʋʋ tiini kʋ cɔgɩ mʋ yɩ o ba. Baŋa-Wɛ nan wʋ tagɩ kʋlʋ na daanɩ‑o tɩn DƖ brɩ-nɩ.»
28 Kaanɩ wʋm ma magɩ a japoori a loori Elisa yigə nɩ o wɩ: «Amʋ tu, a wʋ tagɩ nɩ n pa-nɩ bu. Kʋntʋ mʋ a ya taga a wɩ n yɩ ganɩ-nɩ tɩn.»
29 Elisa ma ta dɩ Gehazi o wɩ: «Fɔgɩ n vɔ n gwaarʋ kiri-kiri n daarɩ n kwe a nacəgə kam n duri lɩla n kɛ. Nan yɩ warɩ nɔɔn-nɔɔnʋ cwǝŋǝ yuu nɩ. Nɔɔnʋ na warɩ‑m, sɩ n yɩ lǝr-o. N na yi da sɩ n kwe a nacəgə kam n daŋɩ bu wʋm yibiyə nɩ.» 30 Kaanɩ wʋm ma ta dɩ Elisa o wɩ: «Ŋwɩa Tu Baŋa-Wɛ na sɩɩnɩ DƖ wʋra tɩn, amʋ dugi Dɩntʋ yɩrɩ ŋwaanɩ, dɩ nmʋ tɩtɩ ŋwɩa ŋwaanɩ nɩ: amʋ brɩ a bá yagɩ‑m.» Elisa ma zaŋɩ sɩ ba tɔgɩ daanɩ ba kɛ.
31 Gehazi ma loori yigə o vu o yi da yɩ o daarɩ o kwe nacəgə kam o daŋɩ bu wʋm yibiyə nɩ yɩ bu wʋm wʋ gigiri o tɩtɩ. O ma joori o vu Elisa te o ta dɩd-o o wɩ: «Bu wʋm ta wʋ zaŋɩ.»
32 Elisa na yi sɔŋɔ kʋm o zʋ o digə kam tɩn mʋ o nɛ bu wʋm na tɩgɩ o tigi o gadogo baŋa nɩ. 33 O ma pɩ digə kam ni yɩ o loori Baŋa-Wɛ o yɩranɩ. 34 Elisa ta ma zaŋɩ o yi gadogo kʋm baŋa, o pəni bu wʋm baŋa nɩ pa o ni dɩm yɔɔrɩ bu wʋm ni, yɩ o yiǝ yɔɔrɩ o yiǝ. O ma daarɩ o lwarɩ o jɩa pa ya yɔɔrɩ o jɩa. O na lwarɩ o tɩtɩ o pəni bu wʋm baŋa nɩ kʋntʋ tɩn mʋ bu wʋm yɩra yam joori ya lʋnɩ. 35 Elisa ma zaŋɩ o kɩkarɩ digə kam wʋnɩ yɩ o daa joori o vu o lwarɩ o tɩtɩ o pəni bu wʋm baŋa nɩ. Bu wʋm ma tɩn kuni bɩrpɛ yɩ o daarɩ o puri o yiǝ. 36 Elisa ma bəŋi Gehazi yɩ o ta dɩd-o sɩ o bəŋi Sunem tiinə kaanɩ wʋm o pa‑o. O na bəŋi nu wʋm pa o yi tɩn, Elisa ma ta dɩd-o o wɩ: «Joŋi n bu.» 37 Kaanɩ wʋm ma zʋ o tʋ Elisa nɛ baŋa nɩ yɩ o vin o yibiyə tɩga nɩ. O ma sɩɩnɩ o joŋi o bu o viiri.
Wo-kɩnkagɩla yale taanɩ
38 Elisa ma joori o vu Giligalɩ. Kana dɛɛn maa zɩgɩ je sɩm kʋntʋ nɩ. Dɛ dɩdwɩ o dɩ Wɛ nijoŋnə kɔgɔ kʋm ma jeeri daanɩ sɩ ba zaasɩ. O ma ta dɩ o tɩntʋŋnʋ wʋm o wɩ: «Kwe kambi-zaŋa n təni mim nɩ n saŋɩ dwə n pa nɔɔna bam.»
39 Ba kɔgɔ kʋm wʋ nɔɔnʋ dɩdʋa ma zʋ gaa sɩ o goni dwə-vɔɔrʋ. O ma na wəənu tɩ nyɩ dɩ jambwalɩ, gaa dʋvɛn tiu yuu nɩ, o gwəri o su o gɔrɔ o joori. O na yi sɔŋɔ tɩn, o ma goni tɩ maama o wǝli dwə balʋ na wʋ kambiə kam wʋnɩ tɩn, yɩ o wʋ lwarɩ tɩ na yɩ wǝǝnu tɩlʋ. 40 Ba laan ma kwe dwə bam ba maŋɩ ba pa daanɩ. Nɔɔna bam na yɔɔrɩ ba laŋɩ wʋdiu kʋm tɩn, ba ma kaasɩ ba wɩ: «Nii-na! Dɩ́ tu, Baŋa-Wɛ tɩntʋŋnʋ, cɔŋɔ mʋ ba kɩ wʋdiu kʋm wʋnɩ!» Ba maa daa wʋ wanɩ-kʋ ba di.
41 Elisa ma ta o wɩ: ba ja muni ba ba ba pa‑o. O ma kwe-dɩ o kɩ kambiə kam wʋnɩ yɩ o wɩ: «Joori n kɩ wʋdiu kʋm n pa nɔɔna bam sɩ ba di.» Ba na di tɩn, wodiu kʋm daa ba jɩgɩ vɩan dɩ fɩnfɩɩn dɩ.
42 Dɛ dɩdwɩ mʋ nɔɔnʋ wʋdoŋ zɩgɩ Baal-Salisa nɩ o ja o wʋdiiru tɩlʋ na loori yigə tɩ kɩ tɩn o ba o pa Wɛ tɩntʋŋnʋ Elisa. Dɩpwa fiinle, dɩ mɩn-zwarʋ tɩlʋ o na kɩ yolo wʋnɩ tɩn mʋ kʋntʋ. Elisa ma ta dɩ o tɩntʋŋnʋ wʋm o wɩ: «Kwe n pa nɔɔna bam sɩ ba di.» 43 Tɩntʋŋnʋ wʋm ma ləri o wɩ: «Ba yɩ nɔɔna bi mʋ. Wʋdiu kʋntʋ wʋ́ wanɩ kʋ yi-ba na?» Elisa ma joori o ta o wɩ: «Kwe n pa-ba sɩ ba di. Bɛŋwaanɩ Baŋa-Wɛ mʋ taga DƖ wɩ: baá di ba su ba daarɩ.» 44 Tɩntʋŋnʋ wʋm dɛɛn ma sɩɩnɩ o kwe wʋdiu kʋm o pa-ba pa ba di ba daarɩ, nɩ Baŋa-Wɛ na maŋɩ DƖ ta te tɩn.a