Samson lʋra taanɩ
13
Yisɩrayɛlɩ tiinə bam dɛɛn daa ma tʋŋɩ lwarɩm ba cɔgɩ Baŋa-Wɛ yigə. Baŋa-Wɛ ma pa cwǝŋǝ sɩ Filisi tiinə bam di-ba, yɩ ba pa kʋ zʋ ba yɩra bɩna fiinna.2 Nɔɔnʋ wʋdoŋ dɛɛn mʋ wʋra, o yɩrɩ mʋ Manoa. O maa yɩ Dan dwi tu yɩ o zʋʋrɩ Zʋra tɩʋ nɩ. O ya jɩgɩ kaanɩ o na yɩ ka-dʋgʋ tɩn mʋ. 3 Baŋa-Wɛ malɛka kam ma vu kaanɩ wʋm te ka ta ka wɩ: «Kʋ sɩɩnɩ kʋ yɩ cɩga nɩ n wʋ lʋgɩ bu. Kʋ nan bá daanɩ n lagɩ n kwe pugə mʋ n lʋ bəkərə. 4 Nan lwarɩ nɩ n ba maŋɩ sɩ n nyɔ sa-dɛɛra, naa sɩ n di wʋdi-yɔɔrʋ tɩlʋ na culi tɩn. 5 Nmʋ wʋ́ ja pugə n lʋ n bu wʋm kʋntʋ. O lʋra kam kwaga nɩ kʋ ba maŋɩ sɩ fana goni o yuuywe sɩm. Bɛŋwaanɩ o biini maŋa nɩ sɩ kʋ taa veǝ, bu wʋm maŋɩ sɩ n pɔɔr‑o mʋ n kɩ Wɛ jɩŋa nɩ sɩ o taa yɩ Naziri tu. Wʋntʋ mʋ lagɩ o sɩŋɩ sɩ o joŋi Yisɩrayɛlɩ tiinə bam o yagɩ Filisi tiinə bam jɩŋa nɩ.»a
6 Kaanɩ wʋm ma vu o ta o barʋ o wɩ: «Wɛ nɔɔnʋ dɩdʋa mʋ tu amʋ te. O nyɩnyʋgʋ kʋm ya tiini kʋ jɩgɩ fʋʋnɩ, nɩnɛɛnɩ Baŋa-Wɛ malɛka nyɩnyʋgʋ na yɩ te tɩn. Amʋ wʋ bwe‑o sɩ a lwarɩ o na nuŋi mɛ tɩn, o dɩ nan wʋ tagɩ o yɩrɩ o brɩ-nɩ. 7 Nɔɔnʋ wʋm ma ta o brɩ-nɩ nɩ: a lagɩ a ja pugə a lʋ bəkərə mʋ. Kʋntʋ ŋwaanɩ a ba maŋɩ sɩ a nyɔ sa-dɛɛra naa a di wʋdi-yɔɔrʋ tɩlʋ na culi tɩn. Bɛŋwaanɩ bu wʋm wʋ́ taa yɩ Naziri tu na yɩ o yɩra mʋ Wɛ ŋwaanɩ, kʋ zɩgɩ o biini nɩ sɩ kʋ taa nii o tʋʋnɩ maŋa.»
8 Manoa dɛɛn ma loori Baŋa-Wɛ o wɩ: «Amʋ Yuutu, popo! Pa Wɛ tɩntʋŋnʋ wʋlʋ n na tʋŋɩ dɩbam tee nɩ tɩn joori o ba, sɩ o brɩ dɩbam dɩ́ na wʋ́ kɩ te dɩ́ nii bu wʋntʋ baŋa nɩ lanyɩranɩ tɩn.»
9 Wɛ ma sɛ Manoa wɛ-loro kʋm. O kaanɩ wʋm je pwələ nɩ mʋ yɩ Wɛ malɛka kam joori ka ba o te yɩ Manoa ya tǝrǝ. 10 Kaanɩ wʋm ma duri lɩla o vu o ta o barʋ wʋm o wɩ: «Nɔɔnʋ wʋlʋ ya na tu a tee nɩ tɩn daa joori o ba!»
11 Manoa ma zaŋɩ o da o kaanɩ wʋm kwaga. Ba na yi nɔɔnʋ wʋm te tɩn, mʋ Manoa bwe‑o o wɩ: «Nmʋ mʋ yɩ nɔɔnʋ wʋlʋ ya na ŋɔɔnɩ dɩdaanɩ amʋ kaanɩ tɩn na?» O dɩ ma ləri o wɩ: «Ɛɛn!»
12 Manoa laan ma bwe‑o o wɩ: «Nmʋ taanɩ dɩm nan na sɩɩnɩ kʋ kɩ, bu wʋm kʋntʋ ŋwɩa dɩdaanɩ o tɩtʋŋa wʋ́ taa yɩ tɛ mʋ?» 13 Malɛka kam ma ləri ka wɩ: «Kʋ maŋɩ sɩ n kaanɩ wʋm kwe kʋlʋ maama a na tagɩ a brɩ-o tɩn mʋ o kɩ o bɩcarɩ nɩ. 14 Wʋntʋ tɩtɩ ba maŋɩ sɩ o di woŋo kʋlʋ maama na nuŋi vinyə tiu yɩra nɩ tɩn. O ta ba maŋɩ sɩ o nyɔ sa-dɛɛra, naa o di wo-yɔɔrʋ tɩlʋ na culi tɩn. O yɔɔrɩ o maŋɩ sɩ o kɩ o tɔgɩ kʋlʋ maama a na brɩ-o tɩn mʋ.»
15-16 Manoa dɛɛn wʋ lwarɩ nɩ nɔɔnʋ wʋm yɩ Baŋa-Wɛ malɛka kam mʋ. O ma ta malɛka kam o wɩ: «Zuri n yɩra kʋntʋ sɩ dɩ́ beeri bʋŋʋ dɩ́ ma dɩ́ kɩ na dɩ́ pa‑m.» Baŋa-Wɛ malɛka kam ma lǝr-o ka wɩ: «Abam na maŋɩ á wʋ pɛ-nɩ cwǝŋǝ sɩ a viiri, a ta bá di á wʋdiu kʋm. Á nan na jɩgɩ bʋŋʋ, sɩ á ja-kʋ á zwɛ á kɩ kaanɩm á pa Baŋa-Wɛ.»
17 Manoa daa ma ta Baŋa-Wɛ malɛka kam o wɩ: «Nmʋ yɩrɩ nan mʋ yɩ bɛ? Sɩ n taanɩ dɩm na sɩɩnɩ kʋ kɩ sɩ dɩbam dɩ wanɩ dɩ́ kɩ-m zulə.» 18 Baŋa-Wɛ malɛka kam ma lǝr-o ka wɩ: «Bɛŋwaanɩ mʋ yɩ n bwe a yɩrɩ dɩm bwiə? Dɩ tiini dɩ yɩ yɩrɩ-kɩnkagɩlɩ mʋ.»b
19 Manoa ma ja bʋŋʋ o wǝli dɩ wʋdiu pɛɛrɩ. O laan ma kwe-tɩ o tiŋi piu baŋa nɩ o kaanɩ o pa Baŋa-Wɛ. Baŋa-Wɛ ma kɩ wo-kɩnkagɩlɩ yɩ Manoa dɩdaanɩ o kaanɩ wʋm zɩgɩ ba niə. 20 Min-vʋgʋ kʋm na zɩgɩ piu bimbim dɩm nɩ dɩ jaanɩ dɩ diini Wɛ tɩn, mʋ Baŋa-Wɛ malɛka kam tɔgɩ dɩ mim dɩm ka din. Manoa dɩ o kaanɩ wʋm na nɛ kʋntʋ tɩn, mʋ ba vin ba yibiyə tɩga nɩ. 21 Baŋa-Wɛ malɛka kam daa maa wʋ joori Manoa dɩdaanɩ o kaanɩ wʋm tee nɩ. Kʋ ma pa Manoa lwarɩ nɩ nɔɔnʋ wʋlʋ na tu ba te tɩn yɩ Baŋa-Wɛ malɛka mʋ.
22 Manoa ma ta o kaanɩ wʋm o wɩ: «Kʋ zɩgɩ kʋ nii mʋ nɩ dɩbam lagɩ dɩ́ tɩ mʋ, bɛŋwaanɩ dɩ́ nɛ Wɛ yibiyə!» 23 O kaanɩ wʋm ma lǝr-o o wɩ: «Baŋa-Wɛ wʋbʋŋa ya na yɩ sɩ DƖ gʋ dɩbam, DƖ ya bá joŋi zwɛɛm pɛɛrɩ dɩdaanɩ wʋdiu pɛɛrɩ dɩ́ tee nɩ. DƖ nan ya ta bá brɩ dɩbam wo-kɩnkagɩla yantʋ, naa DƖ ŋɔɔnɩ wǝǝnu tɩntʋ dɩdaanɩ dɩbam.»