Samson kadri taanɩ
14
Dɛ dɩdwɩ mʋ Samson ve Timna. O ma na Filisi tiinə bukɔ dɩdʋa. 2 O dɛɛn ma joori o ta dɩ o ko dɩdaanɩ o nu o wɩ: «Amʋ nɛ bukɔ mʋ Timna nɩ, o na yɩ Filisi tiinə bam bukɔ. Ve-na á da kʋ nɛ á lag-o á pa-nɩ sɩ a ma a kɩ a kaanɩ.»3 O ko dɩdaanɩ o nu ma lǝr-o ba wɩ: «Bukwa mʋ ti nmʋ tɩtɩ dwi tiinə wʋnɩ na? Dɩbam dwi dɩm wʋnɩ nɔɔn-nɔɔnʋ mʋ tǝrǝ o na su nmʋ yi pa n ma n ve Filisi tiinə bantʋ na yɩ dwi-gɛ tɩn tɩtarɩ nɩ sɩ n beeri n kaanɩ na?» Samson ta ma fɩn o ko yɩ o wɩ: «Kaanɩ wʋm kʋntʋ mʋ amʋ wʋbʋŋa tɔga. Ve n so‑o n pa-nɩ.»
4 O ko dɩdaanɩ o nu maa yǝri nɩ Baŋa-Wɛ tɔgɩ cwǝŋǝ kantʋ mʋ sɩ o na pwələ o ma o ciŋi najara dɩ Filisi tiinə bam. Ka maŋa nɩ, Filisi tiinə bam dɛɛn di dam Yisɩrayɛlɩ tiinə baŋa nɩ mʋ.
5 Samson dɩdaanɩ o ko dɩ o nu ma vu Timna. Ba maa wʋ cwǝŋǝ nɩ ba twɛ vinyə tweeru karɩ sɩm na wʋ tɩʋ kʋm pwələ nɩ tɩn. Nyoŋ-pwala ma da ka nuŋi ka jeeri Samson yɩ ka suuri. 6 Baŋa-Wɛ Joro ma tu o baŋa nɩ dɩdaanɩ dam, yɩ o kwe o jɩ-bwəri yɩranɩ o ma o tʋrɩ nyoŋo kʋm nɩnɛɛnɩ kʋ yɩ bʋbʋna mʋ tɩn. O nan wʋ tagɩ kʋlʋ o na kɩ tɩn o brɩ o ko dɩdaanɩ o nu. 7 O ma vu tɩʋ wʋ pa o dɩ kaanɩ wʋm larɩ daanɩ. Samson wʋʋ ma da kaanɩ wʋm zanzan.
8 Kʋ na kɩ da fɩnfɩɩn tɩn, Samson ma joori o vu sɩ o laan di o kaanɩ wʋm. O na yi mɛ o ya na gʋ nyoŋo kʋm tɩn, o ma ywəri sɩ o nii kʋ yɩ tɩta mʋ. O ma maanɩ nɩ twɩ mʋ zʋ nyoŋ-tɩkʋ kʋm wʋnɩ, yɩ sɩ kɩ tʋʋrʋ. 9 O ma lɔɔnɩ tʋʋrʋ tɩm, yɩ o di-tɩ o maa kɛa. O na yi o ko dɩ o nu te tɩn, mʋ o pɛ-ba tʋʋrʋ tɩm yɩ ba dɩ di. O maa wʋ tagɩ o brɩ-ba nɩ tɩ nuŋi nyoŋ-tɩkʋ yɩra nɩ mʋ.
10 Samson ko ma vu Timna sɩ ba kɩ kadri dɩm. Samson ma kɩ candiə, nɩ nɔn-dʋnnʋ dɛɛn na yǝni ba kɩ kadri ŋwaanɩ te tɩn. 11 Filisi tiinə bam na nɛ‑o tɩn, mʋ ba pɛ‑o ba nɔn-dʋnnʋ fiintɔ sɩ ba taa wʋ o tee nɩ.
12 Samson ma ta nɔn-dʋnnʋ tɩm o wɩ: «Cəgi-na bɩtar-dɩndɩa kantʋ a na lagɩ a ta tɩn. Amʋ wʋ́ pa abam da yarpɛ sɩ á ma á lwarɩ-ka, sɩ candiə kam laan ti. Á na lwarɩ ka kuri, amʋ wʋ́ pa abam gar-fɩfalɩ fiintɔ, dɩdaanɩ gwar-laarʋ fiintɔ. 13 Abam nan na wʋ lwarɩ dɩndɩa kam kuri, abam mʋ wʋ́ pa-nɩ gar-fɩfalɩ fiintɔ dɩdaanɩ gwar-laarʋ fiintɔ tɩm.» Ba ma ləri o taanɩ dɩm ba wɩ: «Dɩ́ sɛ. Ta n dɩndɩa kam sɩ dɩ́ cəgi.»
14 O ma ta dɩ ba o wɩ:
«Wʋdiu mʋ nuŋi diru yɩra nɩ pa a di,
Wo-sʋnnʋ dɩ ma nuŋi dɩdɛɛrʋ wʋm yɩra nɩ.»
Da yatɔ maama mʋ nɔɔna bam jaŋɩ dɩdaanɩ bɩtar-dɩndɩa kam, yɩ ba wʋ lwarɩ ka kuri.
15 Da yana dɛ dɩm nɩ mʋ ba tagɩ Samson kaanɩ wʋm ba wɩ: «Sʋgɩ n barʋ wʋm sɩ o ta dɩndɩa kam kuri o brɩ dɩbam. Kʋ na daɩ kʋntʋ, dɩ́ lagɩ dɩ́ zwɛ nmʋ dɩdaanɩ n ko sɔŋɔ tiinə maama mʋ dɩ́ gʋ. Abam na bəŋi dɩbam sɩ dɩ́ ba yo seeni tɩn, kʋ yɩ sɩ á vrɩ dɩbam mʋ na?»
16 Samson kaanɩ wʋm ma kan yi-na o yigə nɩ yɩ o wɩ: «A maanɩ nɩ n ba lagɩ amʋ lanyɩranɩ. N dɩ dɩndɩa mʋ n pa a ko sɔŋɔ tiinə bam yɩ n laan wʋ tagɩ ka kuri n brɩ-nɩ.» O dɩ ma ləri kaanɩ wʋm o wɩ: «Ta n ye nɩ amʋ maŋɩ a wʋ tagɩ taanɩ dɩntʋ a brɩ a ko dɩdaanɩ a nu. Bɛɛ mʋ wʋ́ taa te sɩ a ta dɩ kuri a brɩ-m?»
17 Da yarpɛ maama wʋnɩ mʋ kaanɩ wʋm yɔɔrɩ o keeri Samson yigə nɩ. Candiə kam da yarpɛ yam maama wʋnɩ kaanɩ wʋm kanɩ yi-na kʋntʋ mʋ yɩ o keeri Samson yigə nɩ. O na bilis‑o kʋntʋ yɩ da yarpɛ dɛ dɩm yi tɩn, Samson ma ta dɩndɩa kam kuri o brɩ-o. O dɩ ma vu o maŋɩ-dɩ o brɩ nɔn-dʋnnʋ tɩm.
18 Wɩa na lagɩ ka zʋ da yarpɛ dɛ dɩm nɩ tɩn, mʋ tɩʋ kʋm nɔɔna bam tagɩ Samson ba wɩ:
«Bɛ daa mʋ sʋna kʋ dwe tʋʋrʋ?
Bɛ nan daa mʋ dana kʋ dwe nyoŋo?»
Samson ma lǝri-ba o wɩ:
«Abam ya na wʋ jaanɩ amʋ nacwɛn dɩm á ma á va,
Abam ya bá lwarɩ a dɩndɩa kam kuri.»
19 Baŋa-Wɛ Joro ma tu Samson baŋa nɩ dɩdaanɩ dam. O ma zaŋɩ o vu Asekelon o gʋ tɩʋ kʋm kʋntʋ nɔɔna fiintɔ. O daa ta vrɩ ba jɩjɩgɩrʋ mʋ yɩ o daarɩ o kwe ba gwar-ŋʋnnʋ tɩm o pa balʋ na lwarɩ o bɩtar-dɩndɩa kam kuri tɩn. O ma joori o vu o ko sɔŋɔ yɩ o banɩ ta wʋ zuri.
20 Ba dɛɛn ma kwe Samson kaanɩ wʋm ba pa nɔn-dʋŋʋ kʋm na jigi o ciloŋ kadri maŋa kam nɩ tɩn.