Absalɔn nɛ cwǝŋǝ sɩ o joori Zeruzalɛm
14
Zeruya bu Zoabɩ dɛɛn ma maanɩ nɩ Davidi wʋbʋŋa tigi Absalɔn wʋnɩ mʋ dɛ maama. 2 O ma tʋŋɩ nɔɔnʋ Tekoa tɩʋ nɩ sɩ o bəŋi kaanɩ wʋdoŋ o na tiini o jɩgɩ swan tɩn. O na tu tɩn, Zoabɩ ma ta dɩd-o o wɩ: «Kɩ nɩnɛɛnɩ n keeri nɔɔnʋ luə mʋ te. Kwe luə gwaarʋ n zʋ, sɩ n daarɩ n yagɩ n yuu yɔɔ yɩranɩ, n yɩ kwɛ n tɩtɩ dɩ tralɩ nugə. Pa kʋ taa nyɩ nɩnɛɛnɩ n keeri luə mʋ n daanɩ. 3 Nmʋ laan ma n wʋ́ vu pɛ wʋm te n ta kʋlʋ amʋ na wʋ́ brɩ-m tɩn.» Zoabɩ laan ma brɩ kaanɩ wʋm kʋlʋ maama o na wʋ́ ta dɩ pɛ tɩn.4 Tekoa tiinə kaanɩ wʋm ma vu o yi pɛ wʋm yigə o vin o yibiyə tɩga nɩ o zul‑o, yɩ o ta o wɩ: «Pɛ, a loori-m! Wǝli-nɩ!»
5 Pɛ wʋm ma bwe‑o o wɩ: «Bɛɛ mʋ n laga?» O dɩ ma ləri o wɩ: «Dɩ́ ko, amʋ barʋ tɩga o daarɩ-nɩ kadəm mʋ. 6 A nan ya jɩgɩ bəkəri sɩle mʋ. Dɛ dɩdwɩ mʋ ba ve kara yɩ najara tʋ ba tɩtarɩ nɩ dáanɩ. Nɔɔn-nɔɔnʋ na tǝrǝ sɩ o lwɛ-ba tɩn, mʋ ba dɩdʋa magɩ wʋdoŋ wʋm o gʋ. 7 Dɩ́ sɔ-yuu kʋm maama laan nan zɩgɩ amʋ baŋa nɩ sɩ a ja a bu wʋm a ja a ba a pa-ba sɩ ba gʋ, o na gʋ o cʋrʋ kʋm tɩn ŋwaanɩ. Ba maa lagɩ sɩ ba pa a dwi dɩm ti mʋ. Wʋntʋ yɩranɩ laan mʋ yɩ a yi na daarɩ. Ba na gʋ-o, amʋ gɛ mʋ kʋntʋ, a barʋ dɩ daa maa ba taa jɩgɩ bu sɩ kʋ jwa bəŋi o yɩrɩ.»
8 Pɛ wʋm ma ta dɩ kaanɩ wʋm o wɩ: «Joori n vu sɔŋɔ, sɩ a wʋ́ nii n taanɩ dɩm baŋa nɩ sɩ dɩ kwɛ.» 9 Tekoa tiinə kaanɩ wʋm ta maa wɩ: «Pɛ, kǝm dɩm kʋntʋ wʋ amʋ dɩ a dwi dɩm yuu nɩ mʋ. Sɩ kʋ na yɩ nmʋ dɩdaanɩ paarɩ dɩm n na jɩgɩ n di tɩn, daanɩm daɩ sɩ dɩ yi‑m.»
10 Pɛ wʋm laan ma ta o wɩ: «Wʋlʋ maama na ŋɔɔnɩ taanɩ dɩdaanɩ‑m, sɩ n ja kʋ tu n ba amʋ yigə nɩ, sɩ o daa bá na cwǝŋǝ o daanɩ‑m.» 11 Kaanɩ wʋm ta ma ta o wɩ: «Kʋntʋ tɩn, nan kwe n Tu Baŋa-Wɛ yɩrɩ dɩm n du nɩ: wʋlʋ na lagɩ sɩ o joori o joŋi a bu wʋlʋ na tɩgɩ tɩn jɩnɩ dɩm tɩn daa yɩ na cwǝŋǝ sɩ o gʋ a bu wʋntʋ dɩ o wǝli da.» Pɛ Davidi maa wɩ: «Amʋ dugi dɩdaanɩ Ŋwɩa Tu Baŋa-Wɛ yɩrɩ nɩ: n bu wʋm yuuyuǝ dɩdʋa tɩtɩ bá gɔ ka tʋ tɩga nɩ.»
12 Kaanɩ wʋm laan maa wɩ: «A loori-m! Pɛ, pa-nɩ cwǝŋǝ sɩ a ta taanɩ dɩdʋa yɩranɩ a wǝli da.» Pɛ Davidi ma ləri o wɩ: «Ta n tɛa.» 13 O laan ma ta Pɛ wʋm o wɩ:
«Dɩ́ ko, lwarɩ nɩ n wʋ tɔgɩ cwǝŋǝ dɩ n na jɩgɩ Wɛ nɔɔna bam n kɩ kǝm dɩlʋ tɩn. Nmʋ tɩtɩ bu wʋ sa-tɩʋ nɩ mʋ yɩ n wʋ pɛ‑o cwǝŋǝ sɩ o joori sɔŋɔ. Nmʋ nan na ŋɔɔnɩ te dɩ amʋ tɩn, n dɩ n tɩtɩ mʋ kʋntʋ. 14 Nɔɔnʋ maama maŋɩ sɩ o tɩ mʋ. Tʋʋnɩ nyɩ dɩ na balʋ na logi tɩga nɩ tɩn mʋ, ba daa warɩ-ba sɩ ba joori ba pɛ ba kɩ jǝgǝ dɩdʋa nɩ. Wɛ nan ba beeri nɔɔna tʋʋnɩ, sɩ kʋ na yɩ balʋ na baŋwɛ tɩn, DƖ yǝni DƖ pʋrɩ cwǝŋǝ sɩ ba wanɩ ba joori DƖ te.
15 Pɛ, amʋ na jaanɩ taanɩ dɩm a ba nmʋ te tɩn, kʋ yɩ nɔɔna bam na pɛ fʋʋnɩ di amʋ tɩn ŋwaanɩ mʋ. A yɩ nmʋ tɩntʋŋ-kana mʋ. A ma bʋŋɩ a tɩtɩ nɩ a wɩ: a na tu a ta dɩ nmʋ, nń wanɩ-nɩ n wǝli. 16 Pɛ, a nan jɩgɩ cɩga nɩ nmʋ wʋ́ sɩɩnɩ n joŋi amʋ dɩ a bu wʋm sɩ wʋlʋ na kwaanɩ sɩ o cɔgɩ dɩbam tɩn yɩ yi dɩ́ yuu. Wʋntʋ lagɩ sɩ dɩ́ ga dɩ́ tɩga kam pʋpwara Wɛ na pɛ dɩbam tɩn mʋ.
17 Amʋ laan nan tɛ a tɩtɩ nɩ mʋ a wɩ: ‹Amʋ wʋ laan tigə mʋ dɩ kʋlʋ pɛ na goni ni sɩ o kɩ tɩn. Bɛŋwaanɩ, dɩ́ ko, nmʋ nyɩ nɩnɛɛnɩ Wɛ malɛka mʋ, n waɩ n kuri lanyɩranɩ dɩdaanɩ balɔrɔ n pɔɔrɩ daanɩ. N Tu Baŋa-Wɛ wʋ́ taa wʋra dɩ nmʋ.› »
18 Pɛ wʋm ma ta dɩ kaanɩ wʋm o wɩ: «Amʋ dɩ lagɩ a bwe‑m woŋo mʋ, nan yɩ səgi kʋlʋkʋlʋ dɩ amʋ.» Kaanɩ wʋm ma ləri o wɩ: «A ko, bwe n bwiə yam.»
19 Pɛ Davidi ma bwe‑o o wɩ: «Zoabɩ yigə tɔgɩ ka wʋ kǝm dɩntʋ wʋnɩ na?» Kaanɩ wʋm ma lǝr-o o wɩ: «Pɛ, amʋ dugi nmʋ ŋwɩa kam ŋwaanɩ nɩ nɔɔn-nɔɔnʋ bá wanɩ sɩ o fʋ cɩga kam nmʋ yigə nɩ. Nmʋ dɩdɛɛrʋ Zoabɩ mʋ sɩɩnɩ o brɩ-nɩ kʋlʋ maama a na wʋ́ kɩ tɩn, dɩdaanɩ kʋlʋ maama a na maŋɩ sɩ a ta tɩn. 20 O nan kɩ kʋntʋ maama sɩ kʋ pa kǝm dɩm mʋ pipiri dɩ kwɛ. Dɩ́ ko, nmʋ nan maŋɩ n jɩgɩ swan mʋ, nɩ Wɛ malɛka te, n ma n ye kʋlʋ maama na kɩ dɩ́ tɩga kam baŋa nɩ tɩn.»
21 Davidi laan ma bəŋi Zoabɩ yɩ o ta dɩd-o o wɩ: «Tɔ. A lagɩ a kɩ n wʋbʋŋa yam mʋ. Zaŋɩ n vu n ja a bu Absalɔn n joori n ba yo seeni.» 22 Zoabɩ ma vin o yibiyə tɩga nɩ Davidi yigə nɩ o zul‑o. O ma daarɩ o ta dɩd-o nɩ: «Pɛ, a kɩ nmʋ le. Amʋ laan nan lwarɩ nɩ n yigə wʋ amʋ wʋnɩ, dɩdaanɩ n na sɛ n kɩ a na lagɩ te tɩn.»
23 Zoabɩ dɛɛn ma zaŋɩ o vu Gesuri o ja Absalɔn o joori o ba Zeruzalɛm. 24 Davidi nan ya maŋɩ o pa ni mʋ o wɩ: «Absalɔn maŋɩ sɩ o vu o tɩtɩ sɔŋɔ kʋm mʋ o taa wʋra. A bá sɛ sɩ o ba amʋ te.» Absalɔn ma sɩɩnɩ o vu o zʋʋrɩ o tɩtɩ sɔŋɔ kʋm nɩ yɩ o wʋ nɛ pɛ wʋm yibiyə.
25 Nɔɔn-nɔɔnʋ dɛɛn tǝri Yisɩrayɛlɩ tɩga kam maama nɩ yɩ ba tɛ o lam taanɩ sɩ kʋ maŋɩ dɩdaanɩ Absalɔn. Kʋ na zɩgɩ o yuu nɩ sɩ kʋ tu kʋ kwaarɩ o napra seeni tɩn, o mɛ mɛ ba jɩgɩ gɛɛrɩ. 26 O dɛɛn yǝni o pa ba fa o yuu bɩdwɩ mʋ bɩnɩ maama wʋnɩ, o yuuywe sɩm na tiini sɩ dwara yɩ sɩ dunǝ tɩn ŋwaanɩ. Ba na yǝni ba goni-sɩ, sɩ duuni wʋ́ taa maŋɩ dɩ kilo tɩle mʋ. 27 O dɛɛn jɩgɩ bəkəri sɩtɔ dɩ bɩsankana dɩdʋa mʋ. Busankana kam yɩrɩ maa yɩ Tamaarɩ. O na tu o kɩ nɔɔnʋ tɩn, o tiini o lana zanzan.
28 Absalɔn dɛɛn zʋ Zeruzalɛm nɩ bɩna yale mʋ, yɩ o wʋ wanɩ pɛ wʋm yibiyə o na. 29 O ma tʋŋɩ o ta sɩ Zoabɩ ba o te sɩ o daarɩ o ja taanɩ dɩm o vu Pɛ Davidi te o pa‑o. Zoabɩ ma vɩn sɩ o vu Absalɔn te. Absalɔn ta ma tʋŋɩ Zoabɩ kwaga nɩ kuni bale maama yɩ o daa ta wʋ sɛ sɩ o ba. 30 Absalɔn laan ma ta dɩ o tɩntʋŋna bam o wɩ: «Nii-na, Zoabɩ kara mʋ wʋ an kara kam tikəri nɩ tɩn. Ka wʋ mɩnaa nan wʋra ya kɩ lanyɩranɩ. Ve-na á dɩ mim ka wʋnɩ á zwɛ-ka.» Ba ma sɩɩnɩ ba vu ba dɩ mim Zoabɩ kara kam nɩ.
31 Zoabɩ laan ma zaŋɩ o vu Absalɔn sɔŋɔ o bwe‑o o wɩ: «Bɛɛ mʋ kɩ yɩ n pa n tɩntʋŋna vu ba zwɛ a kara kam?» 32 Absalɔn ma ləri o wɩ: «Amʋ tʋŋɩ n kwaga nɩ sɩ n ba amʋ te yɩ n wʋ sɛ. A ya lagɩ sɩ n vu pɛ wʋm te n bwe‑o mʋ n wɩ: ‹Bɛŋwaanɩ mʋ amʋ brɩ a zɩgɩ Gesuri nɩ a ba yo seeni? Kʋ nyɩ dɩ a ya na maŋɩ daanɩ mʋ a zʋʋra, kʋ yaá taa gara kʋ pa-nɩ.› Tɔ. Amʋ nan ta lagɩ sɩ a na pɛ wʋm mʋ. O nan na ye nɩ a kǝm wʋ maŋɩ, sɩ o gʋ-nɩ.»
33 Zoabɩ ma vu Pɛ Davidi te o tʋlɩ kʋlʋ maama Absalɔn na tagɩ tɩn o brɩ-o. Davidi ma pa ba bəŋi Absalɔn sɩ o ba. O na yi da tɩn, mʋ o vin o yibiyə tɩga nɩ o war‑o. Pɛ wʋm ma sɛ o pwəgə yɩ o ja-o o kukwəri.