Mika na jɩgɩ jwǝnǝ yalʋ tɩn
17
Nɔɔnʋ wʋdoŋ dɛɛn zʋʋrɩ Efrayim pweeru laŋa kam nɩ, o yɩrɩ maa yɩ Mika. 2 O ma ta dɩ o nu o wɩ: «Nmʋ səbu-poŋo səbu-dala biə fugə-dɩdʋa na je tɩn, a ni n na sɔɔlɩ n yagɩ wʋlʋ na ŋɔgɩ-kʋ tɩn yuu nɩ. Amʋ ya mʋ ŋɔgɩ-kʋ a kwe. Nan nii n səbu kʋm a joori a jɩgɩ a bɩɩnɩ sɩ a pa‑m.» O nu wʋm ma ləri o wɩ: «Amʋ bu, Baŋa-Wɛ wʋ́ kɩ nmʋ yu-yoŋo.»3 Mika ma kwe səbu kʋm o pa o nu. O dɩ ma ləri o wɩ: «A joŋi səbu kʋm a bu wʋm jɩŋa nɩ yɩ a joori a kwe-kʋ a pa Baŋa-Wɛ mʋ a bu wʋm ŋwaanɩ. A lagɩ sɩ ba ma-kʋ ba ma kɩ jwəm nyɩnyʋgʋ, yɩ ba daarɩ ba ma səbu-poŋo ba kwǝli kʋ maama.» 4 Mika na kwe-kʋ o pa o nu tɩn, o nu wʋm ma lɩ səbu-dala biə-yale o pa gɔgɔ, pa o ma o kɩ jwəm, yɩ o daarɩ o ma səbu-poŋo o taagɩ-dɩ o pa‑o. Ba ma pa dɩ zɩgɩ Mika sɔŋɔ nɩ.
5 Mika dɛɛn ya kwɛ digə mʋ o sɔŋɔ kʋm nɩ sɩ ka taa yɩ wara-je. O ma kɩ o jwǝnǝ dɩ kaanɩm gwar-wʋgʋ o zɩgɩ da, yɩ o daarɩ o kuri o biə bam dɩdʋa sɩ o taa yɩ kaanɩm tu o pa‑o.a 6 Kantʋ maŋa nɩ, Pɛ ta tǝri Yisɩrayɛlɩ lʋgʋ kʋm wʋnɩ, nɔɔnʋ maama maa kɩ o wʋbʋŋa na lagɩ te tɩn.
7 Nɔn-dʋŋʋ dɩdʋa dɩ dɛɛn wʋra. O maa yɩ Levi dwi tu yɩ o zʋʋrɩ Betelɩhɛm na wʋ Zuda laŋa kam wʋnɩ tɩn. 8 Nɔɔnʋ wʋm ma nuŋi da Betelɩhɛm nɩ sɩ o beeri je-gaa o zʋ o taa tʋŋɩ o tɩtʋŋa. O ma beeri o yi Mika sɔŋɔ na wʋ Efrayim pweeru laŋa kam nɩ tɩn. 9 Mika ma bwe nɔɔnʋ wʋm o wɩ: «Nmʋ nuŋi yən nɩ mʋ?» O dɩ ma ləri o wɩ: «Amʋ yɩ Levi tu mʋ, yɩ a laan zʋʋrɩ Betelɩhɛm na wʋ Zuda nɩ tɩn. A nan kaagɩ a beeri mɛ a na wʋ́ taa zʋʋrɩ yɩ a na tɩtʋŋa tɩn mʋ.»
10 Mika laan ma ta o wɩ: «Nan ta n zʋʋrɩ yo seeni. Nmʋ laan wʋ́ ta n brɩ-nɩ cwe yɩ n daarɩ n kaanɩ n pa-nɩ. Bɩnɩ maama wʋnɩ, amʋ wʋ́ pa‑m səbu-poŋo səbu-dala fugə, dɩdaanɩ gwaarʋ, yɩ a ta pa‑m n ni-wʋdiu.» 11 Levi dwi tu wʋm ma sɛ yɩ o lɛɛrɩ o zʋʋrɩ Mika sɔŋɔ nɩ. Mika dɩ ma joŋ-o nɩnɛɛnɩ o bu te. 12 O ma lɩ-o o zɩgɩ pa o yɩ kaanɩm tu o pa‑o. Nɔɔnʋ wʋm dɩ ma lɛɛrɩ o maŋɩ Mika sɔŋɔ nɩ. 13 Mika ma ta o wɩ: «Amʋ ye nɩ Baŋa-Wɛ laan wʋ́ kɩ-nɩ lanyɩranɩ, a na jɩgɩ Levi dwi tu a sɔŋɔ nɩ pa o yɩ a kaanɩm tu tɩn ŋwaanɩ.»