Samson mɔ o jɩnɩ Filisi tiinə bam yuu nɩ
15
Kʋ dɛɛn na kɩ fɩɩn sɩ kʋ maŋɩ dɩ bəniŋə zagɩm maŋa tɩn, mʋ Samson ve sɩ o kaagɩ o kaanɩ wʋm o nii. O ma ja bʋŋʋ o vu sɩ o pa‑o. O ma ta o kaanɩ wʋm ko o wɩ: «A lagɩ sɩ a zʋ a kaanɩ wʋm digə mʋ.» Kaanɩ wʋm ko maa wʋ sɛ, yɩ o wɩ: 2 «Amʋ ya bʋŋɩ nɩ n daa n ba lagɩ‑o mʋ, pa a kwe‑o a pa n yuudoŋ wʋm. Kaanɩ wʋm nyaanɩ mʋ tɩntʋ, yɩ o maŋɩ o lamma o dwe zɩmbaarʋ wʋm. N na lagɩ‑o, sɩ a kwe a pa‑m.»3 Samson ma ta ba maama o wɩ: «Amʋ laan nɛ cwǝŋǝ sɩ a tʋŋɩ kʋlʋ a na lagɩ tɩn Filisi tiinə bam yɩra nɩ, yɩ kʋ bá taa yɩ a yigə!»
4 Samson ma vu o ja nywənkuri biə-yatɔ (300). O vɔgɩ-sɩ mʋ sɩle sɩle sɩ nabilə yam seeni, yɩ o daarɩ o beeri gaa o vɔ-kʋ o məəli sɩ nabilə yam nɩ. 5 O ma tarɩgɩ mim gaarʋ tɩm wʋnɩ, yɩ o yagɩ nywənkuri sɩm sɩ sɩ duri sɩ zʋ Filisi tiinə bam karɩ sɩm wʋnɩ pa mim dɩm zwɛ ba wʋdiiru tɩm maama. Mɩna yalʋ na bɩgɩ ya ti yɩ ba ta wʋ zagɩ-ya tɩn, dɩ mɩn-poə yam, dɩ vinyə tweeru, dɩ Olivi tweeru tɩm maama mʋ cɔgɩ.
6 Filisi tiinə bam ma bwe daanɩ ba wɩ: «Wɔɔ mʋ kɩ tɩntʋ?» Ba ma ləri ba wɩ: «Samson mʋ tʋŋɩ kʋntʋ. Kʋ nan yɩ Timna tu wʋm na kwe Samson kaanɩ wʋm o pa o yuudoŋ wʋm tɩn ŋwaanɩ mʋ o kɩ kʋntʋ.» Filisi tiinə bam ma vu ba zwɛ kaanɩ wʋm dɩ o ko ba gʋ. 7 Samson ma du durə o wɩ: «Abam na tʋŋɩ tɩtʋŋ-lɔŋɔ kʋntʋ tɩn, amʋ na wʋ mɔɔnɩ a jɩnɩ á yɩra nɩ, a bá yagɩ.» 8 O ma tiini o sɩɩnɩ yiǝ o jeeri-ba dɩ najara, yɩ o gʋ ba zanzan. Kʋ kwaga nɩ mʋ o ve Etam, o vu o zʋʋrɩ piu bɔɔnɩ wʋnɩ.
9 Filisi tiinə bam dɛɛn ma vu ba cwi ba vwə Zuda laŋa nɩ, yɩ ba zaŋɩ najara dɩdaanɩ Lehi tiinə bam. 10 Zuda dwi tiinə bam ma bwe-ba ba wɩ: «Bɛŋwaanɩ mʋ abam tu sɩ á zaŋɩ najara dɩdaanɩ dɩbam?» Ba dɩ ma ləri ba wɩ: «Dɩbam tu sɩ dɩ́ ja Samson mʋ sɩ dɩ́ vu dɩ́ kɩ-o nɩnɛɛnɩ o na kɩ dɩbam te tɩn.»
11 Zuda tiinə bam nɔɔna mʋrrʋ tɩtɔ ma vu piu bɔɔnɩ dɩm na wʋ Etam nɩ tɩn, yɩ ba laan ta Samson ba wɩ: «Nmʋ ye nɩ Filisi tiinə bam mʋ te dɩbam. Bɛɛ mʋ yɩ n kɩ dɩbam kʋntʋ?» O ma ləri o wɩ: «Ba na kɩ-nɩ te tɩn ŋwaanɩ mʋ amʋ dɩ kɩ-ba kʋntʋ.»
12 Nɔɔna bam ma ta ba wɩ: «Dɩ́ nan tu sɩ dɩ́ ja nmʋ dɩ́ kɩ Filisi tiinə bam jɩŋa nɩ mʋ.» Samson ma lǝri-ba o wɩ: «Du-na durə á pa-nɩ nɩ abam tɩtɩ bá gʋ-nɩ.» 13 Ba ma sɛ yɩ ba wɩ: «Dɩbam za laga sɩ dɩ́ vɔ‑m mʋ, dɩ́ laan kwe‑m dɩ́ kɩ ba jɩŋa nɩ, sɩ dɩ bá gʋ-m.»
Ba dɛɛn ma kwe ŋʋn-dwɩ sɩle ba ma vɔ‑o, yɩ ba ja-o ba nuŋi piu bɔɔnɩ dɩm nɩ ba joori ba tɩʋ kʋm. 14 Ba na jaan‑o ba yi Lehi tɩn, mʋ Filisi tiinə bam coosi ba yaga yɩ ba duri ba jeeri sɩ ba joŋ-o. Baŋa-Wɛ Joro kʋm ma tu o baŋa nɩ dɩ dam. Ŋʋnɩ sɩm ma kɔ lɩla nɩnɛɛnɩ mim na tʋ bʋbɔɔrʋ wʋnɩ yɩ kʋ yɩ te tɩn. 15 Samson ma dʋlɩ o yi o na bɩnaga pɩyaa-ku-dʋŋa na tigi daanɩ. O ma twɩ o jɩŋa o kwe-ka o ma o gʋ nɔɔna mʋrʋ. 16 Samsɔn maa seeri sinsərə o wɩ naa:
«A mɛ bɩnaga pɩyaa má mʋ,
bɩnaga tɩtɩ nɩ bɩnɛ sɩdonnə sɩm tɛ,
A ma a gʋ nɔɔna mʋrʋ a tiŋi bwərə bwərə.
Bɩnaga pɩyaa má mʋ a mɛ a gʋ nɔɔna mʋrʋ.»
17 O na ŋɔɔnɩ kʋntʋ o ti tɩn, mʋ o dʋlɩ pɩyaa kuə kam o yagɩ. Ba dɛɛn ma pa je sɩm yɩrɩ wɩ: ‹Ramatɩ-Lehi›a.
18 Samson kǝm dɩntʋ maama kwaga nɩ mʋ na-nyɔm tiini dɩ cɛ-o. O ma keeri o loori Baŋa-Wɛ o wɩ: «Nmʋ mʋ tɔgɩ n tɩntʋŋnʋ baŋa nɩ n di najara yantʋ. N laan nan lagɩ sɩ a tɩ lele mʋ dɩdaanɩ na-nyɔm, sɩ dwi-gɛ tiinə bantʋ ja-nɩ mwalɩ yɩranɩ na?» 19 Baŋa-Wɛ ma pa bɔɔnɩ puri tɩga nɩ, yɩ na ta ba nuŋi pa o nyɔ. O ma joori o na dam.b Lehi nɩ mʋ kʋntʋ kɩa. Ba maa bǝi je sɩm yɩrɩ wɩ: ‹En-Hakorɩ.› Buli-yi dɩm ta wʋ Lehi nɩ dɩdaanɩ zɩm maama.
20 Maŋa kalʋ nɩ Filisi tiinə bam na te tɩga kam tɩn, Samson mʋ nii Yisɩrayɛlɩ tiinə bam baŋa nɩ bɩna fiinle.