Tigurə cugi Yisɩrayɛlɩ dɩ Moabɩ laŋa nɩ
3
Zuda tɩʋ pɛ Zʋzafatɩ paarɩ dim bɩna fugə-nana bɩnɩ dɩm wʋnɩ mʋ Akabɩ bu Zʋram dɛɛn di Yisɩrayɛlɩ tɩʋ paarɩ Samari nɩ. O ma jǝni Samari nɩ o di paarɩ dɩm bɩna fugə-yale. 2 Zʋram dɛɛn tʋŋɩ lwarɩm mʋ o cɔgɩ Baŋa-Wɛ yigə. O lwarɩm kikiə yam nan wʋ yi o ko dɩ nu ya na kɩ yalʋ tɩn. O wanɩ o cɔgɩ kandwɛ dɩlʋ o ko dɛɛn na cwi Baalɩ zulə ŋwaanɩ tɩn. 3 Dɩ kʋntʋ dɩ, o paalɩ o kɩ lwarɩm dwi dɩlʋ Nebatɩ bu Zeroboam dɛɛn na kɩ pa Yisɩrayɛlɩ tiinə dɩ da ba kɩ tɩn mʋ. O wʋ sɛ sɩ o yagɩ.4 Moabɩ tɩʋ pɛ Mesa dɛɛn kɔnɩ peeni mʋ. O ma yǝni o maŋɩ sɩ o ja pəlbiə mʋrrʋ bi (100,000) o wǝli dɩ pi-bɛ mʋrrʋ bi (100,000) kʋrrʋ mʋ o vu o pa Yisɩrayɛlɩ tɩʋ pɛ bɩnɩ maama wʋnɩ.a 5 Yisɩrayɛlɩ tɩʋ pɛ Akabɩ nan na tɩgɩ tɩn mʋ Moabɩ tɩʋ pɛ wʋm maa varɩgɩ bam o vɩn Yisɩrayɛlɩ tɩʋ pɛ wʋm ni. 6 Pɛ Zʋram ma zaŋɩ Samari nɩ o la Yisɩrayɛlɩ jar-kərə bam maama o kɩ daanɩ sɩ ba nuŋi ba kɩ najara. 7 O ma tʋŋɩ ni o pa Zuda tɩʋ pɛ Zʋzafatɩ yɩ o wɩ: «Moabɩ pɛ varɩgɩ bam mʋ o vɩn amʋ ni. Kʋntʋ nan tɩn, nmʋ nan wʋ́ sɛ sɩ n da dɩ amʋ sɩ dɩ́ vu dɩ́ kɩ najara dɩ Moabɩ tiinə bam na?» Zʋzafatɩ ma ləri o wɩ: «A wʋ́ sɛ sɩ a wəli‑m. Dɩ́ yɩ cʋrrʋ mʋ daanɩ. Ta n nii dɩbam jar-kərə dɩ dɩ́ siseŋ-nɔɔna bam nɩ ba yɩ nmʋ tɩtɩ nyɩm mʋ.» 8 Zʋzafatɩ ta ma bwe o wɩ: «Dɩ́ nan wʋ́ tɔgɩ cwǝŋǝ kɔɔ mʋ dɩ́ vu dɩ́ puli najara yam?» Zʋram ma ləri o wɩ: «Dɩ́ wʋ́ tɔgɩ Edɔm kagʋa cwǝŋǝ kam mʋ dɩ́ vu dɩ́ yi-ba.»
9 Yisɩrayɛlɩ pɛ Zʋram, dɩ Zuda pɛ wʋm, kʋ wǝli dɩ Edɔm pɛ wʋm ma zaŋɩ ba kɛ dɩ ba nɔɔna bam. Ba maama ma kwe da yarpɛ ba kaagɩ kagʋa kam wʋnɩ pa na daa tǝrǝ sɩ ba dɩ ba vara bam nyɔ.
10 Pɛ Zʋram ma kaasɩ o wɩ: «Lɛɛrʋ yi dɩbam! Baŋa-Wɛ lagɩ DƖ kwe dɩbam pwa batɔ bantʋ mʋ o kɩ Moabɩ tiinə bam jɩŋa nɩ sɩ ba di dɩbam!» 11 Pɛ Zʋzafatɩ ma bwe o wɩ: «Baŋa-Wɛ nijoŋnu wʋra yo seeni sɩ dɩ́ bwe‑o dɩ́ lwarɩ Baŋa-Wɛ wʋbʋŋa na?»b Pɛ Zʋram tɩntʋŋnʋ wʋdoŋ ma ləri o wɩ: «Safatɩ bu Elisa mʋ wʋra. Wʋntʋ dɛɛn mʋ yǝni o bwələ dɩ Eli yɩ o zən‑o.» 12 Pɛ Zʋzafatɩ ma ta o wɩ: «Kʋ na yɩ kʋntʋ, Baŋa-Wɛ kwǝrǝ yǝni ka yi wʋntʋ mʋ cɩga cɩga». Pwa batɔ bam maama ma zaŋɩ ba vu Elisa te.
13 Elisa ma ta dɩ Yisɩrayɛlɩ pɛ Zʋram o wɩ: «Dɩbam jɩgɩ bɛɛ mʋ sɩ dɩ́ kɩ daanɩ? Ve n bwe n ko dɩ n nu nijoŋnǝ bam sɩ ba wəli‑m.» Zʋram ma ləri o wɩ: «Awo! Kʋ yɩ Baŋa-Wɛ mʋ kwe dɩbam pwa batɔ bantʋ DƖ kɩ daanɩ sɩ DƖ daarɩ DƖ kwe dɩbam DƖ kɩ Moabɩ tiinə bam jɩŋa nɩ.» 14 Elisa ma ləri o wɩ: «Paŋwa Tu Baŋa-Wɛ na sɩɩnɩ DƖ ŋwɩ yɩ a yɩ DƖ tɩntʋŋnʋ tɩn, amʋ dugi DƖ yɩrɩ ŋwaanɩ nɩ: kʋ na daɩ a na nɩgɩ Zuda Pɛ Zʋzafatɩ, amʋ yaa brɩ a maŋɩ a ba lagɩ a cegi-m dɩ. A yaa brɩ a ba lagɩ a nii n baŋa nɩ dɩ. 15 Nan bəŋi-na wʋlʋ na ye kɔnɔ tam tɩn á pa-nɩ.» Bɛŋwaanɩ, nɔɔnʋ dɛɛn na yǝni o ta kɔnɔ mʋ Baŋa-Wɛ dam dɩm wʋ́ ba Elisa baŋa nɩ. 16 Elisa ma ta o wɩ: «Baŋa-Wɛ na tagɩ kʋlʋ tɩn mʋ tɩntʋ: ‹Kʋ-na gwəənu á tiŋi nabarɩ-kʋra kantʋ nɩ. 17 Bɛŋwaanɩ, amʋ na wʋ́ kɩ te tɩn, abam bá na dʋa, yɩ viu dɩ bá dʋlɩ. Kʋ daarɩ na wʋ́ ba ba su bolo kʋntʋ sɩ abam dɩ á nɔɔna bam maama dɩ á vara bam taa nyɔa.› 18 Kǝm dɩntʋ yɩ mwalɩ mʋ Baŋa-Wɛ tee nɩ. DƖ daa ta wʋ́ kwe Moabɩ tiinə bam o kɩ abam jɩŋa nɩ. 19 Abam wʋ́ vu á wanɩ ba dam je sɩm maama dɩ ba tʋ-kamunə tɩm. Á ta wʋ́ goni ba tu-ŋʋnnʋ tɩm á dɩ tɩga nɩ yɩ á daarɩ á sɩn ba buli-yiə yam dɩ. Á daarɩ á dʋlɩ dʋlɩ kandwa á dɩ dɩ ba karɩ ŋwɩ sɩm wʋnɩ maama á cɔgɩ-sɩ.»
20 Tɩga na pʋʋrɩ sɩ kʋ maŋɩ dɩ zɩzɩŋa kaanɩm dɩm tɩn mʋ na sɩɩnɩ ba zɩgɩ Edɔm laŋa kam seeni ba ba ba su tɩga kam maama.
21 Moabɩ tiinə bam na ni nɩ pwa batɔ bam mʋ kɩ ba jar-kərə daanɩ ba ba sɩ ba zaŋɩ najara dɩ ba tɩn, ba ma bəŋi balʋ maama na ye najara kǝm tɩn, nɔn-dʋnnʋ dɩ nɔn-kwɩɩrʋ dɩ, pa ba vu ba laŋa kam sisəm ba zɩgɩ da. 22 Tɩga na pʋʋrɩ tɩtɩɩtɩ yɩ Moabɩ tiinə bam zaŋɩ tɩn, ba ma tʋlɩ ba na na bam na tigi bolo kʋm nɩ te tɩn. Wɩa maa nyɩɩnɩ na bam baŋa nɩ pa kʋ nyɩ dɩ jana mʋ tɩn. 23 Ba ma kaasɩ ba wɩ: «Jana mʋ tɩntʋ! Kʋʋ́ taa yɩ pwa bam dɩ ba jar-kərə bam mʋ jaŋɩ ba gʋ daanɩ. Nan pa-na sɩ dɩ́ laan vu dɩ́ vrɩ ba wǝǝnu maama dɩ́ taa te.»
24 Moabɩ tiinə bam na yɔɔrɩ ba yi Yisɩrayɛlɩ jar-kərə bam na kikili daanɩ mɛ tɩn, mʋ Yisɩrayɛlɩ jar-kərə bam nuŋi ba zaŋɩ najara dɩ ba. Ba ma zəli-ba pa ba duri ba joori ba tɩʋ. Ba ma zəli-ba taa yɩ ba gʋ Moabɩ tiinə zanzan. 25 Ba dɛɛn cɔgɩ ba tɩɩnɩ dɩm mʋ. Yisɩrayɛlɩ nɔɔna bam dɩdʋa dɩdʋa ma dʋlɩ kandwa ba faarɩ Moabɩ tɩ-ywəŋə kam maama ba cɔgɩ. Ba ma sɩn ba buli-yiə yam maama ba daarɩ ba goni ba tu-ŋʋnnʋ tɩm maama ba dɩ tɩga nɩ. Kir-Aresɛtɩ tɩʋ kʋm yɩranɩ ya mʋ daarɩ kʋ zɩgɩ punə. Yisɩrayɛlɩ jar-kərə laan ma vu ba gilimi-kʋ yɩ ba daarɩ ba ma napanɩ ba dʋlɩ kandwa ba ma ba cɔgɩ-kʋ.
26 Moabɩ tɩʋ pɛ na maanɩ nɩ o lagɩ o tʋ najara yam wʋnɩ tɩn, o ma ja balʋ na ye sʋ-lɔŋɔ najara kǝm tɩn nɔɔna biə yarpɛ (700) o vu sɩ ba wanɩ ba magɩ ba dʋna bam ba kɛ ba yi Edɔmc pɛ wʋm na wʋ mɛ tɩn yɩ ba ga. 27 O laan ma ja o bu-kwɩan kalʋ ya na wʋ́ ləri o yuu nɩ o ji pɛ tɩn o ma o kɩ zwɛɛm kaanɩm tɩʋ kʋm kəbrə kam baŋa nɩ.d Kǝm dɩntʋ dɛɛn ma tiini dɩ daanɩ Yisɩrayɛlɩ tiinə bam pa ba pipiri ba joori ba tɩtɩ tɩʋ ba daarɩ Moabɩ tɩʋ pɛ dɩ o nɔɔna bam.