Dan tiinə ve ba wʋ Layisi nɩ
18
Wǝǝnu tɩntʋ maama dɛɛn na jɩgɩ tɩ kɩ tɩn, Yisɩrayɛlɩ tiinə bam ya ta ba jɩgɩ pɛ. Ka maŋa nɩ, Dan dwi tiinə bam ma kaagɩ ba beeri tɩga sɩ ba taa zʋʋrɩ ka wʋnɩ. Bɛŋwaanɩ, tɩga kalʋ Yisɩrayɛlɩ tiinə bam na pɔɔrɩ ba pa daanɩ tɩn, Dan tiinə bam ya ta wʋ nɛ ba tɩtɩ laŋa ka wʋnɩ. 2 Dan tiinə bam ma lɩ ba dwi dɩm wʋ nɔn-babɛ sɩnu ba na nuŋi sɔ-yuu maama wʋnɩ tɩn. Ba ma zɩgɩ Zʋra dɩdaanɩ Esatola nɩ ba tʋŋɩ-ba ba wɩ: «Ve-na á kaagɩ tɩga kam, sɩ á daarɩ á ŋɔ á nii ka maama na yɩ te tɩn.» Ba dɛɛn ma kaagɩ taan ba vu ba yi Efrayim pweeru laŋa kam. Ba ma vu Mika sɔŋɔ ba zʋ ba pəni daanɩ.3 Ba na wʋ Mika sɔŋɔ nɩ tɩn, mʋ ba maanɩ Levi dwi tu wʋlʋ na zʋʋrɩ da tɩn kwər-taŋa ba lwarɩ. Ba ma yi o te ba bwe‑o ba wɩ: «Wɔɔ mʋ jaanɩ‑m o ba yo seeni? Nmʋ wʋ yo n kɩ bɛɛ mʋ?» 4 O dɩ ma lǝri-ba o wɩ: «Amʋ dɩdaanɩ Mika mʋ maŋɩ daanɩ, o nan kɩ-nɩ lanyɩranɩ, yɩ o ta ŋwɩ-nɩ pa a lɛɛrɩ a yɩ o kaanɩm tu.»
5 Ba ma ta ba wɩ: «Nan loori Wɛ n pa dɩbam sɩ dɩ́ lwarɩ dɩ́ cwǝŋǝ kam wʋ́ ja ywəəni ka ba ka pa dɩbam, naa ka bá ja ka ba.» 6 Kaanɩm tu wʋm ma lǝri-ba o wɩ: «Yɩ pa-na sɩ á bɩcara taa maga, sɩ Baŋa-Wɛ yigə wʋra á cwǝŋǝ kam wʋnɩ.»
7 Nɔn-babɛ sɩnu sɩm ma nuŋi dáanɩ ba tʋ cwǝŋǝ nɩ ba maa kɛa. Ba ma vu ba yi Layisi. Tɩʋ kʋm nɔɔna bam zʋʋrɩ yalɩm mʋ daanɩ, yɩ fʋʋnɩ ba jɩgɩ-ba nɩnɛɛnɩ Sidɔn tiinə bam te tɩn. Woŋo maama tiini kʋ yi-ba, yɩ ba jɩjɩgɩrʋ gaalɩ. Ba ya zʋʋrɩ da dɩ ywəəni mʋ dɩ wʋ-zuru. Ba tɩʋ kʋm maa yɩ yigə yigə dɩdaanɩ Sidɔn tiinə bam. Ba maa ba tʋŋa dɩdaanɩ nɔɔna badonnǝ.
8 Nɔn-babɛ sɩnu sɩm ma joori Zʋra dɩdaanɩ Esatola nɩ. Ba dwi tiinə bam ma bwe ba kwaga. 9 Ba dɩ ma lǝri-ba ba wɩ: «Pa-na sɩ dɩ́ vu dɩ́ jeeri Layisi tiinə bam dɩ najara. Bɛŋwaanɩ, dɩbam na ve dɩ́ na tɩga kam tɩn, ka lamma lanyɩranɩ. Yɩ taá je-na yo seeni á cɔga. Zʋ-na á joŋi ba tɩga kam á taá te. 10 Abam na yi ba tɩʋ kʋm, á wʋ́ na nɩ je sɩm daga zanzan. Nɔɔna bam maa zʋʋrɩ da yalɩm, yɩ woŋo maama tiini kʋ yi-ba. Baŋa-Wɛ dɩ ma kwe tɩga kam DƖ kɩ á jɩŋa nɩ sɩ á taá te.»
11 Dan dwi tiinə bam nɔɔna biə-yardʋ ma zɩgɩ Zʋra dɩdaanɩ Esatola nɩ ba nuŋi dɩ ba jara-kǝm zɩla sɩ ba vu ba jeeri-ba. 12 Ba ma vu ba twɛ Kiriaf-Jeerim na wʋ Zuda laŋa kam nɩ tɩn ba cwi ba vwə da. Je sɩm wʋ Kiriaf-Jeerim wa-puli seeni mʋ. Dɩ zɩm maama ba ta bǝi je sɩm yɩrɩ wɩ: ‹Mahanɛ-Dan›. a 13 Ba ma zɩgɩ daanɩ ba vu Efrayim pweeru laŋa kam nɩ ba vu ba yi Mika sɔŋɔ kʋm.
14 Nɔn-babɛ sɩnu sɩm ya na ve ba ŋɔ ba nii Layisi tɩn ma ta dɩ ba donnǝ bam ba wɩ: «Abam ye nɩ sam dɩntʋ dɩdʋa wʋnɩ jwəm wʋra ba na gɔgɩrɩ dɩ səbu-poŋo na? Kaanɩm gwar-wʋgʋ, dɩ jwǝnǝ yadonnə dɩ maa wʋra. Jeeli-na á nii á na wʋ́ kɩ te dɩdaanɩ tɩntʋ maama tɩn.» 15 Ba ma ywəri ba zʋ Mika sɔŋɔ, ba vu Levi dwi tu nɔn-dʋŋʋ kʋm te, yɩ ba bwe o kwaga. 16 Dan tiinə jar-kərə biə-yardʋ yam dɛɛn ma cɩ manco-pɩɩna yam ni ba zɩga. 17 Nɔn-babɛ sɩnu sɩm ma zʋ sɔŋɔ kʋm wʋnɩ ba kwe jwəm dɩlʋ na gɔgɩrɩ tɩn, dɩdaanɩ kaanɩm gwar-wʋgʋ kʋm, kʋ wǝli dɩdaanɩ jwǝnǝ yadonnə yam maama. Kaanɩm tu wʋm ma maŋɩ manco-pɩɩna yam nɩ dɩdaanɩ jar-kərə biə-yardʋ yam.
18 Nɔɔna banu bam na zʋ Mika sɔŋɔ kʋm wʋnɩ ba kwe jwəm dɩlʋ na gɔgɩrɩ tɩn, dɩdaanɩ kaanɩm tu gɔrɔ kʋm dɩdaanɩ o jwǝnǝ yadonnə yam tɩn, kaanɩm tu wʋm ma bwe-ba o wɩ: «Bɛɛ mʋ kʋntʋ abam wʋra á kɩ?» 19 Ba ma lǝr-o ba wɩ: «Daa n yɩ joori n puri n ni. Ta n tɔgɩ dɩbam, sɩ n ji dɩ́ ko dɩdaanɩ dɩbam kaanɩm tu. Nmʋ na tu n ji kaanɩm tu n pa Yisɩrayɛlɩ dwi dɩm sɔ-yuu kʋdoŋ ba garɩ n na yɩ nɔɔnʋ dɩdʋa dɩdaanɩ o sɔŋɔ tiinə yɩranɩ kaanɩm tu na?» 20 Kaanɩm tu wʋm ma sɛ ba taanɩ dɩm. O ma kwe kaanɩm tu gɔrɔ kʋm dɩdaanɩ jwǝnǝ yam maama, yɩ o laan pɛ ba kwaga o pu sɩ ba kɛ. 21 Ba maama ma tʋ cwǝŋǝ nɩ ba maa kɛa, yɩ ba biə bam, dɩ ba vara, dɩdaanɩ ba zɩla wʋ yigə nɩ.
22 Dan nɔɔna bam na kɛ ba yi yigə fɩɩn tɩn, mʋ Mika bəŋi o dɩdaanɩ balʋ na zʋʋrɩ daanɩ tɩn o kɩ daanɩ. Ba ma zəli Dan tiinə bam ba ja. 23 Ba ma coosi ba bəŋi Dan tiinə bam, yɩ ba dɩ ləri ba bwe Mika ba wɩ: «Bɛɛ mʋ kɩ yɩ nmʋ pɛ nɔn-kɔgɔ kʋntʋ n kɩ n kwaga nɩ?»
24 Mika maa wɩ: «Abam kwe amʋ jwǝnǝ yalʋ a na kɩ tɩn, dɩdaanɩ a kaanɩm tu wʋm mʋ á ja á viiri. Bɛɛ mʋ yɩ á daa ta jɩgɩ ni sɩ á bwe-nɩ á wɩ: ‹Bɛɛ mʋ kɩa?› Bɛɛ mʋ abam daa daarɩ á pa-nɩ?»
25 Dan tiinə bam ma ləri Mika taanɩ dɩm ba wɩ: «Yɩ ta n ŋʋʋsa! Nmʋ na lagɩ n tɩtɩ, daa n yɩ joori n puri n ni. Kʋ na daɩ kʋntʋ, ban-lʋm tiinə na wʋ dɩ́ tɩtarɩ nɩ tɩn wʋ́ yi‑m, sɩ n dɩdaanɩ n sɔŋɔ tiinə bam maama ga á ŋwɩa.» 26 Dan tiinə bam ma kwe cwǝŋǝ ba maa kɛa. Mika ma na nɩ ba tiini ba damma ba dwe‑o. O dɩ ma joori sɔŋɔ.
27 Dan tiinə bam dɛɛn ma kwe Mika na kɩ wǝǝnu tɩlʋ tɩn, dɩdaanɩ o kaanɩm tu wʋm yɩ ba laan vu ba yi Layisi. Tɩʋ kʋm nɔɔna ya zʋʋrɩ daanɩ yalɩm mʋ, yɩ kʋlʋkʋlʋ ba daanɩ-ba. Dan tiinə bam ma gʋ ba maama yɩ ba daarɩ ba zwɛ ba tɩʋ kʋm maama. 28 Joŋnu maa tǝrǝ sɩ o wǝli-ba, bɛŋwaanɩ je sɩm kʋntʋ dwara mʋ dɩdaanɩ Sidɔn tɩʋ kʋm. Ba maa ba tʋŋɩ dɩdaanɩ nɔɔna badonnǝ. Tɩʋ kʋm kʋntʋ wʋ bolo nɩ mʋ, yɩ kʋ bwələ dɩ Bɛtɩ-Rehobɩ.
Dan tiinə bam dɛɛn ma joori ba lɔ tɩʋ kʋm kʋntʋ ba zɩgɩ, yɩ ba lɛɛrɩ ba zʋʋrɩ kʋ wʋnɩ. 29 Ba ma ləni tɩʋ kʋm yɩrɩ ba bǝi nɩ ‹Dan›. Ba kwe ba nabaarʋ Yisɩrayɛlɩ bu Dan yɩrɩ dɩm mʋ ba ma bəŋi tɩʋ kʋm. Pulim nɩ tɩn, tɩʋ kʋm yɩrɩ nan ya yɩ Layisi mʋ. 30 Dan tiinə bam ma kwe Mika jwəm dɩm ba zɩgɩ da, yɩ ba jɩgɩ-dɩ ba kaana. Geresom bu Zonatan mʋ jigi ba kaanɩm tu. O yɩ Moyisi naa mʋ. Zonatan dwi tiinə maa yɩ ba kaanɩm tiinə sɩ kʋ yi maŋa kalʋ Yisɩrayɛlɩ tiinə dʋna bam na zəli-ba yɩ ba daarɩ ba te tɩga kam tɩn. 31 Dan tiinə bam dɛɛn yǝni ba kaanɩ Mika jwəm dɩm, maŋa kalʋ maama Wɛ digə kam na wʋ Siloo tɩʋ nɩ tɩn mʋ.