Yisɩrayɛlɩ tiinə zaŋɩ najara dɩ Bɛnzamɛn tiinə
20
Yisɩrayɛlɩ dwi tiinə bam maama dɛɛn nuŋi ba kɩ daanɩ mʋ sɩ ba zaŋɩ najara. Ba ma vu Mitspa ba jeeri Baŋa-Wɛ yigə nɩ.b Kʋ na zɩgɩ Dan laŋa kam seeni sɩ kʋ yi Bɛɛr-Seba, kʋ wǝli dɩ Galadɩ laŋa kam tɩn mʋ ba maama nuŋi.a 2 Yisɩrayɛlɩ nakwa bam ma zɩgɩ ba dwiə yam maama nɩ ba da ba jeeri dɩ Wɛ nɔɔna bam. Ba kɔgɔ kʋm maa yɩ jar-kərə mʋrrʋ biə-yana (400,000) yɩ ba ze sʋ-lwaanʋ. 3 Bɛnzamɛn dwi dɩm ma ni nɩ Yisɩrayɛlɩ dwiə yadonnə yam maama mʋ jeeri Mitspa wʋnɩ. Yisɩrayɛlɩ tiinə bam maama ma bwe ba wɩ: «Kʋ dɛ cwǝŋǝ kɔɔ mʋ yɩ kǝm-lɔŋɔ kʋntʋ tʋŋɩ?» 4 Levi dwi tu wʋlʋ kaanɩ ba na gʋ tɩn ma tʋlɩ o wɩ:«Amʋ dɩdaanɩ a ka-biə kam mʋ beeri dɩ vu dɩ yi Bɛnzamɛn tɩʋ Gibea, yɩ dɩ́ bʋŋɩ sɩ dɩ́ maŋɩ da dɩ́ pəni sɩ tɩga pʋʋrɩ. 5 Tɩtɩɩ nɩ mʋ tɩʋ kʋm nɔɔna bam dɛ amʋ ŋwaanɩ ba ba ba kaagɩ sɔŋɔ kʋlʋ wʋnɩ dɩ́ na tigi da tɩn ba pu. Ba bʋbʋŋɩ dɩm mʋ ya yɩ sɩ ba gʋ amʋ. Ba laan ma zi a ka-biə kam ba lagɩ pa o tɩ. 6 A na maanɩ nɩ nɔɔna bantʋ tiini ba tʋŋɩ chavɩ-tɩtʋŋɩ Yisɩrayɛlɩ tɩʋ kʋm nɩ tɩn ŋwaanɩ mʋ a goni a ka-biə kam yɩra yam, yɩ a laan pɔɔrɩ-ya yɩra yɩra a tʋŋɩ a pa Yisɩrayɛlɩ dwi maama. 7 Kʋntʋ tɩn, abam maama na yɩ Yisɩrayɛlɩ dwi tiinə tɩn, laan ja-na taanɩ dɩm sɩ dɩ́ lwarɩ kʋlʋ dɩ́ na wʋ́ kɩ tɩn.»
8 Yisɩrayɛlɩ tiinə bam maama ma ta dɩdaanɩ kwǝrǝ dɩdʋa ba wɩ: «Dɩbam bá joori dɩ́ sam. Dɩbam wʋnɩ dɩdʋa tɩtɩ bá joori sɔŋɔ. 9 Dɩ́ na wʋ́ kɩ te tɩn mʋ tɩntʋ: Dɩ́ wʋ́ ta jɔrɔ mʋ sɩ dɩ́ lwarɩ balʋ na wʋ́ da yigə ba vu sɩ ba jeeri Gibea tiinə bam dɩ najara tɩn. 10 Yisɩrayɛlɩ dwi dɩm maama wʋnɩ mʋ, dɩ́ wʋ́ kuri nɔɔna fugə sɩ ba nuŋi nɔɔna bi maama wʋnɩ, sɩ nɔɔna bi dɩ nuŋi nɔɔna mʋrʋ maama wʋnɩ, yɩ nɔɔna mʋrʋ nuŋi nɔɔna mʋrrʋ fugə maama wʋnɩ. Bantʋ tɩtʋŋɩ wʋ́ taa maŋɩ sɩ ba beeri wʋdiu mʋ ba pa jar-kərə bam. Kʋntʋ wʋ́ pa jar-kərə bam na yi Gibea, baá wanɩ ba mɔ ba jɩnɩ dɩ nɔn-balwaarʋ tɩm lwarɩm kikiə yam ba na kɩ Yisɩrayɛlɩ tɩʋ kʋm nɩ tɩn.»
11 Nɔɔna bam maama dɛɛn ma kɩ ni dɩdʋa sɩ ba jeeri Gibea tiinə bam sɩ ba waarɩ-ba. 12 Yisɩrayɛlɩ dwi tiinə bam maama ma tʋŋɩ kwǝrǝ ba pa Bɛnzamɛn dwi tiinə na wʋ mɛ maama tɩn wɩ: «Bɛŋwaanɩ mʋ yɩ lɛɛrʋ tɩntʋ kɩ abam tɩtarɩ nɩ? 13 Kʋ daɩ sɩ dɩ́ sɛ lwarɩm tɩtʋŋɩ dɩntʋ doŋ Yisɩrayɛlɩ nɩ. Kʋntʋ tɩn, pa-na sɩ Gibea tɩʋ nɔn-wo-kʋrrʋ tɩm na kɩ tɩtʋŋɩ dɩm kʋntʋ tɩn nuŋi pooni sɩ dɩ́ gʋ-ba.»
Bɛnzamɛn tiinə bam maa wʋ sɛ ba cəgi ba donnǝ Yisɩrayɛlɩ tiinə bam kwǝrǝ kam. 14 Ba ma zɩgɩ ba tɩɩnɩ dɩm maama wʋnɩ ba nuŋi. Ba ta ma vu ba jeeri Gibea nɩ sɩ ba zaŋɩ najara dɩdaanɩ Yisɩrayɛlɩ tiinə badaara bam maama. 15 Dɛ dɩm kʋntʋ nɩ Bɛnzamɛn tiinə bam ma la jar-kərə mʋrrʋ fiinle-tɩrdʋ ba kɩ daanɩ. Nɔɔnʋ maama ma ze o sʋ-lɔŋɔ. Bantʋ ma vu ba wǝli dɩ nɔɔna biə yarpɛ balʋ na maŋɩ ba wʋ Gibea nɩ yɩ ba ye jara-kǝm laŋa tɩn. 16 Bantʋ maama wʋnɩ nɔɔna biə yarpɛ dɛɛn yɩ nɔn-gwe mʋ. Ba maama na dʋlɩ napana ba jeeri yuuyuǝ dɩ, ba bá ga-ka. 17 Sɩ kʋ na yɩ Yisɩrayɛlɩ dwi tiinə balʋ maama na daarɩ tɩn, ba dɛɛn lagɩ jar-kərə mʋrrʋ biə-yana mʋ ba kɩ daanɩ. Ba maama maa ye najara kǝm lanyɩranɩ.
18 Yisɩrayɛlɩ tiinə bam ma vu Betɛlɩ ba jeeri wara-je sɩm nɩ. Ba ma bwe Wɛ ba wɩ: «Dɩbam dwi dɔɔ mʋ wʋ́ tɔgɩ yigə ba jeeri Bɛnzamɛn tiinə bam?» Baŋa-Wɛ ma ləri DƖ wɩ: «Pa-na sɩ Zuda dwi tiinə bam da yigə ba vu ba jeeri-ba.»
19 Tɩga na pʋʋrɩ tɩn, Yisɩrayɛlɩ tiinə bam ma gɔ ba vwə yam ba vu Gibea ba cwi pa ya bwələ dɩdaanɩ tɩʋ kʋm. 20 Ba ta ma nuŋi ba vwə yam nɩ ba vu ba zɩgɩ tɩʋ kʋm yigə nɩ sɩ ba jeeri Bɛnzamɛn tiinə bam dɩdaanɩ najara. 21 Dɛ dɩm kʋntʋ nɩ Bɛnzamɛn tiinə bam dɩ ma nuŋi tɩʋ kʋm nɩ ba jeeri Yisɩrayɛlɩ tiinə jar-kərə bam. Ba ma gʋ Yisɩrayɛlɩ tiinə bam nɔɔna mʋrrʋ fiinle-tɩle (22,000). 22-23 Yisɩrayɛlɩ dwiə yadonnə yam ma kɩ baarɩ da kuri nɩ. Ba ta ma vu wara-je sɩm nɩ yɩ ba keeri taa ba loori Baŋa-Wɛ, sɩ kʋ yi dɩdaan-ni maŋa. Ba maa wɩ: «Dɩ́ daa ta ve dɩ́ jeeri dɩ́ cʋrrʋ Bɛnzamɛn tiinə bam dɩdaanɩ najara na?» Baŋa-Wɛ ma ləri DƖ wɩ: «Ve-na á jeeri-ba dɩ najara.» Ba ma joori ba vu ba fɔgɩ ba zɩgɩ nɩnɛɛnɩ pulim dɛ dɩm nɩ ba na maŋɩ ba kɩ te tɩn.
24 Da yale dɛ dɩm nɩ, ba daa ma vu sɩ ba jeeri Bɛnzamɛn tiinə bam dɩdaanɩ najara. 25 Dɛ dɩm kʋntʋ nɩ, Bɛnzamɛn tiinə bam na nuŋi Gibea tɩʋ kʋm ba zaŋɩ najara dɩ ba. Ba daa ma gʋ nɔɔna mʋrrʋ fugə-nana na ye najara kǝm lanyɩranɩ tɩn.
26 Yisɩrayɛlɩ tiinə bam maama ma joori ba vu Betɛlɩ ba keeri ba loori Baŋa-Wɛ. Ba ya vɔgɩ ni mʋ sɩ kʋ yi dɩdaan-ni maŋa, yɩ ba daarɩ ba kwe zwɛɛm pɛɛra dɩdaanɩ yazurə pɛɛra ba kaanɩ ba pa Baŋa-Wɛ. 27-28 Kantʋ maŋa nɩ, dɩdaanɩ Wɛ ni-gonim daka kam wʋ Betɛlɩ nɩ mʋ. Fineasɩ na yɩ Eleyazaarɩ bu, yɩ o ko-nakwɩ yɩ Arɔn tɩn mʋ tʋŋɩ daka kam tɩtʋŋa o ma zuli Wɛ. Yisɩrayɛlɩ tiinə bam ma bwe Baŋa-Wɛ ba wɩ: «Dɩ́ ve sɩ dɩ́ jeeri dɩ́ cʋrrʋ Bɛnzamɛn tiinə bam dɩ najara, naa dɩ́ yagɩ ba yɩra?» Baŋa-Wɛ ma lǝri-ba DƖ wɩ: «Ve-na, sɩ amʋ jwa wʋ́ pa á di-ba.»
29 Yisɩrayɛlɩ tiinə bam ma joori Gibea tɩʋ, yɩ ba pa nɔɔna badonnǝ səgi ba kaagɩ tɩʋ kʋm maama. 30 Da yatɔ dɛ dɩm nɩ, ba daa ta ma vu ba jeeri Bɛnzamɛn tiinə bam dɩ najara. Ba ve ba zɩgɩ mɛ ba na maŋɩ ba zɩgɩ kuni bɩle maama wʋnɩ tɩn mʋ. 31 Bɛnzamɛn tiinə bam maama ma nuŋi ba daarɩ ba tɩʋ kʋm sɩ ba jeeri-ba. Ba ta ma pa kʋ zʋ Yisɩrayɛlɩ tiinə bam yɩra nɩnɛɛnɩ pulim kam nɩ ba na kɩ te tɩn. Tɩʋ kʋm pwələ kam nɩ mʋ ba gʋ Yisɩrayɛlɩ tiinə bam nɔɔna fiintɔ balʋ na duri ba tɔgɩ cwe sɩlʋ na ve Betɛlɩ dɩdaanɩ Gibea tɩn. 32 Bɛnzamɛn tiinə bam maa tɛ daanɩ wɩ: «Dɩbam daa di tɩga ba yɩra nɩ mʋ nɩnɛɛnɩ pulim kam kʋ na kɩ te tɩn.» Sɩ kʋ na yɩ Yisɩrayɛlɩ tiinə bam, bantʋ maa wɩ: «Pa-na sɩ dɩ́ titwəni nɩnɛɛnɩ dɩ́ wʋra dɩ́ duri mʋ sɩ dɩ́ lu, sɩ dɩ́ wanɩ dɩ́ vaŋɩ-ba dɩ́ ja dɩ́ nuŋi tɩʋ kʋm nɩ dɩ́ yi cwə-farɩ sɩm seeni.»
33 Yisɩrayɛlɩ tiinə bam ma titwəni ba vu ba joori ba kikili Baal-Tamarɩ nɩ ba zɩga. Yisɩrayɛlɩ tiinə balʋ ya na səgi ba kaagɩ Gibea tɩʋ kʋm sɩ kʋ maŋɩ dɩdaanɩ kʋ wa-zʋʋrɩ seeni tɩn ma ba ba nuŋi. 34 Yisɩrayɛlɩ jar-kərə bam wʋnɩ, ba ya kuri nɔɔna mʋrrʋ fugə balʋ na tiini ba ye jara-kǝm lanyɩranɩ tɩn mʋ. Bantʋ ma vu ba yi Gibea ba jeeri Bɛnzamɛn tiinə bam dɩ baarɩ. Najara yam ma ba ya cɛ zanzan. Bɛnzamɛn tiinə bam maa wʋ lwarɩ nɩ ba mʋmwɛ tiim maŋa bwələ. 35 Dɛ dɩm kʋntʋ nɩ, Baŋa-Wɛ pɛ Yisɩrayɛlɩ dwiə yadonnə yam mʋ di Bɛnzamɛn dwi tiinə bam. Ba dɛɛn gʋ Bɛnzamɛn jar-kərə mʋrrʋ fiinle-tɩnu dɩ bi (25,100) mʋ. 36 Bɛnzamɛn tiinə bam ma maanɩ nɩ Yisɩrayɛlɩ tiinə bam di-ba.
Yisɩrayɛlɩ tiinə bam di Bɛnzamɛn tiinə bam
Yisɩrayɛlɩ tiinə bam nan ya titwəni mʋ Bɛnzamɛn tiinə bam yigə nɩ ba joori kwaga, bɛŋwaanɩ, ba tɩɩna yam daŋɩ balʋ ba na pɛ ba səgi ba kaagɩ Gibea tɩʋ kʋm tɩn baŋa nɩ mʋ. 37 Nɔɔna balʋ ya na səgi tɩn yɔɔrɩ ba vɔɔrɩ ba zaŋɩ mʋ ba duri ba zʋ Gibea tɩʋ kʋm nɩ, yɩ ba laan jagɩ tɩʋ kʋm je maama nɩ ba gʋ wʋlʋ maama na zʋʋrɩ kʋ wʋnɩ tɩn. 38 Yisɩrayɛlɩ jar-kərə balʋ na daarɩ tɩn nan ya kɩ ni-mɔrɔ dɩ balʋ na səgi tɩn mʋ dɩ mɩmaŋɩ dɩntʋ, nɩ ba na zʋ da sɩ ba zwɛ-kʋ sɩ nyʋa zaŋɩ wɛɛnɩ tagɩ-tagɩ. 39 Kʋntʋ maa na kɩa, Yisɩrayɛlɩ tiinə bam wʋ́ pipiri sɩ ba jeeri Bɛnzamɛn tiinə bam dɩ najara yam. Kantʋ maŋa kam nɩ, dɩdaanɩ Bɛnzamɛn tiinə bam ya gʋ Yisɩrayɛlɩ tiinə bam nɔɔna fiintɔ mʋ. Ba maa tɛ daanɩ ba wɩ: «Ɛhɛɛ! Dɩ́ daa wʋra dɩ́ di Yisɩrayɛlɩ tiinə bam nɩnɛɛnɩ pulim kam nɩ kʋ na kɩ te tɩn.»
40 Nyʋa dɛɛn ma puli sɩ ka nuŋi tɩʋ kʋm nɩ ka zaŋa tagɩ-tagɩ ka maa diini wɛ. Bɛnzamɛn tiinə bam ma pipiri ba na nɩ nyʋa mʋ zaŋɩ ba tɩʋ kʋm maama wʋnɩ. 41 Yisɩrayɛlɩ tiinə bam ma pipiri ba dɩ jeeri-ba dɩ najara yam. Bɛnzamɛn tiinə bam wʋbʋŋa ma je, bɛŋwaanɩ ba lwarɩ nɩ cɔgɩm mʋ yi-ba. 42 Ba ma kwaanɩ sɩ ba duri ba lu Yisɩrayɛlɩ tiinə bam, yɩ ba kwe kagʋa cwǝŋǝ kam ba durǝ. Yisɩrayɛlɩ tiinə bam maa wʋ pɛ-ba cwǝŋǝ sɩ ba lu. Ba badonnǝ ma nuŋi ba tɩɩnɩ dɩm nɩ ba kɩ Bɛnzamɛn tiinə bam ba tɩtarɩ nɩ, yɩ ba laan gʋ-ba. 43 Ba na kɩ-ba tɩtarɩ nɩ kʋntʋ tɩn, Yisɩrayɛlɩ jar-kərə bam ta zəli Bɛnzamɛn tiinə bam kʋntʋ mʋ ba kɛ ba vu Gibea wa-puli seeni, yɩ ba yɔɔrɩ ba gʋɩ-ba cwǝŋǝ kam yuu nɩ. 44 Bɛnzamɛn tiinə jar-kərə balʋ na ye najara laŋa lanyɩranɩ tɩn mʋrrʋ fugə-nana (18 000) mʋ tɩga. 45 Bɛnzamɛn jar-kərə badonnǝ ma duri ba yɔɔrɩ kagʋa kam seeni sɩ ba kwaanɩ ba vu ba yi Rimɔn piu kʋm. Yisɩrayɛlɩ tiinə bam na zəli-ba tɩn, ba ma gʋ nɔɔna mʋrrʋ tɩnu (5 000) cwǝŋǝ kam yuu nɩ. Ba ta ma zəli-ba taa ba vu ba yi Gidom tɩʋ, yɩ ba gʋ Bɛnzamɛn jar-kərə mʋrrʋ tɩle (2 000) ba wǝli da.
46 Kʋ kweelim nɩ tɩn Bɛnzamɛn jar-kərə bam mʋrrʋ fiinle-tɩnu (25 000) na yɩ najara pamaŋ-bɩbɛ tɩn maama mʋ tɩga dɛ dɩm kʋntʋ nɩ. 47 Ba nɔɔna biə-yardʋ (600) ma wanɩ ba duri ba yi Rimɔn piu kʋm yɩ ba lu. Bantʋ maŋɩ je sɩm kʋntʋ nɩ mʋ canɩ sɩna. 48 Yisɩrayɛlɩ tiinə bam laan maa na joori najara yam wʋnɩ tɩn, ba ma vu ba zʋ Bɛnzamɛn tiinə tɩɩnɩ dɩm maama wʋnɩ, yɩ ba gʋ nɔɔna balʋ maama na zʋʋrɩ dɩ wʋnɩ tɩn. Ba ta gʋ tɩɩnɩ dɩm vara dɩ kʋlʋ maama ba na nɛ tɩn mʋ, yɩ ba daarɩ ba zwɛ-dɩ.