Levi dwi tu dɩ o kaanɩ taanɩ
19
Kantʋ maŋa kam nɩ, pɛ dɛɛn ta tǝrǝ Yisɩrayɛlɩ lʋgʋ kʋm wʋnɩ. Levi dwi tu wʋdoŋ maa wʋra. O maa zʋʋrɩ Efrayim pweeru laŋa kam nɩ, mɛ na yɩ yigə yigə dɩ sam tɩn. Levi tu wʋm ma vu Zuda tɩʋ Betelɩhɛm o di kaanɩ o ja vu sɔŋɔ sɩ o taa yɩ o ka-biə. 2 O ka-biə kam maa ba jɩgɩ cɩga dɩd-o, yɩ o joori o ko sɔŋɔ na wʋ Betelɩhɛm nɩ tɩn o zʋʋrɩ da canɩ sɩna. 3 Kan-barʋ wʋm ma ja wʋbʋŋa sɩ o vu o ŋɔɔnɩ dɩ o kaanɩ wʋm sɩ o ja-o o joori o te. O ma ja o tɩntʋŋnʋ dɩdaanɩ o bɩnɛ sɩle o wǝli da o vu. Kaanɩ wʋm ma pa o zʋ o ko te yɩ o ko dɩ jeer-o dɩ wʋpolo. 4 kan-ko wʋm ma fɩ‑o pa o maŋɩ da o pəni da yatɔ. Ba maama ma di yɩ ba nyɔa daanɩ.5 Da yana dɛ dɩm nɩ, Levi tu wʋm ma zaŋɩ zɩzɩŋa nɩ sɩ o viiri. Kan-ko wʋm ma ta dɩd-o o wɩ: «Saarɩ n ni, sɩ n na dam n viiri.» 6 Baara bam kʋntʋ bale ma maŋɩ da ba di yɩ ba nyɔ daanɩ. Kaanɩ wʋm ko ma ta Levi tu wʋm o wɩ: «Ta maŋɩ yo seeni n pəni, sɩ n di ywəəni.» 7 Levi tu wʋm ta ma kwaanɩ sɩ o viiri. Kan-ko wʋm daa ta ma fɩ‑o pa o maŋɩ da o pəni.
8 Da yanu dɛ dɩm nɩ, baarʋ wʋm ma zaŋɩ zɩzɩŋa nɩ o bwǝli cwǝŋǝ sɩ o kɛ. Kan-ko wʋm daa ma ta o wɩ: «Cəgi sɩ n saarɩ n ni, sɩ wɩa maŋa nɩ nmʋ laan wʋ́ wanɩ n viiri.» Bantʋ bale daa ma di daanɩ. 9 Nɔɔnʋ wʋm dɩdaanɩ o ka-biə kam dɩ o tɩntʋŋnʋ wʋm daa ma zaŋɩ sɩ ba viiri. O tɩmbaarʋ wʋm daa ma joori o ta o wɩ: «Kʋ gɛ fɩɩn mʋ sɩ tɩga yi. Daa n ta pəni yo sɩ n di ywəəni, sɩ wɛ dɩm tʋ mʋ kʋntʋ. Tɩ-pʋra maŋa nɩ abam wʋ́ wanɩ á goni tɩga á zaŋɩ á kɛ.» 10 Baarʋ wʋm daa maa wʋ sɛ sɩ o pəni tɩtɩɩ dɩm kʋntʋ nɩ. O ma ja o ka-biə kam dɩdaanɩ bɩnɛ sɩle sɩm, yɩ o kwe cwǝŋǝ o laan vu o yi Yebusi tiinə tɩʋ kʋm na yɩ Zeruzalɛm tɩn.
11 Ba na twɛ Yebusi tɩn, dɩdaanɩ tɩga kam wʋra ka yi mʋ. Levi tu wʋm tɩntʋŋnʋ ma ta o wɩ: «Pa dɩ́ ywəri Yebusi tiinə bam tee nɩ dɩ́ pəni sɩ tɩga na pʋʋrɩ, sɩ dɩ́ laan viiri.» 12 Levi tu wʋm ma lǝr-o o wɩ: «Dɩbam bá vu dɩ́ zʋ vərə tɩʋ mɛ na daɩ Yisɩrayɛlɩ dwi tiinə na zʋʋrɩ tɩn. Dɩ́ wʋ́ fʋfɔ dɩ́ kɛ dɩ́ yi tɩʋ kʋdoŋ mʋ.» 13 O ta ma ta o tɩntʋŋnʋ wʋm o wɩ: «Kwaanɩ sɩ dɩ́ vu dɩ́ yi Gibea naa Rama tɩʋ sɩ dɩ́ pəni da.»
14 Ba ma gaalɩ Yebusi ba kɛ. Ba ma vu ba yi Gibea, dɩ wɛ zʋ mʋ. Je sɩm kʋntʋ wʋ Bɛnzamɛn laŋa kam nɩ mʋ. 15 Ba ma ywəri daanɩ sɩ ba pəni. Ba ma vu ba je tɩʋ kʋm lara je sɩm nɩ. Nɔɔn-nɔɔnʋ maa wʋ tu ba te sɩ o ja-ba o ja o vu o sɔŋɔ sɩ ba pəni.
16 Ba na wʋra tɩn mʋ nankwɩan wʋdoŋ dɛɛn nuŋi o kara o tɔgɩ da o maa joori sɔŋɔ. Wʋntʋ dɛɛn zʋʋrɩ Gibea nɩ yɩ o ya nuŋi Efrayim pweeru laŋa kam nɩ mʋ. O daɩ Bɛnzamɛn dwi tu nɩnɛɛnɩ tɩʋ kʋm tiinə na yɩ te tɩn. 17 Nankwɩan kam ma maanɩ nɩ: cwə-vəlu mʋ je tɩʋ kʋm lara je sɩm nɩ. O ma bwe‑o o wɩ: «Nmʋ nuŋi yən mʋ n ba n je yo seeni, yɩ n nan ma n ve yən mʋ?»
18 Levi tu wʋm ma lǝr-o o wɩ: «Dɩbam zɩgɩ Zuda tɩʋ Betelɩhɛm nɩ mʋ dɩ́ maa joori sɔŋɔ. A sɔŋɔ kʋm wʋ Efrayim pweeru laŋa kam na yɩ yigə yigə dɩ sam tɩn mʋ. Nɔɔn-nɔɔnʋ nan wʋ tu o ja dɩbam o vu o sɔŋɔ sɩ dɩ́ pəni dɩ́ pʋʋrɩ tɩga. 19 Dɩbam nan jɩgɩ dɩ́ vara bam wʋdiu. Wʋdiu dɩ sana maa wʋra sɩ amʋ dɩ a kaanɩ wʋm dɩdaanɩ a tɩntʋŋnʋ wʋm di. Dɩ́ jɩgɩ kʋlʋ maama dɩ́ na lagɩ tɩn.»
20 Nankwɩan kam ma ləri o wɩ: «Wɛ wʋ́ pa abam yazurə. Á ba amʋ te, sɩ a nii á baŋa nɩ. Yɩ maŋɩ-na pwələ kantʋ nɩ á pəni.» 21 O ma ja-ba o vu sɔŋɔ, yɩ o pa ba bɩnɛ sɩm wʋdiu. O vərə bam ma zarɩ ba nɛ, yɩ ba jǝni sɩ ba di wʋdiu.
22 Ba na wʋra ba di ywəəni kʋntʋ tɩn, mʋ tɩʋ kʋm nɔn-wo-kʋrrʋ tɩdonnǝ tuǝ ba kaagɩ sɔŋɔ kʋm ba pu yɩ ba dwanɩ kʋ boro kʋm. Ba ma ta nankwɩan kam ba wɩ: «Pa vəru wʋm na tu o wʋ n tee nɩ tɩn nuŋi o ba yo seeni, sɩ dɩbam lagɩ sɩ dɩ́ lagɩ‑o mʋ!»
23 Nankwɩan kam ma nuŋi o vu ba te, yɩ o ta dɩ ba o wɩ: «A badonnǝ bam, yɩ kɩ-na lwarɩm dɩm kʋntʋ, sɩ kʋ wʋ maŋɩ! Yɩ swe-na nɩ nɔɔnʋ wʋm yɩ amʋ vəru mʋ. 24 Nii-na amʋ bukɔ mʋ tɩntʋ! O ta yǝri baara. Vəru wʋm dɩ maa ve dɩ o ka-biə mʋ. A wʋ́ ja bantʋ a ba a pa abam sɩ á kɩ-ba á na lagɩ te tɩn. Sɩ kʋ na yɩ nɔɔnʋ wʋntʋ, yɩ kɩ-na tɩtʋŋ-lɔŋɔ kʋm kʋntʋ o yuu nɩ, sɩ kʋ tiini kʋ jɩgɩ cavɩɩra mʋ.» 25 Tɩʋ kʋm nɔɔna bam maa wʋ sɛ. Levi tu wʋm ma fɩn o yigi o ka-biə kam o pa o nuŋi o vu ba te. Ba ma zi‑o ba lagɩ tɩtɩɩ dɩm kʋntʋ maama taa sɩ kʋ taa nii tɩ-pʋra. Tɩga na pʋʋrɩ tɩn mʋ ba yag-o.
26 Tɩga na jɩgɩ ka pʋʋrɩ tɩn, mʋ kaanɩ wʋm kwaanɩ o vu o tʋ o tigi nankwɩan kam digə ni nɩ, mɛ o barʋ wʋm dɛɛn na tigi da tɩn. Wɛ puli mʋ yɩ o ta maŋɩ da o tigə. 27 Tɩga kam na pʋʋrɩ pa Levi tu wʋm pʋrɩ digə kam ni sɩ o nuŋi tɩn, mʋ o nɛ nɩ o ka-biə kam tigi digə kam ni nɩ, yɩ o kwaanɩ sɩ o ja ka ni dɩm. 28 Nɔɔnʋ wʋm ma ta o ka-biə kam o wɩ: «Zaŋɩ sɩ dɩ́ viiri.» Kaanɩ wʋm maa wʋ ləri. O ma ja‑o o daŋɩ o bɩnaga baŋa nɩ, yɩ o kwe cwǝŋǝ o maa viirǝ.
29 O na yi sɔŋɔ tɩn, mʋ o zʋ digə o lagɩ sʋgʋ o ma o goni o ka-biə yɩra yam kuni fugə-bɩle. O ma pɔɔrɩ pɔɔrɩ kaanɩ wʋm yɩra yam o tʋŋɩ o pa Yisɩrayɛlɩ dwiə fugə-yale yam maama. 30 Wʋlʋ maama dɛɛn na nɛ kǝm dɩm kʋntʋ tɩn maa wɩ: «Kǝm dɩntʋ doŋ ta wʋ fɔgɩ dɩ kɩ sɩ dɩ́ na. Kʋ na zɩgɩ maŋa kalʋ Yisɩrayɛlɩ tiinə bam na nuŋi Ezipi nɩ tɩn, sɩ kʋ yi zɩm maama, dɩ́ ta wʋ ni tɩntʋ! Bwɛ-na sɩ dɩ́ nii dɩ́ wʋ́ kɩ tɩta mʋ!»