Samson dɩdaanɩ Delila taanɩ
16
Dɛ dɩdwɩ mʋ Samson dɛɛn zaŋɩ o vu Gaza tɩʋ o na ka-tʋla. O ma zʋ o pəni dɩd-o. 2 Ba ma ta Gaza tiinə bam ba wɩ: «Samson wʋ yo seeni mʋ!» Ba dɩ ma vu o na wʋ mɛ tɩn, yɩ ba kaagɩ-kʋ ba pu. Tɩtɩɩ dɩm kʋntʋ nɩ ba ma cəgi tɩʋ kʋm manco-pɩɩna yam nɩ. Ba maa tigi ba siə yɩ ba wɩ: «Dɩ́ wʋ́ goni tɩga zɩzɩnzɩŋa mʋ dɩ́ vu dɩ́ li‑o dɩ́ gʋ.»3 Samson ma tigi o cəgi tɩtɩɩ kʋnkʋrʋ maŋa. Tɩga na kwɩɩrɩ tɩn, mʋ o ve o vaŋɩ tɩʋ kʋm manco-pɩʋ kʋm o guri. Dɛ sɩlʋ na mʋʋrɩ tɩga nɩ tɩn, dɩ boro kʋlʋ ba na maɩ ba pɩ tɩʋ kʋm ni tɩn, dɩ kʋ bəŋə kam maama mʋ o vaŋɩ o lɩ. O ma kwe-tɩ o daŋɩ o bakalɩ baŋa nɩ o ja o din o tiŋi piu kʋlʋ na tʋlɩ kʋ naɩ Ebrɔn tɩn yuu nɩ.
4 Kʋntʋ na kɩ kʋ kɛ tɩn, mʋ Samson daa nɛ kaanɩ wʋdoŋ, o na zʋʋrɩ Sorɛkɩ bolo nɩ. Kaanɩ wʋm yɩrɩ mʋ yɩ Delila. Samson wʋbʋŋa ma zʋ o wʋnɩ. 5 Filisi tɩɩnɩ yuutiinə bam ma vu kaanɩ wʋm te ba ta ba wɩ: «Kwaanɩ n sʋg-o sɩ n lwarɩ o dam-fɔrɔ kʋm na nuŋi mɛ tɩn, sɩ dɩ́ lwarɩ dɩ́ na wʋ́ kɩ te dɩ́ ja-o dɩ́ vɔ mwalɩ mwalɩ tɩn. Sɩ dɩbam dɩdʋa dɩdʋa wʋ́ ŋwɩ‑m səbu-poŋo səbu-dala biə fugə-dɩdʋa (1100) kʋ ŋwaanɩ.»
6 Delila ma da kʋ ŋwaanɩ o bwe Samson o wɩ: «A loori-m! Ta n brɩ-nɩ nmʋ dam-fɔrɔ kʋm na nuŋi mɛ tɩn. Bɛ tɩtɩ mʋ ba nan wʋ́ ma ba vɔ nmʋ sɩ ba wanɩ-m?» 7 Samson ma lǝr-o o wɩ: «Ba na kwe taŋa ŋʋn-dʋnnʋ tɩrpɛ tɩlʋ ta na wʋ kʋgɩ tɩn ba ma vɔ-nɩ, amʋ wʋ́ taa bwǝnǝ mʋ ywalɩ-ywalɩ nɩnɛɛnɩ nɔɔna maama na yɩ te tɩn.»
8 Filisi yuutiinə bam ma beeri taŋa ŋʋn-dʋnnʋ tɩrpɛ ta na wʋ kʋgɩ tɩn, ba ja ba vu ba pa kaanɩ wʋm, yɩ o ma-sɩ o vɔ Samson. 9 Delila nan ya pɛ nɔɔna badonnǝ mʋ dalɩ digə kadoŋ nɩ yɩ ba cǝgǝ. O ma kaasɩ o bəŋi Samson o wɩ: «Samson! Filisi tiinə bam bɩɩnɩ sɩ ba ja‑m yoo!» Samson ma pɛ o zaŋɩ o vaŋɩ taŋa ŋʋnɩ sɩm o kɔ lɩla nɩnɛɛnɩ gar-ŋʋna na dwe mim yɩ ka di te tɩn. Ba maa wʋ wanɩ ba lwarɩ o dam-fɔrɔ kʋm na zɩgɩ mɛ tɩn.
10 Delila daa ma ta dɩd-o o wɩ: «Nmʋ na ganɩ-nɩ kʋntʋ tɩn, a maanɩ nɩ n jɩgɩ-nɩ mʋ n mwana. Popo! Ta n brɩ-nɩ nɔɔna na wʋ́ kɩ te ba ja‑m tɩn.» 11 Samson ma ta dɩd-o o wɩ: «Ba na mɛ ŋʋn-dwɩ sɩlʋ ba ta na wʋ mɛ ba kɩ kʋlʋkʋlʋ tɩn ba ma ba vɔ-nɩ, a laan wʋ́ taa bwǝnǝ mʋ nɩnɛɛnɩ nɔɔna maama na yɩ te tɩn.»
12 Delila ma beeri ŋʋn-dwɩ o ma o vɔ‑o. O daa ta ma pa nɔɔna bam dalɩ digə kam nɩ ba cǝgǝ. O laan ma kaasɩ o wɩ: «Samson! Filisi tiinə bam bɩɩnɩ sɩ ba ja‑m yoo!» Samson dɛɛn ma zaŋɩ o vaŋɩ tɩntʋ o kɔ nɩnɛɛnɩ gar-ŋʋna doŋ tɩn.
13 Delila daa ma ta dɩd-o nɩ: «Nmʋ ta jɩgɩ-nɩ mʋ n gana, yɩ n daarɩ n mwanɩ-nɩ. N bá ta ba na wʋ́ kɩ te ba ja‑m tɩn n brɩ-nɩ na?» O ma lǝr-o o wɩ: «Nii a yuuywe sɩm na panɩ kuni bɩrpɛ te tɩn, sɩ n laan ja-sɩ n kɩ daanɩ n vɔ n kɩ paarɩ yɩra nɩ, nɩnɛɛnɩ ba na dʋlɩ garyi te tɩn. N na kɩ kʋntʋ, amʋ wʋ́ taa bwǝnǝ mʋ nɩnɛɛnɩ nɔɔna maama na yɩ te tɩn.»
14 Delila ma gan‑o pa o dɔ. O ma ja o yuuywe sɩm na panɩ kuni bɩrpɛ tɩn o vɔ o məəli garyi ba na wʋra ba dʋlɩ tɩn yɩra nɩ, yɩ o daarɩ o pa-sɩ dɩ paarɩ. O laan ma kaasɩ o wɩ: «Samson! Filisi tiinə bam bɩɩnɩ sɩ ba ja‑m yoo!» O ma pɛ o zaŋɩ dɔɔm wʋnɩ, yɩ o vaŋɩ paarɩ dɩm o guri. ɡaryi-dʋlʋ kʋm dɩdaanɩ garyi dɩm maama maa wʋ o yɩra nɩ.
15 Kaanɩ wʋm ma ta dɩd-o nɩ: «Nmʋ na tɛ nɩ n soe-nɩ tɩn, bɛɛ mʋ yɩ n wʋ kɩ n wʋʋ dɩdaanɩ amʋ? N ganɩ-nɩ tɩntʋ n kɩ kuni bɩtɔ, yɩ n ta wʋ sɛ sɩ n ta n dam-fɔrɔ kʋm na zɩgɩ mɛ tɩn.»
16 Dɛ maama o ma tiini o jɩgɩ Samson yiǝ o gigilə dɩ taanɩ dɩm kʋntʋ. Samson yɩra ma ba ya cɛ, yɩ o kaagɩ o beeri tʋʋnɩ je. 17 O ma ga kʋ ŋwa yɩ o ta o cɩga kam o brɩ kaanɩ wʋm o wɩ: «Fana ta wʋ goni amʋ yuuywe sɩntʋ. Kʋ zɩgɩ maŋa kalʋ a na wʋ a nu pugə nɩ tɩn mʋ Wɛ pɔɔrɩ-nɩ sɩ a taa yɩ Naziri tu a pa‑o. Ba na fanɩ a yuuywe sɩm, amʋ wʋ́ ga a dam dɩm mʋ, pa a taa bwǝnǝ ywalɩ-ywalɩ nɩnɛɛnɩ nɔɔna maama na yɩ te tɩn.»
18 Delila ma lwarɩ nɩ o tagɩ o cɩga maama mʋ o brɩ-o. O ma tʋŋɩ o bəŋi Filisi yuutiinə bam yɩ o ta dɩ ba o wɩ: «Joori á ba-na, sɩ o laan tagɩ cɩga kam je o brɩ-nɩ.» Nɔɔna bam ma ja o səbu kʋm ba wǝli da ba ba ba pa‑o. 19 O ma ganɩ Samson pa o pəni o nɛ baŋa nɩ o dɔ. O laan ma bəŋi nɔɔnʋ pa kʋ tu ba o fanɩ Samson yuuywe sɩm na panɩ kuni bɩrpɛ tɩn. Delila ma ganɩ Samson pa o ba o ga o dam dɩm. 20 O ma kaasɩ o wɩ: «Samson! Filisi tiinə bam bɩɩnɩ sɩ ba ja‑m yoo!»
O ma pɛ o zaŋɩ dɔɔm wʋnɩ yɩ o sigi o tɩtɩ nɩ o wɩ: «Amʋ wʋ́ vrɩ a tɩtɩ mʋ a yagɩ nɩnɛɛnɩ a na yǝni a maŋɩ a kɩ te tɩn.» O daa wʋ lwarɩ nɩ Baŋa-Wɛ yag-o. 21 Filisi tiinə bam ma ja-o, yɩ ba daarɩ ba pi o yicilbiə ba lɩ. Ba ma ja-o ba vu Gaza tɩʋ wʋnɩ, yɩ ba kwe canna cɩgɩrʋ ba ma lɩ‑o ba zɩgɩ. O dɛɛn na wʋ pɩɩna digə nɩ kʋntʋ tɩn, ba maa jɩg-o ba cʋɩ ba muni. 22 Samson yuuywe sɩm daa ma puli sɩ sɩ taa nuŋǝ.
Samson tʋʋnɩ
23 Filisi yuutiinə bam ma jeeri daanɩ sɩ ba kaanɩ ba jwəm Dagɔn, sɩ ba daarɩ ba di candiə dɩdaanɩ wʋpolo.a Ba maa wɩ: «Dɩ́ wɛ dɩm pɛ dɩ́ jɩŋa zʋ dɩ́ dʋnʋ Samson.» 24 Nɔn-kɔgɔ kʋm maa na nɛ‑o tɩn, mʋ ba sɩŋɩ sɩ ba taa zuli ba wɛ dɩm yɩ ba wɩ:
«Dɩ́ wɛ dɩm pɛ dɩ́ jɩŋa zʋ
dɩ́ dʋnʋ wʋm.
Wʋntʋ ya mʋ cɔgɩ dɩ́ tɩʋ kʋm,
yɩ o gʋ dɩbam zanzan.»
25 Ba na wʋra ba di ywəəni kʋntʋ tɩn, mʋ ba bwɛ daanɩ ba wɩ: «Ja-na Samson á ba yo seeni sɩ o taa kɩ mʋla sɩ dɩ́ taa mwana.» Ba ma ja Samson ba nuŋi pɩɩna digə kam nɩ ba ba ba tee nɩ. O ma sɩɩnɩ o kɩ pa ba mwana. Ba ma pa o zɩgɩ sɔŋɔ kʋm ywə yale tɩtarɩ nɩ. 26 Samson ma ta bu wʋlʋ na jɩg-o o vaŋɩ tɩn o wɩ: «Pa a dwe ywə yalʋ na jɩgɩ sɔŋɔ kʋntʋ ya zɩgɩ tɩn, sɩ a lagɩ sɩ a salɩ ya yɩra nɩ mʋ.»
27 Sɔŋɔ kʋm dɛɛn nan su dɩ nɔɔna mʋ, baara dɩ kaana. Filisi yuutiinə bam maama dɩ maa wʋra. Sɔŋɔ kʋm nayuu nɔɔna bam yɩ mʋrrʋ tɩtɔ mʋ na zɩgɩ ba nii Samson na kɩ te tɩn, yɩ ba kɩ-o ba mwana. 28 Samson ma loori Baŋa-Wɛ o wɩ: «Yuutu Baŋa-Wɛ, guli amʋ gulə, sɩ n joori n pa-nɩ dam bɩdwɩ yɩranɩ. Amʋ Tu Wɛ, pa a daa kɩ kǝm dɩdwɩ a ma mɔ jɩnɩ Filisi tiinə bam baŋa nɩ, dɩ ba na lɩ a yicilbiə bam tɩn.»
29 Samson ma tʋ o gʋrɩgɩ ywə yale yalʋ na jɩgɩ sɔŋɔ kʋm ya zɩgɩ kʋ tɩtarɩ nɩ tɩn. O jazɩm maa jɩgɩ ywe dɩdwɩ: yɩ jagwiə kam dɩ jɩgɩ dɩdɩm dɩm. O laan ma yigi-ya. 30 O ta ma kaasɩ o wɩ: «Yagɩ sɩ amʋ dɩdaanɩ Filisi tiinə bam tɔgɩ daanɩ dɩ́ tɩ.» O ma tiini o yigi sɔŋɔ kʋm ywə yam dɩdaanɩ o dam maama, pa kʋ tʋ kʋ li Filisi yuutiinə bam dɩdaanɩ nɔɔna balʋ maama na wʋ kʋ wʋnɩ tɩn. Kʋ ma pa Samson tʋʋnɩ dɛ nɩ, o na gʋ nɔɔna balʋ tɩn daga ba dwe balʋ o na ŋwɩ yɩ o gʋ tɩn.
31 O cʋrrʋ tɩm dɩdaanɩ ba sɔŋɔ tiinə maama ma ba ba kwe o yɩra yam ba joori sɔŋɔ. Ba ma kɩ-o o ko Manoa yibeeli dɩm nɩ. Zʋra dɩdaanɩ Esatola tɩtarɩ laŋa nɩ mʋ kʋntʋ. O dɛɛn nii Yisɩrayɛlɩ tiinə bam baŋa nɩ bɩna fiinle mʋ.